Read Termanu MARKUS 4 Bible Online

MARKUS 4 - Termanu bible

MARKUS 4

¹ Yesus nanoli seluk nai Dano Galilea su'u na. Hataholi makadotok nanseli lakamomotu lan. Hu ndia de neu nangatuuk neu ofak esa lain nai dano dale, ma hataholi makadotok sila la lapadeik lai dano su'u na.

²Boema Yesus nanolis dede'ak ba'u ka ninik nakandandaak nae leo ia.

³“Mamanene ha! Hapu hataholi manatao tina-osi esa neu sele-nggali bini-ngges.

⁴Lelek fo ana sele-nggali boema, hapu bini-ngges nggelok tu'da lai enok lain. Boema manupui la mai de la'aheni bini-ngges sila la.

⁵Hapu nggelok tu'da lai mamana mabatuk lain, de dae isi na ka'da faa anak. Bini-ngges sila la ala moli no lai-laik, nana dae isi na ta ba'u ka fa,

⁶tehu nai lelek fo le'do namatetu boema, nupu nala male, basa boema lamatuu de mates, nanahu oka nala ta tola dema ka fa.

⁷Hapu bini-ngges nggelok tu'da lai makatema dila-nggauk tala'da. Boema makatema dila-nggauk sila la ala moli de lakahapi la nupuk sila la de ta labuna-laboa fa.

⁸Tehu hapu bini ngges nggelok tu'da lai dae maoe-maisik lain boe. Bini-ngges sila la moli no malole, de lamatua boema labuna-laboa, de hapu nggelok teluhulu, hapu nggelok neehulu, ma hapu nggelok didikuk la'i natun esa.”

⁹Yesus tui basa nakandandaak ndia boema nae, “Emi madi'idok soona, mamanene leona!”

¹⁰Lelek fo Yesus mesa-mesa kana boema, hataholi mana mamanene basa nanoli na, ala mai sama-sama lo ana mana tunga kasanahulu dua nala. Ala loken fo nafa'da mangalele'do nakandandaak ndia sosoa-ndandaan.

¹¹Boema Yesus nafa'das nae, Manetualain fe basa emi baba'e-babati malole fo ela emi bubuluk bibila babaak la'eneu “Manetualain paleta tao leo beek. Tehu nanoli hataholi dea kala soona, Ana pake nakandandaak,

¹² fo ela ‘Ala taoafik lakandoo, tehu ala ta bubuluk hata fo ana dadi fa, neukose lamanene lakandoo, tehu ta lalelak fa, dede'ak ia ana dadi, fo ela ala boso lita ma lalelak, ma ala boso mai leo Manetualain mai, fo Manetualain fes do'o do ampon.’ ”

¹³Basa boema Yesus nafa'das nae, “Makanaema emi ta malelak nakandandaak ndia sosoa-ndandaan fa soona, tao leo beek fo emi hapu malelak nakandandaa fe'e kala?

¹⁴Manasele-nggali ndia nde bee na, nde hataholi manatui-benga halak maneme Manetualai na mai.

¹⁵Bini-ngges fo manatu'da nai enok lai na, nakasasama na nde hataholi fo lamanene halak la'eneu Manetualain paleta tao leo bee ka. Tehu lamanenen tutika Nitu mai de ana ho'i-na hata fo nanasele-nggali basak sila la leme dale nala dalek mai.

¹⁶Bini-ngges fo manatu'da nai mamana mabatuk lai na, nakasasama na nde hataholi fo lamanene halak ndia tutika ala sipo kana no dale namahokok.

¹⁷Tehu halak ndia ta nahuu-naoka nai dale nala dalek fa, de nalosa ta lakatatakak losa doo ka fa. Leondiak ala hapu toto'a-tataak do fefepa-lili'uk nanahu halak ndia, tutika ala fali deak.

¹⁸Bini-ngges fo manatu'da nai makatema dila-nggau ka tala'da ndia, nakasasama na nde hataholi fo lamanene halak ndia,

¹⁹tehu dale nala laba'e la'eneu so'da nala, ma ala hii ka'da laso'da nai hahapu-dadai manadai lena ka dalek. Hihii-nanau manadai lenak soaneu dede'a mata-mata kala masok leo dale nala dalek neu. Hu ndia de, lakahapi la halak maneme Manetualain mai nai dale nala dalek, nalosak ta labuna-laboa fa.

²⁰Ma bini-ngges fo manatu'da nai dae maoe-maisik lain ndia, nakasasama na nde hataholi fo lamanene halak ndia boema ala sipo kana, de labuna-laboa ba'u ka, nalosa hapu nggelok teluhulu, hapu nggelok nehulu, ma hapu nggelok buna-boan didikuk la'i natun esa.”

²¹ Boema Yesus kokolak nakandoo nae, “Ade emi mita hai hataholi de'de na banu ka soona, ana tatana ketun ninik lepeneu, do ana pedan neu pepe'u ka dae do? Tao leo bee o ta hetu. Tao leo bee o ana tao banuk ndia neu mamana banuk lain.

²² Ta hapu nafuni na hata esa boen, nana neukose nananitak; ma ta hapu bibila-babaa na hata esa boen, nana neukose nanabubuluk.

²³Hu ndia de makanaema see madi'idok soona, mamanene leona!”

²⁴ Boema Yesus kokolak seluk nae, “Taoafik neu hata fo emi mamanenek ia! Uuku-dodouk fo emi paken soaneu uku-dou hataholi fe'e ka, neukose Manetualain pake uuku-dodouk ndia boe, fo Ana uku-dou emi. Ma uuku-douk ndia ba'ulena seluk bai.

²⁵ Nanahu hataholi manamanuu basa ka, neukose nanafe lenak ba'u ka seluk bai; tehu hataholi nuu ta ka, metema bei nanuu faa anak soona, neukose nanaho'i falik boe.”

²⁶Yesus tuti kokola na seluk nae, “Makanaema Manetualain paleta sama leo Mane ka soona, heheo-hihilun hapu nakandandaa kana ninik hataholi esa sele-nggali bini-ngges nai tina.

²⁷Nai fai le'odae na ana sungu; boema nai fai lele'do na ana fo'a. Tehu bini-ngges sila la moli lakandoo, fo lamatua-lamadema. Naa, eno na tao leo beek fo bini-ngges sila la ala moli ma lamatua, hataholi ndia ta bubuluk fa.

²⁸Dae ndia nde tao na bini ngges sila la labuna-laboa, makasososa na ndana na, basa soona pule na, fo besa ka boa na.

²⁹ Ma makanaema gandum ndia namatasa-namalatu soona, neukose hataholi ndia mulai ketu-kolu leona, nanahu fai na losa so.”

³⁰Boema Yesus natane seluk nae, “Makanaema Manetualain paleta soona, ita takasasama kana no bee ka? Ta'du-tana bee ka nde ita paken fo tafa'da mangalele'don?

³¹Makanaema Manetualain paleta soona, heheo-hihilun sama leo nakandandaak ia: Hataholi esa ho'i na ai sawi de'ek esa fo ana selen leo dae dale neu. Ai de'e sawi ndia nde bee na, bini ngge kome'do ana nai daebafa ka.

³²Tehu makanaema ana moli soona, ana dadi ai matuaina nai ai nanasele kala tala'da. Ndana nala eloaka, de nalosa manupui la mai fo landunu lai lain.”

³³Yesus nanoli hataholi la ninik nakandandaak leondiak ba'u ka, fo nandaa no hataholi sila la malela na.

³⁴Makanaema Yesus nanoli hataholi sila la soona, nanoli ninik nakandandaak nakandoo. Tehu makanaema no ana mana tunga nala mesa kasa soona, nafada basa sila la no mangalele'dok.

³⁵Le'donosok ndia boe, Yesus nafa'da ana mana tunga nala nae, “Mai fo ata sa'e ofak leo dano selik teu.”

³⁶Boema Yesus sa'e leo ofak lain neu ma ana mana tunga nala la'oela hataholi makadotok sila la leme dano su'u na, de ala kae leo ofak lain leu boe. Ofa fe'e kala lai ndia boe. Basa boema Yesus no ana mana tunga nala mulai lofa laa neu.

³⁷Dodoo faa boema, ani matuaina mai. Lii la mulai puka ofa ka de oe masok leo dalek neu, nalosa oe a hihii nae henu ofa ka.

³⁸Ndia te Yesus kailungu-kailungu esa de Ana sungu nai ofa bui. Boema ana mana tunga nala leu fafae lafo'an de lafa'dan lae, “Ama Mesen, ade ita soe nde ia so, tehu Ama ta nafaduli fa?”

³⁹Yesus fo'a boema nasapala anina, ma dano ndia nae, “Makamate leona!” No besak ndia boe, ani na nakamate, ma dano nee-nee lino-lino.

⁴⁰Boema Yesus nafa'da ana mana tunga nala nae, “Tao le'e de emi bii? Tao le'e de emi ta mamahele Au fa?”

⁴¹Boema ala bii ma esa nafa'da esa nae, “Tunga ndo na see hataholi ia, de nalosa ani lii tunga paleta na.”