Read Termanu MARKUS 5 Bible Online

MARKUS 5 - Termanu bible

MARKUS 5

¹Makabui na, Yesus no ana mana tunga nala losa Dano Galilea selik, fo nai nusa Garasa.

²Yesus bei kona neme ofak lain mai tutika, touk esa kalua neme lea-luak manai late sala dalek mai.

³Hataholi ndia, dula dale mangalau ka koasa nan, de ana leo ka'da nai late sala. Ala ta hapu pa'a lala fan; leomae ala pa'a lini kana namosina boe.

⁴Nasi'a ei liman nanalangek, tehu ana tao naketuheni namosina sila la tataas esa, ma besi manai ei na, ana tao nala'dis. Hataholi ndia balakai na seli, nalosa hataholi ta hapu ta'da nala fan.

⁵Lele'do le'odaen naleu-nalaak nai late sala, ma nai pupuku kala, boema ana nggasi ma ana tao nahina ao na ninik batu.

⁶Lelek bei nai doo ka te nita Yesus mai de nalai neu, boema ana senek neu Yesus mata na.

⁷Ana nggasi napane'e nae, “Yesus, Fo Manetualain Mademaina Ana na! O sanga tao au le'e ia? No Manetualain na'de na, au dokodoe fo boso tao doidoso au!”

⁸Hataholi ndia kokolak nae leondia nana Yesus nafa'dan nae, “Dula dale mangalau ko nei, kalua meme hataholi ia dalek mai leona!”

⁹Boema Yesus natanen nae, “O na'de see?” Hataholi ndia nataa nae, “Au na'de ‘Legiun’, nanahu ami makadotok nanseli!”

¹⁰Hataholi ndia noke fali-fali neu Yesus, fo daenga boso nadenu dula dale mangalauk sila la kalua leme nusak ndia mai.

¹¹Ndia te bafi makadotok totofi sanga nana'ak nai pupuku ka huu na.

¹²Boema dula dale mangalauk sila la dokodoe neu Yesus lae, “Madenu ami meu leo bafi sila la dalek meu.”

¹³Boema Yesus nakaheik. Dadi, dula dale mangalauk sila la kalua leme hataholi ndia mai de ala masok leo bafi sila la dalek leu. Bafi sila la lala'ena lalai de ala tee leme fela ka su'u na leo dano dale leu boema ala bolo. Bafi sila la basa-basas lala'ena, fafakama bafi lifun dua.

¹⁴Boema hataholi manamanea bafi sila la lalai de leu lafa'da manda'dik ndia neu hataholi manai kota no nggolo titia-tatai nala. Boema hataholi la mai fo ala sanga mete manda'dik beek ndia.

¹⁵Ala mai tutika lakandoo leo Yesus leu, boema lita hataholi fo na'ka sa dula dale mangalau ka nai aon dale ndia, bei nangatuuk nai ndia. Ana pake bua-lo'as so, ma dudu'a na boeo namaneu so. Boema basa-basas ala bii beno'u.

¹⁶Hataholi manita matan manda'dik ndia, ala tui manda'dik ndia neu basa hataholi la.

¹⁷Boema nusak ndia hataholi nala loke fo, Yesus la'oela nusak ndia.

¹⁸Lelek fo Yesus sa'e nala ofak lain boema, hataholi fo na'ka sa dula dale mangalau ka nai aon dale ndia noke Yesus, fo ana tunga Yesus.

¹⁹Tehu Yesus ta nakaheik fa de nafa'dan nae, “Fali leona, fo mafa'da o tolanoo ka'a-fa'di mala, hata fo Lamatua ka tao no'i basan neu o so, ma mafa'das, Lamatua ka dale malolen soaneu o a!”

²⁰Boema hataholi ndia ana la'o leona, de ana mulai tui nai kota esa na'de, Kota Sanahulu, hata fo Yesus tao basan soaneu ndia. Basa hataholi la lamanene boema, ala dodoo doak ana.

²¹Yesus fali seluk leo dano selik neu boema, hataholi makadotok ala mai de lakamomotu lan neme boboa kaisun mai.

²²Hataholi esa na'de Yairus ana mai. Hataholi ndia mauli-malangan nai uma mamasok manai kota ndia. Lelek fo nita Yesus boema, ana sene neu mata na,

²³de noke nanseli nae, “Ama, au anafe'o nga namahe'di belak. Ama sue na, mu fo mafaloen fo ana lea-hai, fo daenga boso maten!”

²⁴Boema Yesus neu sama-sama no Yairus. Hataholi makadoto kala tungan de lakaseseti Yesus neme basa boboa-kaisun nala mai.

²⁵Nai hataholi makadotok sila la tala'da, hapu inak esa namahe'di po'a daak teuk sanahulu dua so. He'dis ndia bei natutik no he'di bula na.

²⁶Nase'o basa hata-heto nala fo ana bae dote la, tehu dotel sila la esa boeo ta hapu tao nahai fan. Te he'di na boetai namabela nakandoo.

²⁷Inak ndia namanene tutuik ba'u ka la'eneu Yesus so. Boema inak ia si'da esa-esa no hataholi makadotok sila la de neu deka no Yesus neme dea mai,

²⁸nanahu ana dodoo nai dalen dale nae, “Sa'di au taila'e ka'da ba'du manalu na boeo, neukose au lea-hai!”

²⁹Neu de ana taila'e Yesus ba'du manalu na boema, no hatematak ndia boe, po'a daa na nate'e tutik. Name'da nana ana hai so.

³⁰Nai hatematak ndia boeo, Yesus name'da balakai na kalua neme aoinan dale mai. Boema Ana lipa leo hataholi makadotok sila la neu de natanes nae, “See ka nde taila'e Au ba'du manalu nga?”

³¹Boema ana mana tungan nala lafa'dan lae, “Ama mita matam hataholi de'u-de'u basa ia la lakaseseti. Ma Ama bei natane nae, see ka nde taila'e Ama?”

³²Tehu Yesus ka'da mete nakandoo leo boboa kaisun neu.

³³Inak ndia bubuluk basa, hata manda'dik neu aoina na so, boema no dedelek ma bibiik, ana senek neu Yesus mata na, de ana manaku ndia tatao-nono'in.

³⁴Boema Yesus nafa'dan nae, “Ana ngonei, hu ka nde o mamahele Au de o lea-hai! Mu'u ma no so'da-molek leona. Te o lea-hai makandoo so!”

³⁵Yesus bei kola-kola te, ladenu hataholi de'ubee leme Yairus uman mai de lafa'da Yairus lae, “Tuan, Tuan anafe'o na maten so, de tuan boso boe tao susa seluk Ama Mesen bai.”

³⁶Tehu Yesus ta taoafik neu hataholi sila la hala nafafa'dan ndia fa, de nafa'da Yairus nae, “Boso bii, te ka'da mamahele!”

³⁷Boema Yesus la'ok nakandoo, tehu Ana ta nau hataholi tunga fan de no ka'da Petrus ma Yakobis boema Yohanis fo sila tolanoo kala.

³⁸Lelek fo ala losa Yairus uman boema Yesus mete te nai uma, seek see doto-doto, ma lamanene kikii-makaleleu matuaina.

³⁹Boema Yesus nakandoo leo uma dale neu de nafa'das nae, “Tao le'e de emi makalupu manseli ma emi kii makaleleu? Ni'iana ndia ta mate fan; te ka'da ana sungu ndia!”

⁴⁰Tehu ala hika Yesus. Boema nadenu basa-basas kalua leo deak leu de no ni'iana ndia ina aman, ma ana mana tunga katelu nala masok leo ni'iana ndia kaman dale leu.

⁴¹Lala dalek boema Yesus ho'u na ni'iana ndia lima na de nafa'dan nae, “Talita kum,” fo sosoa na nae, “Ana inaana konei, Au afa'da neu o, fo'a leona!”

⁴²No hatematak ndia boe, ni'iana inaanak ndia ana fo'a de ana la'ok. Inaanak ndia teuk sanahulu dua so. Basa hataholi manita matan manda'dik ndia, ala dodoo doa kana lanseli!

⁴³Tehu Yesus kena ka'is no mahelek, fo ala boso tui-benga dede'ak ndia neu su'di see a boen. Boema nafa'das nae, “Fe ni'iana ndia na'a-ninu leona.”