Read Termanu MARKUS 8 Bible Online

MARKUS 8 - Termanu bible

MARKUS 8

¹Basa de, beita doo ka boen te hapu seluk hataholi makadotok bubuak esa, ala mai de lakabubua. Nana hataholi sila la nana'an ta. Boema Yesus nalo na ana mana tunga nala de nafa'das nae,

²“Au dale nga tu'da neu hataholi makadotok ia la. Faik telu dale na, hataholi sila la sama-sama lo Au, de besak ia basa nana'a nala so.

³Makanaema Au adenus ala fali no tei lou nala soona, neukose ala sapala'o lai eno tala'dak. Lena-lenak nai hataholi sila la dalek, hapu hataholi nggelok ala mai leme dae dook mai.”

⁴Boema Yesus ana mana tunga nala lae, “Mamanak ia mamana mana pasife'ek, de hataholi a hapu asa nana'ak nai bee fo dai basa hataholi ia la?”

⁵Yesus natanes nae, “Emi mini loti de'ubee nai ndia?” Boema lae, “Loti hitu.”

⁶Boema Yesus nadenu hataholi makadotok sila la langatuuk leu dae lain. Boema Ana ho'i na loti kahituk sila la de noke makasi neu Manetualain. Basa boema, Ana tete'i loti sila la de Ana fen leo ana mana tunga nala neu fo ala baba'e fe hataholi sila la. Boema ana mana tunga nala tao tunga Yesus paletan ndia.

⁷Lini i'a lutuk boak de'ubee boe. Yesus noke makasi neu Manetualain neu i'ak sila la boema, nadenu ana mana tunga nala fo ala baba'e fe hataholi la i'ak sila la boe.

⁸Ala la'a losa lakabete. Hataholi mana'a kala, fafa'kama hataholi lifun ha. Basa boema, Yesus ana mana tunga nala hehele lakabubualala nana'aela kala lepeneu henuk hitu. Boema Yesus nadenu hataholi sila la fo ala fali le'us leona,

¹⁰ma no ana mana tunga nala sa'e ofak tutik de leu leo nusa Dalmanuta leu.

¹¹ Hataholi Farisi de'ubee leu leo Yesus leu de ala mulai lale'a lon, fo ala sanga lakahihi'i kana. Loke Yesus tao manda'di beuk, fo ana da'di ta'du-tana esa nae, Ana mai neme Manetualain mai.

¹² Yesus hela hahae na boema nae, “Hu beek de hataholi besak ia la loke Au tao manda'di beuk? Ta! Neukose Au ta fes ta'du tana matak leondia ka fa!”

¹³Boema Yesus la'oelas de neu leo ofak dale neu. Basa boema neu leo dano selik neu.

¹⁴Yesus ana mana tunga nala lafandelehenin de ta lini loti dai fa. Lini ka'da loti esa nai ofak lain.

¹⁵ Yesus nafa'das nae, “I'akouk hataholi Farisi la lo Herodes lalu tei na.”

¹⁶Boema ana mana tunga nala mulai lakokolaaok la'eneu dede'ak ndia. Bekola lae, “Ana kokolak nae leondia nana, ita lotin ta do.”

¹⁷Yesus bubuluk hata fo sila latataneao ka. Hu ndia de natanes nae, “Tao le'e de emi matataneaok la'eneu loti ta? Ade emi ta bubuluk ma emi beita malelak boen do? Tao le'e de, emi dudu'a-aafim ana pa'a tao leondiak?

¹⁸ Emi manuu matak, ma tao le'e de emi ta mita fa? Emi manuu di'idook, ma tao le'e de emi ta mananene fa? Emi ta mafandendelek

¹⁹loti kalimak fo Au tete'i fen neu hataholi lifu kalima kala la'a fa do? Emi hehele makabubua nana'aela kala, lepeneu henuk de'ubee?” Boema lataa lae, “Sanahulu dua.”

²⁰Yesus natane seluk nae, “Ma nai lelek fo Au tete'i fe hataholi lifu kaha kala loti kahituk sila la, emi hehele ma nana'aela kala, lepeneu de'ubee?” Boema lataa lae, “Lepeneu hitu.”

²¹Yesus nafa'da selu kasa nae, “Naa, ade emi beita malela kana boen do?”

²²Ala losa Betsaida boema, hataholi la lo hataholi pokek esa leo Yesus neu fo loken nafaloe hataholi pokek ndia fo nakahahai kana.

²³Boema Yesus ho'u na hataholi pokek ndia lima na de nalala'on leo kota deak neu. Basa boema, Yesus mu'di ape neu hataholi ndia mata na. Boema Ana tao lima na neu hataholi ndia mata na de natanen nae, “Ade besak ia o hapu mita hata esa so do beik?”

²⁴Hataholi ndia ana mete leo uluk neu boema nae, “Hei, Au ita hataholi la bela'o, tehu au itas sama leo ai huu ka.”

²⁵Yesus tao seluk lima na neu hataholi ndia mata na. Oek ia soona, hataholi ndia sanga enok fo nita no malolena. Mata na hai, de nita basa hata lala'ena no mangale'dok.

²⁶Boema Yesus nafa'dan nae, “Fali leona! Tehu boso fali seluk leo kota ndia mu bai.”

²⁷Yesus no ana mana tunga nala leu leo nggolo-nggolok manai Kaisarea ma Filipi titia-tatai nala leu. Ala losa eno tala'dak boema Yesus natanes nae, “Tunga hataholi la nafa'dana soona, Au ia see?”

²⁸ Boema lataa lae, “Hapu hataholi nggelok lafa'da lae, Yohanis Mana Salani ka, ma hapu nggelok boeo lafa'da lae, Elia ma nggelok seluk bai soona lafa'da lae, nabi ndia.”

²⁹ Yesus natanes nae, “Tehu tunga emi soona, Au ia see?” Boema Petrus nataa nae, “Ama nde Mane Mana Fe So'da ka!”

³⁰Boema Yesus fes nasanene'dak fo ela ala boso lafa'da hataholi esa boen, la'eneu see Yesus ndia.

³¹Basa ndia boema, Yesus mulai nanoli ana mana tunga nala nae, Ana Hataholi ka muse doidoso nanseli, ma neukose lasi-lasi kala, malanga ima mala, ma malanga agama la ala la'ba nana. Neukose ala taolisan, tehu neu fai katelu na soona, neukose naso'da falik.

³²Yesus nafada dede'ak ndia neu ana mana tunga nala no mangale'dok. Boema Petrus hela Yesus leo boboak neu de ana ka'i Yesus.

³³Tehu Yesus lipa leo dea neu de Ana mete ana mana tunga nala, boema Ana ka'i Petrus nae, “La'o madook ia, mana dudungu-papau konei! O dudu'a ma dudu'a hataholi daebafak ndia, te Manetualain dudu'an ta ndia fa!”

³⁴ Basa boema, Yesus nalo hataholi makadotok manai sila la ma ana mana tunga nala de nafa'das nae, “Hataholi mananau tunga Au a, muse nafandeleheni hihii-nanaun fo basa soona, ana lu'a ai nggangena, fo ana tunga nahele Au.

³⁵ Nana hataholi fo ana nau ho'u nahele so'da na, neukose namopo so'da na. Tehu hataholi fo ana tunu-hotu so'da na soaneu Au, ma soaneu Hala Malole fo neme Manetualain mai soona, neukose ana hapu so'da na.

³⁶Nanalak hata ba'eneu hataholi esa, makanaema ana hapu basa daebafak ia lala'ena, tehu namopo so'da na?

³⁷Ade so'dak ndia hapu tukan ninik hata esa do?

³⁸Makanaema hataholi esa ana mae manaku Au ma Au nanoli nga nai le'do fai malenalanga-masa'basok ma mangalauk ia soona, Ana Hataholi ka boeo, neukose Ana mae manaku hataholi ndia nai lelek fo Ana Hataholi ka Ana mai no Aman koasa na, ma no ata nusa so'dak malalao nala.”