Read Termanu MARKUS 9 Bible Online

MARKUS 9 - Termanu bible

MARKUS 9

¹Boema Yesus nae, “Bubuluk leona! Te nai emi basa-basam manai ia la, hapu nggelok beita mate fa, metema beita nita Manetualain paleta ninik koasa na!”

² Basa faik ne boema, Yesus no Petrus ma Yakobis no tolanoon Yohanis de mesa kasa leo lete madema esa poi na leu. Ala losa letek ndia poi na boema, ala mete neu te Yesus mata-panan nasafali.

³Bua-lo'a papake na nasafali da'di fula mangadilak. Ta hapu mana safesak esa boen nai daebafak ia, ana hapu safe-saa fo fula na leondiak fa.

⁴Basa boema, Yesus ana mana tunga katelun sila la lita Yesus kola-kola no Elia ma Musa.

⁵Boema Petrus nafa'da Yesus nae, “Ama Mesen, ita leo mai ia na, malole naseli. Malole lenak ami tao ma lalaak telu mai ia fo, Ama soa esa, Musa soa esa, ma Elia soa esa.”

⁶Tunga ndo na, Petrus ta bubuluk hata fo ana kokolak ndia fa, nana Petrus no nonoo kadua nala bii lanseli.

⁷ Basa boema, ko'a sa poti nalas, boema lamanene hala ka neme ko'as ndia dalek mai nae, “Ia nde Au Anang fo Au sue-lai ka. Mamanene meun!”

⁸No lai-laik, ala mete leo boboa-kaisun leu te, ta lita hataholi esa boen sama-sama no Yesus nai ndia fa, te ka'da Yesus mesa kana so.

⁹Lelek fo ala kona leme letek ndia lain mai boema, Yesus fes nasanene'dak nae, “Boso tui hataholi esa boen, hata fo na'ka sa emi mitak ndia, nakahuluk neme Ana Hataholi ka naso'da falik neme mamate sa mai.”

¹⁰Ala tao tunga hala heheluk ndia, tehu ala mulai lakokolaaok la'eneu Yesus hala-kokolan fo nae, “naso'da falik neme mamate sa mai”.

¹¹ Boema latane Yesus lae, “Tao le'e de mese agama la lafa'da lae, Elia muse ana mai nakahuluk?”

¹²Yesus nae, “Memak Elia mai nakahuluk fo ana tao matalolole basa hata lala'ena. Tehu dede'a na tao leo beek no Ana Hataholi ka? Hu beek de, nai Susula Malalaok dale nanasulak nae, neukose Ana Hataholi ka doidoso nanseli, ma hataholi la lakadadae kana?

¹³Tehu Au afa'da neu emi te, Elia mai so de hataholi la taon tunga sila dale hihii-nanau nala. Dede'ak ndia nandaa no hata fo nanasulak nai Susula Malalaok dale la'eneu aoina na.”

¹⁴Lelek fo Yesus no ana mana tunga katelu na fali ma'is sama-sama lo ana mana tunga fe'e nala, te lita hataholi makadotok lai ndia so. Mese agama de'ubee, bei lale'a lo Yesus ana mana tunga nala.

¹⁵Hataholi sila la lita Yesus tutika ala nggenge la, boema lalai-lalai mesan leu fo ala sipo kana.

¹⁶Boema Yesus natane ana mana tunga nala nae, “Emi matataneaok beek ndia mo mese agama sila la?”

¹⁷Nai hataholi makadotok sila la dalek, hataholi esa nafa'dan nae, “Ama Mesen, au o au ana nga leo Ama mai. Au anang ndia hala tak, nana dula dale mangalau ka masok nai aon dale.

¹⁸Makanaema dula dalek ndia fo'a soona, nakabebepa neu dae lain fo bafa na nafufu'de, ma nisi na nggio-nggio, boema basa ao na balakai. Au oke Ama ana mana tunga nala fo ala usiheni dula dale mangalauk ndia, tehu ala ta labe'i fan.”

¹⁹Boema Yesus nafa'da ana mana tunga nala nae, “Emi ia su'di selin! Emi ia hataholi fo te'e-te'e, ta mamahele fa. Au muse leo o emi, ma Au ta haelai amanasa emi losa faihi'da? Mo ni'iana ndia leo ia mai!”

²⁰Boema lo ni'iana ndia leo Yesus neu. Lelek fo Dula dale mangalauk ndia nita Yesus tutika, ana tao na ni'iana ndia ao na hela holoduku, de nalosa ni'iana ndia fepaneu de naloli-lokak neu dae lain boema bafa na nafufu'de.

²¹Boema Yesus natane ni'iana ndia aman nae, “Ni'iana ia, ana tao leo iak faik de'ubee ia so?” Ni'iana ndia aman nae, “Neme bei ana-na mai!”

²²“Dula dale mangalauk ndia, la'i esa-la'iesa ana sanga enok fo ana taonisan, ninik ana fen tu'da leo ha'i dale, do oe dale neu. Tehu metema Ama nau tulu-fali soona, ela leo bee na Ama sue-lai ma tulu-fali ami dei!”

²³Boema Yesus naen nae, “O mae le'e? O mae, metema Ama hapu? Hata lala'ena ana da'di, sa'di hataholi a namahele!”

²⁴Tutika ni'iana ndia aman ana nggasi ma nae, “Lamatuak, au amahele tehu au namahehele nga ta dai fa. Tulu-fali au leona, fo ela au amahele lena seluk bai!”

²⁵Lelek fo Yesus nita hataholi makadoto kala mulai mai lakamomotu boema, Ana paleta dula dale mangalauk ndia nae, “Dula dale pakek ma hala ta konei, Au paleta o, kalua meme ni'iana ia dalek mai, fo boso boe fali seluk leo ni'iana ia aon dale mai makandondook bai!”

²⁶Dula dale mangalauk ndia ana nggasi boema, ana tao na ni'iana ndia ao na hela holoduku, basa boema ana kalua neme ni'iana ndia dalek mai. Mete ni'iana ndia soona, sama leo mamate sa, de nalosa basa hataholi la bekola lae, “Ni'iana maten so!”

²⁷Tehu Yesus ho'u na ni'iana ndia lima na de nafofo'an. Boema ni'iana ndia ana fo'a leona.

²⁸Yesus losa uma boema, ana mana tunga nala esa-esa mai de latanen lae, “Hu hata de ami ta hapu usiheni duladale mangalauk ndia fa?”

²⁹Boema Yesus nae, “Dula dale mangalauk matak leondia ka, ta hapu usihenin ninik eno matak leo bee ka boen, ka'da ka ninik huhule-haladoi ka mesa kana.”

³⁰Yesus no ana mana tunga nala la'oela mamanak ndia boema, ala la'ok lakandoo tunga Galilea. Yesus ta nau hataholi bubuluk Ndia nai bee fa,

³¹nana nanoli ana mana tunga nala nae, “Neukose Ana Hataholi ka nanafehenik leo hataholi daebafa ka koasan dale neu fo ala taolisan, tehu neu fai katelu na soona, neukose naso'da falik!”

³²Ana mana tunga nala ta lalelak Yesus nanolin ndia fa, tehu ta lapalani latane fan.

³³Ala losa uma esa nai Kapernaum boema, Yesus natane ana mana tunga nala nae, “Na'ka sa emi matataneaok beek neme eno tala'dak?”

³⁴ Ala ta lataa fa, nana lale'a leme eno tala'dak ndia, lale'a la'eneu see ka nde matualena.

³⁵ Yesus nangatuuk boema nalo ana mana tunga kasanahulu dua nala de nafa'das nae, “Hataholi fo ana nau da'di hataholi makahuluk soona, ana muse da'di hataholi makabuik, ma ana muse da'di malalau-maoono neu basa hataholi lala'ena.”

³⁶Basa boema, Yesus ho'u na ni'iana esa lima na de non leo basa-basas uluk neu. Ana bei ifa no ni'iana ndia te nafa'da ana mana tunga nala nae,

³⁷ “Hataholi fo ana sipok ni'iana esa leoiak nanahu Au, soona sosoa na nae, ana sipok Au. Ma hataholi mana sipok Au a, ana ta sipok ka'da Au mesa nga nde ndia fa, tehu ana sipok Ndia fo manamadenu Au a boe.”

³⁸Boema Yohanis nafa'da Yesus nae, “Ama Mesen, ami mita hataholi esa, ana usiheni nitu ninik ana pake Ama na'de na. Boema ami kena-ka'in, nana ita hataholin ta ndia fa.”

³⁹Tehu Yesus nae, “Boso kena-ka'in, nana ta hapu hataholi esa boen, hapu tao manda'di beuk ninik ana pake Au nade nga soona, hataholi ndia nakadadaek Au.

⁴⁰ Nana hataholi fo ana ta lena la'ban ita, sosoa na nae hataholi ndia nok ita.

⁴¹ Mafandendelek te! Hataholi fo ana fe emi minu, hu ka nde Mane Mana Fe So'da ka ana mana tungan emi soona, tao leo bee o ana sipo ngga'di na.”

⁴²“See nde tao na hataholi esa neme hataholi kome'doana ia la ta lamahele seluk leu Au fa soona, malole lenak pa'a batu tutu'tu ka neu botolii na, fo tapan leo tasi dale neu.

⁴³ Makanaema o lima na nini sala-singok fe o soona, te'teheni limak ndia! Malole lenak o maso'da mo Manetualain no limak seli, neme o masok leo tasi ha'ik dale, fo nde ha'i mana ketu basa ta ka, no o limam duas. [

⁴⁴Nai naa ha'i ta hapu mate fan, ma ule kala ta hapu mate fas.]

⁴⁵Ma makanaema o ei ma nini sala-singok fe o soona, te'teheni eik ndia. Malole lenak o maso'da mo Manetualain, no o eim seli, neme o nanatapak leo tasi ha'ik dale neu, no o eim duas. [

⁴⁶Nai naa ha'i ta hapu mate fan, ma ulek-ka la ta hapu mate fas.]

⁴⁷ Makanaema o mata ma nini sala-singok fe o soona, e'do heni matak ndia! Malole lenak o masok Manetualain Daebafa Beu na no o matam seli, neme o nanatapak leo tasi ha'ik dale neu, no o matam duas.

⁴⁸ Nai naa, ha'i a ta hapu mate fan, ma ulek ala ta hapu mate fas.

⁴⁹Hataholi a esa-esak, neukose nanatao nalalaok ninik ha'i, sama leo tutunu-hohotuk fo nanatao nalalaok ninik masik.

⁵⁰ Masik ndia malole, tehu makanaema masin ta soona, ade bei hapu tao namasi selu kana do ta? Da'di, ela leo bee na emi da'dileo masi ka, fo maso'da sama-sama no mole dame.”