Read Termanu LUKAS 10 Bible Online

LUKAS 10 - Termanu bible

LUKAS 10

¹Basa ndia de Lamatua ka hele na ana manatungan hituhulu seluk, boema nadenus ala la'ok dua-dua lakahuluk leme Yesus leo basa kota ma mamanak fo sanga neu donge-dama kala.

² Yesus nafa'das nae, “Buna-boak fo neukose nanaketu-kolu ka ba'u ka, tehu manaso'u belak soaneu keketu-kokoluk, ka'da lumanak. Hu ndia de moke tina lamatuak, fo daenga ana haitua manaso'u belak mai soaneu ketu-kolu bubu'u-palusan buna-boan.

³ Naa, la'o leona! Au adenu emi sama leo bi'ilopo a neu leo busa fui a tala'da heon leu.

⁴ Boso mini alukosu doik, do mamana doik do ta'bueis boe. Boso mate'e nai eno tala'dak fo mate'a hataholi esa boen.

⁵Metema emi masok leo uma esa dalek meu soona, mate'as mae, ‘Sa'di leo bee na mole-dame ba'eneu uma ia.’

⁶Metema nai ndia hapu hataholi ana hii mole-dame soona, emi nate'a mole-damem ndia neukose nahele non. Te metema ta soona, hela falik emi nate'a mole-damem ndia.

⁷ Leo mahele meme ka'da uma esa. Ka'da sipo hata fo ala sadia fe emi nai ndia, nana hataholi manamaue-male'di ka, nanuu hak sipo ngga'di na. Boso lali-lali neme uma esa leo uma esa meu.

⁸Metema emi meu leo kota esa meu, fo ala sipok emi no malole nai ndia no malole soona, mi'a hata fo nanasadiak fe emi nai ndia.

⁹Makahahaik hataholi kamahe'dis manai kota ndia, boema tui-benga fe hataholi manai sila la mae, ‘Neukose Manetualain no lai-laik Ana mulai paleta da'dileo Manek nai emi tala'da.’

¹⁰ Tehu metema emi meu leo kota esa meu, fo ala ta sipok emi nai ndia fa soona, kalua leo enok lain meu fo mafa'da mae,

¹¹‘Emi kota ma daesopum fo nakadita nai ami ei dale ma, ami sasapuhenin da'dileo nasanene'dak soaneu emi. Tehu bubuluk leona, te fai na deka soaneu Manetualain mulai paleta da'dileo Manek nai emi tala'da!’

¹² Mafandendelek leona. Neu fai mate'e ka te, ndofo na seli soaneu Manetualain fe do'o do ampon neu hataholi Sodo mala, neme kota ia hataholi nala mai!”

¹³ “Soe ba'eneu emi, fo kota Korazim! Ma soe ba'eneu emi, fo kota Betsaida! Leo uni ka, basa manda'di beuk fo nanataok neme emi tala'da ndia, nanatao basak neme kota Tirus ma Sidon na soona, tao leo bee o, hataholi sila la, ala tukatei-saledale basa doo ka, leme sila sala-singo nala mai so, boema ala pake bua-lo'a fafaluk, ma ala tao daesopuk neu langa nala lain.

¹⁴Neu fai mate'e ka te, ndofo na seli soaneu Manetualain fe do'o do ampon neu hataholi Tirus-sala lo hataholi Sidon nala, neme emi mai.

¹⁵ Boema emi, fo kota Kapernaum, emi maedaenga, neukose ala so'u lamdedema emi losa nusa so'da ka do? Ta! Nakalenak bai, tao leo bee o, ala tapa emi leo tasi ha'ik dale meu!”

¹⁶ Boema Yesus nafa'da ana manatunga nala nae, “Metema see namanene emi soona, namanene Au. See tipa emi soona, ana tipa Au. Boema hataholi manatipa Au a, ana tipa Ndia, fo manamadenu Au a boe.”

¹⁷Ana manatunga kahituhuluk sila la ala fali ma'is no namahokok lanseli. Lafa'da lae, “Lamatuak, dula dale mangalau kala boeo ala tunga ami paleta ma, metema ami paletas minik Lamatua ka na'de na!”

¹⁸Boema Yesus nafa'das nae, “Au ita Nitu a tu'da neme lalai sama leo ndela sa.

¹⁹ Bubuluk leona! Te Au fe basa emi koasa soaneu emi heheta menge ma kula ka, boema tao mala'di musu be'i-balakain lala'ena, ta no hata esa boen fo hapu tao susa-soe emi.

²⁰Leomae leondiak boe, boso mamahoko hu ka nde dula dale mangalau kala tunga emi paleta ma. Malole lenak emi mamahoko, hu ka nde emi na'de ma nanasulak nai susula maso'dak manai nusa so'da ka.”

²¹Bei nai faik ndia boe, Yesus namahoko hu ka nde Manetualain Dula Dale na koasa nan. Yesus nae, “Ama, Manetualain fo mana koasa lalai ma daebafa ka! Au oke makasi neu O, hu ka nde basa sila la O bibila-babaas neme hataholi malela kala ma malelaina la, tehu O matu'dus neu hataholi manasakola ta kala. Ndia nde nandaa no Ama dale ma.

²² Basa hata lala'ena, Ama fe basan neu Au so. Ta hapu hataholi esa boen nalelak Ana ka, ka'da Ama ka mesa kana. Ta hapu hataholi esa boen nalelak Ama ka, ka'da Ana ka mesa kana, ma neu hataholi see fo Ana ka fe Ama ka nalela kana.”

²³Boema Yesus lipa leo ana manatunga nala neu, basa boema nafa'das mesa kasa nae, “Emi maua-manale nana emi mita basa hata fo emi mitan besak ia.

²⁴Mafandendelek leona! Nabi ba'u ka ma mane kala hii lita hata fo emi mitan besak ia, tehu ta lita fan. Ala hii lamanene hata fo emi mamanenen besak ia, tehu ta lamanene fan.”

²⁵ Basa boema, mese agama esa to'da mai soaneu nakahihi'ik Yesus. Natane nae, “Ama mesen, au muse tao hata fo ela au hapu sipo so'da matetu ka ma manaketu basa ta ka?”

²⁶Yesus nataa nae, “Ala sulak beek nai Susula Malalaok dale? O hahapu ma leo beek la'eneu dede'ak ndia?”

²⁷ Hataholi ndia nataa nae, “ ‘Sue-lai o Lamatuam Manetualain, ninik o dale katematua ma, ninik basa o samane ma la'iesa kana, ninik basa o be'i-balakaim, ma ninik basa o dudu'a-aafim lala'ena,’ ma ‘Sue-lai o nonoo hataholi ma, sama na leo o sue-lai o aoina ma.’ ”

²⁸ Yesus nae, “O natataam ndia la'en. Tao-no'in leona, soona neukose o maso'da.”

²⁹Tehu mese agama ndia nau tao namandoo aoina na, hu ndia de natane nae, “See ka nde au nonoo hataholing ndia?”

³⁰Yesus nataa nae, “Hapu touk esa kona neme Yerusalem leo Yerikho neu. Nai eno tala'dak, mana bonga uma sapu nan, de ana loso na basa hata-heton lala'ena, ma ana fefepa-popoko nan hihii leo maten nana. Boema ala la'oelan lenga-lenga neme enok lain no ao na hinak-hinak mesan.

³¹Nandaa no imam esa boeo ana la'ok tunga enok ndia boe. Lelek nita hataholi ndia, boema ana heok leo eno ka selik neu, boema ana la'ok nakandoo.

³²Leondiak boe no hataholi Lewi esa ana la'ok tunga ndia. Lelek nita hataholi ndia, boema neu deka non fo ana mete matalololen. Tehu hataholi ndia boeo, ana heok leo eno ka selik neu, boema ana la'ok nakandoo.

³³ Tehu basa boema hataholi Samaria esa ana la'ok tunga enok ndia boe. Lelek nita hataholi ndia, boema dale na he'di nanseli, nana ana kasia nana.

³⁴Boema neu deka no hataholi ndia, boema ana safe balisi hina nala ninik angol, ma namo'don ninik mina, basa boema ana popoti-papalu hinak sila la. Basa ndia boema ana fua hataholi ndia neu keledein lain, boema non leo losmen esa neu fo puli lamo'don.

³⁵Balahaa boema ana ho'i na doi isi lilofulak dua de ana fes leo mana manuu losmen ndia neu, boema nafa'dan nae, ‘Puli-mamo'don, ma metema bei hapu sese'ba fe'ek bai soona, mahani te metema au fali ma'i nga soona, au baen.’ ”

³⁶Basa boema Yesus tui nate'e tutuik ndia ninik natatanek nae, “Nai hataholi kateluk sila la, see ka nde tunga o hahapu ma, fo tatao-nono'in da'dileo nonoo hataholik neme hataholi fo nanafefepa-popokok ndia?”

³⁷Mese agama manamatanek ndia nataa nae, “Hataholi fo manatulu-fali basa hataholi ndia.” Yesus nafa'dan nae, “Nah, muu leona, fo tao-no'in leondiak boe!”

³⁸ Basa boema Yesus ma ana manatunga nala la'ok lakandoo leleo-lala'o nala, boema ala losa nggolok esa. Nai ndia inak esa na'de Marta, ana ka'in leo uma na neu.

³⁹Marta tolanoo inan esa na'de Maria. Maria ia nangatuuk deka no Lamatuak Yesus, fo namanene nanoli nala.

⁴⁰Tehu Marta soona ana puelau nanseli no tatao-nono'i uma lo na. Boema neu leo Yesus neu de nafa'dan nae, “Lamatuak, ade Lamatua ka ta mafaduli fa, metema Maria po'ilotak au puelau mesa nga? Madenun fo ana tulu-fali au dei!”

⁴¹Lamatua ka nataa nae, “Marta, Marta! O dale ma falahaa, ma o su'ba ka'da dudu'a-dodoo ia ma naa;

⁴²te see ko na fo nanapaluu ka, ka'da dede'ak esa mesa kana. Maria hele basa hata fo malole a, fo neukose ta nanaho'ik neme ndia mai fa.”