Read Termanu LUKAS 13 Bible Online

LUKAS 13 - Termanu bible

LUKAS 13

¹Nai lelek ndia, hataholi tui Yesus la'eneu Pilatus taonisa hataholi Galilea de'ubee, nai lelek ala fe tutunu-hohotuk neu Manetualain.

²Yesus namanene tutuik ndia boema nae, “Hu ka nde ala taolisa hataholi Galilea sila la leondiak boema, emi maedaenga ndia da'di buti esa nae, hataholi sila lasala-lasingo lenaheni hataholi Galilea fe'e kala do?

³Ta makandondook! Tehu mafandendelek leona: te metema emi ta tukatei-saledale meme emi sala-singo mala mai fa soona, neukose emi basa-basa mala boeo mopo-mate sama leo hataholi sila la.

⁴Tao leo beek boe no hataholi kasanahulu faluk fo manamatek leme Siloa ma, nai lelek fo uma ndia puni madema na napaluni nalas? Emi maedaenga ndia da'di natutu'duk esa nae, hataholi sila la masala-masingok lenaheni basa hataholi fe'ek fo manaleo leme Yerusalem ma do?

⁵Ta makandondook! La'iesa seluk Au afa'da: Te metema emi ta tukatei-saledale meme emi sala-singo mala mai fa soona, emi basa-basa mala boeo neukose mopo-mate sama leo hataholi sila la.”

⁶Basa ndia boema, Yesus tui nakandandaak ia boe nae, “Hapu hataholi esa nanuu ai kak huk esa nai osi angol dale. Faik esa boema neu sanga ai boak nai ai ndia, tehu ana ta hapu boak esa boen.

⁷Da'di nafa'da manamanea osi nae, ‘Mete dei, te teuk telu ia so, au mai sanga ka boak nai ai kak ia, tehu au ta hapu boak esa boen. Ka'da lo'oheni ai ndia leona! Te ka'da ana musi basa nana'ak manai dae dale a!’

⁸Tehu manamanea osi ndia nataa nae, ‘Nemena fo ana moli seluk teuk ia dale na Tuan. Au sanga tatatik okofefeo huu na fo au tao pupuk neu.

⁹Fafa'ka ma mahani te teu mana maik ia soona, besa ka naboa. Tehu metema ta soona, bole Tuan madenu fo lo'ohenin.’ ”

¹⁰Nai fai Sabat esa boema, Yesus nanoli nai uma mamasok esa dalek.

¹¹Nai ndia hapu inak esa, namahe'di teuk sanahulu falu so, nanahu dula dale mangalau ka nai aoinan dale. Inak ndia pukudouk, de ana ta hapu napadeik natetu makandondook fa.

¹²Lelek fo Yesus mete nitan boema, Ana bou kana nae, “Ina, lea-hai meme o he'di ma mai leona!”

¹³Boema Yesus tao lima na neu inak ndia lain tutika no hatematak ndia boe, inak ndia napadeik natetu, boema ana koa-kio Manetualain.

¹⁴ Malanga uma mamasok ndia namanasa de nae, Yesus nakahahaik hataholi nai fai Saba ta, hu ndia de nafa'da hataholi la nae, “Hapu faik ne soaneu taue-tale'di, hu ndia de mai la'e faik sila la fo nakahahaik o, fo boso nai fai Saba ta!”

¹⁵Boema Lamatua ka nafa'dan nae, “Hai, Hataholi manadea-dale kala lemin! Nai fai Saba ta basa hataholi la po'i sapi do keledei nala fo neu hanis oe.

¹⁶Naa, besak ia nai ia, hapu inak esa Abraham tititi-nonosin, fo teuk sanahulu falu dale na Nitu pa'a nan so. Ade inak ia ta bole nanase'i-po'ik neme papa'an ndia nai fai Saba ta fa do?”

¹⁷Yesus hala-kokolan ndia tao na Yesus musu noo nala mae lanseli; tehu basa hataholi fe'e kala lamahoko lita basa mata beuk fo Yesus tao ka.

¹⁸Yesus natane nae, “Metema Manetualain paleta soona, heheo-hihilun tao leo beek? Au hapu akasasama kana no bee ka?

¹⁹Heheo-hihilun sama leo nakandandaaak mana maik ia: Hataholi esa ho'i na sawi de'ek esa, beoma neu selen leo osin dale neu. Ai de'ek ndia moli boema ana da'di ai huk matuaina, de manupui la tao ndunu nala nai ai ndia ndana nala.”

²⁰Yesus natane la'iesa seluk nae, “Metema Manetualain paleta soona, Au akasasamak heheo-hihilun no bee ka?

²¹Heheo-hihilun sama leo inak esa ho'i na lalu tei ka fo ana sese'do kana no ha'de sopuk litel hahulu losa basa-basan sa'e.”

²²Nai leleo-lala'ok leo Yerusalem neu, Yesus la'ok tunga kota-kota ma nggolo-ta'du kala, boema nanoli.

²³Boema hapu hataholi natanen lae, “Ama, ade hataholi nanasoi-tefak ka'da lumanak mesan do?” Yesus nataa nae,

²⁴ “Sanga enok leona fo masok tunga lelesu makabi'a ka, Nana hataholi ba'u ka te'e-te'e ala sanga enok masok, tehu ala ta bisa fa.

²⁵Nai lelek uma lamatuak fo'a napadeik de ana kena lelesu na, ndia te emi mapadeik nai deak de emi dedelu lelesu a, boema emi mafa'dan mae, ‘Tuan, soi fe ami lelesu leona!’ Soona neukose Tuan ndia nataa nae, ‘Au ta bubuluk emi meme bee mai fa!’

²⁶ Neukose emi mataa mae, ‘Ami me'a-minu sama-sama mo Tuan so, ma Tuan boeo nanoli nai ami kota ma eno nala so!’

²⁷ Tehu Tuan ndia neukose nafa'da seluk nae, ‘Au ta bubuluk emi meme bee mai fa. La'o meme ia, hai emi fo hataholi mangalau kala lemin!’

²⁸ Nai lelek emi mita Abraham, Isak, Yakob boema basa nabi la lamahoko-setelee nai Manetualain Daebafa Beu na dale ka, neukose emi kii-makaleleu ma doidoso, nanahu emi nanausiheni basak leo deak meu!

²⁹Neukose hataholi la mai leme dulu ma muli, leme kii ma kona mai, fo neukose lamahoko-setelee nai Manetualain Daebafa Beun dale.

³⁰ Tete'e ka, hataholi fo mate'e ka, neukose ana da'di hataholi makasososak, ma hataholi fo makasososa ka, neukose ana da'di hataholi mate'ek.”

³¹Nai lelek ndia boe, hapu hataholi Farisi de'u bee mai leo Yesus mai de lae, “Boso leo meme ia! Muu leo mamana fe'ek mu, nana Herodes nau taonisa O.”

³²Yesus nataa nae, “Mu mafa'da hataholi fo ana hii ka'da tao nakalulutuk ndia mae, ‘Faik ia ma balahaa, Au usiheni dula dale mangalau kala, ma Au akahahaik hataholi kamahe'dis ala, tehu neu fai katelu na, neukose Au tao akababasak Au tatao-nono'ing.’

³³Leomae leondiak boe, Au muse leo-la'ok akandoo Au leleo-lala'ong faik ia, balahaa ma balahaa binesak, nana ta malole nabi esa nanatao nisak nai Yerusalem deak.

³⁴Yerusalem, Yerusalem! O lau mala taomisa basa nabi la, ma Manetualain hataholi nadedenu nala, tapas minik batu, losa mates. La'i de'u bee so, Au hii holu basa o lau mala, sama leo manu ina nasaluluku ana nala nai li'dan dale, tehu o ta nau fa!

³⁵ Hu ndia de Manetualain ta nau nok o seluk fa. Bubuluk leona, te mulai besak ia, neukose o ta mita seluk Au losa o mafa'da mae, ‘Nanaba'e-palak neu Ndia fo ana mai no Lamatua ka na'de na.’ ”