Read Termanu LUKAS 15 Bible Online

LUKAS 15 - Termanu bible

LUKAS 15

¹ Faik esa boema manasusu bea makadotok ma hataholi fo lau nala lafa'da lae hataholi ta malole la, ala mai lamanene Yesus nanoli-nafa'dan.

²Hataholi Farisi la ma mese agama la mulai lakamumu lae, “Awe, hataholi ia sipok hataholi ta malole la, bai te na'a sama-sama nos!”

³Hu ka nde ndia de Yesus tuis nakandandaak ia,

⁴“Leo uni ka emi hataholim esa bi'ilopon natuan esa, boema namopo esa, ade neukose ana tao beek? Tao leo beeo neukose ana la'oela bi'ilopo kasiohulu siok sila la leme mo mana'u ka, fo neu sanga manamopok ndia losa hapun.

⁵Ma metema ana hapu falik bi'ilopo ndia soona, namahoko nanseli nalosa nasaa bi'ilopo ndia neu alun lain,

⁶boema nini fali kana. Basa boema nalo nonoo nala ma uma titia-tatai nala ma nae, ‘Mai fo ata tamahoko. Au bi'ilopo manamopo nga au hapu fali kana so!’

⁷Naa, leondiak boe nai nusa so'da ka hapu namahokok fo matua lena soaneu hataholi masala-masingok esa tukatei-saledale, neme hataholi siohulu sio fo malole so de ta paluu tukatei-saledale so'on.”

⁸Basa boema Yesus tui nakandandaak fe'ek esa nae, “Leo uni ka inak esa doi isi lilofulan sanahulu, boema namopo esa. Neukose ana tao beek? Tao leo bee o neukose ana de'de napila banu ka fo ana sasapu uma na, boema ana sanga te'e-te'e no doik ndia losa ana hapu fali kana.

⁹Nai lelek ana hapu falik doik ndia soona, nalo basa nonoo nala boema uma titia-tatai nala fo nafa'das nae, ‘Au amahoko anseli nana hapu falik au doi mana mopo nga so. Mai fo ata tamahoko leona!’

¹⁰Leondiak boe Manetualain ata nusa so'da nala neukose lamahoko, metema hapu hataholi mangalau ka tukatei-saledale neme sala-singo nala mai.”

¹¹Yesus nafa'da seluk nae, “Hapu amak esa ana toun dua.

¹²Ana muliana ka nafa'dan nae, ‘Ama, besak ia fe au baba'e nga neme ita su'i-beten mai.’ Boema aman ba'e su'i-beten neu anan duas.

¹³Basa faik de'ubee boema, ni'iana mulianak ndia nase'oheni ndia hata baba'e na de neu leo nusa dook neu. Nai naa, ana didilo-dodolo tali doi na ninik so'da lena-lena ka.

¹⁴Lelek doi na basa la'iesa kana boema, la'a matuaina da'di nai nusak ndia, nalosa ana mulai naleu-nalaak leona.

¹⁵Boema neu naue-nale'di nai laun esa nai ndia, boema nadenun leo tina neu fo nanea bafi na.

¹⁶Niiana ia name'da namala'a nanseli de nalosa ana hii na'a bafi sila la nana'a na. Leomae namala'a nanseli, tehu hataholi esa boen ta fen na'a fa.

¹⁷Neu mate'e na boema besa ka name'da de nae, ‘Hataholi manamaue-male'di nai au amang uma na, nana'a-nininun sasikao-kao, tehu au nai ia soona, au hihii mate o la'a sa!

¹⁸Malole lenak au fali no lai-laik fo au afa'da au amang ae, Ama, au asala-asingo basa neu Manetualain ma neu Ama so.

¹⁹Au ta andaa da'di ama anan so'on. Mafa'da mae, au da'di ama hataholi manaue-male'din.’

²⁰Boema no lai-laik ana fali ne'un leo aman uman neu leona. Neu de bei nai doo ka no uma te, aman nitan so. Boema aman dale na tu'da de nalai neu solu kana, tutika ana holu nan de ana de'in.

²¹Boema ni'iana ndia nafa'da aman nae, ‘Ama, au asala-asingo basa neu Manetualain ma neu Ama so. Au ta andaa da'di Ama anan so'on.’

²²Tehu aman nalo malalau-maoono nala de nafa'das nae, ‘Lai-lai meu ho'i bua papake neulauk fo fen pake. Boema o'du ndeli neu lima ku'u na, ma fen pake sapatu neu ei na.

²³Basa ndia soona, meu pa'a sapiana maao fo do'don leona, fo ta'a-tinu ma tamahoko-setelee.

²⁴Nana makahulu na au ana nga maten so, tehu besak ia naso'da falik. Makahulu na mopon, tehu besak ia hapu fali kana so.’ Boema ala mulai feta-dote leona.

²⁵Ndia te ana ulu na nai tina. Lelek ana fali ma'in de ana deka no uma boema, namanene musi kala lalii, ma fofoti-lolongek.

²⁶Boema nalo na malalau-maoonon esa de natanen nae, ‘Te beek da'di nai uma?’

²⁷Malalau-maoono ndia nataa nae, ‘Tuan fa'di na fali ma'in! De Tuan aman, nadenu do'do sapiana maao, nana ana hapu falik ana na no so'da-molek so!’

²⁸Boema ana uluk ndia namanasa nanseli, de nalosa ana ta nau masok leo uma dale neu fa. Tehu aman mai de ana kokoen masok leo dalek neu.

²⁹Tehu ana uluk ndia nae, ‘Tunga teuk au aue-ale'di sota-mate fe ama. Ta la'iesa fo au se'i ama paleta na fa. Tehu ama fe au beek? Bi'ihiik esa boeo, ama beita fe nita au fo au tao feta o au nonoo ngala fa!

³⁰Ama anan ndia na'a basa Ama su'i-beten neu ina manasosoa-piao kala, tehu leondiak ana fali ma'in boema Ama do'do fen sapiana maao!’

³¹Boema aman nataa nae, ‘Ana ngonei, o mo au tataas esa nai uma. Ma au su'i-beteng lala'ena, o nuum la'iesak sila la.

³²Tehu ita muse tao feta ma tamahoko-setelee, nana o fa'di ma makahulu na maten so, tehu besak ia naso'da falik. Makahulu na mopon, tehu besak ia hapu fali kana so.’ ”