Read Termanu LUKAS 17 Bible Online

LUKAS 17 - Termanu bible

LUKAS 17

¹Yesus nafa'da ana manatunga nala nae, “Tao leo bee o hapu dede'a-dede'ak fo tao na hataholi a tao sala-singok. Tehu soe ba'eneu hataholi manamakadada'dik dede'ak sila!

²Malole lenak, metema pa'a batu tutu ka neu hataholi ndia botolii na fo tu'uhenin leo tasi dale neu, neme ana tao na hataholi esa neme hataholi kome'doana ia la, ala tao sala-singok.

³ Hu ndia de manea matalolole leona! Metema o tolanoo ma nasala-nasingo soona, kena-ka'in leona. Fo metema ana tukatei-saledale soona, fe do'o do ampon neun.

⁴Metema faik esa nasala-nasingo neu o la'i hitu, boema tunga faik ana mai fo nafa'da o nae, ‘Au oke ampon,’ soona fe do'o do ampon neun.”

⁵Basa ana manatunga nala lafa'da Lamatuak Yesus lae, “Lamatuak, matetea-mahehele ami namahehele ma leona.”

⁶Boema Lamatua ka nataa nae, “Metema emi manuu namahehelek ba'u ai sawi de'e ka soona, emi hapu mafa'da aihu matuaina ia mae, ‘O nanafe'ahenik leona, fo nanaselek nai tasi dale, soona tao leo bee o aihu matuaina ndia neukose ana tunga emi paleta ma.’ ”

⁷“Leo uni ka hataholi esa nai emi dalek, nanuu malalau-maoono fo ana foidae nai tina do manafoo bi'ilopo. Metema malalau-maoono ndia ana fali ma'in soona, ade nafa'dan nae, ‘Mai fo mu'a lai-lai leona.’?

⁸Tao leo bee o ta hetu! Nasafali na, neukose nafa'dan nae, ‘Sadia fe au nana'a-nininung mai. Mu pake bua-lo'a balisi fo manea au nai lelek au bei u'a inu. Basa ndia soona, besa ka o bole mu'a.’

⁹Malalau-maoono ndia ta paluu nanakoa-kiok fa, nanahu ana tunga tua na paleta na hetu?

¹⁰Leondiak boe neu emi. Metema emi tao basa hata fo ala paleta basan neu emi soona, mafa'da leona mae, ‘Ami ia ka'da malalau-maoono. Ami bela-ba'um ndia, de ami muse tao-no'in.’ ”

¹¹Nai Yesus leleo-lala'on leo Yerusalem dalek neu, Ana tunga nusa Samaria no Galilea dae too na.

¹²Lelek ana masok nala nggolok esa dalek boema, hataholi he'di lou mangalauk sanahulu ala mai. Lapadeik lai doo ka,

¹³boema ala nggasi ma lae, “Yesus! Ama Mesen! Sue-lai ami dei!”

¹⁴ Lelek Yesus mete nitas boema nae, “Meu leo ima mala, fo mokes ala palisak emi ao ma.” Ala bei bela'o te he'di nala lea-hai so.

¹⁵Lelek hataholi esa neme hataholi kamahe'dis sila la dalek, name'da nana ana lea-hai so, boema ana fali no ana koa-koak mesan ma ana koa-kio Manetualain.

¹⁶Boema nai Yesus matan, ana sene-do'ok ma noke makasi neun. Hataholi ndia hataholi Samaria.

¹⁷Basa boema Yesus nae, “Ade hapu hataholi sanahulu nananakahahaik hetu? Sio seluk lai bee bai?

¹⁸Tao le'e de ka'da hataholi manamai ia, ana fali ma'in fo noke makasi neu Manetualain?”

¹⁹Boema Yesus nafa'da hataholi ndia nae, “Fo'a fo mu'u ma leona. Hu ka nde o mamahele Au, de o lea-hai so.”

²⁰Hataholi Farisi de'ubee latane Yesus lae, faihi'da Manetualain mai fo Ana paleta. Boema Yesus nataa nae, “Manetualain paleta na ana ta mulai ninik ta'du-tana fo hapu hataholi nitan,

²¹nalosa hataholi hapu kokolak nae, ‘Mai meten te nde ia!’ do ‘nai naa!’ Nana Manetualain mulai paleta nai emi tala'da so.”

²²Basa ndia boema, Yesus nafa'da ana manatunga nala nae, “Neukose fai na losa, emi hii mita Ana Hataholi ka fain esa neme fai-fai nala mai, tehu emi ta hapu mita fan.

²³Mahani te neukose hataholi nafa'da emi nae, ‘Meten, te nai ndia!’ do ‘Meten, te nai ia!’ Tehu emi boso kalua fo meu sangan.

²⁴Sama na leo ndela sa nandela nai lalai, fo nasa'a neme pedak leo pedak neu soona, mahani te Ana Hataholi ka heheo-hihilun nai fai mamai na leondiak boe.

²⁵Tehu makasososa na, Ana muse doidoso ba'u ka, boema hataholi lelek besak ia la, ala ta sipo kana fa.

²⁶ Nai faik fo mahani te Ana Hataholi ka nananatu'duk soona, heheo-hihilun sama leo nai makahulu na Noh tepo-lele na.

²⁷ Hataholi a na'a-ninu, ma ana saoana. Leondiak ana da'di nakandondoo henin losa Noh masok leo ofa matuaina dale neu, fo faa tua ka ana mai, soona mate basa hataholi sila la lala'ena.

²⁸ Bei sama leo Lot tepo-lele na boe. Hataholi a na'a-ninu, nase'o-banasa, tao tina-osi ma nafofo'a uma.

²⁹Tehu lelek Lot kalua neme Sodom mai a, nai faik ndia ha'i ma belerang kona neme lalai mai de, ana hotu naputu la'iesa kasa.

³⁰Mahani te heheo-hihilun leondiak, nai lelek Ana Hataholi ka nananatu'duk.

³¹ Nai faik ndia hataholi se nai uma na punin lain soona, ana boso kona fo ho'i bua-lo'an nai uma dale. Leondiak boe hataholi see bei nai tina soona, ana boso fali leo uma mai.

³² Mafandendelek hata fo ana da'di neu Lot saoina na so!

³³ Hataholi fo ana sanga enok soi-tefa na maso'da na, neukose namopo maso'da na. Tehu hataholi fo namopo maso'da na, neukose ana soi-tefa na maso'da na.

³⁴Mamahele leona, te nai le'odaek ndia, leo uni ka hataholi dua sungu lai pepe'uk esa soona, neukose lo esa, ma ala la'oela esa.

³⁵Leo uni ka inak dua nggili gandum, soona neukose lo esa, ma ala la'oela esa. [

³⁶Leo uni ka hataholi dua laue-lale'di lai tina soona, neukose lo esa, ma ala la'oela esa.]”

³⁷Boema Yesus ana manatunga nala latanen lae, “Lamatuak, neukose dede'ak ndia ana da'di nai bee?” Boema Yesus nataa nae, “Nai bee hapu popolak soona, manupui mana'a popola kala lai ndia.”