Read Termanu LUKAS 18 Bible Online

LUKAS 18 - Termanu bible

LUKAS 18

¹Basa ndia boema Yesus tui nakandandaak esa soaneu nanoli ana manatunga nala fo ela ala hule-haladoi tataas esa ma boso ketu namahehe nala.

²Yesus nae, “Nai kota esa hapu manamaketu-mala'dik esa, ana ta bii Manetualain ma ta nafaduli neu su'di see a boen.

³Nai kota ndia boeo, hapu inafalu esa neu tataas esa leo manamaketu-mala'dik ndia, fo noke nasala'e dede'a na. Inafalu ndia nafa'dan nae, ‘Tulu-fali au, fo mafa'da au dede'a nga ndo na, fo masasale matak mo au musu noo nga.’

⁴Faik de'ubee dale na, manamaketu-mala'dik ndia ana ta nau tulu-fali inafalu ndia fa. Tehu mate'e na manamaketu-mala'dik ndia dodoo nae, ‘Leomae au ta bii Manetualain ma au ta afaduli neu su'di see a boen,

⁵tehu hu ka nde inafalu ia ka'da tao tasibu au nakandoo, de malaole lenak au asala'e dede'a na. Te metema ta soona, neukose ana mai nakandondoo henin fo ana tao susa au.’ ”

⁶Boema Lamatua ka nae, “Taoafik leon neu hata fo mana maketu-mala'dik fo ta manatao tunga ndo ndia, nafa'da ka!

⁷Naa, ade Manetualain neukose ta nasala'e hataholi kamahehelen fo lalo bou-bou lon lele'do-le'odaen fa do? Ade nakadodook fai na, fo Ana ta tulu-fali fas do?

⁸Mamahele leona! Te neukose no lai-laik, nasala'e dede'a nala! Tehu metema Ana Hataholi ka mai soona, ade bei natongo no hataholi fo namahele neun nai daebafak ia do ta?”

⁹Yesus boeo tui nakandandaak ia neu hataholi fo ana mete hataholi fe'ek nai daeanak, tehu namahele aoina na mesa kana nde malole.

¹⁰Yesus nae, “Hapu hataholi dua leu leo Manetualain Uman soaneu hule-haladoi. Esa hataholi Farisi ma esa ka hataholi manasusu bea.

¹¹Hataholi Farisi ndia napadeik mesa kana ma ana hule-haladoi nae, ‘Ou Manetualain, au oke makasi neu O, nana au ta sama leo hataholi fe'e kala, fo mana tenepetak, mana po'de-paik, do mana hohongek fa. Au oke makasi, nanahu au ta sama leo manasusu bea ndia fa.

¹²Au oka ao nga la'i dua mamasok esa, ma metema au hahapu nga sanahulu soona, au fe O baba'ek esa.’

¹³Tehu manasusu bea ndia napadeik nai doo ka, ma nakalenak ta napalani nanganalo leo lalai neu fa. Ana lane lima na neu fana na ma nakatele langa na de nae, ‘Ou Manetualain, sue-lai au hataholi masala-masingok ia!’ ”

¹⁴ Yesus nae, “Mamahele leona, te nai lelek ala fali le'us leo uma leu te, Manetualain sipo ka nde manasusu bea ndia, te hataholi Farisi ndia fa. Nana basa hataholi fo namatutua-namadedema aoina na, neukose nananakaloloe-nakadadaek; ma basa hataholi fo nakaloe-nakadae aoina na, neukose nananamatutua-namadedemak.”

¹⁵Hapu hataholi la lo ni'iana la leo Yesus neu fo ela Ana fes baba'e-papalak. Lelek Yesus ana manatunga nala lita dede'ak ndia, boema lamanasa hataholi sila la.

¹⁶Tehu Yesus nalo ni'iana sila la boema nafa'da ana mana tunga nala nae, “Neme na fo ni'iana sila la mai leo Au mai. Boso kena ka'is, nana hataholi matak leo ia kala nde da'di lima eik neme Manetualain hataholi kamahehele nala mai.

¹⁷Mafandendelek leona! Te hataholi fo ta nasasale matak no Manetualain sama leo ni'iana esa fa soona, neukose ana ta da'di lima eik neme Manetualain hataholi kamahehele nala mai fa.”

¹⁸Mauli-malanga Yahudi esa natane Yesus nae, “Ama Mesen fo malole, au muse tao beek fo daenga au hapu sipo so'da matetu ka ma mana ketu basa ta ka?”

¹⁹Yesus natanen nae, “Te tao le'e de o mafa'da mae Au malole? Ta hapu hata esa malole boen, te ka'da Manetualain mesa kana.

²⁰ O malelak basa Manetualain paleta na nae: ‘Boso hohonge, boso manisa, boso mamanako, boso sakasii pepekok, ma fe ha'da-holomata neu o inam ma o amam.’ ”

²¹Hataholi ndia nataa nae, “Basa paleta sila la au tao tungas ndek au bei muli solu nga so.”

²²Yesus namanene dede'ak ndia boema nae, “Bei hapu seluk dede'ak esa fo o muse taon. Mase'oheni basa o hata-hetom lala'ena, fo fe doi na leo hataholi nuu ta-hata ta ka soona, neukose o hapu hata-heto nai nusa so'da ka. Basa ndia soona, mai fo tunga Au leona.”

²³Tehu lelek hataholi ndia namanene dede'ak ndia boema, dale na he'di sa, nanahu hataholi ndia, hataholi kamasu'ik nanseli.

²⁴Yesus bubuluk hataholi ndia dale na he'di sa, hu ndia de nae, “Tea na seli soaeneu hataholi kamasu'i ka da'di lima eik neme Manetualain hataholi kamahehele nala mai!

²⁵Mu'dak la'i esa kana onta esa masok tunga ndandau ka bolo na, neme hataholi kamasu'ik esa masok leo Manetualain Daebafa Beu na dalek neu.”

²⁶Basa hataholi fo lamanene Yesus kokolak nae leondia boema, latane lae, “Metema leondiak soona, see ka nde hapu maso'da ka?”

²⁷Yesus nataa nae, “Fo manda'di tak ba'eneu hataholi daebafa ka, ana da'di ba'eneu Manetualain!”

²⁸Boema Petrus nae, “Mete leona! Te ami la'oela ami tolanoo ka'a fa'dim soaneu tunga Ama so.”

²⁹Yesus nae, “Mamahele leona! Te hataholi fo ana la'oela uma na, do saoina na, do tolanoo na, do ina-aman, do ana nala, hu ka nde nalalau-naoono Manetualain,

³⁰soona, hataholi ndia neukose nanabalas la'i dua nai lelek besak ia, ma nai lelek manamai ka, neukose ana hapu maso'da matetu ka ma manaketu basa ta ka.”

³¹Yesus tao nakabubua ana manatunga kasanahulu dua nala mesa kasa boema nae, “Taoafik leona! Te besak ia ita teu leo Yerusalem teu. Nai naa, basa hata fo nabi la sula kana la'eneu Ana Hataholi ka, neukose ana da'di.

³²Neukose ala fen leo hataholi ta Yahudi la neu, fo neukose ala hakinonolin, lakamumulu-lakamamae kana, ma ala mu'di ape neun.

³³Neukose ala tao doi-doson, ma ala taolisan, tehu neu fai katelu na, neukose naso'da falik.”

³⁴Basa sila la ana manatunga nala ta lalela kana faa anak boen. Ana manatunga nala ta bubuluk hata fo Yesus kokola kana. Ala ta bubuluk fa, nanahu hata fo Ana kokola kana ndia sosoa-ndandaan nanabibila-babaak soaneus.

³⁵Lelek Yesus ma hataholi fo manatunga nana sanga nae losa nai Yerikho, te hataholi pokek esa bei nangatuuk fo noke-noke nai eno ka su'u na.

³⁶Lelek namanene hataholi makadotok sila la la'ok seli boema natane nae, “Te beek manda'dik ndia?”

³⁷Lafa'dan lae, “Yesus fo hataholi Nazaret ndia, Ana tunga ia.”

³⁸Boema hataholi pokek ndia nggasi ma nae, “Yesus, Dauk anan! Sue-lai au dei!”

³⁹Hataholi manala'ok manai ulu kala lamanasan de ladenun denge-denge. Tehu ana nggasi napane'e seluk nae, “Dauk Anan! Sue-lai au dei!”

⁴⁰Yesus nate'e ma nadenu hataholi la lo hataholi pokek ndia leo Yesus neu. Lelek ana deka boema Yesus natane nae,

⁴¹“Hata fo o mahiik Au taon soaneu o?” Hataholi pokek ndia nataa nae, “Tuan, au hii ita.”

⁴²Boema Yesus nae, “Metema leondiak soona, mita leona! Hu ka nde o mamahele neu Au, de o hai.”

⁴³No hatematak ndia boe, ana hapu nita, boema ana tunga Yesus, ma noke makasi neu Manetualain. Lelek hataholi makadotok sila la lita dede'ak ndia boema, basa-basas koa-kio Manetualain.