Read Termanu LUKAS 19 Bible Online

LUKAS 19 - Termanu bible

LUKAS 19

¹Lelek Yesus losa Yerikho, boema Ana la'ok nakandoo de Ana la'ok seli kota ndia.

²Nai kota ndia, hapu malanga manasusu bea kamasu'ik esa, na'de Zakeos.

³Ana hii nita see Yesus ndia, tehu hu kande hataholi makadotok nanseli, ma touk ia keke'uanak boema ana ta hapu nita Yesus fa.

⁴Da'di, nalaik nakahuluk hataholi la de ana kae leo ai esa lain neu, fo ela ana hapu nita Yesus fo ba'ihanak seluk bai te, neukose Yesus la'ok tunga ndia.

⁵Lelek Yesus losa ndia boema Ana mete leo lain neu de nae, “Zakeos, kona lai-lai leona! Nana faik ia tao leo bee o Au tuli o umam.”

⁶Zakeos kona lai-lai de no namahokok ana sipo Yesus da'dileo fui nai uman.

⁷Basa hataholi fo mana lita dede'ak ndia, mulai lakamu mu. Lafa'da lae, “Awe! Neu leo lalai nai hataholi ta malole la uman!”

⁸Nai uman, Zakeos fo'a napadeik de nafa'da Yesus nae, “Lamatuak, au hata-heto ngala seli, neukose au fe hii kasa leo hataholi nuu ta-hata ta kala, ma see boe fo au ke'dindiu hain soona, neukose au bae fali kana la'i ha!”

⁹Boema Yesus nafa'da hataholi makadotok sila la nae, “Nai faik ia, hataholi ia no basa uma isi nala nanasoi-tefa basak ma nanafe so'da beuk neme Manetualain mai, nanahu ndia boeo namahele sama leo Abraham fo emi bei ba'ikai mala.

¹⁰ Ana Hataholi ka Ana mai soaneu sanga ma soi-tefa hataholi manala'ok sala eno ka.”

¹¹ Hataholi la bei nenenen Ana kokolak, te Yesus kokolak nakadoo ninik nakandandaak esa. Nana nai lelek ndia Ana deka no Yerusalem so, ma hataholi la laedaenga neukose Manetualain paleta no lai-laik da'dileo Manek nai daebafa ka.

¹²Yesus nae, “Hapu maneana esa neu leo nusa dok neu soaneu so'un da'di manek de basa boema ana fali ma'in.

¹³Ana beita la'o fa te nalo na malalau-maoonon sanahulu, boema ana fes esa na doi isi lilopilas esa. Nafa'das nae, ‘Au la'o soona, meu dangan minik doik ia la.’

¹⁴Tehu nusak ndia lau nala lakamun. Da'di, basa de ana la'o boema ala haitua hataholi nadedenuk neu soaneu nafa'da nae, ‘Ami ta nau hataholi ia da'di ami mane ma fa.’

¹⁵Tehu maneana ndia ka'da ala so'un da'di manek. Basa boema ana fali leo nusa na neu. No lai-laik nalo malalau-maoono nala mai lataa, soaneu ana bubuluk ala hapu bunak de'ubee.

¹⁶Malalau-maoono makasososa ka mai de nae, ‘Tuan, Tuan fe au doi isi lilopila kisak ndia, au akabubuna kana de ana da'di sanahulu.’

¹⁷Tuan ndia nae, ‘Malole so, O malalau-maoono malole! Hu ka nde o bisa nananamahelek nai dede'a ana kala dalek de au fe o da'di mana koasa neu kota sanahulu.’

¹⁸Malalau-maoono kadua ana mai boema nae, ‘Tuan, Tuan fe doi isi lilopila kisak ndia, au akabubuna kana da'di lima so.’

¹⁹Manek ndia nafa'da malalau-maoono ndia nae, ‘Neukose o da'di mana koasa neu kota lima.’

²⁰Malalau-maoono esa ka ana mai de nae, ‘Tuan, Tuan doi na nde ia. Au potin nai lesu dale.

²¹Au bii Tuan, nana Tuan hataholi fo dale matea. Tuan ho'i hata fo nun ta ndia fa, ma tuan ketu-kolu nai mamanak fo tuan ta sele-nggali fa.’

²²Manek ndia nafa'dan nae, ‘O malalau-maoono mangalauk! Neukose au huku o nandaa no o hala-kokolam. O bubuluk au hataholi fo dale matea. Au ho'i hata fo ta au nung fa, ma au ketu-kolu buna-boak nai mamanak fo au ta sele-nggali fa.

²³Metema leondiak soona, tao le'e de o ta pe'da au doi nga leo ban ka neu fa, fo ela metema au fali ma'i nga soona, au hapu sipo falik doik ndia no buna na fa?’

²⁴Basa boema manek ndia nafa'da hataholi manamapadeik manai ndia nae, ‘Ho'i ma falik doik ndia neme hataholi ndia mai, fo fen leo malalau-maoono fo mana manuu doiisi lilopila kasanahuluk ndia neu.’

²⁵Tehu hataholi sila la lae, ‘Tuan, tehu hataholi ndia nanuu sanahulu so.’

²⁶ Manek ndia nataa nae, ‘Mafandendelek! Te hataholi manuu ka so, neukose fe selu kana ba'u ka. Tehu hataholi fo ta nuu ta ka, soona hata fo bei nanuun neukose nanaho'inak neme hataholi ndia mai boe.

²⁷Ma besak ia mo au musu noong fo ala ta nau au da'di sila mane na, leo ia mai. Taomisa la'iesa kasa nai au matang!’ ”

²⁸Yesus nafa'da basa sila la boema, Ana la'ok nai hataholi sila la uluk fo leo Yerusalem neu.

²⁹Lelek ala deka Betfage ma Betania nai Pupuku Zetun-na, boema Yesus nadenu ana manatungan dua leu lakahuluk.

³⁰Yesus nafa'das nae, “Meu leo nggolok manai ita matan eli. Metema emi losa naa soona, neukose emi mita keledei ana esa nanapa'ak nai ndia. Keledei ndia hataholi beita sa'e nita fan. Se'i ma keledei ndia fo minin leo ia mai.

³¹Metema hataholi natane emi nae, ‘Tao le'e de emi se'i ma keledei ndia?’ soona mafa'dan mae, ‘Lamatua ka paluun.’ ”

³²Ana manatunga kaduak sila la leu boema latongo lo basa-basan, nandaa no Yesus hala nafa'da na.

³³Duas bei se'i keledei ana ndia te, manonuu ka nafa'das nae, “Tao le'e de emi se'i ma keledei ana ndia?”

³⁴Duas lataa lae, “Lamatua ka paluun.”

³⁵Boema lini keledei ana ndia leo Yesus neu. Basa boema ala bela ba'du manalu nala neu keledei ana ndia muliha'in lain de, lakasasa'ek Yesus leo lain neu.

³⁶Ana sa'e keledei ndia de Ana la'ok tunga hataholi sila la mata na, boema ala o'du la bua-lo'a nala de ala belas neu enok lain.

³⁷Lelek Yesus hihii nae losa Yerusalem, fo bei nai eno loloek manai Pupuku Zetun-na, te basa ana manatunga makadoton sila la lalo bebou koa-kio Manetualain ma loke makasi neun, nanahu basa manda'di beuk fo lita matan so.

³⁸ Lalo bebou lae, “Nanaba'e-palak ba'eneu Manek fo ana mai no Manetualain na'de na! So'da-molek nai nusa so'da ka, ma kokoa-kikiok neu Manetualain!”

³⁹Hataholi Farisi de'ubee lai hataholi makadotok sila la dalek lafa'da Yesus lae, “Ama Mesen, madenu Ama ana manatunga mala fo bedenge.”

⁴⁰Yesus nataa nae, “Mamahele leona! Te metema hataholi sila la bedenge soona, batu ia la neukose ala eki.”

⁴¹Lelek Yesus boetai deka no Yerusalem, de Ana mete nita kota ndia boema Ana kii.

⁴²Ma nae, “Kasian la'iesa kana, neu o Yerusalem! Malole na seli, metema faik ia o lau mala bubuluk hata fo nini mole-dame! Tehu besak ia, dede'ak ndia nananafunik neme sila mai.

⁴³Te'e-te'e, fai na neukose losa, nai bee o musu noo mala ala tao mana mapanggenggek okofefeok o. Neukose ala lapadei okofeo la o, ma lakaseti la o neme basa bu'uk lala'ena mai.

⁴⁴Neukose ala tao lakalulutuk o sama-sama mo basa o lau mala lala'ena, ma ta hapu batu esa boen, neukose ala po'ilota kana nananakatoto'do nahelek neme mamanana fa, nana o ta taoafik neu faik fo lelek Manetualain mai soaneu Ana soi-tefa nala o fa!”

⁴⁵Basa boema Yesus masok leo Manetualain Uman dale neu de Ana mulai usiheni manadangan manai sila la.

⁴⁶ Yesus nafa'das nae, “Nai Susula Malalaok dale nanasulak nae leo ia: Manetualain nafa'da nae, ‘Au Uma nga neukose ana da'di uma fo mamanak soaneu hataholi a hule-haladoi.’ Tehu emi taon da'di manabonga uma la ndunu na!”

⁴⁷ Tunga faik Yesus nanoli nai Manetualain Uman dale. Malanga ima mala ma mese agama la boema lasi-lasi Yahudi la hii taolisan,

⁴⁸tehu ala ta hapu enok soaneu tao fan, nanahu basa hataholi la ka'da lamanene lahelen, ma lahiik hala-kokolan.