Read Termanu LUKAS 2 Bible Online

LUKAS 2 - Termanu bible

LUKAS 2

¹Nai lelek ndia, Kesel Agustu sa ana po'i paleta fo ela basa nusa Roma lau nala sulak na'dek fo leke dede'u nala.

²Ala leke lau nala dede'u makasososa na nde ia, fo ndia te Kirenius da'di gobelnol nai nusa Siria.

³Basa hataholi manai lelek ndia, leu fo sulak na'de nala nai esa-esak kotan.

⁴Hu ka nde Yusuf ia Dauk tititi-nonosin de ana muse la'o neme Nazaret fo nai Galilea leo Betlehem nai Yudea neu, fo mamanak bongi Mane Dauk-ka.

⁵Yusuf sulak na'de na sama-sama no Maria tonanga na, fo bei kailus.

⁶Nai lelek lai Betlehem boema, Maria fai na losa fo ana bongi.

⁷Ana bongi na ni'iana touanak esa, fo ana ulu na. Ala popoti ni'iana ndia ninik temak, boema langapepe'u kana neu hako esa ha'deaik nai dalek, nana ta hapu mamanak ba'eneu sila, nai kama manai lai na fa.

⁸Nai le'odaek ndia, hapu manafoo la bei lanea bi'ilopo nala nai mook esa nai nusak ndia.

⁹No kaiboik Manetualain ata nusa so'da nala, latu'du ao nala neus, ma masa'a ka nangale'do neme Manetualain mai de nangale'do nalas, boema ala bii lanseli.

¹⁰Tehu ata nusa so'dak ndia nafa'da nae, “Boso bii! nana au mai uni hala malole soaneu emi. Halak fo tao namahoko basa hataholi lala'ena.

¹¹Faik ia nai Dauk kota na, bongi basa Mane Mana Fe So'da ka, fo nde Kristus fo Lamatua ka so.

¹²Ta'du-tanan nde ia: Neukose emi matongo mo ni'iana beuana esa, nanapopotik ninik temak, boema nangape'uk nai hako esa dalek.”

¹³No kaiboik, ata nusa so'dak ndia sama-sama no ata nusa so'da fe'ek makadotok nan fo koa-kio Manetualain. Lafa'da lae,

¹⁴“Koa-kio Manetualain, fo manai lalai mademaina! Ma nai daebafa ka poi na, mole-dame ba'eneu hataholi daebafak, fo mana tao lamahoko Manetualain dale na!”

¹⁵Basa de ata nusa so'da kala la'oelas fo ala fali leo nusa so'da ka leu, boema manafoo sila la esa nafa'da esa nae, “Mai teu leo Betlehem teu, fo ata mete manda'dik fo Manetualain nafa'dan neu ita ndia.”

¹⁶Ala la'o lai-lai leona, boema latongo lo Maria ma Yusuf, ma ni'iana beuana ndia bei nangape'uk nai hako dale.

¹⁷Lelek manafoo la lita ni'iana beuana ndia boema, ala tui hata fo ata nusa so'da kala lafa'dan la'eneu ni'iana beuana ndia.

¹⁸Ma basa hataholi la dodoo doa kana lamanene manafoo sila la tutui na.

¹⁹Tehu Maria pe'da basa dede'ak sila la nai dalen dale, boema ana dudu'a-dodoon.

²⁰Basa boema manafoo sila la ala fali leo mo ka leu, boema ala koa-kio ma lamatutua-lamadedema Manetualain, nanahu basa hata fo lamanenen ma lita basan ndia, nandaa no hata fo ata nusa so'da kala lafa'da ka.

²¹ Basa de ni'iana ndia faik falu, boema ala suna tana. Boema ala foin na'de Yesus, fo nde na'dek fo ata nusa so'da ka nafa'dan te, inan beita nailu fan.

²² Nai lelek Yusuf ma Maria muse tao latetu ha'da tao nalalao ao ka tunga Musa hoholo-lalanen boema, lo ni'iana ndia sama-sama leo Yerusalem neu, fo ala fen neu Manetualain.

²³ Nanahu nai Manetualain hoholo-lalanen dale, nanasulak nae leo ia, “Basa ni'iana touana ulu kala, muse fes leo Manetualain neu.”

²⁴Sila boeo dudu'a fe tutunu-hohotuk, fo nde kateu pasan esa, do kalua ana pasan esa, sama leo nananaketu basak nai Manetualain hoholo-lalanen dale so.

²⁵Lelek ndia nai Yerusalem, hapu hataholi esa na'de Simeon. Hataholi ndia hataholi malole, fo ana bii neu Manetualain, ma ana bei nahani fai na losa ba'eneu Manetualain soi-tefa hataholi Israe la. Manetualain Dula Dale na koasa nan,

²⁶ma Manetualain Dula Dale na nafa'da basan nae, ana beita mate fa, metema beita nita Mane Mana Fe So'dak fo Manetualain helu ka.

²⁷Hu Manetualain Dula Dale na hehela-nonolen, de Simeon masok leo Manetualain Uman dale neu. Nai lelek ndia, Yusuf ma Maria lo Yesus fo bei ni'iana ndia leo dalek neu, soaneu lakalala'ok ito-atok fo agama hoholo-lalanen paleta ka.

²⁸Boema Simeon ho'i na Ni'iana ndia de ana ko'o nan, boema ana koa-kio Manetualain nae:

²⁹“Besak ia ou Manetualain, O tao matetu O hehelu-balatam so. Neme na fo O atam ia mate no mole-dame.

³⁰Nana au ita matang Manasoi-tefa fo O madenun mai so

³¹Manasoi-tefa ndia, O sadia basan soaneu leoina lala'ena:

³² sama leo mangale'dok fo nangale'do na eno ka ba'eneu leoina fe'e kala, soaneu ala mai leu O; fo nde mangale'dok manini ha'da-holomata ba'eneu O hataholi kamahehele mala fo Israel.”

³³Ni'iana ndia ina aman dodoo doa kana, lamanene hata fo Simeon nafa'dan la'eneu sila Ana na.

³⁴Simeon fes baba'e-papalak, boema nafa'da Maria, fo Ni'iana ndia inan nae, “Ni'iana ia, Manetualain hele basan soaneu Ana tao namopo-namate, ma Ana soi-tefa na hataholi Israel ba'u ka. Neukose Ana da'di ta'du esa neme Manetualain mai, ma neukose hataholi ba'u ka ala la'ban nana,

³⁵Ma no enok ndia, tei-aten nanabukahenik. Ma neukose o mesa ma doidoso, nono'ka bai o dale ma nanapapauk ninik tafaina matane.”

³⁶Nai ndia boe hapu nabi inak esa namalasi nanseli so. Na'de Hana, fo Fanuel neme leo Ase ra, anan ndia. Hana saoana basa teuk hitu boema,

³⁷ana da'di inafalu, losa besak ia teun faluhulu ha so. Beita la'iesa fo ana la'oela Manetualain Uma na fa. Lele'do le'odaen nai ndia, fo ana sene-do'ok neu Manetualain, ninik hule-haladoi ma oka ao na.

³⁸Naa, nai faik ndia boe, ana leondia neu boema, ana koa-kio Manetualain, ma ana kokolak la'eneu ni'iana ndia neu basa hataholi fo lahani fai na Manetualain ho'i falik Yerusalem.

³⁹ Yusuf ma Maria tao latetu basa hata fo Manetualain Hoholo-lalanen paleta neu sila boema, ala fali le'us leo Nazaret nai Galilea.

⁴⁰Ni'iana ndia boetai namatua ka, ma boetai balakaik. Manatee tenok nanseli, ma Manetualain sue-lainan ba'u na seli.

⁴¹ Tunga-tunga teuk, Yesus ina aman leu leo Yerusalem leu, fo ala tunga Feta Paskah.

⁴²Ma lelek Yesus teun sanahulu dua boema, leu leo feta ndia sama leo biasa na.

⁴³Basa feta boema ala fali, tehu Yesus bei elan nai Yerusalem tehu ina aman ta bubuluk fa.

⁴⁴Laedaenga Ana tunga nai hataholi bubuak sila la dalek. Ala la'ok basa fai katemak esa besa ka ala sangan nai tolanoo ka'a-fa'di nala, ma hataholi nalelela nala.

⁴⁵Tehu ala ta hapu fan. Da'di ala fali seluk leo Yerusalem fo leu sangan.

⁴⁶Ala sanga basa faik telu dale na boema, besa ka ala hapun nai Manetualain Uman dale. Ana bei nangatuuk namanene mese agama la nanoli nala, fo Ana fe natatanek neus.

⁴⁷Basa hataholi fo lamanene nana, ala dodoo doa kana, nanahu natataa nala la'e-la'e mesan.

⁴⁸Ina aman boeo litan boema, ala dodoo doa kana. Inan nafa'dan nae, “Ana ngonei, taole'e de O tao ami leoiak? Au o, o amam hela-hae manseli no sanga O!”

⁴⁹Yesus nataa nae, “Tao le'e de, ama no ina sanga Au? Ade ama no ina ta bubuluk mae, Au muse nai Au Ama nga Uman dale fa do?”

⁵⁰Tehu ala ta lalelak Yesus natataa na fa.

⁵¹Basa boema Yesus fali sama-sama nos leo Nazaret leu, ma Ana tunga duas paleta na. Inan pe'da basa dede'ak sila la, nai dalen dale.

⁵² Yesus boetai tama namatua ka, ma manatee teno na boetai tama, boema Manetualain sue-lain ma hataholi daebafa ka lahii kana.