Read Termanu LUKAS 20 Bible Online

LUKAS 20 - Termanu bible

LUKAS 20

¹Nai faik esa boema, Yesus nanoli ma Ana tui-benga Hala Malole maneme Manetualain mai neu hataholi manai Manetualain Uman dale. Malanga ima mala ma mese agama la sama-sama lo lasi-lasi Yahudi la ala mai

²de lafa'da Yesus lae, “So'ba mafa'da fe ami, O hak beek tao basa ia la? See ka nde fe O hak ndia?”

³Yesus nataa nae, Au hii atane boe. “So'ba mafa'da fe Au,

⁴See nde fe Yohanis hak fo ana salani? Manetualain do hataholi daebafak?”

⁵Boema ala mulai lakokolaok leon lae, “Metema ita tafa'da tae, ‘Manetualain nde fen hak,’ ka soona neukose nae, ‘Metema leondiak soona, tao le'e de emi ta mamahele Yohanis fa?’

⁶Tehu metema ita tafa'da tae, ‘Hataholi daebafak nde fen hak ka,’ soona basa hataholi la neukose ala pia ita ninik batu, nana hataholi sila lamahele, Yohanis ndia nabi esa.”

⁷Da'di ala lataa lae, “Ami ta bubuluk fa.”

⁸Boema Yesus nafa'das nae, “Metema leondiak soona, Au boeo neukose ta afa'da emi, see nde fe hak neu Au soaneu tao basa ia la fa.”

⁹ Yesus tui hataholi sila la nakandandaak manamai ka nde ia nae, “Hapu touk esa ana sele osi angol esa. Basa boema ana fe osi ndia neu manaso'u belak de'ubee fo ala seban, boema ana la'o leo nusa fe'ek neu fo ana leo nala doo ka nai naa.

¹⁰Lelek fo fai na losa ketu ango la, boema osi lamatuak ndia haitua malalau-maoonon neu leo manaso'u bela kala soaneu ana sipo baba'e na. Tehu manaso'u belak sila la fepa malalau-maoono ndia de ladenun ana fali no lima louk.

¹¹Boema osi lamatuak ndia haitua seluk malalau-maoono fe'en esa neu. Tehu malalau-maoono ndia boeo ala fepan ma manaso'u belak sila la lakamumulu-lakamamae kana, boema ladenun ana fali no lima louk.

¹²Basa boema osi lamatuak ndia haitua malalau-maoono katelu a neu. Tehu malalau-maoono ndia boeo, manaso'u belak sila la fepan, ma ala tu'un leo osi deak neu.

¹³Mate'e na boema, osi lamatuak ndia nae, ‘Au muse tao beek bai? Neukose au adenu au ana susue nga neu. Tao leo bee o neukose ala fe ha'da-holomata neun!’

¹⁴Tehu lelek fo manaso'u belak sila la lita osi lamatuak ndia ana na boema, esa nafa'da esa nae, ‘Ia nde hapu pusaka nala. Mai fo taotisan leona, fo ela ita hapu pusaka nala.’

¹⁵Boema ala hela lon leo osi deak neu de ala taolisan.” Boema Yesus natane nae, “Naa, metema osi lamatuak ndia fali ma'in soona, neukose ana tao manaso'u belak sila la le'e?

¹⁶Tao leo bee o neukose ana ma'i fo ana taonisa manaso'u belak sila la, fo ana fe osi ndia leo manaso'u bela fe'ek neu.” Lamanene dede'ak ndia boema hataholi sila la lafa'da Yesus lae, “Ta makandondook!”

¹⁷ Yesus nanganalos boema nae, “Metema leondiak soona, Susula Malalao ka lalanen ia, sosoa na beek? ‘Batu fo tuka uma la ta pake fan so, ana da'di basa batu makasososak so.’

¹⁸Basa hataholi fo manatu'da leu batu ndia lai na, neukose lakalulutuk, ma batu ndia napaluni na see soona, neukose ana da'di dae sopuk.”

¹⁹Mese agama la ma malanga ima mala bubuluk lae nakandandaak ndia, Yesus tuin la'e sila. Hu ndia de ala hii ho'u lan hatematak ndia boe, tehu ala bii hataholi makadoto kala.

²⁰Da'di ala sanga fai lelak malole. Ala solok hataholi soaneu ala tao da'dileo hataholi ndoos, fo ladenu hataholi sila la lakahihi'ik Yesus ninik natatanek, fo ela ala hapu fen leo Gobelno la koasan dale neu.

²¹Boema hataholi fo nanasolo basak sila la lafa'da Yesus lae, “Ama Mesen, ami bubuluk mae, basa hata fo Ama mafa'dan ma manolik sila la tete'e ka. Ami boeo bubuluk, Ama nanoli no mangale'dok la'eneu Manetualain hihii-nanaun soaneu hataholi daebafa ka, nana Ama ta mete matak fa.

²²Hu ndia de, so'ba Ama mafa'da fe ami, tunga ita agama na nakanenete na, bole bae bea leo Kese la neu do ta?”

²³Tehu Yesus bubuluk sila keke'din ndia. Hu ndia de nae,

²⁴“So'ba matu'du Au, doi isi lilofulak esa. Yesus sipo nan boema natanes nae, See mata aon ma see na'den ia?” Boema lae, “Kese la!”

²⁵Yesus nafa'das nae, “Metema leondiak soona, Kesel nuun bee soona, fen leo Kese la neu, ma Manetualain nuun bee soona, fen leo Manetualain neu.”

²⁶Nananitak nai hataholi makadotok sila la matan, ala ta hapu Yesus salan faa anak boen. Ka'da ala bedenge ma bafa nala bee poo neu Yesus natataan ndia.

²⁷ Hataholi de'ubee leme Saduki nakabubua na mai leo Yesus mai. (Hataholi sila la nde bee na nakabubuak fo hahapu nala lae hataholi manamate kala, neukose ta laso'da falik so'on.) Ala latane Yesus lae,

²⁸ “Ama Mesen, Musa sulak hoholo-lalanek ia soaneu ita: Metema touk esa maten te anan ta, soona tolanoo na muse sao na inafalu ndia, fo ela ana bongi fe hataholi manamatek ndia tititi-nonosik.

²⁹Hapu hai hataholi hitu tolanoo kala. Ulu ka saoana boema maten te anan ta.

³⁰Basa boema ana kadua sao na inafalu ndia, tehu ndia boeo maten te anan ta.

³¹Dede'a ka sama ana da'di neu tolanoo katelu boe ma leondiak nakandondoo losa ana kahitu a.

³²Mate'e na inak ndia boeo maten.

³³Naa, losa faik fo hataholi manamate kala laso'da fali ka, see ka nde sao inak ndia? Nana hataholi kahituk sila la ala sao inak ndia so.”

³⁴Yesus nataa nae, “Hataholi maso'dak besak ia la ala saoana,

³⁵tehu hataholi fo nandaa soaneu nanatao naso'da falik neme mamate sa mai, ma naso'da nai le'do fai manamai ka, ala ta saoana so'on.

³⁶Heheo-hihilun sama leo ata nusa so'da ka, ma ala ta hapu mate fa. Sila nde bee na Manetualain ana nala, nana sila nanatao naso'da falik neme mamate sa mai so.

³⁷ Musa mesa kana nafa'da no mangale'dok nae, hataholi manamate kala neukose nanatao naso'da falik. Nai susula lii na dalek, la'eneu makatemak fo manapilak ndia, ana seseik Lamatua ka da'dileo: ‘Abraham Manetualai na, Isak Manetualai na, ma Yakob Manetualai na.’

³⁸Naa, Manetualain ndia, hataholi manamate kala Manetualain ta ndia fa! Te hataholi maso'da kala Manetualain ndia! Nana soaneu Manetualain de basa hataholi la laso'da.”

³⁹Mese agama de'ubee lae, “Ama Mesen natataa na lole na seli.”

⁴⁰Hu ndia de, ala ta lapalani latane seluk Yesus hata-hata so'on.

⁴¹Yesus natanes nae, “Tao leo beek de hapu nananafa'dak nae Mane Mana Fe So'da ka, Dauk tititi-nonosin?

⁴² Te see ko na Dauk mesa kana nafa'da nai susula Mazmu ra dalek nae, ‘Manetualain nafa'da au Lamatua nga nae: Mangatuuk mai Au boboa kona nga,

⁴³losa Au tao a O musu noo mala lakaluku-lakatele leu O.’

⁴⁴Da'di metema Dauk seseik Mane Mana Fe So'dak ndia nae, ‘Lamatuak,’ soona hapu nai bee, Dauk tititi-nonosin Ndia?”

⁴⁵Lelek hataholi la bei nenene Yesus kokolak, te nafa'da ana manatunga nala nae,

⁴⁶ “Masanene'dak soaneu mese agama la. Ala nau bela'o lo ba'du manalun fo manaluina nala, ma ala nau nanafe ha'da-holomata nai hataholi ba'u matan. Ala nau mamanak mahada-holomatak nai uma mamasok dale ma nai feta-dote.

⁴⁷Ala ke'dindiu inafalu la fo ala loso la uma nala. Ma soaneu lafunilisa sila tatao-nono'i mangalaun ndia de, ala hule-haladoi soona, nalu na seli. Hataholi matak leo ia kala, neukose huhuku nala bela ka!”