Read Termanu LUKAS 22 Bible Online

LUKAS 22 - Termanu bible

LUKAS 22

¹ Feta Loti Ta Pake Lalu Teik fo loken lae Paskah, ana deka so.

²Malanga ima mala ma mese agama la bei sanga enok soaneu taolisa Yesus no denge-dengek, nanahu ala bii hataholi makadoto kala.

³Basa boema Nitu koasa na Yudas fo loken lae Iskariot boe, fo nde hataholi esa neme Yesus ana manatunga kasanahulu dua nala mai.

⁴Hu ndia de Yudas neu de nakokolaok no malanga ima mala ma basa malanga manamanea Manetualain Uma na, la'eneu tao leo beek fo ana hapu fe Yesus neus.

⁵Ala lamahoko lanseli ma laheluk soaneu fen doik.

⁶Yudas boeo nakaheik de ana mulai sanga fai loak fo ana fes Yesus no denge-dengek.

⁷Fai na losa fo nai Feta Loti Ta Pake Lalu Tei ka dalek, nae bi'ilopo Paskah nanado'dok so.

⁸Boema Yesus nadenu Petrus ma Yohanis nae, “Meu leona, fo sadia ita nana'a Paskah na.”

⁹Latane lae, “Ama nau ami sadian nai bee?”

¹⁰Yesus nataa nae, “Nai lelek emi masok leo kota meu, te touk esa ana bei nini nggusi esa oe nai dalek, neukose natongo no emi. Tungan leo uma fo ana maso ka dalek meu,

¹¹ma mafa'da uma lamatuak ndia mae: Mesen nae, ‘Mamanak nai bee fo Au o Au ana manatunga ngala mi'a nana'a Paskah?’

¹²Neukose uma lamatuak ndia natu'du fe emi, kama matua esa nai uma lain no lou-laan mandaik. Soona sadia basa-basan neu ndia leona!”

¹³Boema Petrus ma Yohanis leu leona, boema ala hapu basa-basan nandaa sama leo hata fo Yesus nafa'da ka. Boema ala sadia nana'a Paskah leona.

¹⁴Lelek fai na losa soaneu la'a nana'a Paskah, Yesus nangatuuk sama-sama no basa ana manatunga nala nai mamana mei malalao ka.

¹⁵Boema Yesus nafa'das nae, “Au ahiik anseli u'a nana'a Paskah ia sama-sama o emi, beidai Au beita doidoso fa!

¹⁶Nana te'e-te'e, neukose Au ta u'a ia seluk losa nangatuu mei ia sosoa-ndandaan nananafa'dak nai Manetualain Daebafa Beu na dalek.”

¹⁷Basa ndia boema, Yesus so'uk nggalaa Ango la leo lain neu, boema Ana hule-haladoi noke makasi neu Manetualain, basa boema nae, “Ho'i ma ia, fo baba'en leona!

¹⁸Bubuluk leona, te mulai besak ia, neukose Au ta inu angol ia so'on, losa fai na Manetualain da'di Manek ma Mana Koasa no matetuk.”

¹⁹Basa ndia boema Yesus ho'i na loti a. Ma Ana hule-haladoi noke makasi basa neu Manetualain, Ana tete'i loti ndia ninik lima na, boema Ana fen neu ana manatunga nala ma nae, “Ia nde Au ao paa nga fo nanafe henik soaneu emi. Tao-no'i ia leona, soaneu mafandendelek Au.”

²⁰ Leondiak boe, la'a basa boema Ana fe nggala angol ndia neu ana manatunga nala ma nae, “Nggalas ia nde bee na Manetualain hehelu beu na, fo nanapaku nisak ninik Au daa nga, daak fo nanapo'ahenik soaneu emi.”

²¹ “Tehu, mete leona, Te hataholi mana ke'dindiu Au a, nai ia boe!

²²Ana Hataholi ka memak neukose ana mate, sama na leo Manetualain naketu basan so. Tehu soe ba'eneu hataholi fo manake'dindiu nana!”

²³Boema ana manatunga nala esa mulai natane esa nae, see ka nde nai ita basa-basa tala ia nde neukose tao dede'ak ndia.

²⁴ Nai Yesus ana manatunga nala dalek, nale'a ka ana moli da'di la'eneu see ka nde neme sila nananafa'dak matua lena.

²⁵ Yesus nafa'das nae, “Leoina fo mane nala ta lalelak Manetualai na, ma manakoasa nala fo lokes lae, ‘Mana Tulu-Fali Lau na, ala da'di tuan neu lau nala.’

²⁶ Tehu emi ta bole leondiak fa. Nasafali na, hataholi fo matuaina nai emi tala'da, muse ana da'di sama leo kome'do ana, ma mauli-malangan soona, muse ana da'di sama leo malalau-maoono.

²⁷ See ka nde matua lena: hataholi fo nangatuuk na'a nai mei a, do hataholi manamalalau-maoono nana? Tao leo bee o hataholi fo manamangatuuk ndia. Tehu Au nai emi tala'da da'dileo malalau-maoono.

²⁸Nai basa Au toto'a-sosotang lala'ena dalek, emi sama-sama mo Au tataas esa.

²⁹Sama leo Ama ka fe basa Au hak soaneu paleta, leondiak boe neukose Au fe hak ndia neu emi boe.

³⁰ No enok ndia emi boeo tunga mamahoko-setelee mo Au, nai lelek Au da'di Mane ka. Ma neukose emi mangatuuk nai kandela manek kasanahulu dua kala lain, soaneu paleta Israel leoina kasanahulu dua nala!”

³¹“Simon, Simon. Mamanene leona! Nitu fe basa loak soaneu so'ba-su'di emi, sama leo mana tao tina osi a ana tao kofe'ek gandu ma neme lou na mai, nalosa malole kofe'ek neme mangalau ka mai.

³²Tehu Au hule-haladoi basa soaneu o so Simon, fo ela o namahe le ma boso kou-mosa. Ma metema o fali leo Au mai soona, o muse matetea-mahehele o tolanoo mala.”

³³Petrus nataa nae, “Lamatuak, au sadia masok bui ma mate sama-sama o Lamatua ka!”

³⁴Yesus nae, “Mamahele leona Petrus, te manu a beita kokoa faik ia fa, te o malelesi Au la'i telu so.”

³⁵ Basa ndia boema Yesus nafa'das nae, “Makahulu na lelek fo Au adenu emi no ta fe emi loak mini mamana bua-lo'as, alukosu, do ta'bueis fa, ade emi to'a-ta hata-hata do?” Lataa lae, “Ta!”

³⁶Yesus nae, “Tehu besak ia see nanuu mamana bua-lo'as, do alukosu soona, muse ho'i ninin, ma see tafainan ta soona, muse nase'o ba'du manalu na fo asa tafaina.

³⁷ Nana, mamahele leona, te Susula Malalao ka lalane na nde ia nalii nae leo ia, ‘Lafa'da lae, Ana da'dileo hataholi mangalauk esa,’ dede'ak ndia muse ana da'di neu Au aoinang lain. Nana hata fo nanasulak nai Susula Malalaok dale la'eneu Au, besak ia ana da'di.”

³⁸Yesus ana manatunga nala lafa'da lae, “Lamatuak, mete mitak nai ia, hapu tafaina dua.” Yesus nataa nae, “Hahae leona!”

³⁹Yesus la'oela kota ndia de sama leo biasa na neu leo Pupuku Setu na neu. Ana manatunga nala boeo tunga lon.

⁴⁰Lelek ala losa mamanak ndia, boema nafa'das nae, “Hule-haladoi leona, fo ela emi boso nanaso'ba-su'dik.”

⁴¹Basa boema Ana neu leo dodoo ana faa neme ana manatunga nala mai, fafa'kama dodoo na batu tatapak esa, boema Ana senek de Ana hule-haladoi,

⁴²nae, “Ama, metema bole soona, madook doidosok fo Au muse la'ola'din ia neme Au a mai leona. Tehu boso tunga Au hihii-nanaung, te tunga ka'da Ama ka hihii-nanaun.”

⁴³Boema ata nusa so'dak esa mai de natetea-nahehelen.

⁴⁴Yesus dale na susa nanseli, nalosa Ana boetai te'e-te'e hule-haladoi. Puse na sama leo daa ka, ana titi leo dae lain neu.

⁴⁵Yesus hule-haladoi basa boema Ana fali seluk leo ana mana tunga nala neu. Ana hapu nas ala sungu, nanahu dale nala he'di lanseli.

⁴⁶Boema nafa'das nae, “Tao le'e de emi sungu? Fo'a leona, fo hule-haladoi, fo ela emi boso hapu soso'ba-susu'dik.”

⁴⁷Lelek Yesus bei kola-kola te, hataholi bubuak esa ala mai. Yudas fo Yesus ana manatungan esa nde no hataholi sila la. Basa boema Yudas neu deka no Yesus de ana de'in.

⁴⁸Yesus nafa'dan nae, “Yudas, ade no dede'ik ndia de o nau ke'dindiu Ana Hataholi ka do?”

⁴⁹Lelek Yesus ana manatungan mana sila la lita hata fo neukose ana da'di, boema lafa'da lae, “Lamatuak, neme na fo ami meu sapu malas ninik tafaina.”

⁵⁰Boema hataholi esa neme sila dalek mai, sapu na imam matua ina ata na ninik tafaina de nalosa ketuheni di'idoo kona na.

⁵¹Tehu Yesus nafa'da nae, “Hahae leona!” Boema nafaloe hataholi ndia di'idoo na, ma nakahahai kana.

⁵²Basa boema Yesus nafa'da malanga ima mala ma malanga matua ina mana manea Manetualain Uma na, boema lasi-lasi Yahudi fo ala mai lai ndia soaneu ala ho'u nana nae, “Ade Au ia hataholi mangalauk, de nalosa emi mai no tafaina ma ai keke'uk soaneu ho'u Au do?

⁵³ Tunga faik Au o emi nai Manetualain Uman, te emi ta ho'u Au fa. Tehu fai na nde ia soaneu emi, faik fo nai bee makahatu ka ana koasa.”

⁵⁴Ala ho'u la Yesus de lon leo imam matuaina uman neu. Petrus tunga neme doo ka mai.

⁵⁵Lakafu'ik ha'i nai uma ndia so'da na tala'da heon, boema Petrus neu de nangatuuk sama-sama no hataholi mana mangatuuk okofeo la ha'i ndia.

⁵⁶Malalau-maoono inak esa nita Petrus nangatuuk nai ha'i bubuak ndia boboa na. Boema malau-maoono inak ndia ana taoafik matalolole Petrus, basa boema nae, “Hataholi ia boeo, na'kasa sama-sama no Yesus!”

⁵⁷Tehu Petrus nalelesi. Nafa'da nae, “Au ta alelak hataholi ndia makandondook fa!”

⁵⁸Doo-doo faa boema, hataholi fe'ek esa nita Petrus boema nae, “O boeo hataholi esa neme hataholi sila la mai hetu!” Tehu Petrus nataa nae, “Ta, au ta!”

⁵⁹Fafa'kama basa li'u esa boema hataholi fe'ek esa seluk nita Petrus, boema ana kokolak napane'e nae, “Memak hataholi ia Yesus ana manatungan, nana ia boeo hataholi Galilea!”

⁶⁰Tehu Petrus nataa nae, “Tou nei, o kokolak mae le'e ndia, au ta bubuluk fa!” Hatematak ndia boe fo Petrus bei kola-kola, te manu kokoa.

⁶¹Yesus boeo lipa leo dea neu de nanganalo Petrus. Boema Petrus nafandele na Lamatua ka nafa'da basan nae, “Manu beita kokoa faik ia fa, te o malelesi Au la'i telu.”

⁶²Boema Petrus kalua neme ndia mai de ana kii ke'du-ke'du.

⁶³Hataholi-hataholi fo bei lanea Yesu sa, ala hakinonoli ma fefepa-popokon.

⁶⁴Ala potiketu mata na de latanen lae, “So'ba neuk su'dik, see ka nde fefepa-popoko O a?”

⁶⁵Ala kokolak dede'a-kokola nakamumulu-nakamamaek ba'u ka seluk soaneun.

⁶⁶Balahaa fafaik boema, lasi-lasi Yahudi la, malanga ima mala, ma mese agama la lakabubua, boema lo Yesus leo sila Mana Maketu-Mala'di Agama Matua Ina na matan neu.

⁶⁷Lafa'dan lae, “Mafa'da fe ami, ade O ia Mane Mana Fe So'da ka do?” Yesus nataa nae, “Leomae Au afa'da emi boeo, neukose emi ta mamahele fa.

⁶⁸Ma leomae metema Au atane emi boeo, neukose emi ta mataa fa.

⁶⁹Tehu mulai besak ia, neukose Ana Hataholi ka nangatuuk nai Amak Fo Mana Koasa Matua Ina boboa kona na.”

⁷⁰Tutika basa-basas lahala lae, “Metema leondiak soona, O ia Manetualain Anan do?” Yesus nataa nae, “Emi halam ndia.”

⁷¹Boema lafa'da lae, “Ta paluu seluk sakasii so'on! Ita tamanene matan neme bafa na mai so!”