Read Termanu LUKAS 23 Bible Online

LUKAS 23 - Termanu bible

LUKAS 23

¹Basa hataholi manai sidang ndia dale ka, ala fo'a lapadeik de lo Yesus neu nataa Pilatus.

²Ala losa ndia boema, ala mulai kalaa kana lae, “Ami hapu ma Hataholi ia tao na lau nala latofa-latalak. Ana dudungu-papau hataholi la fo ala boso bae bea leo Kese la neu, nana nafa'da nae, Ndia nde bee na ami Mane ma, Manek Mana Fe So'dak fo Manetualain helu ka.”

³Boema Pilatus natane Yesus nae, “Tete'e ka hataholi Yahudi la Mane na nde O do?” Yesus nataa nae, “O halam ndia.”

⁴Boema Pilatus nafa'da malanga ima mala ma hataholi makadotok sila la nae, “Au ta hapu Hataholi ia salan faanak boen soaneu huku fan.”

⁵Tehu lakaseti lahele seluk lae, “Ana dudungu-papau basa hataholi manai Yudea la lala'ena ninik nanoli na. Makasososa na ana dudungu-papau hataholi la Galilea la, de besak ia ana losa nai ia so boe.”

⁶Lelek Pilatus namanene halak ndia boema natane nae, “Ade hataholi ia, hataholi Galilea do?”

⁷Lafa'da basa Pilatus lae, Yesus da'di neme nusak fo nai Herodes koasa na dae boema, Pilatus haitua Yesus leo Herodes neu, fo lelek ndia nai Yerusalem boe.

⁸Lelek fo Herodes nita Yesus, boema namahoko nanseli nanahu namanene ala kokolak Yesus na'de na doo ka so, de ana hii nitan. Namahena ana hapu nita Yesus tao manda'di beuk.

⁹Hu ndia de Herodes fen natatanek ba'u ka, tehu Yesus ta nataa makandondook fa.

¹⁰Boema malanga ima mala ma mese agama la leo mata leu de ala kalaak Yesus no mahelek.

¹¹Boema Herodes ma solda'du nala, ala mulai hakinonoli ma lakamumulu-lakamamaek Yesus, boema ala papaken papake matua-madema, basa boema Herodes haitua falik-kana leo Pilatus neu.

¹²Makahulu na Herodes no Pilatus musu kala, tehu faik ndia boema, duas da'di tia-laik leona.

¹³Pilatus nalo nakabubua malanga ima mala, ma basa mauli-malanga nala, ma lau nala,

¹⁴boema nafa'das nae, “Emi mo Hataholi ia leo au mai ma emi mafa'da mae, Ana tao na hataholi la latofa-latalak. Besak ia au palisa kana nai emi matam so, tehu au ta hapu tatao-nono'i mangalauk esa boen, nandaa no dede'ak fo emi kalaa kana fa.

¹⁵Herodes hahapu na boeo leondiak, hu ndia de ndia boeo haitua falik Yesus leo ami mai. Hataholi ia ta tao hata-hata esa boen, fo nandaa hukun niinik huhuku mamates fa.

¹⁶Hu ndia de ka'da au filu kana, fo basa soona au po'in.” [

¹⁷Pilatus kokolak nae leondia nanahu, tunga-tunga feta Paskah soona, biasa na nadale malole fo ana po'i hataholi nanahukuk esa nandaa no hataholi Yahudi la nonoke na.]

¹⁸Tehu basa hataholi mana makabubuak manai sila la, ala eki lae, “Taomisan! Fo po'i fe ami Barabas!” (

¹⁹Barabas ia nanahukuk nana tasibu fo manda'dik manai kota ma nanahu kanisa ka.)

²⁰Pilatus nau po'i Yesus, hu ndia de ana kokolak la'iesa seluk neu hataholi makadotok sila la.

²¹Tehu ala eki lae, “Lona-nggangen! Lona-nggangen!”

²²Boema soaneu kala'i telu na Pilatus nalos nae, “Tehu Ana tao sala beek? Au ta hapu salan esa boen fo nandaa hukun ninik huhuku mamates fa! De neukose ka'da au filu kana fo au po'in.”

²³Tehu ala eki lini momopo-mamate nala lae, muse lona-nggange Yesus. De mate'e na, sila eeki na nini buna-boak.

²⁴Boema Pilatus naketu fo ana tao natetu sila hala nonoke na,

²⁵de ana po'i hataholi fo sila loke ka, fo nde hataholi nanahukuk nanahu ana tao tasibu ma kanisak. Basa boema ana fes Yesus fo ala taon tunga sila hihii-nanaun.

²⁶Boema malanga ima mala, mauli-malanga nala lo Yesus fo leu lona-nggangen. Nai eno tala'dak, latongo lo hataholi esa na'de Simon fo neme Kirene mai, ndia te ana sanga masok leo kota neu. Boema solda'du la tahan lan de lakasetin fo ana lu'a ai nggange ka tunga Yesus dea na.

²⁷Hataholi makadotok la'ok lai Yesus dea na, fo nai dalek hapu inak de'ubee boe. Inak sila la kii makaleleu Yesus.

²⁸Tehu Yesus lipa leo dea neu de nafa'das nae, “Ina Yerusalem-mala lemin! Boso kii makaleleu Au. Kii-makaleleu emi aoina mala mesa kana ma emi ana mala.

²⁹Nana fai na neukose ana losa fo hataholi a nafa'da nae, ‘Maua-manalek nanseli ba'eneu inak fo beita lailu lita, ina ana ta kala, ma inak fo beita lasu'u lita ni'iana beuana fa!’

³⁰ Nai lelek ndia nde neukose hataholi a nafa'da lete kala nae, ‘Mapaluni ma ami leona!’ Ma neu pupuku kala lae, ‘Mapaluni mala ami leona!’

³¹Nana metema soaneu aihuk fo bei maso'da ka, hataholi a taon sama leo iak so, na muda hata no ai hu tuu ka bai!”

³²Lo hataholi fe'ek dua fo ala huku lisas sama-sama lo Yesus boe. Hataholi kaduak sila la hataholi mangalau kala.

³³Ala losa mamanak fo loken lae, “Langadui ka”, boema ala lona-nggange Yesus no hataholi mangalauk kaduak sila la, de esa nai Yesus boboa kona na, ma esa seluk nai boboa kii na.

³⁴ Boema Yesus hule-haladoi nae, “Ama, fe do'o do ampon neu hataholi sila la! Te ala ta bubuluk hata fo ala tao fa.” Basa boema ala tu'u batu fo ala baba'e Yeus bua papake nala.

³⁵ Hataholi la lapadeik lai ndia fo lanilu. Ndia te lasi-lasi Yahudi la hakinonoli Yesus lae, “Ana soi-tefa na hataholi fe'e kala so. Naa, neme na fo besak ia Ana soi-tefa na aoina, metema Mane Mana Fe So'dak fo Manetualain hele ka, te'e-te'e nde Ndia!”

³⁶ Solda'du la boeo hakinonolin. Leu deka lon de ala fen angol makeis,

³⁷boema lae, “Metema hataholi Yahudi la Mane na nde O soona, soi-tefa ma aoina ma leona!”

³⁸Nai Yesus ai nggange na nisi lai na ala sulak dede'a ka nde ia nae, “Hataholi Yahudi la Mane na nde Ia.”

³⁹Hataholi mangalauk fo nanalona-nggangek nai ndia, esa nakamumulu-nakamamaek Yesus. Nafa'da nae, “Mane Mana Fe So'da ka nde O hetu? Naa, soi-tefa ma O aoina ma ami leona!”

⁴⁰Tehu hataholi mangalauk esa ka ana ka'i nonoon ndia nae, “Ade o ta bii Manetualain fa do? O nanahukuk sama-sama leo Ndia boe.

⁴¹Ka'da ita dua huhuku na, memak nandaa no ita tatao-nono'in. Tehu Hataholi ia salan ta makandondook!”

⁴²Boema nafa'da Yesus nae, “Mafandendelek au leona, metema O fali ma'i ma da'dileo Manek!”

⁴³Yesus nafa'dan nae, “Mamahele leona! Faik ia neukose o sama-sama mo Au nai Firdaus dalek.”

⁴⁴Fafa'kama li'u sanahulu dua le'dohana na, boema le'do ta nasalaa so'ok, de basa nusak ndia lala'ena makahatuk nanseli losa li'u telu le'donoso na.

⁴⁵ Tema maloa fo nanalonak nai Manetualain Uman dale a, tati ba'en neu biak dua.

⁴⁶ Boema Yesus nggasi napane'e nae, “Ama! Au fe Au ao paa samaneng leo O limam dale neu!” Ana kokolak basa nae leondia boema maten.

⁴⁷Lelek malanga solda'du matuaina nita basa hata fo ana da'di ndia boema, ana koa-kio Manetualain. Boema nafa'da nae, “Tete'e ka, Hataholi ia salan ta!”

⁴⁸Hataholi makadotok fo mana mai lanilu lai ndia, lita manda'dik ndia. Basa-basas fali no lasasale dale lanseli.

⁴⁹ Basa Yesus hataholi nalela nala, nai dalek ina-inak fo manatungan neme Galilea mai a, lapadeik leme doo ka, de lita basa manda'dik sila la.

⁵⁰Hapu touk esa na'de Yusuf, bongi nai kota Arimatea nai nusa Yudea. Hataholi ia hataholi malole, fo hataholi la fe ha'da-holomata neun. Ndia boeo bei nahani talu-talu no Manetualain fai na Ana mulai paleta da'dileo Mane ka. Leomae hataholi ia lima eik neme Manamaketu-Mala'di Agama Matua Ina mai, tehu ana ta sipok manamaketu-mala'di kala nakeketu na ma tatao-nono'i nala fa.

⁵¹

⁵²Yusuf ia neu noke Pilatus fo ana fe Yesus popola na leo ndia neu fo neu natoi-natonon.

⁵³Basa boema neu nakona na Yesus popola na neme ai nggangek lain mai de ana popotin ninik tema fula mamates. Basa ndia boema, neu natoin nai bolo mamates esa, ana kalin nai pupuku batu esa lain. Bolo mamates ndia nanapake beitak.

⁵⁴Faik ndia fai limak, fo fai Saba ta sanga nae mulai ndia so.

⁵⁵Basa inak fo manamaik lo Yesus leme Galilea mai a, ala tunga Yusuf de lita late sa mamana na. Ma lita Yesus popola na ala pe'da taon leo beek nai bolok dale.

⁵⁶ Basa boema ala fali de ala sadia bunga-henasina ma mina kaboominik fo ala pisi neu Yesus popola na. Nai fai Saba ta ala hahae ue-le'dis, fo tao tunga agama hoholo-lalanen.