Read Termanu LUKAS 24 Bible Online

LUKAS 24 - Termanu bible

LUKAS 24

¹Nai fai mamasok fafaiana na boema, inak sila la lini ala sadia la bunga henasina la de leu leo lates leu.

²Ala losa lates de ala mete neu te, batu fo ala tatanan neu late sa, nanalolihenik so.

³Boema lakandoo leo lates dale leu de, ala mete te Lamatuak Yesus popola na ta nai ndia so'on.

⁴Ala bei lapadeik ma lapangamak dudu'a-dodoo dede'ak ndia, te kaiboboianak hataholi dua, bua-lo'a papake nala fula mangadilak, lapadeik deka los.

⁵Boema ala bii lanseli de ala sene-do'o kasa. Ndia te hataholi kaduak sila la bei kokolak los lae, “Taole'e de emi sanga maso'da ka nai hataholi manamate kala tala'da?

⁶ Ta nai ia so'on te naso'da falik so. Mafandendelek hata fo nafa'da basan neu emi, nai lelek fo bei neme Galilea,

⁷nafa'da nae, ‘Muse ala fe Ana Hataholi ka leo hataholi masala-masingo kala leu fo ala lona-nggangen, tehu neu fai katelu soona, neukose naso'da falik.’ ”

⁸Boema inak sila la lafandele la Yesus hala-kokola nala.

⁹Basa de ala fali ma'is leme lates mai boema, ala tui basa manda'dik ndia neu hataholi nadedenu kasanahulu esa nala ma ana manatunga fe'e nala.

¹⁰Ina-inak fo manatui basa dede'ak sila la neu Yesus ana manatunga nala sila nde: Maria Magdalena, Yohana ma Maria fo Yakobis inan, boema ina fe'e kala, fo ala sama-sama los.

¹¹Tehu ana manatungan sila la laedaenga inak sila la ka'da tui dede'a manda'di tak sila, de ta lamahele inak sila la tutui na fa.

¹²Tehu Petrus fo'a de nalai-nalai mesan leo lates neu. Ana losa boema nakatele de ana titino leo lates dalek neu, boema nita ka'da tema mamate sa nai ndia. Petrus dodoo doa kana, boema ana fali ne'un no natatanek ba'u ka nai dalen dale, la'eneu hata fo ana da'di so.

¹³Bei nai faik ndia dalen-na boe, Yesus ana manatungan dua bei bela'o leo nggolok esa na'de Emaus, fafa'kama kilo sanahulu esa dodoo na neme Yerusalem mai.

¹⁴Duas bei bela'o ma ala kokolak la'eneu basa dede'ak fo manada'di basak ndia.

¹⁵Duas bei bekola ma latuka aafik te Yesus mai de ala la'ok sama-sama.

¹⁶Lita Yesus, tehu hata esa tao nalas ta lalela kana fa.

¹⁷Boema Yesus natanes nae, “Emi dua kokolak beek ndia?” Tutika late'e tehu mata-pana nala manasusak.

¹⁸Boema hataholi kaduak sila la esa na'de Kleopas, natane Yesus nae, “Ade Ama hataholi manamai esa nai Yerusalem de, ta bubuluk manda'dik fo ana da'di nai fai-fai mate'ek ia la fa do?”

¹⁹Boema Yesus natanes nae, “Manda'di beek ndia?” Boema lataa lae, “Manda'dik fo ana da'di neu Yesus fo hataholi Nazaret ndia. Hataholi ndia Nabi esa. Hala-kokolan ma tatao-nono'in nanuu koasa matuaina, nau tunga Manetualain mata memete na, do tunga basa hataholi daebafa ka mata memete na boe.

²⁰Malanga ima mala ma ita lasi leoina nala fehenin fo ala hukulisan, ma ala lona-nggangen!

²¹Te se'ko na ami mamahena mae, neukose Hataholi ndia nde soi-po'i leoina Israe la! Dede'ak ndia ana da'di basa faik katelu ia so.

²²Nakalenak bai, ami inam de'ubee ala tao langgengek ami. Bei fafaianak nanseli te leu leo lates leu,

²³tehu ta lita popola na nai lates dale fa. Boema ala fali ma'is de lafa'da ami lae, sila lita ata nusa so'da kala de latu'du ao nala ma lafa'da lae, Yesus naso'da falik so.

²⁴Boema ami hataholim de'ubee lalai leo lates leu, de lita hata fo inak sila la lafa'da ka, memak leondiak, ka'da ta lita Yesus fa.”

²⁵Boema Yesus nafa'das nae, “Hei, emi ia beita malelak ma emi dale ma tea na seli soaneu mamahele basa hata fo nabi la lafa'da basa ka so!

²⁶Ade Mane Mana Fe So'da ka muse Ana la'ola'di nakahuluk basa doidosok sila la, fo besa ka nanatao nandela-nasa'ak do ta?”

²⁷Basa boema Yesus nafa'da mangalele'dos basa hata fo nanasulak nai Susula Malaok dale la'eneu aoina na, mulai neme Musa susula nala ma basa nabi la susula na.

²⁸Ndia te leu leo nggolo ka, ana deka so. Yesus tao nono'ka bai de Ana sanga la'ok nakandoo,

²⁹tehu ala tahan nana lae, “Ata tunga uma te, besak ia hihii,” nae le'odae de mulai makahatu ia so. Boema Yesus masok de sungu nos.

³⁰Nai lelek fo Yesus nangatuuk na'a sama-sama nos, boema Ana ho'i na loti a de noke makasi neu Manetualain de Ana tete'i loti ndia ninik lima na de Ana fen neu duas.

³¹Basa boema besa ka duas lame'da lae, Yesus nde Ndia. Tehu mopo kana neme duas mata memete na mai so.

³²Boema esa kokolak no esa nae, “Ade ita ta tamahoko tanseli nai lelek fo Ana kokolak no ita neme eno tala'dak, ma nai lelek fo nafa'da mangalele'do Susula Malalao ka isi liin neu ita ndia fa hetu?”

³³Besak ndia boe, duas fo'a de ala fali leo Yerusalem leu. Ala losa te lita Yesus ana manatunga kasanahulu esa nala bei lakabubua sama-sama lo ana manatunga fe'e kala,

³⁴fo ana manatungan sila la nde lafa'das lae, “Memak tete'e ka Lamatua ka naso'da falik de, natu'du basa aoina na neu Simon so!”

³⁵Boema Yesus ana manatunga kaduan fo besa ka manamaik sila la, ala tui sila ninitan maneme eno tala'da ka, ma tao leo beek de sila lalelak Lamatua ka nai lelek fo Ana tete'i loti a.

³⁶Duas bei tui-tui leondia te, no kaiboboianak Yesus napadeik nai basa-basas tala'da heon de nae, “So'da molek neu emi!”

³⁷Ala nggenge ma ala bii lanseli, nanahu laedaenga sila lita ko'donaok ndia.

³⁸Tehu Yesus nae, “Tao le'e de emi bii? Tao le'e de emi dale ma naba'e?

³⁹Au nde ia! Mete mita Au lima nga no Au ei nga nde ia! Mafaloe ma mete matalololen leona, nanahu ko'donao ka ta nanuu isik ma duik sama leo hata fo emi mitan nai Au a.”

⁴⁰Yesus kokolak basa nae leondia boema, natu'du lima ein neus.

⁴¹Boema ana manatunga nala lamahoko lanseli de bafa nala bee poo nalosa tea na seli ba'eneus soaneu lamahele hata fo besa ka sila litan ndia. Hu ka nde lamahoko lanseli de ala beita hapu lamahele dede'ak ndia ma ala dodoo doa kana, nai lelek ndia de Yesus natanes nae, “Ade emi manuu nana'ak nai ia boe do?”

⁴²Boema ala fen i'a nanasesenak biak esa.

⁴³Yesus sipo na i'ak ndia boema, na'an neme mata nala.

⁴⁴Basa ndia boema, Yesus nafa'das nae, “Dede'ak ia la nde Au afa'da basan neu emi, nai lelek Au bei sama-sama o emi a. Basa dede'ak fo nanasulak la'eneu Au nai Musa susula na, nai basa nabi la susula na, ma nai Mazmur susula na dale ka, muse ana da'di.”

⁴⁵Basa boema, Yesus buka dudu'a-aafi nala fo ela lalelak Susula Malalao ka sosoa-ndandaan.

⁴⁶Boema nafa'das nae, “Nai Susula Malalaok dale, nanasulak nae Mane Mana Fe So'da ka muse doidoso, ma muse naso'da falik neme mamate sa mai nai fai katelu na.

⁴⁷Susulak ia la boeo lafa'da lae, no Mane Mana Fe So'dak ndia na'de na, muse nanatui-bengak neu basa leoina lala'ena mae, hataholi daebafa ka muse tukatei-saledale, ma mafa'da mae Manetualain fe do'o do ampon neu sala-singo ka. Halak ndia muse nanatui-bengak mulai neme Yerusalem mai.

⁴⁸Emi ia nde da'di sakasii neme basa sila lala'ena mai.

⁴⁹ Ma neukose Au nde haitua fe emi hata fo Au Ama nga helu basa ka so. Tehu emi muse mahani mahele nai kota ia, losa koasa maneme Manetualain mai a, ana poti na emi.”

⁵⁰Basa ndia boema, Yesus nos kalua leo kota Betania leu. Ala losa ndia boema, Ana so'uk lima na de Ana fes baba'e-papalak.

⁵¹Yesus bei fes baba'e-papalak te nanaso'uk leo nusa so'da ka neu, boema nasi'da-naba'e nos.

⁵²Ala sene-do'o kana, basa boema ala fali le'us leo Yerusalem no dale namahokok nanseli,

⁵³boema ala koa-kio lakandoo Manetualain nai Manetualain Uman.