Read Termanu LUKAS 3 Bible Online

LUKAS 3 - Termanu bible

LUKAS 3

¹Nai teu kasanahulu lima na neme Kesel Tiberius sa paleta, Pontius Pilatus da'di gobelnol nai Yudea, ma Herodes paleta nai Galilea, Felipus fo Herodes tolanoo na, ana paleta nai nusa Iturea ma Trakhonitis, boe te Lisanias paleta nai Abilene.

²Fo mana ho'u imam matuaina nde Hanas, basa boema Kayafas. Nai teuk ndia nde Manetualain kokolak no Yohanis, fo Zakharia ana na, nai mo solokae ka.

³Boema Yohanis neu leo mamanak lala'ena nai basa nusak manai Lee Yarden-na, fo nanduku-nalosak halak maneme Manetualai na mai. Yohanis nalo ma nae, “Tukatei-saledale neme sala-singo mala mai leona, ma emi muse nanasalanik, fo ela Manetualain fe do'o do ampon neu emi.”

⁴ Ndia nandaa no hata fo nanasulak nai nabi Yesaya susulan dale nae, “Hapu hataholi nalo bou-bou nai mo solokae ka nae, ‘Sadia enok soaneu Lamatua ka leona, tao matetu eno kala ba'eneun.

⁵Masadokek lala'ena, ela leo bee na nanapo'ak, basa lete kala ma pupuku kala, tao matetus. Enok fo mana dopelele'u kala, ela leo bee na tao mamandoos, ma enok fo mana loe-nda'e kala, tao matetus.

⁶Basa hataholi manai daebafa ka lala'ena, neukose lita tao leo beek fo Manetualain soi-tefa na hataholi daebafa ka!’ ”

⁷ Hataholi makadotok mai leo Yohanis, fo ana salamis. Yohanis nafa'das nae, “Emi hataholi mangalau kala! See ka nde nafa'da nae, emi hapu naladeak neme Manetualain huhukun fo manamai ka?

⁸ Matu'du minik emi tatao-nono'im mae emi tukatei-saledale basa neme emi sala-singom mai so. Boso mafa'da mae Abraham nde bee na, emi bei-ba'ikaim. Mafandendelek: te neme batu ia la mai boeo, Manetualain nabi'i tao tititi-nonosik soaneu Abraham!

⁹ Taka nanasadia basak soaneu lo'oheni ai a huu na, losa oka nala. Basa ai fo ta naboa boa malole fa soona, neukose nanalo'o henik, fo tu'un leo ha'i dale neu.”

¹⁰“Da'di hata fo muse ami taon?” hataholi latane Yohanis lae leondia.

¹¹Yohanis nataa nae, “Hataholi fo nanuu ba'du biak dua soona, muse ana fe esa leo ba'du ta ka neu; ma hataholi manana'a-nininu ka, muse ana baba'e fe hataholi nana'a-nininu ta ka.”

¹² Manasusu bea la boeo ala mai leo Yohanis mai fo salanis. Latane lae, “Ama Mesen, ami muse tao beek?”

¹³Yohanis nataa nae, “Boso susu lena ba'u ka neme hata fo nananaketu basak so.”

¹⁴Hapu solda'du la boeo latane lae, “Leo beek no ami? Ami muse tao beek?” Yohanis nataa nae, “Boso makaseti hataholi fe doik, ma boso kalaak pepekok fo loso ma hataholi doin. Ela leo bee na ngga'di fo emi sipo ka, dai emi nde ndia so!”

¹⁵Nai lelek ndia, hataholi la mulai beetane lae, ade Yohanis nde Mane Manasoi-tefa fo sila lahani ka do.

¹⁶Hu ndia de Yohanis nafa'da basa-basas nae, “Au salani emi ninik oe, tehu mahani te, neukose Hataholi manamaik ndia matua lenaheni au. Bukaheni ta'bu ei na tali na boeo, Au ta andaa fa. Neukose Ana salani emi ninik Manetualain Dula Dale na, ma ha'i.

¹⁷Ana ho'u ooko nai liman dale, soaneu ana da'i-lelee gandu ma losa balisi. Gandu ma neukose nanatao nakabubuak nai soka dale, tehu neukose Ana hotuheni u nala nai ha'i manamate ta ka dalek!”

¹⁸Yohanis nanoli-nafa'da hataholi la ninik eno mata-mata kala leondiak, nai lelek ana tui-benga Hala Malole a.

¹⁹ Tehu Yohanis ka'i Herodes fo manakoasa Galilea, la'eneu ana sao na no Herodias fo tolanoo na saoina na, ma la'eneu basa mangalau fe'en fo ana tao basa ka.

²⁰Tehu Herodes boetai tama seluk tatao-nono'i mangalau nala ninik ana tao Yohanis leo bui dale neu.

²¹Basa de basa hataholi sila la nanasalani basak boema, Yesus boeo nanasalanik. Ma lelek ana bei hule-haladoi, boema lalai a natahuka,

²² boema Manetualain Dula Dale na kona neu lain, nalupa manupui kalua. Boema Manetualain hala na nananamanenek nafa'da nae, “O nde Au Anang fo Au susue-lalai ka. O tao mamahoko Au dale nga.”

²³Nai lelek Yesus mulai ho'u ue-le'din te fafa'ka ma teun teluhulu so. Tunga hataholi a hahapu na soona, Yusuf anan Ndia, Eli anan,

²⁴Matat anan, Lewi anan, Malkhi anan, Yanai anan, Yusuf anan,

²⁵Matica anan, Amos anan, Nahum anan, Hesli anan, Nagai anan,

²⁶Maat anan, Matica anan, Simei anan, Yosekh anan, Yoda anan,

²⁷Yohanan anan, Resa anan, Zerubabel anan, Sealtiel anan, Neri anan,

²⁸Melkhi anan, Adi anan, Kosam anan, Elmadam anan, Er anan,

²⁹Yesua anan, Eliezer anan, Yorim anan, Matat anan, Lewi anan,

³⁰Simeon anan, Yehuda anan, Yusuf anan, Yonam anan, Elyakim anan,

³¹Melea anan, Mina anan, Matata anan, Natan anan, Dauk anan,

³²Isai anan, Obed anan, Boas anan, Salmon anan, Nahason anan,

³³Aminadab anan, Admin anan, Arni anan, Hezron anan, Peres anan, Yehuda anan,

³⁴Yakob anan, Isak anan, Abraham anan, Tera anan, Nahor anan,

³⁵Serug anan, Rehu anan, Peleg anan, Eber anan, Salmon anan,

³⁶Kenan anan, Arpakhsad anan, Sem anan, Noh anan, Lamekh anan,

³⁷Metusalah anan, Henokh anan, Yared anan, Mahalaleel anan, Kenan anan,

³⁸Enos anan, Set anan, Adam anan, Manetualain anan.