Read Termanu LUKAS 4 Bible Online

LUKAS 4 - Termanu bible

LUKAS 4

¹Nai lelek Yesus la'oela Lee Yarden-na, boema Manetualain Dula Dale na koasa na Yesus de non leo mo maloa neu.

²Nitu so'ba Yesus nai ndia, faik hahulu dale na. Nai fai manalu ndia dale na, ta na'a-ninu hata-hata esa boen. Da'di neu mate'e na boema, name'da namala'a.

³Boema Nitu nafa'dan nae, “Metema Manetualain Anan O soona, madenu batu ia la da'di loti leona.”

⁴ Yesus nataa nae, “Nai Susula Malalaok dale nanasulak nae, ‘Hataholi a ta hapu naso'da neme loti mesa kana mai fa.’ ”

⁵Boema Nitu no Yesus leo mamana mademaina esa lain neu. Ka'da nai hatematak esa mesa kana de, nitu natu'dun basa nusak manai daebafa ka lala'ena.

⁶Nitu nafa'da Yesus nae, “Basa koasa ma su'i-betes ia la, neukose au fen neu O, nana basa-basas nanafe basak neu au so, ma au hapu fen neu su'di see fo au nau fen neu.

⁷Basa sila lala'ena, neukose ala da'di o nuum, metema O sene-do'ok neu au.”

⁸ Boema Yesus nataa nae, “Nai Susula Malalaok dale nanasulak nae, ‘Sene-do'ok neu o Lamatuam Manetualain, ma ka'da malalau-maoonon.’ ”

⁹Boema Nitu no Yesus leo Yerusalem neu leo Manetualain Uma na punin lain neu, de nafa'dan nae, “Metema Manetualain Anan O soona, palaboku leo dae mu leona.

¹⁰ Nana nai Susula Malalaok dale nanasulak nae, ‘Neukose Manetualain nadenu ata nusa nala lasulu-lahapa O.

¹¹ Ma ata nusa so'da kala boeo neukose ala ndaso la O fo daenga O ei ma ta koila'e batu a fa.’ ”

¹² Yesus nataa nae, “Nai Susula Malalaok dale nanasulak nae, ‘Boso so'ba Lamatuak fo o Manetualai ma.’ ”

¹³Nitu so'ba basa Yesus ninik basa enok mata-matak lala'ena, boema ana la'oela Yesus de nahani fai malole seluk bai.

¹⁴Manetualain Dula Dale na koasa na Yesus nai lelek Ana fali leo Galilea neu. Halak la'eneu Yesus ndia, ana sipela leo basa nusak ndia lala'ena neu.

¹⁵Yesus nanoli nai uma mamaso kala dalek, de basa hataholi la koa-kion.

¹⁶Yesus neu seluk leo Nazaret neu boe, fo nai mamanak fo namatua neme ndia. Nai fai Saba ta tunga biasa na, neu leo uma mamasok neu. Ana fo'a napadeik fo Ana lees Susula Malalao ka

¹⁷boema ala fen nabi Yesaya susula na. Ana buka susula nanalunuk ndia boema, Ana hapu lalanek esa ia nae,

¹⁸“Lamatua ka Dula Dale na nai Au dalek, nana Ana so'u basa Au, soaneu tui-benga Hala Malole neu hataholi nuu ta-hata ta ka. Nadenu Au soaneu po'a-benga soi-po'i ka neu hataholi nanahuku kala ma nakahahai ka ba'eneu hataholi poke kala; soaneu soi-po'i hataholi nanatuni-ndeni kala

¹⁹ ma tui-benga Lamatua ka fai mamai na fo soi-tefa hataholi kamahehele nala.”

²⁰Yesus lunu fali susulak ndia, de Ana fe fali kana leo malalau-maoono fo mana hapu bela-ba'uk faik ndia, boema nangatuuk. Basa hataholi manai uma mamasok ndia dale ka, langanalon.

²¹Boema Yesus mulai kokolak nos nae leo ia, “Susula Malalao ka lalanen ia la, faik ia dale na nanatao natetuk nai lelek emi mamanene nana.”

²²Ana kokolak dede'a-kokola kala neulau hiik, nalosa hataholi la bafa nala bee poo ma ala sipok hata fo nafa'da ka. Tehu lafa'da lae, “Ade Yusuf ana na, ta nde ia fa hetu?”

²³Boema Yesus nafa'das nae, “Tao leo bee o, neukose emi pake dede'a lasik ia la'eneu Au nae, ‘Dote, makahahaik O aoina ma mesa kana. Ami mamanene O tao manda'di beuk neme Kapernaum, hu ndia de mu fo taos nai O nggolo-ta'dum ia.’ ”

²⁴ Yesus kokolak tama selu kana nae, “Mafandendelek, te ta hapu nabi fo nanafe ha'da-holomata nai nggolo-tu'dun fa.

²⁵ Tehu mamanene leona: te nai lelek Elia tepo-lele na, lelek u'dan ta teuk telu seselik dale na, boema la'a-ndoe matuaina da'di nai basa nusak a lala'ena. Nai lelek ndia, hapu inafalu makadotok nai Israel.

²⁶ Leomae leondiak boe, Manetualain ta nadajenu Elia neu leo inafalu sila la esa neu boen, te ka'da nadenun neu leo inafalu esa nai Sarfat nai nusa Sidon na.

²⁷ Leondiak boe, nai lelek Nabi Elisa tepo-lele na, hapu hataholi ba'u ka nai Israel hapu he'di lou mangalauk, tehu ta hapu hataholi esa boen neme hataholi sila la lea-hai boen, te ka'da Naaman fo hataholi Siria ndia.”

²⁸Basa hataholi manai uma mamasok ndia, lamanasa lanseli, nai lelek lamanene dede'ak ndia.

²⁹Boema ala fo'a lapadeik de ala usiheni Yesus leo kota deak neu, de helan leo fela madema esa nai letek esa nai sila kota na. Ala dudu'a lae, ala solin leo felak ndia dalek neu.

³⁰Tehu Yesus tolanini hataholi makadotok sila la de, Ana la'o.

³¹Basa boema Yesus neu leo kota Kapernaum fo nai Galilea. Nai naa nanoli hataholi la nai fai Saba ta.

³² Lelek litan nanoli boema bafa nala bee poo, nana Ana kokolak no heohan.

³³Nai ndia fo nai uma mamasok ndia, hapu hataholi esa nitu mangalau ka koasa nan. Hataholi ndia nakadii-nakau ma nae,

³⁴“Hei Yesus, hataholi Nazaret, O sanga tao ami le'e ia? Ade O mai soaneu tao makalulutuk ami do? Au bubuluk see O; O hataholi nadedenuk fo malalaok neme Manetualain mai!”

³⁵Boema Yesus nasapala dula dale mangalauk ndia nae, “Denge-denge, fo kalua meme hataholi ia mai leona!” Boema dula dale mangalauk ndia bala hataholi ndia neu hataholi sila la basa-basas mata na, basa boema ana kalua neme hataholi ndia mai, tehu ana ta tao nahe'di fan.

³⁶Basa hataholi la dodoo doa kana, ma esa kokolak no esa nae, “Hataholi ia dede'a-kokolan su'diselin. No heohan ma koasa, Ana paleta dula dale mangalauk kala kalua, de ala kalua boe!”

³⁷Boema halak la'eneu Yesus, ana mulai sipela leo basa nusa ndia lala'ena neu.

³⁸Yesus la'oela uma mamasok ndia boema, neu leo Simon uman neu. Simon alina na ao na sumai, de hataholi la lafa'da dede'ak ndia neu Yesus.

³⁹Yesus neu leo inak ndia pepe'u na neu boema, Ana usiheni sumaik ndia. Sumaik ndia mopon kana, boema Simon alina na fo'a tutik de nalalau-naoonos.

⁴⁰Lelek le'do a tenak boema, hataholi la lo tolano-tolanoon fo kamahe'di mata-mata kala leo Yesus neu. Yesus lalaa lima na neu hataholi sila la esa-esak lain de nakahahai kasa.

⁴¹Dula dale mangalau kala boeo kalua leme hataholi makadotok boema ala nggasi beau lae, “Manetualain Anan O!” Tehu Yesus nasapalas ma Ana ta fes loak kokolak fa, nana ala bubuluk lae, Ndia nde Mane Mana Fe So'da ka.

⁴²Nai lelek le'do a mulai tii boema, Yesus la'oela kota ndia de neu leo mamana nees esa neu. Boema hataholi la mulai sangan, de lelek ala hapun boema ala sanga enok, fo daenga Ana boso boe la'oela bais.

⁴³Tehu Yesus nae, “Hala Malole la'eneu tao leo beek fo Manetualain paleta. Au muse tui-bengan nai kota fe'e kala boe, nana hu ka nde dede'ak ndia de, Manetualain nadenu Au leo daebafa ka mai.”

⁴⁴Hu ndia de Yesus tui-benga nai uma mamasok manai nusa Yudea lala'ena.