Read Termanu LUKAS 5 Bible Online

LUKAS 5 - Termanu bible

LUKAS 5

¹Nai faik esa boema Yesus napadeik neme dano Genesare ta solokaen lain. Hataholi makadotok lakaseseti ao soaneu lamanene halak maneme Manetualai na mai.

²Yesus nita ofak dua lai solokaek ndia lain. Mana dolu-dala nala kona leme ofak sila la lain mai so, de ala beitao balisi dala nala.

³ Yesus kae leo ofak esa lain neu fo nde Simon ofa na, boema nadenu Simon tipa ofa na dodoo ana faa neme solokae ka mai. Yesus nangatuuk neu ofak ndia lain de nanoli hataholi makadoto kala.

⁴Basa de nanoli basa boema nafa'da Simon nae, “Sefe leo oe madema neu, fo pilu o dala ma neu fo ho'u i'ak.”

⁵ Simon nataa nae, “Tunggulu, le'odae manalu ia dale na, ami tao-no'i no mahelek, tehu ami ta mala hata esa boen! Tehu hu ka nde Tunggulu nadenu de malole au tu'u seluk dala neu.”

⁶ Ana tu'un neu boema, ala hapu i'ak makadotok nanseli, losa dala na mulai siiba'en.

⁷Hu ndia de, ala loke tutulu-fafalik neme nonoon manai ofa fe'e kala mai. Nonoon sila la mai boema, basa-basas laisi i'ak sila la, de ala tao lahenu ofa kaduak sila la, de nalosa ofa kaduak sila la hihii lae ala bolo.

⁸Lelek Simon nita ndia boema, ana sene-do'ok neu Yesus mata na boema nae, “La'oela au Lamatuak! Nana au hataholi masala-masingok!”

⁹Simon ma basa hataholi fo mana lo nana dodoo doa kana lita ala hapu i'a makadotok sila la.

¹⁰Leondiak boe no Simon nonoo nala, fo nde Yakobis ma Yohanis fo Zebedeus ana nala. Yesus nafa'da Simon nae, “Boso bii! Mulai besak ia, neukose o da'di mana dala hataholi.”

¹¹Simon no nonoo nala hela ofak sila la leo solokaek lain neu, basa boema ala la'oela basa-basas de leu tunga Yesus.

¹²Faik esa boema Yesus nai kota esa. Nai naa, hapu touk esa ao na henuk no he'dilou mangalauk. Lelek nita Yesus boema ana sene-do'ok neu Yesus mata na, de ana dokodoen nae, “Ama, metema Ama nau soona, Ama makahahaik au!”

¹³Yesus nafaloe hataholi ndia ma nafa'da nae, “Au nau. Naa, lea-hai leona!” Hatematak ndia boe, he'di na lea-hai.

¹⁴ Boema Yesus ka'i hataholi ndia fo ela ana boso tui dede'ak ndia neu su'di see a boen. Nafa'dan nae, “Mu leo ima ma mu leona, fo moken soaneu nafa'da tete'e ka, o lea-hai so. Boema mu fo fe tutunu-hohotuk sama leo Musa paleta ka, fo da'dileo buti neu hataholi la lae, o hai te'e-te'e so.”

¹⁵Tehu halak la'eneu Yesus boetai nakapepela leo basa mamanak lala'ena, boema hataholi ba'u ka mai soaneu lamanenen, ma soaneu nakahahai kasa leme he'di-lau nala mai.

¹⁶Basa ndia boema Yesus neu hule-haladoi nai mamana nees esa.

¹⁷Nai faik esa, lelek Yesus bei nanoli, boema hapu hataholi Farisi de'ubee ma mese agama la langatuuk lai ndia. Ala mai leme Yerusalem ma leme kota-kota manai Galilea ma Yudea mai. Manetualain koasa na nai Yesus dalek soaneu nakahahaik hataholi kamahe'dis ala.

¹⁸Nai lelek ndia hataholi de'ubee mai lo hataholi lu'uk esa nangape'uk nai ne'ak esa lain. Ala sanga enok lo hataholi ndia leo uma dale neu, fo ela ala hapu taon neu Yesus mata na.

¹⁹Tehu hu ka nde hataholi makadotok lanseli lai ndia, de ala ta hapu lon leo dalek neu fa. Hu ndia de, ala lakasasa'e kana leo uma kalan lain leu. Boema ala ofeheni uma kala na faa anak. Boema lakonan sama-sama no ne'a na neu Yesus mata na nai hataholi makadotok sila la tala'da.

²⁰Lelek fo Yesus nita hataholi sila la namahehele na ba'una seli, boema nafa'da hataholi lu'uk ndia nae, “Tolanoo ei, o sala singom hapu do'o do ampon so.”

²¹Boema mese agama la ma hataholi Farisi la mulai esa nafa'da esa nae, “See hataholi ia de napalani nakamumulu-nakamamaek Manetualain? See ka nde bisa fe do'o do ampon neu sala-singo ka, ka'da Manetualain mesa kana?”

²²Yesus bubuluk sila dudu'a natatane nala. Hu ndia de nafa'da nae, “Tao le'e de, emi tane-tane leondiak nai emi dalem dale?

²³Bee ka nde ndofo na lena. Tafa'da tae, ‘O sala-singom hapu do'o do ampon so,’ do tafa'da tae, ‘Fo'a fo la'ok leona!’?

²⁴Tehu besak ia neukose Au fe buti neu emi, ae nai daebafak ia poi na, Ana Hataholi ka nanuu koasa soaneu fe do'o do ampon neu sala-singo ka.” Boema Yesus nafa'da hataholi lu'uk ndia nae, “Fo'a leona, ho'i ma o ne'a ma fo fali leona!”

²⁵No lai-laik hataholi ndia fo'a neme sila basa-baas mata nala mai, boema ana ho'i na ne'ana de ana fali no koa-kio Manetualain.

²⁶Sila basa-basas bafa nala bee poo lanseli, boema ala koa-kio Manetualain. No bibii-namata'uk lafa'da lae, “Dodoo doak nanseli no manda'dik fo ita titan faik ia!”

²⁷Basa ndia boema Yesus la'o leo deak neu, de nita hataholi manasusu bea esa na'de Lewi, bei nangatuuk nai uma bea dale. Boema Yesus nafa'dan nae, “Tunga Au leona.”

²⁸Lewi fo'a napadeik de ana la'oela basa-basan lala'ena, boema neu tunga Yesus.

²⁹Basa ndia boema, Lewi tao feta nai uman soaneu Yesus. Manasusu bea ba'u ka, ma hataholi fe'e kala la'a sama-sama lon.

³⁰ Hataholi Farisi de'ubee ma mese agama la, lame'da nai dale nala dalek ta malole fa, boema lafa'da Yesus ana manatunga nala lae, “Tao le'e de, emi basa-basa mala mi'a-minu mo manasusu bea la ma hataholi ta malole fa?”

³¹Yesus nataa nae, “Hataholi so'da-la'da ka ta paluu dote fa te ka'da hataholi kamahe'di kala dei.

³²Au mai ta soaneu alo hataholi fo name'da aoina na malole so, te Au mai soaneu hataholi masala-masingo kala, fo ela ala tukatei-saledale leme sala-singo nala mai.”

³³Hataholi la lafa'da Yesus lae, “Yohanis ma hataholi Farisi la ana manatunga nala, nasi'a ala oka ao nala, ma ala hule-haladoi. Tehu O ana manatunga mala hii ka'da la'a ma linu.”

³⁴Yesus nataa nae, “Ade emi bisa madenu fui la fo ala oka ao nala nai feta ka'bi nga, nai lelek mana kabing tou ka, bei sama-sama noos do? Tao leo bee o, ta hetu!

³⁵Tehu neukose fai na losa, mana kabing touk ndia nanaho'ik neme sila mata na mai. Nai lelek ndia nde neukose ala oka ao nala.”

³⁶Boema Yesus tuis nakandandaa ka nde ia, “Ta hapu hataholi tana ba'du palaa ka ninik tema bibiak fo ala ho'in neme ba'du beu ka mai fa. Nana ana siba'e badu beuk ndia. Nakalenak bai, tema nanatana beuk ndia, ta nandaa no badu palaa ka fa.

³⁷Leondiak boe, ta hapu hataholi sali angol beu ka leo alukosu banalou palaa ka dalek neu fa. Nana angol beuk ndia neukose tao naka'di alukosu ndia, nalosa ango la po'ahenin ma alukosu a nalutun.

³⁸Angol beu ka muse salin leo alukosu beuk dale neu boe.

³⁹Leondiak boe, ta hapu hataholi fo ana nau ninu angol beu ka, metema ninu basa angol palaak so. ‘Angol palaak ndia la'da na nde lena,’ nae leondia.”