Read Termanu LUKAS 7 Bible Online

LUKAS 7 - Termanu bible

LUKAS 7

¹Yesus nafa'da basa dede'ak sila la neu hataholi makadoto kala boema neu leo Kapernaum neu.

²Nai ndia hapu malanga solda'du Roma nanuu ata esa fo ana sue nan ba'u na seli. Ata ndia namahe'di de hihii maten.

³Nai lelek malanga solda'du ndia namanene la'eneu Yesus boema nadenu lasi-lasi Yahudi de'ubee leu leo Yesus leu soaneu loken fo ela Ana mai fo nakahahaik ata na.

⁴Lelek ala losa Yesus boema hataholi sila la dokodoe lanseli, fo ela Ana tulu-fali malanga solda'du matuaina ndia. Lafa'da Yesus lae, “Malanga solda'du matuaina ndia nandaa Ama tulu-falin,

⁵nana ana sue-lai ita leoina na, ma nafofo'a basa ami uma mamaso ma so.”

⁶Boema Yesus la'o sama-sama nos. Lelek fo Yesus hihii nae deka no uma ndia te, malanga solda'du matuaina ndia nadenu nonoo nala leu lafa'da Yesus lae, “Ama boso sota losa au umang. Au ta andaa sipok Ama nai au umang fa.

⁷Hu ndia de au mesa nga ta apalani asasale matak o Ama fa. Da'di fe ka'da paleta fo daenga au ata nga lea-hai.

⁸Nana au boeo akatele neu paleta manai lai na, ma nai au dae boeo hapu solda'du ana kala, fo muse lakatele neu au paleta nga. Metema au adenu solda'du anak esa ae, ‘La'o!’ soona ana la'o boe; ma metema au afa'da neu fe'e kala ae, ‘Mai ia!’ soona ana mai boe. Ma metema au paleta au ata nga ae, ‘Tao ia leona!’ soona ana taon boe.”

⁹Yesus dodoo doa kana namanene dede'ak ndia. Ana lipa de nafa'da neu hataholi makadotok fo ala bei tunga nana nae, “Hataholi ia anseli. Te'e-te'e, nai hataholi Israe la tala'da boeo, Au beita atongo o namahehelek ba'u ia fa!”

¹⁰Lelek hataholi nananadenuk sila la fali leo malanga solda'du matuaina ndia uman leu te, ata ndia lea-hai so.

¹¹Beita doo bee boen te, Yesus neu leo kota Nai na neu. Ana manatunga nala ma hataholi makadotok sama-sama lon.

¹²Lelek fo Yesus deka no kota ndia lelesuina na boema, hataholi la ndolo mamates esa leo kota deak neu. Hataholi manamatek ndia nde bee soona ana touk esa, fo inafalu esa ana kisa na. Kota ndia laun makadotok sama-sama lo inafalu ndia.

¹³Lelek Lamatuak Yesus nita inak ndia boema, dale na tu'da neun de nafa'dan nae, “Ina, boso kii-makaleleu!”

¹⁴Basa boema Yesus neu deka no loanak mamates ndia de nafaloen. Boema mana ndolo-la late'e. Yesus nae, “Hai tou muli-solu konei! Fo'a leona!”

¹⁵Tou muli-soluk fo manamate basak ndia ana fo'a de nangatuuk, ma ana mulai kokolak. Boema Yesus fen leo inan neu.

¹⁶Basa hataholi la bii ma ala mulai koa-kio Manetualain. Lafa'da lae, “Nabi matuaina esa to'da mai nai ita tala'da so! Manetualain mai fo Ana soi-tefa na hataholi kamahehele nala so!”

¹⁷Halak la'eneu Yesus ia, ana sipela leo basa Yudea lala'ena, ma nusa titia-tatai nala.

¹⁸Yohanis ana manatunga nala lafa'da Yohanis, basa manda'dik ndia. Boema Yohanis nalo na ana manatungan dua,

¹⁹boema nadenus leu leo Lamatuak Yesus fo latanen lae, “Ade Ama ia hataholi fo neukose ana mai tunga Manetualain hehelu na, do muse ami mahani hataholi fe'ek?”

²⁰Yohanis ana manatunga kaduan sila la leu leo Yesus leu de lafa'dan lae, “Yohanis Mana salani ka nadenu ami mai matane Ama, ade Ama ia nde hataholi fo neukose ana mai tunga Manetualain hehelu na, do ami muse mahani seluk hataholi fe'ek?”

²¹Lelek ndia Yesus nakahahaik hataholi makadotok, ma Ana usiheni dula dale mangalauk makadotok, boema Ana tao na hataholi pokek makadotok hapu lita.

²² Da'di Yesus nataa nae, “Fali leo Yohanis meu, fo mafa'dan basa hata fo emi mamanenen ma mitan: hataholi poke ka nita, hataholi lu'u ka la'ok, hataholi he'di lou mangalau ka lea-hai, hataholi pake ka namanene, hataholi manamate ka naso'da falik, ma Hala Malole maneme Manetualain mai a, nanatui-bengak neu hataholi nuu ta-hata ta kala.

²³Maua-manalek neu hataholi fo ta hapu ne'ek soaneu tipa Au fa.”

²⁴Basa de Yohanis hataholi nadedenun sila la'o boema, Yesus mulai kokolak no hataholi makadotok la'eneu Yohanis nae, “Emi hii mete beek nai mo maloa? Hanoe dok esa fo ani na fuu ninin do?

²⁵Do bee ka? Hataholi esa papake-ngganggaon mana'ahiik do? Hataholi fo manapake-nggao leondia ka, ma naso'da no hahapu-dadai manadai lena ka, ana leo nai mane ka uman dei!

²⁶Da'di emi meu soaneu mete beek? Soaneu mete nabi esa do? La'en, lena-lenak lenaheni neme nabi esa mai.

²⁷ Nana Yohanis ndia nde nananafa'dak nai Susula Malalao ka lalanen ia dalek nae, ‘Ia nde Au hataholi nadedenu nga,’ Manetualain nafa'da, ‘Neukose Au adenun nakahuluk neme O mai, fo ela ana sadia enok soaneu O!’ ”

²⁸Yesus nafa'da boe nae, “Mafandendelek leona, te nai daebafak ia beita hapu hataholi matua lenaheni Yohanis Mana Salani ka. Tehu hataholi fo, kome'doana nanseli nai Manetualain hataholi kamahehele nala tala'da, matua lenaheni Yohanis Mana Salani ka.”

²⁹ Basa hataholi la, manasusu bea la lai dalek, lamanene Yesus kokolak dede'ak ndia; sila nde hataholi fo manatao tunga Manetualain paleta na, ma ala nau Yohanis salanis.

³⁰Tehu hataholi Farisi la ma mese agama la ta nau sipok Manetualain dale tutu'un soaneu sila aoina nala fa, nalosa ala ta nau Yohanis salani fas.

³¹Boema Yesus kokolak seluk nae, “No bee ka, Au muse akasasamak hataholi lelek besak ia la? Sila sama leo bee ka?

³²Sila sama leo ni'iana fo langatuuk lai pasa ka. Bubuak esa nalo bou-bou neu fe'e kala nae, ‘Ami fuu kinuk, makaminak nakamee namahokok soaneu emi, tehu emi ta nau foti-longe fa! Ami makamee nakamee manafaluk, tehu emi ta kii-makaleleu fa!’

³³Lelek Yohanis Mana Salani ka ana mai de ana oka ao na, ma ta ninu angol fa, emi mafa'da mae, ‘Nitu masok nai dalek!’

³⁴Nasafali na lelek Ana Hataholi ka mai, de Ana na'a ma ninu, boema emi mafa'da mae, ‘Mitak Hataholi ndia dei! Maa fula, mana mafuk, manasusu bea la nonoon, ma hataholi masala-masingo kala nonoon.’

³⁵Leomae leondiak boe, Manetualain manatee teno na neukose nananitak la'en tunga hata fo nanatao-no'ik neme hataholi-hataholi manasipok manatee tenok ndia.”

³⁶Hataholi Farisi esa na'de Simon, ana ka'i Yesus na'a. Yesus neu leo uman neu de nangatuuk na'a.

³⁷ Nai kota nda hapu inak esa naso'da nai sala-singo ka dalek. Lelek namanene lae Yesus bei na'a nai hataholi Farisi ndia uman boema ana mai no nini boto esa isi na mina kaboominik.

³⁸Napadeik neu Yesus dea na deka no ei na ma ana kii, boema nakadoe Yesus ei na ninik luu oe na. Basa boema ana lose nama'da Yesus ei na ninik langa doo na, ma ana de'in, boema ana po'a mina kaboomini ka neu.

³⁹Lelek hataholi Farisi fo mana ka'i Yesu sa nita dede'ak ndia, boema ana dodoo nai dalen dale nae, “Leo uni ka hataholi ia nabi soona, tao leo bee o Ana bubuluk, see inak fo mana koila'e nana, ma nae inak ndia naso'da nai sala-singo ka dalek!”

⁴⁰Boema Yesus nafa'da Simon nae, “Simon, hapu hata esa fo Au nau afa'dan neu o.” Simon nataa nae, “Hei Ama Mesen, mafa'dan leona.”

⁴¹Yesus nae, “Hapu hataholi dua, lahuta hataholi mana makatotonak doik esa. Esa nahuta doi isi lilofulak natun lima, ma esa ka nahuta doi isi lilofulak limahulu.

⁴²Duas ta hapu bae ketu huta nala fa, boema huta nala nanalosehenik. Na, nai hataholi kaduak sila la, see ka nde susue-lalain lena neu hataholi manafe doi totonak ndia?”

⁴³Simon nataa nae, “Au aedaenga hataholi manamahuta makadotok fo nanalosehenik ndia!” Yesus nataa nae, “O hahapu ma la'en.”

⁴⁴Boema Yesus mete leo inak ndia neu ma nafa'da Simon nae, “O mete mitak inak ia dei? Au mai leo o umam mai, te o ta sadia oe soaneu tao balisi Au ei nga fa. Tehu inak ia tao balisi basa Au ei nga ninik luu oe na, ma ana lose nama'dan ninik langa doo na.

⁴⁵O ta sipok Au ninik dede'ik fa, tehu inak ia ta hahae de'i Au ei nga, mulai neme Au losa ia.

⁴⁶O ta po'a mina neu Au langa nga fa, tehu inak ia po'a basa mina kaboominik neu Au ei nga so.

⁴⁷Te'e-te'e, susue-lalain fo matuainan ndia, natu'du nae sala-singo makadoto nala, nanafe do'o do ampon so! Metema hataholi a nanafe do'o do ampon faa anak soona, neukose susue-lalain faa anak boe.”

⁴⁸Boema Yesus nafa'da inak ndia nae, “O sala-singo mala nanafe do'o do ampon so.”

⁴⁹Hataholi fe'ek fo manamangatuuk la'a sama-sama lo Yesu sa, mulai esa nafa'da esa nae, “See hataholi ia, nalosa Ana hapu fe do'o do ampon neu sala-singo ka?”

⁵⁰Tehu Yesus nafa'da inak ndia nae, “Hu ka nde o mamahele Au, de o hapu so'dak. Mu'u ma leona no mole-dame!”