Read Termanu LUKAS 8 Bible Online

LUKAS 8 - Termanu bible

LUKAS 8

¹Basa boema beita doo ka boen te, Yesus neu leo kota-kota ma nggolo-nggolo kala neu, soaneu tui-benga Hala Malole nae, Manetualain mulai paleta da'dileo Mane ka. Ana manatungan sanahulu dua tunga sama-sama lon.

² Leondiak boe, inak de'ubee fo nananakahahai basak neme dula dale mangalau ka ma he'di-lau sa mai. Inak sila la nde: Maria, fo loken boeo lae, Magdalena, (nanahu dula dale mangalauk hitu, nanakalua basak neme aon dale mai);

³boeo Yohana, fo Khuza saoina na. Khuza ia, pegawi nai Herodes uma mane na, Susana, ma ina fe'ek ba'u ka seluk bai. Ala tulu-fali Yesus ma ana manatunga nala ninik sila tali-doi mesa nala.

⁴Hataholi la ka'da mai lakandoo leo Yesus mai, leme kota mata-mata kala mai. Nai lelek hataholi makadotok lakabubua boema, Yesus tuis nakandandaa ka nde ia:

⁵“Hataholi mana tao tina-osi esa, neu sele-nggali bini-ngges. Lelek fo ana bei nggali-nggali te, hapu bini-ngges nggelok tu'da lai enok lain. Hataholi heheta-aa'i nggelok, ma nggelok manupui la la'a henis.

⁶Hapu nggelok boeo ala tu'da lai dae mabatuk lain. Nai lelek nupu la kalua mai boema ala male, nana dae na tuuk.

⁷Hapu bini-ngges nggelok tu'da lai na'u aiana dila-nggauk tala'da. Na'u aiana dila-nggauk sila la moli sama-sama lo bini-ngges sila la, de ala aangus nalosa mates.

⁸Tehu hapu bini-ngges nggelok tu'da lai dae maisi-maminak lain, boema ala moli de labuna-laboa didikuk la'i natun esa.” Yesus tui basa nakandandaak ndia boema nafa'das nae, “Metema see madi'idook soona, ela leo bee na mamanene leona!”

⁹Yesus ana manatunga nala latanen, nakandandaak ndia sosoa-ndandaan.

¹⁰ Yesus nataa nae, “Emi nanafe baba'e-babatik basa soaneu bubuluk bibila-babaak la'eneu tao leo beek Manetualain paleta da'dileo Mane ka. Tehu hataholi fe'e kala soona, nanananolik ninik nakandandaak, fo ela ala taoafi kana, tehu ala ta bubuluk hata fo ana da'di fa, ma lamanene tehu ta lalela kana fa.”

¹¹Basa boema Yesus nafa'da nae, “Nakandandaak ndia sosoa-ndandaan nde ia: Bini-ngges sila la nde Manetualain dede'a-kokolan

¹²Bini-ngges fo manatu'da nai enok lai na, nakasasama na nde hataholi fo lamanene dede'a-kokolak sila la. Tehu Nitu mai de ana losonini halak ndia neme dale nala dalek mai, fo ela boso lamahele fo nanasoi-tefa kala.

¹³Bini-ngges fo manatu'da lai mamana mabatuk lai na, nakasasama na nde hataholi fo nai lelek lamanene halak ndia, boema ala sipo kana no dale namahokok. Tehu halak ndia ta nahuu-naoka nai dale nala dalek fa. Ala lamahele ka'da ba'ihanak mesan, de nai lelek soso'ba-susu'di ka ana mai, boema ala fali deak.

¹⁴Bini-ngges fo manatu'da lai makatema dila-nggau ka tala'da, nakasasama na nde hataholi fo namanene halak ndia, tehu dale nala laba'e la'eneu so'da nala, boema ala hii laso'da nai masoda manadai lena ka dalek, ma no namhokok nai daebafak ia. Basa sila la lakahapi lalas de nalosa ta labuna-laboa boa latuk fa.

¹⁵Bini-ngges fo manatu'da lai dae maisi-mamina ka, nakasasama na nde hataholi fo namanene halak ndia, boema nape'dan nai dalek fo malole ma ndo sa dalek. Ala lakatatakak losa labuna-laboa.”

¹⁶ Basa ndia boema Yesus nafa'da nae, “Ta hapu hataholi fo ana de'de na pila banu ka boema ana tatanan ninik lepeneu, do ana pe'dan neu pepe'u ka dae fa. Neukose ana pe'da banuk ndia neu banu eik lain, fo ela hataholi manamasok leo dalek neu a, ana hapu nita mangale'dok.

¹⁷ Ta hapu hata nananafuni ka, neukose ta nananitak fa, ma ta hapu hata fo nanabibila-babaa ka, neukose ta nanaofehenik fo nanabubuluk fa.

¹⁸ Hu ndia de taoafik matalolole hata fo emi mamanene nana. Nana hataholi fo manamanuu ka, neukose ala fen ba'u ka lena seluk. Tehu hataholi fo ta manuu ka, neukose nanaho'ik neme hataholi ndia mai, leomae bei ela ka'da faa anak nai ndia boeo.”

¹⁹Yesus inan ma tolanoo nala ala mai latongo lon tehu ala ta bisa deka fa, nana hataholi makadotok nanseli.

²⁰Boema hapu hataholi esa nafa'da Yesus nae, “Ama, Ama inan ma Ama tolanoo nala lai deak. Ala nau latongo lo Ama.”

²¹Tehu Yesus nafa'da neus nae, “Hataholi fo namanene Manetualain dede'a-kokolan, ma ana tao-no'in soona, sila la nde Au inang ma Au tolanoo ngala.”

²²Faik esa boema, Yesus no ana manatunga nala sa'e ofak. “Mai teu leo dano selik teu,” Yesus nafa'das nae leondia. Boema ala la'o leona.

²³Nai lelek fo ofa ka bei la'ok te Yesus sungu. Kaiboboi anak te, ani matuaina fo'a nai dano ndia. Oe a mulai masok leo ofak dale neu, nalosa nini soe matuaina neu basa-basas.

²⁴Boema Yesus ana manatunga nala leu de ala fafaen. Lafa'dan lae, “Ama Mesen, Ama Mesen, ita soe!” Yesus fo'a boema nasapala aniina ma lii manapoponuk ndia. Ani na ma lii ndia boeo nakamate, boema dano da'di nee nee-lino lino nanseli.

²⁵Boema Yesus nafa'da ana manatunga nala nae, “Tao le'e de emi ta mamahele Au fa?” Boema ala dodoo doa kana ma ala bii. Ma esa kokolak no esa nae, “Tunga ndo na see hataholi ia, de nalosa Ana paleta ani na ma lii a boeo ala tungan!”

²⁶Yesus ma ana manatunga nala sa'e ofak lakandoo losa nusa Gerasa nai Dano Galilea selik.

²⁷Nai lelek Yesus kona leo dae mada ka neu boema tou nitu sa'ek esa ana mai leo Yesus mai. Hataholi ndia neme kota mai. Doo ka so ana ta pake bua-lo'as ma ana ta nau leo nai uma fa. Ana nau ka'da leo nai lea-luak manai late sala.

²⁸Lelek nita Yesus tutika ana nggasi boema ana sene-do'ok neu Yesus mata na ma nalo nae, “Yesus, Manetualain Fo Madema Ina Ana na! O tao au le'e ia? Au dokodoe, boso tao doidoso au!”

²⁹Hataholi ndia nafa'da nae leondia nana Yesus paleta dula dale mangalauk ndia kalua neme aon dale mai. Nasi'a dula dale mangalauk ndia ana koasa nalan, de nalosak leomae lima ein nanahenge basak ninik namosina ma lanea lahelen, tehu ana bei hapu tao naketu namosina ndia, boema dula dale mangalauk ndia non leo mo solokae ka neu.

³⁰Yesus natane hataholi ndia nae, “O na'de see?” Hataholi ndia nataa nae, “Au na'de ‘Legiun’ ”, nana hapu dula dale mangalauk ba'u ka masok nai aon dale so.

³¹Dula dale mangalauk sila la loke lanseli fo daenga Yesus boso usiheni sila leo Fela Mamatesa dalek leu.

³²Deka no mamanak ndia, hapu bafi makadotok nan bei totofi nana'ak nai pupuku ka huu na. Dula dale mangalauk sila la loke lanseli neu Yesus fo daenga Ana fe sila loak masok leo bafi sila la dalek leu. Boema Yesus nakaheik.

³³Boema dula dale mangalauk sila la kalua leme hataholi ndia dalek mai de, ala masok leo bafi sila la dalek leu. Boema bafi sila la lalai, de ala palaboku leme fela ka su'u na leo dano dale leu, de basa boema ala bolo.

³⁴Mana manea bafi sila la lita hata fo ana da'di so. Boema lalai de ala tui manda'dik ndia nai kota ma nai nggolo titia-tatai nala.

³⁵Boema hataholi la kalua mai, fo ala mete hata manda'dik ndia. Ala mai leo Yesus mai te nai ndia, ala lita hataholi fo natapo'i neme dula dale mangalau ka mai ndia, bei nangatuuk deka no Yesus ei na. Ana pake bua-lo'as so, ma dudu'a-aafin namaneu so boe. Boema ala bii.

³⁶Sila fo mananita manda'dik ndia, ala tui hataholi la, tao leo beek de hataholi ndia nanatao nalea-haik.

³⁷Boema basa nusa Gerasa lau na lala'ena loke lanseli fo daenga Yesus la'oela mamanak ndia, nana basa-basas bii lanseli. Boema Yesus sa'e leo ofak lain neu, fo Ana fali ne'un.

³⁸Hataholi fo natapo'i neme dula dale mangalau ka mai ndia, ana dokodoe neu Yesus fo daenga ana bole tunga. Tehu Yesus nadenun ana fali ne'un. Nafa'dan nae,

³⁹“Mu'u ma leona, ma tui-benga hata fo Manetualain tao basan neu o so.” Boema hataholi ndia neu tui-benga neu kota ndia lala'ena, hata fo Yesus tao basan neu ndia so.

⁴⁰Lelek Yesus fali leo dano a selik neu boema, hataholi la sipo kana no namahokok nanahu lahani talu-talu lon.

⁴¹Boema malanga uma mamasok esa nai mamanak ndia ana mai. Na'de Yairus. Ana sene-do'ok neu Yesus mata na, ma noke nanseli fo ela Yesus mai leo uman mai,

⁴²nanahu anafe'o kisa na fo teun sanahulu dua, hihii maten. Yesus bei la'o-la'o leo Yairus uman neu te hataholi la lakasesetin neme boboa-kaisum mai.

⁴³Nai dalek hapu inak esa, teuk sanahulu dua dale na ana po'a daak, fo natutik no he'di bula na. Ana nabasa hata-heton soaneu namo'do nai dote la, tehu ta hapu lakahahaik lala fan.

⁴⁴Inak ndia deka no Yesus neme dea mai, boema ana koila'e Yesus ba'du manalu na pe'da na. No hatematak ndia boe, inak ndia po'a daa na, nate'e.

⁴⁵Boema Yesus natane nae, “See ka nde koila'e Au a?” Hu ka nde ta hapu manamanaku fa. Boema Petrus nae, “Ama, hataholi makadotok nanseli lai Ama boboa-kaisun. Ala seseti Ama!”

⁴⁶Yesus nae, “Tehu hapu hataholi koila'e Au. Au bubuluk ndia nana hapu be'i-balakaik kalua neme Au dalek mai.”

⁴⁷Inak ndia name'da nae tatao-nono'in ndia nanabubuluk. Da'di ana mai no ao na dele ngge'be-ngge'be, boema ana sene-do'ok neu Yesus mata na. Boema ana tui nai basa hataholi la matan, tao le'e de ana koila'e Yesus boema ana lea-hai nai hatematak ndia boe.

⁴⁸Yesus nafa'dan nae, “Ana ngonei, hu ka nde o mamahele neu Au de o lea-hai. Fali mu'u ma leon no so'dak.”

⁴⁹Yesus bei kola-kola te hataholi nananadenuk esa ana mai neme Yairus uman mai. Nafa'da Yairus nae, “Tuan anafe'o na maten so. Tuan boso boe tao susa Ama Mesen bai.”

⁵⁰Lelek fo Yesus namanene halak ndia te nafa'da neu Yairus nae, “Boso bii. Ka'da mamahele te o ana ma neukose ana lea-hai.”

⁵¹Ala losa Yairus uman boema Yesus ta fe loak neu hataholi esa boen fo ana masok tunga fan, ka'da Petrus, Yohanis, Yakobis ma ni'iana ndia ina aman mesa kasa.

⁵²Basa hataholi la bei kii-makaleleu hu ka nde ni'iana ndia mamate na. Tehu Yesus nae, “Boso kii-makaleleu bai. Nana ni'iana ndia ta mate fan, te ka'da ana sungu ndia!”

⁵³Ala hika Yesus, nana ala bubuluk ni'iana inanak ndia maten so.

⁵⁴Basa boema Yesus ho'u na ni'iana ndia lima na de nafa'da nae, “Fo'a leona, Ana ngo!”

⁵⁵Ma ni'iana ndia hahae na fali, de no hatematak ndia boe ana fo'a. Basa ndia boema Yesus nadenus fo ala fe ni'iana ndia na'a.

⁵⁶Ni'iana ndia ina-aman dodoo doa kana lanseli. Tehu Yesus kena-ka'is, fo boso lafa'da manda'dik ndia neu su'di see a boen.