Read Termanu LUKAS 9 Bible Online

LUKAS 9 - Termanu bible

LUKAS 9

¹Yesus nalo ana manatunga kasanahulu dua nala, boema Ana fes koasa fo ala usiheni dula dale mangalau kala ma lakahahaik he'di lau sala.

²Basa boema nadenus leu lakahahaik hataholi kamahe'di kala, ma ala tui-benga halak la'eneu tao leo beek fo Manetualain paleta leo Mane ka.

³ Yesus nafa'das nae, “Boso mini hata-hata soaneu emi leleo-lala'om ndia. Boso mini ai tete'ek, do alukosu doik, do nana'a-nininuk, do tali-doik, do bua papakek biak dua.

⁴Ala sipok emi nai bee soona, leo meme ndia losa emi la'oela kota ndia.

⁵ Ma nai bee ala ta sipok emi fa soona, nai lelek emi la'oela kota ndia, ngganggafuheni daesopu ka neme emi ei dale ma da'dileo nasanene'dak soaneus.”

⁶Yesus ana manatunga nala la'o boema, neu leo nggolo-nggolo kala neu fo tui-benga Hala Malole ndia, ma nakahahaik hataholi kamahe'di sala nai mamanak lala'ena.

⁷ Herodes, fo mana koasa Galilea namanene la'eneu basa manda'dik sila la ma napangamak. Nana hapu hataholi nafa'da nae, Yohanis Mana Salani ka naso'da falik so.

⁸Hapu nggelok boeo lafa'da lae, Elia to'da mai seluk so. Hataholi fe'e kala bai soona lae, nabi esa neme nabi-nabi makahulun eli la naso'da falik so.

⁹“Te se'ko na au adenu hataholi neu te'te na Yohanis langa na so. Da'di tunga ndo na see hataholi ia, nalosa ala kokolak halak ba'u ka nanseli la'eneun?” Herodes nae leondia. Hu ndia de Herodes nahiik nanseli natongo no Yesus.

¹⁰Yesus ana manatungan fo nadenu kala fali ma'is boema, ala tui Yesus basa hata fo sila tao-no'i nana. Boema Yesus lelekos fo la'ok sama-sama mesa kasa leo kota Betsaida leu.

¹¹Tetapi hataholi la bubuluk dede'ak ndia de nalosa ala tunga lahele Yesus. Yesus sipo kasa, boema Ana kokolak nos la'eneu tao leo beek fo Manetualain paleta leo Mane ka. Ma Ana nakahahaik hataholi kamahe'di sala lai hataholi sila dalek boe.

¹²Lelek le'do tenak boema, Yesus ana manatunga kasanahulu dua nala mai de lafa'dan lae, “Ama, mamanak ia ana pasi fe'e. Malole lenak Ama madenu hataholi ia la fali, fo ela leu sanga nana'ak ma mamana susunguk nai nggolo-nggolo titia-tataik ia la.”

¹³Tehu Yesus nataa nae, “Ka'da emi fes la'a.” Yesus ana manatunga nala lae, “Tehu ami lotim ka'da lima, ma i'ak boak dua nde ia. Ade ami muse meu asa nana'ak soaneu basa hataholi ia la do?”

¹⁴Fafakama hapu touk lifun lima lai ndia. Yesus nafa'da ana manatunga nala nae, “Madenu hataholi ia la langatuuk bubua-bubua kala leona. Fafakama hataholi limahulu soona bubuak esa.”

¹⁵Yesus ana manatunga nala tao hata fo Yesus nafa'da neus ala.

¹⁶Boema Yesus ho'i na loti kalima kala ma i'a boa kaduak sila la. Basa boema nanganalo leo lalai neu de noke makasi neu Manetualain. Basa ndia boema, Ana tete'i loti ma i'ak sila la ninik lima na, boema Ana fen neu ana manatunga nala, fo ala baba'en neu hataholi makadotok sila la.

¹⁷Basa-basas la'a losa lakabete. Boema Yesus ana manatunga nala hehele lakabubua nana'a elak sila la lepeneu sanahulu dua.

¹⁸Nai faik esa, fo nai lelek Yesus bei hule-haladoi mesa kana, te ana manatunga nala mai. Boema Yesus natanes nae, “Tunga hataholi a nafafa'da na, Au ia see?”

¹⁹ Boema lataa lae, “Hapu nggelok lae, Yohanis Mana Salani ka. Hapu nggelok boeo lae, Elia. Nggelok seluk bai soona lae, nabi lele makahulu na, esa naso'da falik nde ndia so.”

²⁰ Yesus natane nae, “Tehu tunga emi soona, Au ia see?”. Petrus nataa nae, “Ama nde bee na Mane Mana Fe So'dak fo Manetualain helu ka.”

²¹Boema Yesus nafa'da ana manatunga nala nae, “Boso mafa'da dede'ak ndia makandondook neu su'di see a boen.”

²²Yesus boeo nafa'da nae, “Memak Ana Hataholi ka muse doidoso ba'u ka, ma lasi-lasi nala boema malanga ima mala ma mese agama la ala la'ba nana. Neukose ala taolisan, tehu neu fai katelu na soona, naso'da falik.”

²³ Basa boema Yesus nafa'da basa hataholi manai sila la nae, “Hataholi fo ana nau tunga Au a, muse nafandele heni basa paluu nala, fo ana lu'a ai nggange na tunga faik fo ana tunga nahele Au.

²⁴ Nana hataholi fo ana ho'u nahele so'da na, neukose namopo so'da na. Tehu hataholi fo ana tunu-hotu so'da na soaneu Au paluu nga, neukose ana hapu so'dak.

²⁵Nanalak hata ba'eneu hataholi esa, metema nanuu basa daebafak ia lala'ena, tehu ana tao nalutu ma namopo so'da na?

²⁶Metema hataholi a mae manaku Au ma Au nanoli nga soona, Ana Hataholi ka boeo neukose Ana mae manaku hataholi ndia nai lelek Ana fali ma'in no koasa na, ma no Ama ka koasa na, boema ata nusa so'dak fo malalaok koasa nala!

²⁷Bubuluk leona: te nai emi manai ia la dalek, hapu nggelok neukose ta mate fa, metema beita lita Manetualain paleta fa.”

²⁸ Fafa'ka ma Yesus nanoli basa dede'ak sila la mamasok esa boema, Ana leleko Petrus, Yohanis, ma Yakobis leo letek esa poi na leu fo ala hule-haladoi.

²⁹Yesus bei hule-haladoi te mata-panan nasafali, ma bua papake na da'di fula mangadilak.

³⁰Boema no kaiboboianak hataholi dua fo nde Musa ma Elia mai latu'du ao nala no mandela-masa'ak neme nusa so'da ka mai. Ala kokolak lo Yesus la'eneu mamate na fo ta doo ka so'on te, neukose Ana la'ola'din nai Yerusalem.

³¹

³²Lelek ndia Petrus ma nonoo nala mana sungu kala, tehu no kaiboboianak ala fo'a, de lita Yesus nandela-nasa'a, ma hapu hataholi dua lapadeik lon.

³³Nai lelek hataholi kaduak sila la sanga la'oela Yesus, boema Petrus nafa'da Yesus nae, “Ama Mesen, ita leo nai ia na malole na seli. Malole ami mapadedeik ma lalaak telu: esa soaneu Ama, esa soaneu Musa, ma esa seluk soaneu Elia.” (Petrus kokolak nae leondia, tehu ana ta nalelak hata fo ana kokola kana fa.)

³⁴Petrus bei kola-kola te, ko'as esa mai de ana poti nalas de nalosa ala bii.

³⁵ Basa boema hala ka nananamanenek neme ko'as ndia dalek mai nae, “Ia nde Au anang fo Au hele ka. Mamanenen leona!”

³⁶Halak ndia nate'e te ala lita Yesus mesa kana nai ndia. Yesus ana manatunga nala ka'da bedenge la'eneu basa sila la, ma hata fo sila litan ndia, ta lafa'da hataholi esa boen.

³⁷Balahaa boema Yesus ma ana manatunga katelu nala kona leme letek ndia lain mai boema, hataholi makadotok ala mai.

³⁸Touk esa neme hataholi makadotok sila la tala'da heon mai ma ana nggasi nae, “Ama Mesen, Ama sue na mete au ana nga dei. Au anang ka'da kisak esa nde ndia!

³⁹Metema dula dale mangalauk ndia sapu nan soona, ana nggasi kaiboik ma ao na hela-holoduku nalosa bafa na nafufu'de. Dula dalek ndia tao nan doidoso nakandoo ma ana ta nau kalua fa!

⁴⁰Au oke basa Ama ana manatunga nala, fo ala usiheni dula dalek ndia, tehu ta lala fan.”

⁴¹Boema Yesus nataa nae, “Te'e-te'e emi hataholi langa batuk ma kamahehele tak! Losa faihi'da, Au muse leo o emi ma Au ta haelai amanasa neu emi? Mo o anam ndia leo ia mai!”

⁴²Ni'iana ndia bei la'ok leo Yesus neu te, dula dale mangalauk ndia balan neu dae ma ana tao na ao na hela-holoduku. Tehu Yesus paleta dula dalek ndia kalua, boema ni'iana ndia ana lea. Boema Yesus fe falik ni'iana ndia leo aman neu.

⁴³Basa hataholi la bafa nala bee poo lita Manetualain koasa matua inan ndia. Nai lelek fo hataholi la bei bafa nala bee poo lita basa hata fo Ana taon nana boema, Yesus nafa'da ana manatunga nala nae,

⁴⁴“Taoafik matalolole, ma boso mafandele heni Au dede'a-kokolang ia: Ana Hataholi ka neukose nanafek leo hataholi daebafa ka koasan dale neu.”

⁴⁵Tehu Yesus ana manatungan sila la ta lalelak dede'a-kokolan sila fa. Nana dede'a-kokolak sila la nanabibila-babaak soaneus, fo ela boso lalela kana. Tehu ala bii latanen dede'ak ndia.

⁴⁶ Nai Yesus ana manatunga nala dalek, nale'a ka da'di la'eneu see ka nde nai sila dalek, nde matua lena.

⁴⁷Yesus bubuluk sila dudu'a-aafin. Hu ndia de Ana ho'i na ni'iana esa de Ana fe ni'iana ndia napadeik neu boboa na.

⁴⁸ Boema nafa'da ana manatunga nala nae, “Hataholi fo ana sipok ni'iana ia nanahu Au soona, sosoa na nae, ana sipok Au. Ma hataholi fo mana sipok Au a, ana sipok Ndia fo manamadenu Au a. Nana hataholi fo kome'doana nai emi tala'da, ndia nde matua lena!”

⁴⁹Boema Yohanis nae, “Tunggulu, ami mita hataholi usiheni nitu ninik Tunggulu na'de na de ami ka'in, nana hataholi ndia ta neme ita nakabubua na mai fa.”

⁵⁰Yesus nafa'da Yohanis ma ana manatungan fe'e nala nae, “Boso ka'in, nana hataholi fo ana ta la'ban emi fa soona, sosoa na nae ana nok emi.”

⁵¹Lelek fo Yesus fai na sanga deka Yesus nanaso'uk leo nusa so'da ka neu, boema Ana ho'i nakeketuk soaneu neu leo Yerusalem neu.

⁵²Boema Yesus nadenu hataholi nakahuluk neme Ndia mai. Hataholi fo nadenun sila la leu boema, ala masok leo nggolok esa nai Samaria soaneu ala sadia basa hata lala'ena ba'eneu Yesus.

⁵³Tehu hataholi manai nggolok ndia, ta nau sipok Yesus fa, nana litan, Ana bei la'o-la'o leo Yerusalem neu.

⁵⁴ Nai lelek ndia Yesus ana manatuga nala fo nde, Yakobis ma Yohanis ala bubuluk dede'ak ndia, boema lae, “Lamatuak, ade Lamatua ka nau ami moke ha'i kona neme lalai mai fo ana hotunisa hataholi ia la do?”

⁵⁵Yesus lipa leo dea neu boema, namanasas.

⁵⁶Basa boema ala leu leo nggolok fe'ek leu.

⁵⁷Yesus ma ana manatunga nala bei bela'o te hapu hataholi nafa'da Yesus nae, “Ama, au nau tunga Ama su'di leo bee neu!”

⁵⁸Yesus nataa nae, “Busa fui a mabolok, ma manupui a mandunuk, tehu Ana Hataholi ka ta nanuu mamanak soaneu nakalololik aoina na neu fa.”

⁵⁹Basa boema Yesus nafa'da hataholi fe'ek esa seluk nae, “Mai tunga Au leona.” Tehu hataholi ndia nae, “Ama, fe au loak fali akahuluk soaneu au u atoi au amang dei.”

⁶⁰Yesus nataa nae, “Nemena fo hataholi manamate ka natoi ndia hataholi manamate na mesa kana. Tehu o mu tui-benga hala ka nae Manetualain mulai paleta so.”

⁶¹ Hapu hataholi fe'ek esa boeo nafa'da nae, “Ama, au nau tunga Ama, tehu fe au loak fali akahuluk soaneu ate'a au hataholi ngala dei.”

⁶²Boema Yesus nafa'da hataholi ndia nae, “Metema hataholi esa mulai nakau uk, boema ana lipa leo dea neu soona, hataholi ndia ta nandaa da'di lima-eik neme Manetualain hataholi kamahehele nala mai fa.”