Read Termanu ULANGAN 10 Bible Online

ULANGAN 10 - Termanu bible

ULANGAN 10

¹“Basa boema, MANETUALAIN nafa'da au nae, Musa, pa'a-ma batu bebelak dua, sama leo batu bebela ka duak makasososak-ka, ma taom-ma peti ai esa boe, fo pe'da batu bebela ka duak-kala leo dalek neu, soona mai matongo moo Au, nai letek-ka poin-na.

²Neukose, Au sulak dede'a-kokolak neu batu bebela ka duak sila-la lain, sama leo Au sulak neu batu bebela ka duak fo o tao makalulutuk-kasa ndia; basa soona, o muse pe'da batu bebela ka duak sila-la, leo peti ndia dalek neu.

³Boema, au tao-a peti esa, neme ai akasia mai, ma au pa'a ala batu bebelak dua, sama leo batu bebela ka duak makahuluk-kala, de au enis leo letek lain neu.

⁴Boema, MANETUALAIN sulak Paleta Sanahulu neu batu sila-la lain, sama no paleta makasososak-ka, fo nde Ana fe emi paleta-la, nai lelek Ana kokolak neme ha'i-a tala'da mai, nai faik fo emi makabubua meme letek-ka huun-na. Basa ndia boema, MANETUALAIN fe batu bebelak nanasulak sila-la, leo au mai,

⁵Boema, au pe'da batu bebela ka duak sila-la, leo au tao-a peti-a, dalek neu, fo nandaa no MANETUALAIN paletan-na — de mulai neme hatematak ndia, losa besak ia, batu bebelak nanasulak ka duak sila-la, bei lai ndia.” (

⁶ Basa boema, hataholi Israel-la, ala la'o leme hataholi Yaakan-nala oedolun-nala mai, de leu leo Mosera leu. Mate Harun neme ndia, de latoi-latonon neme ndia boe. Anamanen Eleazar nggatin da'di imam.

⁷Ala la'o leme ndia mai, de leu leo Gudgod leu, boema lakandoo leo Yotbata leu, fo nai dae ndia, oen makadotok.

⁸ Nai lelek bei leme letek-ka ndia, MANETUALAIN hele hehelik hataholi Lewi-la, fo ala ito-ato Peti Hehelu-balataak-ka, ma lalalau-laoono MANETUALAIN, boema ala kokolak baba'e-papalak nenik Manetualain na'den-na. Sila bela-ba'un nde ndia, losa besak ia.

⁹Hu ndia de, leo Lewi-la, ala ta hapu dae pusaka sama leo, leo fe'e-fe'ek-kala, sama leo emi MANETUALAIM-ma nafa'da neus-sala.)

¹⁰ “Au leo eme letek lain, lele'dok haahulu, ma le'odaek haahulu, sama leo au taon nai makasososan-na. MANETUALAIN fe au amanene la'iesa seluk, nae Ana ta nau tao namate-namopo emi fa.

¹¹Boema, nadenu au la'o, fo au auli-alanga emi, fo ela emi hapu manuu dae fo Ana helu basan neu emi bei-ba'i kaim-mala so.”

¹²“Besak ia tolano-tolanoong-ngala lemin, taoafik neu hata fo, emi MANETUALAIM-ma noken neme emi mai fo nde: Fe ha'da-holomata neu emi MANETUALAIM-ma, ma tao-no'i basa paletan-nala lala'en-na. Sue-lain ma makaluku-makatele neun, neni basa emi ao paa samanem lala'en-na.

¹³Tunga la'iesak MANETUALAIN paletan fo, faik ia, au anduku-alosak-kana neu emi, hu kande neni malole fe emi.

¹⁴Lalai mademaina nde been-na, emi MANETUALAIM-ma, nuun ndia; daebafak-ka no basa hata lala'en fo, manai daebafak-ka lain boeo, Ndia nuun sila.

¹⁵Tehu MANETUALAIN susue-lalain ba'un-na seli, neu emi bei-ba'i kaim-mala, nalosa neme basa leoina lala'en-na, Ana helek-ka nde emi, de losa besak ia boeo, emi da'di Ndia ana hehelen.

¹⁶Da'di, mulai neme hatematak ia mai, emi muse tunga neu MANETUALAIN ma boso boe malangabatu seluk bai.

¹⁷ Emi MANETUALAIM-ma, nai basa lamatua daebafak lala'en-na lain, ma koasan-na, lena heni basa koasa lala'en-na. Ndia nde Manetualain fo, matua-madema ma manakoasa, de muse tungan. Ana ta metematak fa, ma Ana ta nau hataholi solo dalen-na nenik hata esa boen.

¹⁸Ana nasala'e faluina anamaak-kala haak-ka, fo ela taos tunga ndoos ma matetuk. Ana sue-lai hataholi nusa dea fo, manaleo sama-sama loo ita leoinan-nala, ma Ana fes nana'a-nininuk ma papake-ngganggaok.

¹⁹Soona, emi boeo, muse matu'du emi susue-lalaim, neu hataholi nusa dea sila-la, nana makahulun-na, emi hataholi nusa dean-nai Masir boe.

²⁰Fe ha'da-holomata neu emi MANETUALAIM-ma, ma makaluku-makatele neu ka'da Ndia mesak-kana. Ela leo been-na, emi lilineka mahele neun, ma emi soo-supa menik ka'da Ndia na'den-na mesak-kana.

²¹Koa-kion, nana Ndia nde emi Manetualaim-ma. Emi mita matam, Ana tao fe emi, tatao-nono'i matuaina-la, ma maneni bibii-namata'uk-ka.

²² Lelek fo, emi bei-ba'i kaim-mala leu leo Masir leu-a, sila dede'un-na, ka'da hataholi teluhulu. Tehu besak ia, emi MANETUALAIM-ma, taon-na emi dede'um-ma, de'u nduuk manai lalai-a.”