Read Termanu ULANGAN 12 Bible Online

ULANGAN 12 - Termanu bible

ULANGAN 12

¹“Emi muse tunga hoholo-lalanek ia-la, nai emi fai maso'dam-ma dalek, nai nusak fo, emi bei ba'i kaim MANETUALAIN-na, fen neu emi-a.

²Emi masok mala nusak ndia dalek soona, emi muse tao makalulutuk, leoina manaleo manai sila-la, mamana sene-do'ok neu sila lamatua daebafak nala. Mamana sosongo-tatangon manai letek mademaina-la poin-na, manai pupukuk-kala poin-na, ma manai ai matuaina-la huun-na.

³ Tao matu'u mei tunu-hotun-nala, ma tao makalulutuk lutu batu sosongon-tatangon-nala. Hotu heni Asyera dodoki-dudulan-nala, ma tao makalulutuk sila ai batu dodoki-dudula sosongo-tatangon-nala, fo ela ala boso boe, sene-do'ok neu lamatua daebafak sila-la, nai mamanak sila bai.

⁴Nai lelek, emi sene-do'ok neu emi MANETUALAIM-ma soona, boso nana dulak neme hataholi sila-la sene-do'on neu sila lamatua daebafak-na.

⁵Neukose, emi MANETUALAIM-ma, hele mamanak esa neme basa leo Israel-la daen-nala mai, fo ela ita leoinan-na mai leo matan-na mai, fo ala sene-do'ok neun.

⁶Nai mamanak ndia nde, emi muse meni tutunu-hohotu nanatunuk, boema tutunu-hohotu fe'ek-kala, fo nde emi tunu-hotu hahapu dadain ba'ek esa neme ba'eneu sanahuluh, tutunu-hohotuk soaneu bae nasar-ra, emi tutunu-hohotum fo, emi fe no emi dale hihiim-ma, ma emi sapi ana bi'ihii ana, bi'ilopo ana fo, nanabongi makasososak-kala.

⁷Nai mamanak ndia boe, fo nai emi MANETUALAIM-ma matan-na, emi sama-sama moo emi teidalem-mala, muse mi'a-minu no namahokok, soaneu emi sosota-mamangum buna-boan, nanahu emi MANETUALAIM-ma ba'e-pala basa sila-la so.

⁸Emi boso tao hata esa boen, sama leo besak ia ita tao-ka. Besak ia, emi sene-do'ok tunga emi dale hihiim-ma,

⁹nanahu emi beita masok leo, emi MANETUALAIM-ma, fe emi nusak-ka meu fa, mamanak fo emi hapu leo mahele, no nee-nee lina-linok.

¹⁰Emi lena basa Lee Yarden-na soona, neukose emi MANETUALAIM-ma tulu-fali emi, fo emi mangatuu ma emi leo dae manai lee ndia selik. Neukose, nasulu-nahapa emi nemi, neme musu lala'en-na mai, fo neukose emi maso'da no nee-nee lino-linok ma tetu-temak.

¹¹Basa soona, neukose emi MANETUALAIM-ma hele mamanak esa, fo nai bee, emi muse sene-do'ok neun. Emi muse meni basa hata lala'en, fo au paletan neu emi, fo nde, tutunu-hohotu nanatunuk, ma tutunu-hohotu fe'ek-kala, fo nde emi tunu-hotu hahapu dadain ba'ek esa neme ba'eneu sanahuluh, ma tunu-hotu hehelik fo emi helu, fen neu MANETUALAIN.

¹²Emi sama-sama moo emi anam-mala, emi atam-mala, ma hataholi Lewi manaleo manai emi kotam-mala, hu kande, ala ta hapu dae baba'ek nai emi nusam-ma fa, ela leo been-na, emi basa-basam-mala, mamahoko nai emi MANETUALAIM-ma matan-na.

¹³Emi ta bole tunu-hotu emi tutunu-hohotum, su'di nai mamanak bee fo, emi hele aom,

¹⁴tehu ka'da nai mamanak fo, MANETUALAIN helen nai emi leom esa daen-na. Ka'da nai mamanak ndia nde, emi muse tunu-hotu tutunu-hohotu nanatunuk, ma tao-no'i tatao-nono'ik fo, au paletan neu emi.

¹⁵Tehu emi bole do'do emi bana-manum, fo mi'a paan-na nai mamanak bee fo emi leo nai ndia. Emi MANETUALAIM-ma fe emi ba'ubee soona, emi bole mi'a. Basa hataholi fo, nau hataholi malalaok do hataholi manggenggeok boe, ana bole na'a paa ndia, sama leo emi bole mi'a paa nusa.

¹⁶ Ka'da emi ta bole mi'a daan-na fa, po'ahenin leo dae lain neu, sama leo oe-a.

¹⁷Emi ta bole mi'a emi tutunu-hohotu neme emi hahapu dadain baba'ek esa neme ba'en neu sanahuluh fo nde gandum, angol ma mina setun-nala hahapu dadain ba'ek esa neme ba'eneu sanahuluh fa, ma emi sapim, bi'ihiik ma bi'ilopom-mala, ana nanabongi makasososan-nala, tutunu-hohotuk fo bae nasar, emi tutunu-hohotum fo, emi fe no emi dale hihiim-ma, do tutunu-hohotu fe'ek-kala, nai emi mamana leleom-ma fa.

¹⁸Emi ma emi anam-mala, sama-sama moo emi atam-mala, ma hataholi Lewi manaleo manai emi kotam-ma, muse mi'a tunu-hotuk ndia, nai emi MANETUALAIM-ma matan-na, fo nai emi MANETUALAIM-ma hele mamanak-ka. Ma emi muse mamahoko nai mamanak ndia, nanahu emi ue-le'dim buna-boan lala'en-na.

¹⁹Mafandendelek, fo boso nalosak emi po'ilotak hataholi Lewi-la, latofa-latalak, nai lelek emi leo nai nusak ndia.

²⁰Metema, MANETUALAIN tao namaloa basa emi nusam-ma, dae toon-nala, sama leo Ana helu basak-ka soona, emi bole mi'a paa, su'di bebe'ik-ka leona.

²¹Metema, emi MANETUALAIM-ma hele mamanak-ka, dook-ka nanseli neme emi mamana leleom-ma mai soona, emi bole do'do sapi esa, bi'ilopo do bi'ihiik, fo MANETUALAIN fe emi kala, fo mi'a su'di bebe'ik-ka, nai emi mamanam-ma, sama leo au afa'da basan neu emi so.

²²Basa hataholi, fo nau malalaok do manggenggeok boe, bole na'a paa ndia, sama leo emi bole mi'a paa nusa.

²³ Tehu paa bee-la bei madaak soona, emi ta bole mi'a fan, nanahu bana ndia samanen-na, nai daan dale, de emi ta bole mi'a paan-na, sama-sama no samanen-na fa.

²⁴Ta bole mi'a daan-na makandondook fa, te emi muse po'ahenin leo dae lain neu, sama leo oe-a.

²⁵Metema, emi tunga paleta sila-la soona, neukose MANETUALAIN namahoko, de emi moo emi tititi-nonosim-mala, neukose maso'da no tetu-temak.

²⁶Basa tutunu-hohotuk ma tunu-hotuk lala'en fo emi helu basa, fen leo MANETUALAIN neu, emi muse menin leo mamanak fo MANETUALAIN helek-ka neu.

²⁷Tutunu-hohotu nanatunuk ma tutunu-hohotuk fo, emi mi'a paan-na, muse nanatunu-hotuk nai emi MANETUALAIM-ma mei tunu-hotun lain, tehu po'aheni daan-na, leo mei tunu-hotuk ndia lain neu.

²⁸Metema emi taoafik matalolole neu basa hata lala'en fo, au paletan neu emi, soona emi tao tatao-nono'i malole fo nandaa no emi MANETUALAIM-ma dalen-na, nalosa emi moo emi tititi-nonosim-mala, so'da-molek ma tetu-temak, losa dodoon-na.”

²⁹“Emi MANETUALAIM-ma, neukose Ana tao namate-namopo leoina fo, manaleo manai nusak ndia, nalosa emi hapu mangatuu-man, fo emi leo-ma nusak ndia.

³⁰Metema, leoina sila-la, nanatao namate-namopo basak soona, manea matalolole, fo boso nalosak emi nana dulak neme leoina sila, sene-do'on neu matualain fe'ek-kala, nana tatao-nono'ik ndia, neni soe fe emi.

³¹Emi boso nana dulak neme leoina sila-la, sene-do'on neu sila lamatua daebafak fe'en-nala, fo emi paken soaneu sene-do'ok neu emi MANETUALAIM-ma, nana sila sene-do'ok nenik tatao-nono'i manggengeok fo, MANETUALAIN nape'da dale nasak tatao-nono'ik ndia fa. Lena-lenak, ala tunu sila ana bongin-nala, nai sila mei tunu-hotun lain, da'di neu tutunu-hohotuk soaneu sila lamatua daebafak-nala.

³² Tao-no'i basa hata lala'en fo, au paletan neu emi; boso popo-tama do ho'i heni faa anak boen.