Read Termanu ULANGAN 17 Bible Online

ULANGAN 17 - Termanu bible

ULANGAN 17

¹Boso tunu-hotu fe emi MANETUALAIM-ma sapi do bi'ilopo lu'u-la'ak, nanahu Ana nape'da dale nasak-kana fa.

²Metema, emi mamanene, lae nai emi kotam esa, hapu hataholi tao sala-singok neu emi MANETUALAIM-ma, nanahu ana la'olena hehelu-balataak-ka,

³ ma paletan-nala nenik ana sene-do'ok ma amahele neu lamatua daebafak fe'ek-kala, do neu le'do-a, bulak-ka, do nduuk-kala,

⁴soona emi muse palisak matalolole dein. Ade tete'ek-ka, atao-nono'i mangalauk ndia, ana da'di nai Israel so do,

⁵soona muse tapa hataholi masalak ndia, nenik batu losa maten.

⁶ Tehu bole hukunisa hataholi ndia, metema hapu sakasii dua, do lena neme dua mai; ta bole hukunisa hataholi esa fa, metema hapu ka'da sakasii esa.

⁷ Basa sakasii-la, nde tapa batu makasososak-ka neu hataholi ndia, fo besak-ka laun-na lala'en-na. No enok ndia, emi hapu tao mamopo, tatao-nono'i mangalauk ndia.

⁸Metema, manakee-manafula manai mamanak ndia, ala ta laketu-lala'di lalelak dede'ak ndia fa, nanahu nakeketun-na, tean-na seli, fo nde hataholi fo ana tutu'u basa, soaneu ana taonisa hataholi, do ana ta name'da fa te, ana taonisa hataholi, nale'a-napilik la'eneu pusaka, do esa tao nakahina esa soona, emi muse meu leo, emi MANETUALAIM-ma hele mamanak-ka meu.

⁹Kalaak emi dede'am ndia, leo imam-mala Lewi-la, ma manakee-manafula fo, manamalalau-maoono manai sila-la, fo ela laketu-lala'din.

¹⁰Sila nde fe nakeketuk-ka, soona emi muse palisak matalolole sila nakeketun fo ala fen neu emi-a.

¹¹Sipom-ma, sila nakeketun-na, fo maketun tunga sila nakeketun-na, losa dede'a anak-kala boe.

¹²Su'di see fo, ana napalani la'ban manakee-manafula ma imam-mala nakeketun-na soona, muse hukunisa hataholi ndia; no enok ndia, emi hapu tao mamopo tatao-nono'i mangalauk ndia, nai Israel.

¹³Basa hataholi fo, lamanene la'eneu manada'dik dia, ala bii-lamata'u lanseli, nalosa ta hapu seluk hataholi, napalani tao tatao-nono'ik leondiak-ka so'on.”

¹⁴ “Metema emi leo nai dae fo, emi MANETUALAIM-ma fen neu emi-a soona, fafa'kama emi mahiik manuu manek esa, sama leo leoina fe'e-fe'ek fo, manai emi titia-taataim-mala boe.

¹⁵Hele matalolole, fo ela emi so'u hataholi fo, ana da'di emi manem-ma nde been-na, emi MANETUALAIM-ma nde hele hataholi ndia. Emi muse hele hataholi ndia, neme emi leoinam mai, fo emi boso so'u hataholi nusa dea, da'di emi manem-ma.

¹⁶ Manek-ka, ta bole nanuu ndala ba'uk-ka, fo ana fe solda'dun-nala, ma ana ta bole nadenu leoina ia fo, leu asa ndala nai Masir fa, nanahu MANETUALAIN nafa'da, nae Ndia anan-nala, ala ta bole fali-le'us leo nusak ndia leu so'on.

¹⁷ Manek-ka, saoinan boso ba'uk-ka, fo ela ana boso nasadea MANETUALAIN. Manek-ka boeo, ana boso sanga enok fo, namasu'i lilofulak ma lilopilas fa.

¹⁸Metema, dooei basa hataholi esa da'di manek soona, ana muse fen susulak esa, isin-na Manetualain hoholo-lalanen, fo hoholo-lalanek sila-la nanasalin neme imam Lewi-la pe'da susulak-kala mai.

¹⁹Ana muse pe'da susulak ndia, nahele nai boboan-na, ma nai fai maso'dan-na dalek, ana muse lees susulak ndia, fo ela ana nanoli fe ha'da-holomata neu ndia MANETUALAIN-na, ma ana tunga basa paleta lala'en fo, nanasulak nai susulak ndia dalek-ka.

²⁰Metema, ana lees matalololen soona, neukose ana ta tatao oan nae ndia malole lena neme hataholi fo, sila leoina esa, ma neukose ana ta la'olena MANETUALAIN paletan-nala, no enok leobeek ndia boe. Boema, ndia no tititi-nonosin-nala, neukose ala paleta leoinan, neme bobongik leo bobongik neu.”