Read Termanu ULANGAN 18 Bible Online

ULANGAN 18 - Termanu bible

ULANGAN 18

¹“Basa leo Lewi-a lala'en-na, ala hapu bela-ba'uk da'di leo imam, hu ndia de, sila ta bole hapu baba'ek neme dae Israel-la, buna-boan mai fa. Sila muse laso'da leme tunu-hotuk ma tutunu-hohotu fe'e-fe'ek fo, nanafek neu MANETUALAIN-na.

² Sila ta bole lanuu dae sama leo, leo fe'ek-kala fa, nana MANETUALAIN nde da'di, sila baba'en-na, sama leo MANETUALAIN helu basan neu sila so.

³Metema, hataholi esa, ana tunu-hotu tutunu-hohotuk sapi do bi'ilopo, soona fe bana ndia eialun-na, timin-na, ma tei-aten leo imam-mala neu, fo da'di neu sila baba'en-na.

⁴Sila baba'en-na boeo nde, gandum, angol, ma mina setun-na, buna-boa makasososan-na, boema bi'ilopo-la, bulu nananggute makasososan-na.

⁵Neme basa leo-leo manai Israel-la mai, emi MANETUALAIM-ma, Ana hele basa leo Lewi-a, da'di imam losa dodoon-na so.

⁶Metema, leo Lewi esa, ana da'di neme su'di kota bee mai, nai Israel, ana mai leo MANETUALAIN hele mamanak-ka mai, fo ana leo nai ndia soona,

⁷ana bole nalalau-naoono ndia MANETUALAIN da'di leo imam, sama leo hataholi Lewi fe'e-fe'ek fo, manamalalau-maoono manai mamanak ndia.

⁸Ana bole hapu nana'ak fo, dede'un-na sama no imam fe'ek-kala; hata fo ana hapu neme uma isin-nala mai boe.”

⁹“Metema, emi masok mala emi MANETUALAIM-ma, Ana fe emi nusak-ka dalek soona, boso nanadulak neme leoina manai sila-la, tatao-nono'i mangalaun-nala mai.

¹⁰ Nai emi dalek, ta bole hapu hataholi esa boen, ana tunu-hotu anan-na, da'di leo tutunu-hohotu nanatunuk fa. Ma ta bole hapu hataholi esa boen, ana da'di hataholi manasiula-tongonok, manasanga ta'du-tana, manapake dede'a-kokolak fo nakahahaik hataholi kamahe'dis, do

¹¹ manasuangi, do hataholi fo, naloo nalelak hataholi manamatek, samanen-na.

¹²Emi MANETUALAIM-ma, ta hii hataholi manatao tatao-nono'i mangalauk leondiak-ka fa, hu ndia de, Ana usiheni nggilleo-bobongik sila-la, leme emi matam-ma mai

¹³ Da'di, ela leo been-na, emi mamahele neu emi MANETUALAIM-ma, no emi dalek-katematuam-ma.”

¹⁴Basa boema, Musa nafa'da nae, “Leoina manai nusak fo, neukose emi leo nai dalek ndia, ala tunga nanoli-nafa'dak neme, manasiula-tongok-kala, ma manasanga ta'du-tana-la mai. Tehu, emi MANETUALAIM-ma ta nau emi tao leondiak fa.

¹⁵ Nasafalin-na, neukose Ana fe emi nabi esa, sama leo au, fo emi muse tungan.

¹⁶Nai faik fo, emi makabubua meme Letek Sinai-a, emi dokodoe fo ela, emi boso boe mamanene emi MANETUALAIM-ma, Ana kokolak, ma emi boso boe, mitan nai ha'i manapila lo'aloak-ka dalek, nana emi bii mate emi.

¹⁷Hu ndia de, MANETUALAIN nafa'da au nae, ‘Sila nonoken ndia, malole.

¹⁸Neukose, Au fes nabi esa sama leo o, neme sila leoinan mai. Neukose, Au afa'dan hata fo, muse ana nafa'dan, boema neukose, ana nanduku-nalosak-kana neu leoina ndia, basa hata lala'en fo, Au paleta neun-na.

¹⁹ Neukose ana kokolak pake Au na'deng-nga, fo neukose Au huku su'di see fo, ana ta nau namanene fan.

²⁰Tehu metema, nabi esa, ana napalani nanduku-nalosak hala-heheluk esa, fo ana pake Au na'deng-nga, te se'kona, Au ta adenun ana tao leondiak fa soona, muse taonisan; leondiak boe, ba'eneu nabi fo, ana kokolak pake lamatua daebafak fe'ek-kala na'den-nala soona, muse hukunisas.’

²¹Fafa'kama, emi matane nai, emi dalem dale mae, ‘Tao leo beek fo, ami bubuluk, ade nabi ndia, hala hehelun-na, neme MANETUALAIN mai do ta?’

²²Metema nabi esa, ana kokolak pake MANETUALAIN na'den-na, tehu hata fo ana kokolak-kana ndia, ana ta da'di fa soona, hala-kokolak ndia, ta neme MANETUALAIN mai fa. Nabi ndia, ana kokolak pake ndia na'den-na, de ta paluu emi bii-mamata'u neu fan.”