Read Termanu ULANGAN 19 Bible Online

ULANGAN 19 - Termanu bible

ULANGAN 19

¹ “Emi MANETUALAIM-ma, Ana tao namate-namopo basa leoina sila-la, fo Ana fe nusan-na leo emi neu, boema emi ho'i-ma kotan-nala, ma uman-nala, fo emi leo nai ndia soona,

²emi muse ba'e dae ndia neu baba'ek telu, fo baba'ek esan-na, nanuu kota nasulu aok esa, fo ela hataholi kanisak-kala lalai leo naa leu.

⁴Metema hataholi esa, ana ta tutu'u taonisa hataholi fe'ek, fo ndia musun ta ndia fa soona, hataholi kanisak ndia nalai leo kota sila-la esa neu, fo ana bole leo neme ndia.

⁵Sama-na leo, hataholi dua, sama-sama leu lo'o ai nai nula dale. Nai lelek hataholi esak-ka, ana lo'o ai boema, mosuheni ta'kan-na isin-na, de la'e nonon ndia, nalosa maten. Soona hataholi fo ana ta tutu'u nanisa ndia, salan ta, de ana bole nalai leo kota nasulu aok sila-la, esa dalek neu, fo ela naso'da. Ela leo been-na, kota mananasulu aok sila-la, esa nai dook-ka, fo ela hataholi nanataonisak ndia teidalen-nala, ta hapu taolisa hataholi kanisak fo, salan ta ndia fa.

⁷Hu ndia de, au paleta emi fo sadia-ma, kota telu.

⁸Metema emi MANETUALAIM-ma, tao namaloa emi daem-ma, sama leo Ana helu basan neu emi bei-ba'i kaim-mala, boema Ana fe la'iesak nusak ndia, leo emi neu soona,

⁹emi muse hele seluk kota nasulu aok telu (Neukose Ana fe nusak ndia leo emi neu, metema emi tunga basa hata lala'en fo au paletan neu emi nai faik ia, ma metema emi sue-lai emi MANETUALAIM-ma, fo maso'da tunga nanolin-nala.)

¹⁰Tao-no'i basa paleta sila-la, fo ela emi boso masala-masingo, nanahu emi po'ilotak hataholi sala tak-ka, nanataonisak nai nusak fo, emi MANETUALAIM-ma fe neu emi ndia.”

¹¹“Tehu dede'an-na fe'ek bai, metema hataholi esa, ana nasasalematak no musun-na, de ana tutu'u basa, ma ana nape'da dale nasak no musun ndia fa, de ana taonisan, boema nalai leo kota nasulu aok sila-la, esa neu, fo ana hapu nasulu-nahapak.

¹²Nai dede'ak ndia dale, basa mauli-malangan kota, muse laloo hataholi ndia, fo ala fen leo hataholi manamatek ndia teidalen-nala neu, fo daenga ala taolisan.

¹³Boso kasian hataholi ndia. Soi-po'i Israel neme kanisak ndia mai, fo ela emi hapu maso'da no tetu-temak.”

¹⁴ “Metema emi losa nusak fo, emi MANETUALAIM-ma fe emi nusak-ka soona, emi boso makano'dok emi too-lanem mo emi titia-tataim fo, nananaketu basak neme makahulun eli mai so.”

¹⁵ “Sakasii esa maesak-kana soona, beita dai soaneu nafa'da hataholi nanakalaak esa salan-na fa; muse paluu sakasii dua, nai dede'ak ndia dalek.

¹⁶Metema hataholi esa, ana nau tao nakatutu'dak hataholi fe'ek, nenik kalaak pepekok nai manakee-manafula matan, soona

¹⁷duas muse leu leo mamana nakaluku-nakatelek fo MANETUALAIN naketuk-ka leu, fo ela basa imam-mala ma manakee-manafula manai sila-la, naketu dede'ak ndia.

¹⁸Basa manakee-manafula-la, muse palisak matalolole dede'ak ndia, fo metema tete'ek-ka hataholi ndia, ana nakamumulu-nakamamaek hataholi Israel-la, soona

¹⁹muse huku hataholi ndia, sama leo tatao-nono'in neu musu non-na. No enok ndia, emi hapu tao mamopo tatao-nono'i mangalauk ndia.

²⁰Neukose basa hataholi-la lamanene dede'ak ndia, fo ala bii-lamata'u, nalosa ta hapu hataholi tao tatao-nono'i mangalauk leondiak-ka so'on.

²¹ Boso mape'da dalek susuek, nai dede'ak matak leondiak-ka. Huhukun-na nalupa: Samanek nggati samanek, matak nggati matak, nisik nggati nisik, limak nggati limak, ma eik nggati eik.”