Read Termanu ULANGAN 20 Bible Online

ULANGAN 20 - Termanu bible

ULANGAN 20

¹“Metema emi meu matee-matati fo, la'ban emi musum-mala, fo emi mita musu-a kaleta musun-nala, ndalan-nala boema solda'dun-nala de'ulena emi soona, boso bii. Te emi MANETUALAIM-ma, fo manasoi-po'i emi meme Masir mai-a, neukose Ana tulu-fali emi boe.

²Emi beita matee-matati fa te, imam esa muse neu leo emi uluk neu, fo ana kokolak no emi nae leo ia,

³‘Tolano-tolanoong-ngala lemin! Mamanene dei! Te faik ia, emi muse meu matee-matati. Boso bii-mamata'u, do dalem-ma boso ba'ihana, do mapangamak.

⁴Emi MANETUALAIM-ma, Ana tunga fo Ana tulu-fali emi, fo Ana fe emi sengi.’

⁵Basa soona, basa malanga solda'du matuaina-la, lafa'da dede'ak-kala nde ia, neu emi nae, ‘Ade, nai emi dalek, hapu hataholi, besak-ka nafofo'a uman-na, te ana beita tao feta soaneu nakatema fan do? Metema hapu soona, ana bole fali ne'un. Nana metema, maten nai natee-natatik dale soona, neukose hataholi fe'ek neu leona uman-na.

⁶Ade, nai emi dalek, hapu hataholi besak-ka ana sele osi angol-na, te ana beita ketu-seu angol-la boan-na fa do? Metema hapu soona, ana bole fali ne'un. Nana metema, maten nai natee-natatik dale soona, neukose hataholi fe'ek nde, ketu-seu ndia angol-nala boan-na.

⁷Ade, nai emi dalek, hapu hataholi besak-ka ana a'du-natane basa inaanan-na, fo ala sanga sao do? Metema hapu soona, ana bole fali ne'un. Nana metema maten nai natee-natatik dale soona, neukose hataholi fe'ek saon-na inaanan ndia.’

⁸Basa solda'du matuaina-la boeo, muse lafa'da dede'ak ia neu emi lae, ‘Ade, nai emi dalek, hapu hataholi tene manahailuak ma manabii-mamata'uk do? Metema hapu soona, ana bole fali ne'un, fo ela ana boso taon-na hataholi fe'ek mopo palanin-na.’

⁹Basa malanga solda'du matuaina-la, ala kokolak basa loo solda'du-la soona, muse hele mauli-malangan fo, solda'du bubuak esan-na, mauli-malangan esa.

¹⁰Metema emi meu sapu-ma, kota esa soona, fe makahuluk laun-na loak fo laloe aon-na.

¹¹Metema ala soiheni lelesuina-la fo laloe aon-na soona, ho'u-malas fo, muse tao basa-basas da'di emi atam-mala, fo fes ala tao belanusak soaneu emi.

¹²Tehu metema, kota ndia laun-nala, ala ta nau laloe aon-na fa, te lahiik latee-latati soona, emi muse sapu-ma, kota ndia.

¹³Basa soona, metema emi MANETUALAIM-ma nahiik fe emi loso-ma, kota ndia soona, emi muse taomisa la'iesak, touk manai nusak ndia dalek-ka.

¹⁴Tehu, emi bole ho'im-ma basa inak-kala, ni'iana-la, bana-manu ma su'di hata beek fo manai kota ndia dalek-ka. Emi bole pake, emi musum-ma hata-heton sila-la lalaena. Nana emi MANETUALAIM-ma fe la'iesak, basa sila-la leo emi neu.

¹⁵Emi muse tao leondiak, neu basa kota-kota fo, dook-ka neme em nusam-ma mai.

¹⁶Tehu metema, kota sila-la, nai emi MANETUALAIM-ma fe emi nusak-ka dalek soona, emi muse taomisa la'iesak laun-nala.

¹⁷Emi muse tao mamate-mamopo hataholi Het, Amori, Kanaan, Feris, Hewi ma Yebus-sala, sama leo emi MANETUALAIM-ma, paletan neu emi.

¹⁸Taomisas, fo ela ala boso tao-la emi, masala-masingo neu emi MANETUALAIM-ma, nenik lanoli emi tao tatao-nono'ik fo nanamaluak, ba'eneu sila lamatua daebafak-na.

¹⁹Metema, emi sanga matee-matati moo kota esa, fo emi makahapi-man losa dook-ka soona, boso lo'o ai maboak manai sila-la. Mi'a ai sila-la boan-na, tehu boso lo'oheni huun-nala, nana emi ta musu moo ai sila-la fa.

²⁰Emi bole lo'o ai fe'ek fo, tao pa'a soaneu pa'a okokfefeok kota ndia, losa kota ndia, ana tu'da leo emi limam dale neu.”