Read Termanu ULANGAN 21 Bible Online

ULANGAN 21 - Termanu bible

ULANGAN 21

¹“Metema, nai emi MANETUALAIM-ma fe emi nusak-ka dalek, hapu hataholi, ana mate nisalala nai tina, tehu ta bubuluk see kande, taonisan-nana fa,

²soona emi mauli-malangan ma manakee-manafulam-mala, leu ukun neme mamates-sa lololin-na, leo kota-kota fo manadeka loo mamates-sa lololin-na.

³Soona, kota fo ana deka nanseli no mamates-sa, lasi nggolon-nala muse pa'a-la sapi ana esa, ana beita hela nita luku fa.

⁴Ala muse leni sapi ndia, leo lee manama'dak taak esa nai ndia, fo daen-na bei nanafoi-fala taak, ma nanasele tani bei taak, neu dae manai lee ndia su'un-na fa. Nai mamanak ndia ala muse helula'di sapi ndia lesuha'in-na.

⁵Basa imam Lewi-la boeo, muse leu leondia leu, nanahu sila muse fe nakeketuk neu dede'a kanisak lala'en-na. Emi MANETUALAIM-ma hele sila, soaneu lalalau-laoonon, ma ala fe baba'e-papalak nenik na'den-na.

⁶Boema, kota manadekak nanseli ndia, lasi nggolon-nala lala'en-na, muse safe liman-nala nai sapi ndia lain,

⁷ma lafa'da lae, ‘Ami ta taomisa hataholi ndia fa, ma ami ta bubuluk see kande, taonisa fan.

⁸MANETUALAIN, fe do'o do ampon neu Israel, O anam fo, O soi-po'in neme Masir mai. Fe do'o do ampona neu ami, ma boso mafa'da mae, ami nde lu'a-lepa hataholi sala tak fo, nanataonisak ndia.’

⁹Soona, no emi tao-no'i hata fo MANETUALAIN noken, de ta na'da nae, emi nde lu'a-lepa kanisak ndia fa.”

¹⁰“Metema, emi matee-matati, fo emi MANETUALAIM-ma fe emi sengi, boema emi foo meni hataholi nanafook,

¹¹fo fafa'kama, nai hataholi nanafook sila-la dalek, hapu inak esa mata-makeek, fo o mahiik sao-man.

¹²Soona moo inak ndia, leo o umam neu. Losa uma soona, ana muse ngguteheni langadoon-na, ma ana soeheni lima fangan-nala,

¹³ma ana nggatiheni bua papaken-na. Ana muse leo nai o umam, ma ana falu, ina-aman mamaten-na, bulak esa dalen-na. Basa ndia soona, o bole sao-man.

¹⁴Metema, neu fai makabuin, fo o ta mahiik-kana so'on soona, o bole madenun, fo ana fali ne'un no ao loak. O ta bole taon da'di leo ata, do o mase'on, nanahu o makasetin de, o sungu moon so.”

¹⁵“Metema, touk esa saon dua, de ana sue esa, ma esa soona ta, tehu duas manabongi anaotuk mesan, tehu manabongin-nakahuluk anatouk-ka, nde saoinan fo, ana ta sue fan-nana.

¹⁶Metema, hataholi ndia, ana nau ho'i nakeketuk leo beek fo, ana ba'e su'i-beten neu enan-nala soona, ana ta bole nok saoina susue-lalain-na fa, fo ana fe hak ana uluk-ka leo saoinan ndia, anan-na neu.

¹⁷Ana muse ba'e hata-heton, fo ana fe baba'ek dua leo ana uluk-ka neu, leomae ana uluk ndia, saoina susuen-na, anan ta ndia fa. Tunga nakeketuk-ka, de aman muse tao natetu, ana uluk-ka baba'en-na, de ana muse fe baba'e ana uluk-ka leo ni'iana ndia neu.”

¹⁸“Metema, ni'iana touanak esa, nalanga batu de ana hii ka'da lena-la'ban, ma ana ta nau tunga ina-aman paletan-na fa, leomae ina-aman huku hain so.

¹⁹Soona, ina-aman muse loon leo lasi nggolok manai kota fo, ala leo lai ndia, fo ela laketu-lala'di huhukuk soaneu ni'iana ndia.

²⁰Ina-aman muse lafa'da, lasi nggolok manai kota ndia lae, ‘Ami anam ia, nalanga batu, ma ana ta nau tunga ami paletam-ma fa; boema ana hii ka'da didilo-dodolo tali-doik ma ana hii ka'da mafuk ala-lalu.’

²¹Soona, touk manai kota ndia dalek-ka, ala muse tapalisa ni'iana ndia, nenik batu. No enok ndia, emi tao mamopo tatao-nono'i mangalauk ndia. De metema, basa hataholi Israel-la, ala lamanene manada'dik ndia soona, neukose ala bii-lamata'u.”

²²“Metema hataholi esa nanahukunisak, nanahu tatao-nono'i mangalauk esa, fo popolan-na nanalonak nai dii esa lain,

²³ soona ta bole po'ilotak popolak ndia, lona-lona nahele neme dii ndia lain, le'odae katemak esa, te muse natoi-natonon nai faik ndia dalen-na boe. Popolak fo nanalonak nai dii ndia lain-na, neni MANETUALAIN soo-supan fe nusak ndia. Da'di matoi-matono popolak ndia, fo ela emi boso tao manggenggeo, emi MANETUALAIM-ma fe emi nusak-ka.