Read Termanu ULANGAN 23 Bible Online

ULANGAN 23 - Termanu bible

ULANGAN 23

¹“Hataholi fo mamaen-na nakalulutuk do loun-na nanakee henik soona, ana ta bole da'di MANETUALAIN anan-nala so'on fa.

²Hataholi ama tak-ka no basa tititi-nonosin losa bobongik ka sanahulu-a, ta bole da'di MANETUALAIN anan-nala so'on fa.

³ Hataholi Amon-nala, ma hataholi Moab-pala, boema tititi-nonosin-nala losa bobongik ka sanahulu-a, ta bole da'di MANETUALAIN anan-nala so'on fa,

⁴ nanahu nai lelek emi kalua meme Masir mai-a, ala ta nau fe emi nana'a-nininuk fa. Nakalena, ala se'ba Bileam, fo Beor neme kota Petor-a, nai Mesopotamia, fo ana soo-supa emi.

⁵ Tehu emi MANETUALAIM-ma, ta nau namanene Bileam soo-supan ndia fa De Ana nggati soo-supak ndia, da'di baba'e-papalak, nanahu Ana sue-lai emi.

⁶Nai emi fai maso'dam-ma dalek, boso tulu-fali leoina sila-la, ma boso fes laso'da no tetu-temak.

⁷Boso makadadaek hataholi Edom-mala, nanahu emi tolanom sila-la. Boeo, boso makadadaek hataholi Masir-ra, nanahu emi leo hai neme sila nusan-na so.

⁸Neme bobongi ka telu-a, losa bobongik manamaik-kala, ala bole da'di MANETUALAIN anan-nala so'on.”

⁹“Metema, emi meu matee-matati soona, emi muse madook emi aoinam-ma, neme basa tatao-nono'i manggenggeok lala'en-na mai.

¹⁰Metema, hataholi esa nanggenggeo, nanahu nai lelek ana sungu, hata esa ana da'di nai bibii-mamaen soona, ana muse kalua neme uma ofu dale mai, fo nahele neme deak.

¹¹Le'do-a sanga tenak soona, ana muse nadiu oe, fo le'do-a tenak soona, ana bole masok fali leo uma ofu dale neu.

¹²Emi muse sadia mamanak nai oofuk-ka deak, fo meu mangadeak nai ndia.

¹³Metema, nau meu leon-na meu soona, fe'ek neme basa hata emi menik-kala, meni seluk ai keke'uk esa soaneu kali bolok mamana nangadeak-ka ma soaneu nakadofu nenik-kana.

¹⁴Emi MANETUALAIM-ma, sama-sama no emi nai uma ofu dale, fo Ana nasulu-nahapa emi, ma Ana fe emi sengi, emi musum-mala. Hu ndia de, manea emi uma ofum-ma fo ela balisi nahele. Boso hapu hata esa, ta kandaak nai emi dalek boen, fo ela MANETUALAIN boso la'oela emi.”

¹⁵“Metema, ata esa nalai la'oela tuan-na, boema ana mai leo emi mai, fo noke nasulu aon-na soona, boso madenu falik-kana.

¹⁶Ana bole hele mamanak nai emi kotam esa, fo ana leo, boema emi ta bole tao balakaik neu fan.

¹⁷ Hataholi Israel esa, nau touk do inak boe, ta bole da'di manasosoa-piaok, nai uma sosongo-tatangok-kala fa.

¹⁸Doik fo, ana hapun neme sosoa-piaon mai boeo, ta bole menin leo emi MANETUALAIM-ma Uman-na neu fa, fo bae nasar, nana emi MANETUALAIM-ma, ta hii mete manasosoa-piaok manai uma sosongo-tatangok-kala, ma manasosoa-piaok-kala, doi sese'ban-na fa.

¹⁹ Metema, emi fe hataholi nusa dea, ana tona doik soona, emi bole moke bunak. Tehu metema, emi fe emi leoinam esa, ana tona doik, do nana'ak, do bua-lo'a fe'ek soona, emi ta bole moke bunak fa. Metema, emi tunga paleta ndia, soona emi MANETUALAIM-ma, fe baba'e-papalak neu basa hata lala'en fo, emi tao-no'in nai nusak fo emi mangatuu-man ndia.

²¹ Metema, emi helu mae, emi fe hata esa leo emi MANETUALAIM-ma neu soona, no lai-laik, tao matetu emi hehelum ndia, nanahu emi MANETUALAIM-ma, Ana la'ok nakandoo, fo metema, emi ta tao matetu fan soona, emi masala-masingo.

²²Metema, emi ta tao hehelu-balataak moo MANETUALAIN fa soona, emi ta masala-masingo fa.

²³Tehu metema, emi tao hehelu-balataak moo emi MANETUALAIM-ma, tunga emi dale hihii-nanau mesam-ma soona, emi muse tao matetun.

²⁴Metema, emi la'ok tunga hataholi fe'ek osi angol-na soona, emi bole mi'a angol boak su'di bebe'ik-ka, tehu boso ho'i meni.

²⁵Metema, emi la'ok tunga hataholi fe'ek tina gandum-na soona, emi bole ketu gandum nenik emi limam-ma, tehu boso ke'di menik, dope keke'dik gandum.”