Read Termanu ULANGAN 25 Bible Online

ULANGAN 25 - Termanu bible

ULANGAN 25

¹Metema, tou Israel dua, leu leo uman naketu-nala'dik-ka leu, fo ala kalaak dede'ak esa, boema manakee-manafula laketun, esa ta nasala fa, ma esa nasala.

²Metema, laketu hataholi masalak-ka, nenik huhuku fefepa-lili'uk soona, manakee-manafula muse ladenun fo nakabuku. Fefepa-lili'uk dede'un-na, nandaa no tatao-nono'i mangalauk fo, ana tao-no'ik-ka,

³ tehu ta bole lena neme, boak haahulu mai fa. Metema lena neme boak haahulu mai soona, ndia sosoa-ndandaan nae, lakamumulu-lakamamaek hataholi ndia, nai lea matan.

⁴ Metema, sapi-a heheta-aa'i gandum soona, boso pole nggonggolon-na.”

⁵ “Metema hataholi de'ubee, tolanok-kala, de ala leo lakabubua, boema mate esa, tehu ana ta bongi anatouk fa, soona inafalu ndia, ta bole sao hataholi deak fa. Sao manamaten ndia, tolanon esa, muse ana saon-na, inafalu ndia.

⁶Sila anatou ulun-na, muse taon da'di sila tolano manamaten ndia, ana ulun-na, fo ela ana hapu tititi-nonosik nai leoina Israel-la dalek.

⁷ Metema, ana ta nau sao tolano manamaten-na soan ndia fa soona, inak ndia muse neu nafa'da kota ndia lasin-nala nae, ‘Au sao manamateng-nga tolanon-na, ana ta nau fe ndia tolanon-na, tititi-nonosik esa boen, nai leoina Israel-la dalek fa.’

⁸Soona, kota ndia lasin-nala, muse laloo hataholi ndia, fo ala kokolak loon. Metema, ana ta nau sipok fa soona,

⁹hataholi ndia, tolano manamaten-na, saoinan-na muse neu leo hataholi ndia matan-na neu, nai kota ndia lasin-nala matan, fo se'iheni hataholi ndia ta'buein-na, ma ana mu'di ape neu mata-panan, boema nafa'da nae, ‘Hataholi fo, ana ta nau fe tolanon-na tititi-nonosik fa, muse tao taon leo iak.’

¹⁰Neukose, loke hataholi ndia teidalen-nala nai Israel soona lae, ‘Teidalek fo, ta'buein-na nanase'ihenik.’ ”

¹¹“Metema, touk dua, ala latutuk, boema touk esak-ka saoinan-na, ana sanga enok fo, ana tulu-fali saotoun-na, nenik ana ho'un-na tou matutuk esak-ka mamae-mamamin soona,

¹²boso sue-lai inak ndia, fo te'teheni liman-na.

¹³ Boso pake tatais ma uuku-susu'di ta matetuk, fo ke'di-mdiu hataholi.

¹⁵Pake tatais ma uuku-susu'di matetuk, fo ela emi maso'da maladook-ka, nai emi MANETUALAIM-ma fe emi nusak-ka.

¹⁶Emi MANETUALAIM-ma, Ana ta hii hataholi manake'di-ndiuk-ka fa.”

¹⁷ “Mafandendelek, hataholi Amalek-kala, ala tao emi leo beek, nai emi leleo-lala'om-ma dalek, fo nai lelek emi kalua meme Masir mai-a.

¹⁸Ala ta bii-lamata'u neu Manetualain fa, de ala sapu-la emi neme dea mai, fo nai lelek emi sota-mangu, ma emi aom-ma ndole-ndaku, boema ala taolisa la'iesak hataholi makabuik-kala, nanahu ala sota-mangu lanseli, no lala'ok-ka so.

¹⁹Hu ndia de, metema emi MANETUALAIM-ma fe nusak ndia neu emi, fo emi leo no nee-nee-lino-linok, nanahu emi musum manai emi titia-tataim-mala, ala ta latee-latati loo emi so'on soona, emi muse taomisa la'iesak hataholi Amalek sila-la, boso ela esa boen, fo ela mopo na'den-nala, nai daebafak-ka ia poin-na. Boso mafandele henin!”