Read Termanu ULANGAN 26 Bible Online

ULANGAN 26 - Termanu bible

ULANGAN 26

¹“Metema, emi masok mala emi MANETUALAIM-ma, fe emi nusak-ka fo, emi leo nai dalek,

² fo metema emi ketu-kolu basa emi daem-ma buna-boan lala'en-na soona, emi muse pe'da makabubua emi boa sosam-mala neu lepeneu esa dalek, fo menis leo emi MANETUALAIM-ma hele mamanak-ka neu.

³Basa soona, meu leo imam manamalalau-maoono nai faik ndia dalen-na, fo mafa'dan mae, ‘Au afa'da emi MANETUALAIM-ma, fo Ana helu basan neu ita bei-ba'i kain-nala, nae Ana fe ita nusak-ka, au leo nai dalek so.’

⁴Soona, imam-ma sipo-na lepeneu ndia, neme o limam dale mai, fo ana pe'dan neu emi MANETUALAIM-ma mei tutunu-hohotun-na matan-na.

⁵Basa soona, o muse kokolak dede'ak ia-la, nai emi MANETUALAIM-ma matan-na mae, ‘Ou MANETUALAIN, au bei ba'i kaing-ngala nde been-na, hataholi Aram fo, manamaleu-malaak-kala. Ana no teidalen-nala, leu leo nai Masir, da'di leo hataholi manamai. Lelek, fo ala leo naa leu-a, ka'da sila hataholi de'ubee, tehu ala da'di leoina matuaina, ma mabe'i-balakaik.

⁶Hataholi Masir-ra, ala tuni-ndeni ami, ma ala lakaseti ami, fo ami maue-male'di da'di leo ata.

⁷Boema, ami maloo bou-bou, fo moke tutulu-fafalik neu O, fo ami bei-ba'i kaim-mala Aman, MANETUALAIN. O mamanene ami dokodoen-ma, ma O mita ami doi-dosom-ma, boema ami toto'a-tataam-mala.

⁸Boema, no O koasam-ma, ma O be'i-balakai matuainam-ma, de O soi-po'i ami neme Masir mai. O tao manada'di beuk-kala, ma ta'du-tana matabeuk-kala, ma manada'dik fo neni bibii-namata'uk fe musu-a.

⁹Basa boema, O moo ami leo ia mai, de O fe ami dae kamasu'ik ma maoe-maisik ia.

¹⁰Hu ndia de, ou MANETUALAIN, au tunu-hotung ia-la nde been-na, boak sosak neme dae fo O fe au-ka mai.’ Soona pe'da lepeneu ndia neu emi MANETUALAIM-ma matan-na, fo sene-do'ok neun.

¹¹Moke makasi neu emi MANETUALAIM-ma, fo manafe baba'e-babatik neu emi ma emi teidalem-mala. Leleko moo, hataholi Lewi-la ma hataholi nusa dea manaleo nai emi dalek-ka, fo ala tunga nai feta ndia dalek boe.

¹² Tunga-tunga teuk-ka telun-na soona, emi muse fe tunu-hotu hahapu dadain ba'ek esa neme ba'eneu sanahulu mai, neme emi daem-ma buna-boan mai, leo hataholi Lewi-la, hataholi nusa dea-la, faluina anamaak-kala, fo ela ala hapu nana'ak fo, ala paluuk-kala, nai basa emi kotam-mala dalek. Metema basa soona,

¹³mafa'da emi MANETUALAIM-ma mae, ‘Au fe la'iesak hahapu dadain ba'ek esa neme ba'eneu sanahulu mai fo au pe'dan nai umang-nga leo O, fo MANETUALAIN, au ta ho'i ela faaanak boen; au fe la'iesak-kana leo hataholi Lewi-la, hataholi nusa dea-la, ma faluina anamaak-kala neu so, sama leo au MANETUALAING-nga, fe au paleta-la. Neme MANETUALAIN paletan-na, la'eneu tunu-hotu hahapu dadain ba'ek esa neme ba'eneu sanahulu mai, au ta la'olena esa boen.

¹⁴Au ta u'a tunu-hotuk ndia faaanak boen, nai lelek au falu mamates, do nai lelek au anggenggeo de, au ta leo nai uma dale fa, do au temfei leo mamates neu. Au tunga MANETUALAIN so; basa hata lala'en fo, O paletan neu au-a, au tao la'iesak-kasa so.

¹⁵Neme O mamana malalao-malalafum manai nusa so'dak-ka, o makanae ma O ba'e-pala O anam Israel; boeo O fe baba'e-papalak neu O fe ami nusak fo kamasu'ik ma maoe-maisik ndia, nandaa no O hehelu-balataam neu, ami bei-ba'i kaim-mala.’ ”

¹⁶“Faik ia, emi MANETUALAIM-ma paleta emi, fo tao basa paleta sila-la lala'en-na; tao basa paleta sila-la, no dalek-katematuak ma no basa emi aopaa samanem lala'en-na.

¹⁷Faik ia, emi sipok MANETUALAIN da'di leo emi Manetualaim-ma. Emi maheluk mae, emu tunga neun, ma emi tao tunga basa hoholo-lalanen ma paletan lala'en-na.

¹⁸ Faik ia, MANETUALAIN sipok emi, da'di leo Ndia ana nanahele mesan, sama leo Ana helu basan neu emi so, ma Ana paleta emi fo, emi tao tunga basa paletan lala'en-na.

¹⁹Neukose MANETUALAIN taon-na emi, mamade'u lena heni leoina fe'ek fo, Ana nakadada'dik basak-kala so, ma neukose emi nanakoa-nanakiok, ma nanafe ha'da-holomata. Emi da'di, emi MANETUALAIM-ma ana nanahelen, sama leo hala hehelun-na.”