Read Termanu ULANGAN 29 Bible Online

ULANGAN 29 - Termanu bible

ULANGAN 29

¹Dede'a-kokolak hehelu-balataak ia-la nde, no MANETUALAIN paletan-na de, Musa taon no leoina Israel-la, nai lelek bei leme dae Moab-pa. Hehelu-balataak sila-la, nalupa tatamak neme hehelu-balataak fo MANETUALAIN taon no leoina Israel-la, neme Letek Sinai-a.

²Musa nadenu basa hataholi Israel-la fo, ala lakabubua, boema nafa'das nae, “Emi mita matam, hata fo MANETUALAIN taon soaneu mane Masir-ra, no basa manapaletan manai nusak ndia lala'en-na so.

³Emi boeo, mita basa, MANETUALAIN tao susa-soe matuaina-la, manada'di beuk-kala, ma tatao-nono'i mata beuk-kala so.

⁴Tehu losa faik ia, Ana beita nau fe emi malelak, basa hata fo, emi la'ola'din ndia, sosoa-ndandaan-nala fa.

⁵Teuk haahulu dalen-na, MANETUALAIN hela-nole emi, tunga moo solokaek-ka, tehu ta pulu-po'o emi bua papakem-ma, ma emi ta'bueim-ma fa.

⁶Emi lotin ta, de emi ta mi'a fa, ma angol ta, de emi ta minu fa, ma emi ta minu ala-lalu fa, tehu MANETUALAIN fe emi basa hata fo, emi paluun, fo ela emi bubuluk, mae Ndia nde, emi MANETUALAIM-ma-na.

⁷ Ma nai lelek, ita losa mamanak ia, Mane Sihon-na neme Hesybon mai, ma Mane Og-ka neme Basan mai, de ala sapu-la ita. Tehu ita sengis.

⁸ Ita loso-ta, sila dae-na, de ita babab'en neu leo Ruben-na, leo Gad-ta, ma leo Manasye-a seli.

⁹Hu ndia de, ela leo been-na, emi tunga basa hehelu-balataak ia-la lala'en-na, fo ela nai emi tutunga-sasangam lala'en-na dalek, neni buna-boak fe emi.

¹⁰Faik ia, emi basa-basam fo manamapadeik manai emi MANETUALAIM-ma matan-na nde: basa mane leo-la, lasi nggolok-kala, malanga solda'du matuaina-la, basa touk-kala,

¹¹inak-kala, ni'iana-la, ma basa hataholi nusa dea fo, manaleo manai emi nusam dale-a, boema hataholi manahila ai, ma manalepa oe fali emi-a.

¹²Emi MANETUALAIN-ma, Ana tao hehelu-balataak no emi, de emi basa-basam-mala makabubuan-na i ia, soaneu pa'a mahele hehelu-balataak ndia, ma emi sipo emi bela-ba'um-mala.

¹³No hehelu-balataak ndia de, faik ia, MANETUALAIN so'u emi, da'di Ndia leoinan, ma Ana da'di emi Manetualaim-ma-na, sama leo Ana helu basan neu emi, ma neu emi bei-ba'i kaim Abraham, Isak ma Yakob so.

¹⁴MANETUALAIN tao hehelu-balataak ndia no basa bela-ba'un, ta ka'da no emi mesam-ma fa,

¹⁵tehu no basa hataholi fo faik ia, lapadeik lai ia, fo lai ita MANETUALAIN-na matan-na, ma no ita tititi-nonosin manamaik-kala.”

¹⁶“Emi bei mafandendelek, ita teme Masir-ra, ita ua-nalen leo beek, ma ita la'ok tunga leoina fe'ek-kala nusan-na, leo beek.

¹⁷Emi mita basa hataholi sila-la, dodoki-dudula sosongo-tatangon nanamaluak fo, nanadoki-dulak neme ai, batu, lilofulak ma lilopilas-sa mai so.

¹⁸ Da'di manea, fo boso nalosak hataholi esa nai emi dalek, nau touk do inak boe, do teidale-bobongik do leo fo manamapadeik manai ia-la, ala fali deak leme emi MANETUALAIN-ma mai, fo ala sene-do'ok neu, leoina fe'ek-kala lamatua daebafak-nala. Tatao-nono'ik ndia, sama leo aiokak-ka ana moli, fo ana da'di bubu'u-palusa makahe'duk ma malasok.

¹⁹Metema, emi nggelok mamanene paleta mabelaina ndia soona, ana boso dodoo nai dalen dale, nae neukose ndia ua-nalen malole nahele, leomae napalani tunga ka'da dale hihii-nanau mesan-na. Neukose dede'ak ndia, ana tao namate-namopo emi basa-basam-mala, nau hataholi manatao mangalauk-kala do hataholi manatao malole-la boe.

²⁰Neukose, MANETUALAIN ta fe do'o do ampon, neu hataholi leondiak-ka fa. Nasafalin-na, neukose MANETUALAINnasa-melun fo, manalua ponu-ponun-na, la'e hataholi ndia, ma basa susa-soe fo, nanasulak nai susulak ia dalek-ka, neukose ana tuni-ndeni-nala, losa MANETUALAIN tao namate-namopon.

²¹Neukose MANETUALAIN tao hataholi ndia, da'di natutu'duk esa, soaneu basa leo Israel-la, ma hataholi ndia, nanahukuk nenik soo-supak fo, nanaseseik nai hehelu-balataak-ka dalek, fo nanasulak nai susulak ia dalek, fo nde MANETUALAIN susula Hoholo-lalanen.

²²Nai fai makabuin te, emi tititi-nonosim, ma hataholi nusa dea-la leme nusa dook mai, neukose ala lita MANETUALAIN fe susa-soe ma doidosok-ka, ana tuni-ndeni-na, emi nusam-ma.

²³ Neukose belerang-nga ma masik-ka, ala potiketu emi tina-osim, fo ta bisa sele-nggali bini-ngges neu fa, ma na'u-aiana ta moli nai ndia so'on. Neukose emi nusam-ma, nalupa leo Sodom ma Gomora, Adma ma Zeboim, fo MANETUALAIN tao namopos, nai lelek nasa-melun lua ponu-ponu.

²⁴Boema, neukose basa daebafak-ka lala'en-na, latane lae, ‘Tao le'e de, MANETUALAIN tao hataholi sila nusan-na, leondiak? Hu beek de, ana namanasa ba'u-ba'u basa ndia?’

²⁵Soona, natataan-na nae, ‘Hu kande, ala ta nau sipok, sila bei-ba'i kain-nala MANETUALAIN, hehelu-balataan fa; hehelu-balataak fo, Ana taon ba'eneu sila, nai lelek nos kalua leme Masir mai.

²⁶Ala da'di ata neu lamatua daebafak fe'ek fo, ta lalelak-kana fa, te se'kona MANETUALAIN ka'is fo, ala boso sene-do'ok neu lamatua daebafak fe'ek sila-la.

²⁷Hu ndia de, MANETUALAIN namanasa anan-nala, de Ana fe basa soe lala'en fo, nanasulak nai susulak ia dalek-ka, ala tuni-ndeni-la sila nusan-na.

²⁸MANETUALAIN nasa-melun fo'a nanseli, de nai nasa-melu matuainan ndia dalek, Ana usiheni leoina Israel-la neme sila nusan-na mai, de Ana tapas leo nusa dea neu, boema ala leo leme ndia.’

²⁹Ita MANETUALAIN nafuni dede'ak de'ubee; tehu nafa'da hoholo-lalanen neu ita, de ita ma ita tititi-nonosin-nala, muse tungan losa dodoon-na.”