Read Termanu ULANGAN 3 Bible Online

ULANGAN 3 - Termanu bible

ULANGAN 3

¹“Basa boema, ita la'ok leo kii teu, de ita leo dae Basan-na teu. Og, fo mane Basam-ma, ana mai no basa solda'dun-nala lala'en-na, fo latee-lata'ti loo ita, deka kota Edrei-a.

²Tehu, MANETUALAIN nafa'da au nae, ‘Musa, boso bii Og. Neukose Au fe Og no solda'dun-nala, ma basa daen-na lala'en-na leo o neu. Taon sama leo o tao Sihon, fo Mane Amori-a, fo ana paleta nai Hesybon.’

³Da'di, ita MANETUALAIN boeo, Ana fe Mane Og-ka no laun-nala leo ita mai, de ita sengi la'iesak-kasa.

⁴Nai lelek ndia, ita loso-tala basa kotan-nala; de ta ela esa boen. Ita loso-tala kota-la basa-basan, kota neehulu nai dae Argob-pa lala'en-na, fo nai Mane Og-ka nai Basan nusa paletan-na.

⁵Ala pa'a okofefeok kota sila-la nenik papala nanadamak mademaina-la, ma lanuu lelesuina, boema ai betubalak fo ala kena lenik lelesuina sila-la. Fe'ek neme ndia mai, hapu kota nggelok, ta lanuu papala nanadamak fa.

⁶Ita tao takalulutuk la'iesak kota sila-la, ma ita tao tisa la'iesak touk-kala, inak-kala loo anan-nala, sama leo ita taon neu Mane Sihon fo neme Hesybon mai, kotan-nala.

⁷Ita ho'i-ta bana-manun-nala, ma ita kalo teni kota sila-la hata-heton-nala.

⁸Nai lelek ndia, ita ho'i-ta hataholi Amori-la manek-ka dua-nala daen-na, fo neme dae manai Lee Yarden-na ma Lee Arnon-na boboan dulu, losa Letek Hermon-na. (

⁹Hataholi Sidon-nala loke Letek Hermon-na soona lae Siryon, ma hataholi Amori-la soona loken lae Senir.)

¹⁰Ita ho'i-ta Mane Og fo neme Basan mai, nusan-na lala'en-na: fo nde kota-kotan manai dae masapupukuk-kala, dae Gilead ma dae Basan-na, nakandoo leo dulu neu fo losa kota Salkha ma kota Edrei-a neu.” (

¹¹Hataholi Refaim fo maso'dak-ka, ela ka'da Mane Og-ka mesak-kana. Kopan-na, nanataok neme batu-a mai, nanataok neme batu mai, nanalun-na metel haa, ma loloan-na hihii nae metel dua, uukuk ia, tunga uukuk fo nananaketu basak-ka so. Losa besak ia, kopak ndia bei titan nai Raba fo hataholi Amon-nala kotan-na.)

¹²“Dae ndia ana da'di ita nuun boema, au fe leo Ruben-na ma leo Gad-ta, dae manai kota Aroer-ra boboan kii, fo deka no Lee Arnon-na, ma dae letelepak Gilead-ta seli no kotan-nala.

¹³Au fe dae Gilead fo bei elak-ka, boema dae Basan fo nde Mane Og-ka dae nangatuu palan-na fo nde dae Argob-pa lala'en-na neu leo Manasye-a seli.” (Basan nananita-nalelak da'di leo hataholi Refaim-ma nusan-na.

¹⁴Yair, fo neme leo Manasye mai, ana ho'in-na nusa Argob-pa lala'en-na fo nde: neme Basan losa Gesur no Maakha dae toon-na. Ana foi nggolok sila-la na'den-na tunga ndia na'den-na, de losa besak ia, hataholi-la loken soona, lae nggolok Yair.)

¹⁵“Au fe dae Gilead-ta leo, leo-ingu Makhir-ra, fo neme leo Manasye mai.

¹⁶Ma au fe leo Ruben ma leo Gad-ta, dae manai Gilead no Lee Arnon-na tala'da. Fo sila dae too kona nde Lee ndia tala'da, ma sila dae too kii nde Lee Yabok-ka, fo lee ndia seli, nalupa dae too no hataholi Amon-nala nusan-na.

¹⁷Sila daen-na boboan muli, natabaa losa leo Lee Yarden-na neu, fo neme Dano Galilea nai boboan kii, losa Tasi Mates-sa nai boboan kona, fo nakandoo leo Letek Pisga huun-na neu, fo nai boboan dulu.

¹⁸ Nai lelek ndia, au fes paleta nde ia: emi MANETUALAIM-ma fe emi dae manai Lee Yarden-na boboan dulu da'di emi mamana leleom-ma. Tehu emi solda'dum-mala, ala muse ho'u tafa-sisilo, fo ala lena lakahuluk leme leo Israel fe'e-fe'ek-kala leo selik leu.

¹⁹Ka'da emi sao-anam, ma emi mabana-manu ba'uk-kala, bole leo nai au fe basa emi kota-kota-la so.

²⁰Tulu-fali hataholi fo emi leoina esa, losa langatuu-la dae fo emi MANETUALAIM-ma fen leo sila neu, fo nde dae manai Lee Yarden-na boboan muli, ma losa MANETUALAIN fes laso'da no mole-dame nai naa, sama leo Ana fe emi maso'da no mole-dame nai ia boe. Basa ndia soona, besak-ka emi bole fali me'um-ma leo emi dae pusakam fo au fe emi-ka.

²¹Boema, au afa'da Yesua ae, O mita basa hata lala'en fo o MANETUALAIM-ma taon soaneu Sihon ma Og, fo manek-ka duak sila-la so. Leondiak boe, neukose Ana taon soaneu basa manek fo o loso-ma daen-nala.

²²Boso bii-mamata'u neu hataholi sila, nanahu o MANETUALAIM-ma, neukose natee-nata'ti nggati o.”

²³ “Nai lelek ndia, au dokodoe neu MANETUALAIN ae:

²⁴Ou MANETUALAIN Fo Matua Madema, au bubuluk hata fo O matu'dun neu au ia, besak-ka nalupa makasososak neme O tatao-nono'im matuainam ma nanadodoo doak. Ta hapu lamatua daebafak nau nai lalai do nai daebafak-ka boe, fo sama leo O taom-malak hata-hata fo ta uku-dou nala fan.

²⁵Fe au loak fo au lena Lee Yarden-na, ou MANETUALAIN, fo au ita nusa maoe-maisik-ka nai selik eli, dae letelepak fo malole-mana'a, ma Letelepak Libanon-na.

²⁶Tehu MANETUALAIN namanasa au, nanahu emi tatao-nono'im, nalosa Ana ta nau sipok au dokodoeng-nga fa. MANETUALAIN nafa'da seluk au nae, ‘Dai so Musa, boso boe seseik dede'ak ndia bai!

²⁷Muu leo Letek Pisga poin-na muu, fo makanae leo kii-kona, dulu ma muli muu. Taoafik matalolole neu hata fo o mitan ndia, nana neukose o ta lena Lee Yarden-na fa.

²⁸Fe Yesua natutu'duk. Matetea-mahehele dalen-na, nana neukose ndia nde nauli-nalanga leoina ndia leo Lee Yarden-na selik neu, fo langatuu-la nusak fo o mitan ndia.’

²⁹Boema, ita leo teme bafak manai kota Bet-Peor-ra selik.”