Read Termanu ULANGAN 32 Bible Online

ULANGAN 32 - Termanu bible

ULANGAN 32

¹“Hai, lalai, mamanene leona, te au hii kokolak; hai daebafak-ka, pasak di'idoom-ma leona!

²Ela leo been-na, au nanoling-nga, ana kona samaleo u'dan-na, ma au hala-kokolang ana ti'ti sama leo dinis-sa, sama leo u'da ngginggitik-ka nai na'u lain, ma u'da matuaina nai bubu'u-palusa lain.

³Neukose, au koa-kio MANETUALAIN na'den-na. Tui-benga ita Manetualain matua-mademan!

⁴Emi manamasala'em-ma nde, MANETUALAIN fo palani tatibatu, ue-le'din matetu-mandaak, ma basa enon-na ndoos ma matetuk. Emi Manetualaim-ma manalilinekak, ma ta masapepeko-masandandalik fa, Ana tao hata fo malole ma la'en.

⁵Tehu emi nde been-na, leoina fo, ta manalilinekak fa, de ta nandaa da'di Ndia anan-nala so'on, leoina fo, henuk no masapepeko-masandandalik ma sala-singok-ka.

⁶Emi balas MANETUALAIN dale malolen-na leondiak hai hataholi nggoak ma dudu'a-aafi tak-kala lemin? Ade, Ndia ta nde emi Amam, fo Manamakadada'dik emi, fo manatao emi da'di leoina esa fa do?

⁷Mafandendelek le'do-fai makahulun-na, ma taoafik neu bobongik maneuk-kala. Matane emi ina-aman fo ela ala lafa'dan neu emi.

⁸ Lelek Fo Matua-mademaina, Ana baba'e dae-a, naketu leoina esan-na, nok ndia daen-na no lamatua daebafak esa da'di leo manakoasa.

⁹Tehu Yakob tititi-nonosin ia-la MANETUALAIN heles da'di Ndia nuu Mesan.

¹⁰Ana nitas laleu-lalaak nai mamanak nee-nee lino-linok nai moo solokaek-ka. Boema Ana nasulu-nahapas ma nakabobois ma naneas sama leo Ndia pusakan-na.

¹¹Sama leo manupui balupua, ana nanoli anan-nala fo ala laa ana ho'us nenik li'da manamakapepelan-na ma Ana ko'os nai li'dan-nala.

¹²MANETUALAIN hela-nole anan-nala leondiak, ta hapu lamatua daebafak fe'ek sama-sama no fan.

¹³Ana fes koasa letek-kala; ala la'a tina-la buna-boan ma linu fanioe neme pupuku batu mai. Ala hapu mina neme ai setun fo ala moli nai dae mabatuk-kala.

¹⁴Ala hapu kapaoe makadotok neme sila sapin-nala, bi'ihiin-nala ma sila bi'ilopon-nala mai; sila bana-manun nde maao-la sila gandum ma angol-la nde malole nanseli.

¹⁵MANETUALAIN anan-nala da'di kamasu'i-makabetek, tehu ala hii lena-la'ban paleta laao bebonu, ma lakabete nana'ak. Boema ala la'oela Manetualain fo Manamakadada'dik sila ma ala ta sipok Manasoi-manatefa palani tatibatu-na fa.

¹⁶Ala sene-do'ok neu sosono-tatangok, nalosa MANETUALAIN nape'da dale nasak-kasa fa, Nasa-melun fo'a, nanahu tatao-nono'i mangalauk ndia.

¹⁷ Ala tunu-hotu tutunu-hohotuk fe dula dale mangalauk-kala fo Manetualain ta nde ndia fa, neu lamatua daebafak fo, ala ta lalelak-kana fa, lamatua daebafak beuk fo, sila bei-ba'i kain-nala ta bii-lamata'u fas.

¹⁸Ala lafandeleheni sila Manasoi-tefan fo, palani tatibatu, lafandeleheni sila Manetualain fo, manafe maso'dak-ka.

¹⁹MANETUALAIN nita dede'ak ndia boema, namanasa, de Ana ta sipok anan-nala fa.

²⁰Nafa'da nae, ‘Au ta tulu-fali sila so'on; nemen-na fo Au mete su'dik-kasa, neu mate'en-na, ala tao leo beek. Nana leoina sila-la, lalangabatu, ma ala ta lilineka makandondook fa

²¹ Ala tao-la au ta ahiik hata fo, Manetualain ta nde ndia fa, ma Au amanasa sila dodoki-dudula sosongo-tatangon. Boema Au tao-a, Au anang-ngala ta lahiik hataholi fo, leoina ta ndia fa, ma Au amanasa leoina nggoak-ka.

²²Neukose, Au nasa-melung lua ponu-ponu sama leo ha'i fo na'a losa daebafak-ka buin-na, Ha'i ndia na'aheni daebafak-ka no basa oe-isin lala'en-na, ma na'a losa letek-kala buin-na.

²³Ana fe susa-soe-a, ana mai nakandondoo henin. Neukose Au kous, nenik Au kokou ising-ngala lala'en-na.

²⁴Neukose mates, nanahu he'di sumaik-ka, ma la'a-ndoes-sa, ma hu kande he'dis fo maneni mamates-sa. Au po'ilotak bana makaak-kala, ala kaa lalas, ma menge malasok-ka, ana kaas.

²⁵Natee-natatik fo, maneni mamates-sa, nai enok-kala lain; bibii-namatauk-ka, ana tuni-ndeni-na hataholi manai uma-la. Hataholi muli-soluk-kala, ma anafe'oanak-kala, neukose nanatao namate-namopok, ma ni'iana bongi beuk-kala, ma hataholi-lasik-kala boe.

²⁶Au hii tao amopo-amate la'iesak-kasa, fo ela mopo na'den-nala.

²⁷Tehu Au ta nau Israel musun-nala, lamatutua-lamadedema aoinan-nala fa; fafa'kama, ala dudu'a-dodoo sala, fo lafa'da lae sila sengi Au anang-ngala,’ te se'kona, Au nde tao basa ia-la.

²⁸Israel nde been-na, leoina esa fo, ana ta tai-dodoo fa; ta lalelak hata esa boen.

²⁹Ela leo been-na, ala da'di manatee-tenok, fo neukose, ala lalelak, fo ala dudu'a-dodoo sila soda mate'en-na.

³⁰Hapu nai bee, hataholi esa, bisa usi hataholi lifun esa, ma hataholi dua, bisa tao-la hataholi lifun sanahulu lalai? Sila MANETUALAIN-na, nase'oheni sila so; Manetualain fo palani tatibatu ndia, Ana la'oela sila so.

³¹Israel musun-na, ana bubuluk, nae sila manamasulu-mahapan-na, ta sama leo Manetualain, fo Israel manamasulu-mahapan-na fa.

³²Nana, sila tatao-nono'in mangalauk, sama leo Sodom ma Gomora, sama leo sila ai angol-la, boan-na makahe'duk ma malasok.

³³Sila angol-la, oen-na nde been-na, menge makaak-ka lason-na.

³⁴MANETUALAIN nafandendelek anan-nala, musu non-na tatao-nono'in, de neu fain-na te, neukose Ana hukus.

³⁵ Neukose MANETUALAIN balas ma Ana hukus, ta dook-ka so'on te, ala tu'u leu fo mate-mopos; sila fai nakalulutun-na, ana losa no lai-laik.

³⁶ Neukose MANETUALAIN, soi-tefa-na anan-nala, ma Ana sue-lai atan-nala, metema nitas, ala male-tale ma be'i-balakain ta so.

³⁷Soona, MANETUALAIN natane anan-nala nae, ‘Emi mamahena lamatua daebafak fe'ek fo, mabe'i-balakaik-kala, lai bee?’

³⁸Sila la'a paa mina fo, emi tunu-hotuk-ka ma linu angol fo, emi tunu-hotuk-ka. Maloos fo, ala mai tulu-fali emi, nemen-na fo, ala da'di emi manasulu-mahapam.

³⁹Mete leona, te Au Manetualain Fo Kisak esa mesak-kana, ta hapu lamatuak daebafak fe'ek fa, te ka'da Au mesang-nga. Au nde taoisa, ma Au nde tao aso'da falik-kana, Au nde tao ahinan, ma Au nde tao alea-ahain-na. Metema, Au tao-no'i hata esa, soona ta hapu manalena-la'ban fa

⁴⁰No Au, Manetualain fo maso'dak-ka, na'den-na, Au so'uk Au limang-nga, Au soo-supa:

⁴¹Neukose, Au fofola Au tafainang-nga, fo isin-na nangale'do, fo Au akalala'ok huhukuk-ka. Au balas basa manalena-la'ban neu Au-a, ma Au huku basa hataholi fo, ana ta hii Au fa.

⁴²Neukose, Au kou-kou ising-ngala, ladiu sila dan-na; Au taoisa basa manalena-la'ban Au-a, nenik Au tafainang-nga. Su'di see fo, ana lena-la'ban Au soona, au ta po'ilotak-kana fa; Hataholi nanahukuk, ma hataholi makahinak-kala, muse mate boe.

⁴³ Hai, leoinak-kala lemin, koa-kio MANETUALAIN anan-nala, nana MANETUALAIN huku basa hataholi fo, manataonisas-sala so. Ana balas nape'da dalen-na, neu musun-nala, tehu Ana fe do'o do ampon neu anan-nala.”

⁴⁴Musa no Yosua fo Nun anan-nala lees nakameek ndia, nalosa basa leoina Israel-la lala'en-na, hapu lamanenen.

⁴⁵Musa nanduku-nalosak basa, MANETUALAIN nanolin-na neu leoina Israel-la boema,

⁴⁶nafa'da nae, “Taoafik neu basa paleta fo, fai ia, au fen neu emi ndia. Manoli emi anam-mala, nanolik sila-la, fo ela ala tao-no'i basa MANETUALAIN hoholo-lalanen, no dalek-katematuan-nala.

⁴⁷Nana, nanolik sila-la, ta hala kokola louk fa, te emi so'dam-ma nde ndia. Tunga basa paleta sila-la, fo ela emi hapu teunaluk nai nusak fo, ta dook-ka so'on te, emi mangatuu-man nai Lee Yarden-na selik.”

⁴⁸ Nai faik ndia dalen-na boe, MANETUALAIN nafa'da Musa nae,

⁴⁹“Muu leo Letelepak Abarim-ma, nai nusa Moab-pa, fo nai kota Yerikho-a, selik. Soona kae leo Letek Nebo-a lain muu, fo makanae leo dae Kanaan fo, ta dook-ka so'on te, Au fen leo leoina Israel-la neu.

⁵⁰Neukose o mate nai letek ndia lain, sama leo o tolanom Harun, maten neme Letek Hor-ra.

⁵¹Nana emi dua, ta lilineka neu Au, ma ta fe ha'da-holomata neu Au nai leoina Israel-la matan, nai lelek emi meme oemata Meriba, fo deka no kota Kades-sa, nai moo solokaek Sin-na.

⁵²Hu ndia de, o ta bole masok nusak fo, Au fen neu leoina Israel-la fa; ka'da o bole makanaen neme dook-ka mai.”