Read Termanu ULANGAN 33 Bible Online

ULANGAN 33 - Termanu bible

ULANGAN 33

¹Lelek Manetualain atan Musa, beita mate fan te, ana fe leoina Israel-la baba'e-papalak nae leo ia,

²“MANETUALAIN Ana mai neme Letek Sinai mai; Ana tii nai Edom lain, sama leo le'do-a, ma neme Letek Paran-na mai, de nasalaa-na anan-nala. Ata nusa so'dak, lifun sanahulu, ala mai sama-sama loon; ma ha'i pila nai boboa konan-na.

³Tete'ek-ka, MANETUALAIN sue-lai leoinan. Nasulu-nahapa basa Ndia hataholin-nala. Mai fo, ata sene-do'ok neu ein-na, matan-na, ma ata tunga paletan-nala.

⁴Ata tunga Musa fe hoholo-lalanek-kala, fo leoina ia, pusakan fo, belin-na seli ndia.

⁵Lelek Israel nakabubua no mauli-malangan-nala, MANETUALAIN da'di manek neu, anan-nala.”

⁶La'eneu leo Ruben-na, Musa nafa'da nae, “Ela leo been-na, leo Ruben-na, ta mate-mopo nita fa, leomae hataholin-nala, ka'da lumanak mesan.”

⁷La'eneu leo Yehuda, Musa nafa'da nae: “MANETUALAIN mamanene Yehuda dokodoen-na; tao makabubua falik-kasa lo leoinan. Matee-matati nggatis, ou MANETUALAIN, tulu-falis neme sila musu non-na mai.”

⁸ La'eneu Leo Lewi-a, Musa nafa'da nae: “No batu Urim-ma, ma batu Tumim-ma O mafa'da O hihii-nanaum, tunga hataholi Lewi fo O atam manalilinekam-ma. O so'ba-su'di basan, neme Masa so, ma O male'a moos neme Meriba.

⁹Ala lilineka neu O, lena heni basa hata lala'en-na, lena heni ina-amak, ma tolano ka'a-fa'di-a. Ala tunga O paletam-mala, ma ala tao latetu, O hehelu-balataam.

¹⁰Ala lanoli O anam-mala, fo ala tunga basa O paletam-mala, ma ala tunu-hotu tutunu-hohotuk nai O mei tunu-hotum lain.

¹¹MANETUALAIN, tulu-fali leo ia, fo ela latea-lahele, ela leo been-na, O mahiik sila ue-le'din. Taom-mamate-mamopo, basa sila musun-nala, nalosa ala ta hapu fo'a lapadeik so'on.”

¹²La'eneu leo Benyamin-na, Musa nafa'da nae: “MANETUALAIN leo susue-lalain-na nde ia-la. Lele'do-le'odaen, Ana nasulu-nahapas, ma Ana leo nai sila tala'da.”

¹³La'eneu leo Yusuf-fa, Musa nafa'da nae, “Ela leo been-na, MANETUALAIN fe sila daen-na, baba'e-papalak, nenik u'dan, ma nenik oe-a, neme dae dale mai.

¹⁴Ela leo been-na, nai fai ai boak-ka, Ana ba'e-palan neni ai boak, ma ai boak malole-la, lamalatu nai ai lain.

¹⁵Ela leo been-na, neme makahulun eli mai, pupukun-nala henuk no buna-boa neulauk.

¹⁶Ela leo been-na, daen-na nanaba'e-batik nenik basa hata malole lala'en-na, ma nanaba'e-palak neme MANETUALAIN dale malolen, fo Ana kokolak neme makatema manapilak-ka dalek mai. Ela leo been-na, baba'e-papalak ndia, ana kona leo Yusuf tititi-nonosin neu, nana ndia nde, mauli-malangan nai tolanoon-nala dalek.

¹⁷Yusuf be'i-balakain ba'u sapi fuik-ka, be'i-balakain, ma sapi mane fuik-ka susulan ndia nde, hataholi Manasye-la lifu-lifun ma hataholi Efraim-mala, kefin-kefin Ana puka leoinak-kala, ma ana sesetis losa daebafak-ka bu'un-nala.”

¹⁸La'eneu leo Zebulon-nala, ma Isakhar, Musa nafa'da nae: “Ela leo been-na, Zebulon tetu-temak, nanahu leleo-lala'on-nala, ma Isakhar naua-nanale nai lalaa teman-nala.

¹⁹Ala ka'i basa leoinak-kala, ala mai leo sila leten lain mai, fo ala tunu-hotu tutunu-hohotu matetuk-ka nai ndia. Ala hapu su'i-betes neme tasi-a mai, ma neme solokaek manandolo tasi su'un-na mai.”

²⁰La'eneu leo Gad-ta, Musa nafa'da nae: “Kokoa-kikiok neu Manetualain, fo manatao namaloa Gad daen-na. Gad nahani, sama leo singa esa, ana sanga kakalu alun-na, do langan-na.

²¹Ana ho'in-na, ndia soa dae neulauk-ka, nana sila hapu mauli-malangan dae duduin-na. Ala tao tunga basa MANETUALAIN paletan-nala, ma hoholo-lalanen lala'en-na, nai lelek basa mauli-malangan Israel-la, lakabubua sama-sama.”

²²La'eneu leo Dan-na, Musa nafa'da nae: “Dan sama leo singa molisoluk, fo nakaboku, de ana kalua neme Basan mai.”

²³La'eneu leo Naftali-a, Musa nafa'da nae: “Naftali nanaba'e-batik nenik baba'e-papalak, ma MANETUALAIN susue-lalain daen-na neme Dano Galilea mai, fo losa leo kona neu.”

²⁴La'eneu leo Asyer-ra, Musa nafa'da nae: “Asyer hapu baba'e-papalak lena heni, leo fe'e-fe'ek-kala; ela leo been-na, tolanoon-nala tao da'di, susue-lalaik, ma ai setun-nala, moli leloaka nai daen dale.

²⁵Ela leo been-na, nasulu-nahapa kotan-nala nenik lelesuina liti ma besi fo ela leo been-na, so'dan nee-nee lino-linok ma tetu-temak.”

²⁶“Hai Israel! Ta hapu lamatua daebafak fo, sama leo emi Manetualaim-ma fa; Ana la'ok seli lalai-a no ta hapu manamapanggenggek fa, ma Ana tola seli ko'as-sa, fo Ana tulu-fali emi.

²⁷Manetualain nasulu-nahapa emi tataas esa, Alun fo manaketu-basa taak-ka, Ana tia-to'ba emi. Ana usiheni musu-a, neme emi matam-ma mai, fo nadenu emi, tao mamate-mamopos.

²⁸Soona, neukose Yakob tititi-nonosin, laso'da no tetu-temak, nai nusak fo, henuk no gandum, ma angol-la, fo dinis-sa, ana kona neme lalai mai, de ana tetees.

²⁹Maua-manalek ba'eneu o, hai Israel! Ta hapu leoina fo, MANETUALAIN soi-tefa fas. MANETUALAIN sama leo o tafainam-ma, ma o babaa fanam-ma; fo nasala'e o, ma Ana fe o sesengik. O musum-mala neukose ala mai fo ala dokodoe o dalek-kasiam-ma, ma neukose o heheta-aa'is.”