Read Termanu ULANGAN 5 Bible Online

ULANGAN 5 - Termanu bible

ULANGAN 5

¹Musa naloo nakabubua basa leoina Israel-la lala'en-na, boema nafa'das nae, “Tolano-tolanoong-ngala lemin, Mamanene hoholo-lalanek fo au fen neu emi, nai faik ia. Manoli hoholo-lalanek sila-la, fo tungas no lilinekak.

²Ita MANETUALAIN-na, tao hehelu-balataak esa neme Letek Sinai-a,

³ta ka'da no ita bei-ba'i kain-nala fa, tehu no basa ita manai ia-la boe.

⁴MANETUALAIN nau kokolak no ita, matak no matak neme ha'i dale, nai letek ndia lain.

⁵Tehu, hu kande emi bii ha'i, ma emi ta mapalani kae leo letek ndia lain meu fa, de nai lelek ndia, au apadeik nai emi ma MANETUALAIN tala'da, fo au anduku-alosak MANETUALAIN hala-kokolan ndia neu emi. MANETUALAIN po'a-benga nae,

⁶‘Au nde emi MANETUALAIM-ma, fo mananoo emi kalua meme Masir, fo mamanak emi da'di ata.

⁷Boso sene-do'ok neu lamatua daebafa fe'ek-kala. Sene-do'ok neu ka'da Au mesang-nga.

⁸ Boso doki-dulak dodoki-dudulak fo nalupa su'di hata beek nai lalai, nai daebafak-ka, do nai oe dale, fo nai daebafak-ka buin-na.

⁹ Boso sene-do'ok neu dodoki-dudulak matak leondiak-ka, nanahu Au fo emi MANETUALAIM-ma, ta nau nakasasamak-kana o hata esa boen. Hataholi fo nape'da dale nasak neu Au, neukose Au hukun losa bobongi ka telu ma ka haa.

¹⁰Tehu, Au atu'du Au susue-lalaing neu bobongi lifu-lifuk-kala, neme hataholi fo manasue-lai Au, ma manatunga Au paletang-nga.

¹¹ Boso seseik Au na'deng-nga no sosoa-ndandaa tak, nana Au fo emi MANETUALAIM-ma, huku su'di see fo ana seseik Au na'deng-nga no sosoa-ndandaa tak.

¹² Mafandendelek mahelen, fo fe ha'da-holomata neu fai Sabat-ta, da'di leo fai malalao-malalafuk, nana au nde MANETUALAIN fo emi Manetualaim-ma paletan neu emi.

¹³ Nai faik nee dalen-na, emi maue-male'di, ma emi tao-no'i basa emi tatao-nono'im lala'en-na,

¹⁴tehu fai ka hitun-na da'di neu fai hahaeaok fo fai hehelik ba'eneu Au, fo emi MANETUALAIM-ma, fo fai hahaeaok. Nai faik ndia dalen-na, ta bole tao-no'i hata esa boen, nau emi, do emi anam-mala, emi atam-mala, emi bana-manum, do hataholi manamai nai emi nusam dale. Emi atam-mala muse hahaeaon-nala, sama leo emi boe.

¹⁵Mafandendelek te, makahulun-na emi da'di ata neme Masir, boema emi MANETUALAIM-ma soi-po'i emi, nenik be'i-balakai matuainan-na. Hu ndia de, au paleta emi fo tao malalao-malalafu fai Sabat-ta.

¹⁶ Fe ha'da-holomata neu emi amam ma emi inam, fo ela emi hapu tetu-temak ma teu manalun-nai emi MANETUALAIM-ma fe emi nusak-ka.

¹⁷ Boso manisa.

¹⁸ Boso hohonge.

¹⁹ Boso mamanako.

²⁰ Boso fe sakasii pepekok la'eneu emi nonoo hataholim-ma.

²¹ Boso dale he'di hataholi fe'ek hata-heton fo nde: daen-na, bana-manun, saoinan-na, atan-nala, bana-manun, keledein-na, do su'di beek fo hataholi fe'ek nuun.’

²² Nai lelek emi makabuba meme letek lain-na, MANETUALAIN fe emi paleta-la nde sila. Nai lelek Ana kokolak no hala-na nanggunggulu neme ha'i dale, ma koas makate dale mai-a, Ana fe paleta-la nde ndia, te ta paleta fe'ek fa. Boema, Ana sulak-kana neu batu lei dua lain, de Ana fen leo au mai.”

²³“Lelek fo letek ndia lala'en-na ana pila, ma emi mamanene halak-ka neme makahatuk dale mai boema, basa mane leo-la, ma basa lasi nggolok-kala, ala mai leo au mai.

²⁴Lafa'da lae, ‘MANETUALAIN fo ita Manetualain-na natu'du basa matua-mademan, ma mandela-masa'an, nai lelek ami mamanenen Ana kokolak neme ha'i dale mai. Faik ia dalen-na, ami mita matam mae Manetualain kokolak no hataholi daebafak-ka, tehu ta mate hataholi ndia fa.

²⁵Tehu tao le'e de, ami muse pasak ami so'dam-ma bai? Ha'i matuaina ndia, neukose ana tao namopo-namate ami! Ami mamahele mae neukose mate ami, metema ami mamanene MANETUALAIN kokolak seluk.

²⁶Hapu mate hai hataholi daebafak esa, nai lelek Manetualain fo maso'dak-ka, Ana kokolak neme ha'i dale mai so do?

²⁷Hu ndia de, muu leon Musa, fo namanene basa hata lala'en fo, itaMANETUALAIN nafa'dan, boema manduku-malosak-kana neu ami, hata fo Manetualain nafa'dan neu o. Neukose ami mamanenen, fo ami tao tungan.’

²⁸Namanene ndia boema, MANETUALAIN nafa'da au nae, ‘Au amanene basa hata fo leoina ndia nafa'dan so, de sila hala-kokolan ndia la'en.

²⁹So'ba metema sila lanuu dudu'a leondiak nahele! So'ba metema ala fe ha'da holomata tataas esa neu Au, ma ala tunga la'iesak Au paletang-ngala soona, sila ma sila tititi-nonosin laso'da no tetu-temak losa dodoon-na!

³⁰Besak ia muu leona, fo madenu leoina ndia fali ne'un leo sila esa-esak lalaa teman-na neu.

³¹Tehu o, Musa, fali ma'im-ma fo leo moo Au meme ia; neukose Au fe Au hoholo-lalaneng ma Au paletang lala'en-na leo o neu. Manolis hoholo-lalanek ma paleta sila-la, fo ela ala tungan nai nusak fo Au fen neu sila.’

³²Tolano-tolanoong-ngala lemin, tunga no dale katematuak, neu basa hata fo emi MANETUALAIM-ma paletan neu emi. Boso la'olena paleta sila-la esa boen.

³³Tao-no'i basa hata fo emi MANETUALAIM-ma paletan neu emi, fo ela emi so'dam-ma tetu-temak, fo emi hapu leo mahele nai nusak fo neukose emi leo nai dalek ndia.”