Read Termanu ULANGAN 6 Bible Online

ULANGAN 6 - Termanu bible

ULANGAN 6

¹“Emi MANETUALAIM-ma, nadenu au fo, au anoli emi basa hoholo-lalanek ia'la, fo ela emi tao-no'in nai nusak fo, ta dook-ka so'on te, emi leon ndia.

²Ela leo been-na, emi ma emi tititi-nonosim-mala, nai emi fai maso'dam-ma dalek, fe ha'da-holomata neu emi MANETUALAIM-ma, ma tunga basa au fe emi hoholo-lalanan-nala, fo ela emi hapu fai nalu-le'do loak nai nusak ndia.

³Hu ndia de, mamanene leon, tolano-tolanoong-ngala lemin, fo tao-no'i basa sila-la no lilinekak, fo ela emi hapu tetu-temak, ma emi da'di leoina matuaina, nai nusak fo kamasu'ik ma maoe-maisi ndia, sama leo ita bei-ba'i kain-nala MANETUALAIN helu basan so.

⁴ Tolano-tolanoong-ngala lemin, mamanene leona! Ka'da Amak, ma Amak-ka mesak-kana nde ita MANETUALAIN

⁵ Sue-lai emi MANETUALAIM-ma no emi dalek-katematuam-ma: Matu'du emi susue-lalaim ndia, nai emi heo-hilum-ma dalek, ma nai emi tatao-nono'i ma dalek.

⁶ Boso mafandele heni paleta fo, faik ia au fen neu emi ndia, makandondook.

⁷Manoli paleta sila-la neu emi anam-mala. Ela leo been-na, emi kokolak paleta sila-la, nai uma dale, ma nai emi nono hataholim-ma tala'da, nai lelek emi hahaeaom, ma nai lelek emi maue-male'di.

⁸Pa'a paleta sila-la neu emi limam-ma, ma taon neu emi dedeim-ma, fo ela mafandendelek mahelen.

⁹Sulak-kana neu emi umam-ma, dii lelesun-na, ma neu emi lelesuinam-ma.”

¹⁰ “Emi MANETUALAIM-ma, naheluk no emi bei-ba'i kaim Abraham, Isak ma Yakob, nae neukose, Ana fe nusak ndia leo emi neu. Kota-kota-nala matuaina, ma tetu-temak mesa-mesan, tehu emi ta nde mapadedeik kota sila-la fa.

¹¹Uman-nala, henuk no bua-lo'a neulauk mesa-mesan, tehu emi ta nde tao mahenu uma sila-la fa. Neukose emi mita oedolu-la, tehu emi ta nde kali oedolu sila-la fa. Neukose emi mita osi angol ma osi setun-nala, tehu emi ta nde sele sila-la fa. Metema, MANETUALAIN no emi leo nusak ndia neu, fo emi manuu basa hata lala'e fo, emi mahiik mi'an soona,

¹²manea matalolole, fo daenga emi boso mafandele heni MANETUALAIN fo, manasoi-po'i basa emi neme Masir mai, fo mamanak manatao emi da'di ata.

¹³ Fe ha'da-holomata neu emi MANETUALAIM-ma, makaluku-makatele ka'da neu Ndia mesak-kana, boema metema emi soo soona, soo menik ka'da na'den-na mesak-kana.

¹⁴Boso sene-do'ok neu lamatua fe'ek, fo leoina manaleo nai emi titia-tataim-mala, ala sene-do'ok-ka.

¹⁵Metema emi sene-do'ok neu lamatua fe'ek-kala, soona neukose emi hapu emi MANETUALAIM-ma nasa-melun, ma Ana tao namate-namopo la'iesak emi, nana emi MANETUALAIM-ma fo, manai emi tala'da heom-ma, Ana ta nau makasasamak-kana no hata esa boen.

¹⁶ Boso so'ba emi MANETUALAIM-ma, sama leo emi taon neme Masa.

¹⁷Tunga basa hoholo-lalanek fo, emi MANETUALAIN fen neu emi-a.

¹⁸Tao hata fo, tunga MANETUALAIN mata memeten-na, malole ma ndos ma matetuk, soona neukose emi hapu tetu-temak. Dae maoe-maisi fo, MANETUALAIN helu basan neu emi bei-ba'i kaim-mala, neukose ana da'di emi pusakam,

¹⁹ma neukose emi usiheni emi musum-mala, sama leo MANETUALAIN hala hehelun-na.

²⁰Nai faik makabuin, neukose emi anam-mala latane emi lae, ‘Tao le'e de, ita MANETUALAIN, nadenu ita tao basa paleta sila-la?’

²¹Soona emi muse mataa mae leo ia, ‘Makahulun-na, ita da'di mane Masir-ra atan-na, boema MANETUALAIN soi-po'i ita nenik be'i-balakai matuaina.

²²Ami mita matam, MANETUALAIN tao manada'di beuk-kala, ma manada'dik-kala, leni bibii-namata'uk fe hataholi Masir-ra, ma sila manen-na, boema basa manapaletan-nala.

²³Ana soi-po'i ita teme Masir mai, fo no ita leo ia mai, de Ana fe ita dae ia, sama leo Ana helu basan neu ita bei-ba'i kain-nala.

²⁴Ita MANETUALAIN, nadenu ita tao basa paleta sila-la, ma fe ha'da-holomata neun. Metema, ita tao tungan leondiak soona, neukose Ana nakaboboi ita leoinan tataas esa, fo ela ita taso'da no tetu-temak tahele.

²⁵Metema no lilinekak, ita tunga basa paleta lala'en fo, ita MANETUALAIN paletan neu ita, soona neukose Ana sue-lai ita.’ ”