Read Termanu ULANGAN 9 Bible Online

ULANGAN 9 - Termanu bible

ULANGAN 9

¹“Tolano-tolanoong-ngala lemin, mamanene te! Faik ia, emi lena Lee Yarden-na, fo meu mangatuu-ma leoina fo ba'u lena em ma balakain-na lena heni emi ndia, daen-na. Sila kotan-nala matuaina mesa-mesan, ma papala nanadaman-nala mademaina-la losa lalai.

²Hataholin-nala, ao matuaina, ma balakain-na seli; hataholi ao matua ma ei madema sila, de emi mamanene basa, lae ta hapu hataholi esa boen, bisa la'ban hataholi sila fa.

³Tehu besak ia, neukose emi mita matam, tao leo beek de, emi MANETUALAIM-ma, Ana la'ok nai emi uluk, sama leo ha'i manatao maputuk-ka. Neukose, Ana sengi hataholi sila-la, nai emi matam, nalosa no lai-laik, emi bisa usihenis ma emi tao mamate-mamopos, sama leo MANETUALAIN helu basak-ka so.

⁴Emi boso dudu'a-dodoo nai emi dalem dale mae, metema emi MANETUALAIM-ma usihenis leme emi matam-ma mai, hu kande emi tatao-nono'i malolem-ma, ma lilineka neu MANETUALAIN no emi masok fo mangatuu-ma, nusak ndia, ta se'kona hu kande leoina ndia, tatao-nono'i mangalaun-na, de emi MANETUALAIM-ma usihenis leme emi matam mai, ma MANETUALAIN soi poi emi ho'i ma daen-nala hu kande nau tao natetu hala hehelun-na, no emi bei-ba'i kaim-mala fo nde, Abraham, Isak ma Yakob.

⁶Emi ia, te'e-te'e leoina langabatuk, da'di, fo ela emi bubuluk leona, te ta hu kande emi tatao-nono'i malolem-ma, de emi MANETUALAIM-ma fe nusak fo maoe-maisik ndia leo emi neu, fo emi mangatuu-man.

⁷Mafandendelek, tao leo beek de emi taom-ma, emi MANETUALAIM-ma namanasa neme moo solokaek-ka. Nailelek neme emi la'oela Masir, losa emi losa mamanak ia, emi lena-la'ban MANETUALAIN.

⁸Lena-lenak, emi taom-ma emi MANETUALAIM-ma namanasa nanseli neme Letek Sinai-a, nalosa Ana nau tao namate-namopo emi.

⁹ Boema, au kae leo letek lain u, fo au sipo batu hehelu-balataak, fo MANETUALAIN tao hehelu-balataak no emi. Lele'dok haahulu ma le'odaek haahulu, au leo eme letek ndia lain, ma au ta u'a-inu fa.

¹⁰Basa boema, MANETUALAIN fe au, Ana sulak na, batu ka duak-kala. Nai batu sila-la lain, Ana sulak hala-kokolak fo, Ana kokolak-kana no emi neme ha'i-a tala'da mai, nai lelek emi makabubua meme letek-ka huun-na.

¹¹Hei, basa lele'dok haahulu ma le'odaek haahulu boema, MANETUALAIN fe batu hehelu-balataak ka duak sila-la, leo au mai.

¹²Boema, MANETUALAIN nafa'da au nae, ‘Kona lai-lai leona, nana o leoinam fo o moos kalua leme Masir mai-a, ala tao tatao-nono'i mangalauk so. Ala ta tunga Au paletang-ngala so'on, de ala tao dodoki-dudulak fo, ala sene-do'ok neun.’

¹³MANETUALAIN boeo, nafa'da au nae, ‘Au bubuluk leoina ndia, langabatu lanseli.

¹⁴Boso so'ba-so'ba mapanggengge Au. Te Au sanga tao amopo-amates, nalosa tafandele henis leona. Tehu neukose, Au tao o da'di amak neu leoina esa, ba'u lena ma balakain-nala lena neme sila mai.’

¹⁵Boema lepos asadea, de au ko'o eni batu hehelu-balataa ka duak sila-la nenik au limang duas, boema au kona eme letek fo, manapila lo'a-lo'ak ndia lain mai.

¹⁶Boema au mete te, emi la'olena emi MANETUALAIM-ma paletan-na so. Emi masala-masingo basa neu MANETUALAIN so, nanahu emi taom-ma, sapi nanadoki-dulak esa neme liti-a mai.

¹⁷Boema, au bala batu bebelak ka duak sila-la leu dae lain, de lakalulutuk neme emi matam-ma.

¹⁸Boema, au sene-do'ok la'iesa seluk, neu MANETUALAIN neme letek-ka poin-na, nai lele'dok haahulu ma le'odaek haahulu dalen-na, ma au ta u'a-inu fa. Au tao leondiak, nanahu emi masala-masingo basa neu MANETUALAIN, nenik emi tao hata fo mangalauk, nalosa Manetualain namanasa.

¹⁹ Au bii-amata'u neu MANETUALAIN nasa-melun fo, manapila lo'a-lo'ak-ka neu emi, nalosa emi nau, Ana tao namate-namopo emi, tehu oek ia boeo, MANETUALAIN namanene au dokodoeng-nga.

²⁰MANETUALAIN boeo, namanasa nanseli neu Harun, nalosa Ana nau taonisan, boema au hule-haladoi fen boe.

²¹Au tapa heni, emi taom-ma, sapi liti nanadoki-dulak-ka, leo ha'i dale neu. Boema, au tao akalulutuk-kana, ma au paun losa lutu-lutu sama leo afu-ka, boema au tapa heni afu ndia leo leeanak dale neu; lee anak ndia, ana faa neme letek ndia huun-na mai.

²² Emi taom-ma, MANETUALAIN namanasa neme Tabera, Masa ma Kibrot-Taawa boe.

²³ Boema, nai lelek MANETUALAIN nadenu emi fo, la'oela Kades-Barnea, fo meu mangatuu-ma, dae fo neukose Manetualain fen neu emi-a, emi lena-la'ban emi MANETUALAIM-ma paletan-na; emi ta nau mamahele do tunga neu fan.

²⁴Nai lelek neme au alelak emi-a, emi lena-la'ban MANETUALAIN tataas esa.

²⁵Au bubuluk MANETUALAIN naketu basa, sanga tao namate-namopo emi. Hu ndia de, nai lele'dok haahulu ma le'odaek haahulu dalen-na, au sene-do'ok nai MANETUALAIN matan-na,

²⁶de au hule-haladoi ae leo ia: Ou MANETUALAIN, Fo Matua-madema, boso tao mamate-mamopo O anam fo, O soi-po'is ma O moos kalua leme Masir mai, nenik O be'i-balakaim, ma O koasa matuainam-ma.

²⁷Mafandendelek O atam-mala, fo nde Abraham, Isak ma Yakob, ma boso mete leoina ia langabatun-na, tatao-nono'i mangalaun-nala, ma sala-singon-nala.

²⁸Metema, O tao mamate-mamopo O anam-mala boe, soona neukose hataholi Masir-ra lafa'da, lae O ta moo mabe'i, O leoinam ndia leo nusak fo O helu basa, fen leo sila neu, ma lae O moos leo moo solokaek-ka neu, fo O taomisas, nanahu O mape'da dalek neu leoina ndia.

²⁹Tehu mafandendelek leona, MANETUALAIN, te hataholi ia-la nde been-na, leoina fo O heles da'di O anam, de O moos leme Masir mai, nenik O be'i-balakaim, ma O koasa matuainam-ma.”