Read Termanu YOHANIS 10 Bible Online

YOHANIS 10 - Termanu bible

YOHANIS 10

¹“Au dede'ang ia tete'e ka la'en. Metema hataholi esa, ana kae tunga bi'i lalae a, te ana tunga lelesu a fa soona, hataholi nakodaa ma manabonga uma ndia, nanahu ana ta tunga lelesu a fa.

²Tehu hataholi fo ana leo dalek tunga lelesu a soona, manafoo nde ndia dei.

³Boema neukose manamanea lelesu a, ana soi fen lelesu fo metema nalo bi'i la esa-esak na'de na soona, lalelak hala na. Basa soona, ana foo bi'i la leo deak leu.

⁴Metema bi'i la laladeak soona, manafoo a nakahuluk, fo bi'i la tunga dea na, nana bi'i la lalelak hala na.

⁵Bi'i la ta nau tunga hataholi fe'ek fa, de lalai la'oela hataholi ndia, nana ta lalelak hala na fa.”

⁶Yesus tui nakandandaak ndia, tehu ala ta lalelak Yesus dudu'a na leo beek fa.

⁷Boema Yesus kokolak seluk nae, “Tete'e ka, Au hala-kokolang ia la'en: Au nde manafoo bi'ilopo la.

⁸Basa hataholi manamai lakahuluk leme Au mai a, nde bee na nakodaa ma mana bonga uma basa sila la, hu ndia de, bi'ilopo la ta nau lamanene hala nala fa.

⁹Au nde lelesu a. See masok tunga Au soona, neukose naso'da, boema neu leo dalek neu ma ana leo deak neu fo ana hapu na'a-ninu.

¹⁰Nakodaa ka'da ana mai namanako, nanisa, ma ana tao nakalulutuk basa hata lala'ena. Tehu Au mai, fo ela hataholi daebafa ka hapu so'dak, maso'da manaketu basa ta ka.

¹¹Au nde manafoo malole. Manafoo malole a ana fe basa so'da na neu bi'ilopo nala.

¹²Tehu hataholi mana'a ngga'di a, manafoo ta ndia fa. Boema bi'i la lamatua na ta nde ndia boen. Hu ndia de, metema nita busa fui ka mai soona, neukose nalai la'oela bi'i la. Soona busa fui ndia, ana kaa nala bi'i la, ma ana tao na bi'i la tapasasala.

¹³Tutika hataholi mana'a ngga'di ndia nalai, nana hu ka nde naue-nale'di fo sue ka nde ana hapu ngga'di. Hu ndia de, ana ta nafaduli bi'i sila la fa.

¹⁴ Au nde manafoo malole. Sama na leo Ama ka nalelak Au, ma Au alelak Ama ka leondiak boe. Au alelak Au bi'ilopo ngala, ma bi'i sila boeo lalelak Au. Au fe la'iesak Au maso'da nga neu bi'i sila la.

¹⁶Boema Au bei anuu bi'ilopo fe'ek boe, tehu bi'i sila ta lakabubua lo bi'ilopo bubuak ia fa. Au muse u foo falik bi'i sila la boe, fo daenga lalelak Au hala nga. Neukose basa bi'i sila la, ala da'di ka'da bubuak esa, boema manafoo ka'da esa boe.

¹⁷Ama ka sue-lai Au, nana Au feheni Au maso'da nga, fo daenga Au hapu fali kana.

¹⁸Ta hapu hataholi esa boen, hapu ho'i fali kana neme Au mai fa. Nana Au fen tunga Au hihii-nanau mesa nga. Au anuu koasa soaneu Au feheni Au maso'da nga, ma anuu koasa soaneu ho'i fali kana. Bela-ba'uk ndia, Au sipon neme Ama ka mai.”

¹⁹Hu ka nde Yesus kokolan ndia de hataholi Yahudi la lale'a leona.

²⁰Sila ba'u ka lafa'da lae, “Nitu nai dalen dale! De namulu ndia! Sosoak hata, emi mamanene Hataholi ndia?”

²¹Tehu nggelok bai soona lae, “Hataholi nitu sa'e ka ta kokolak leondiak fa! Ade nitu hapu tao na hataholi poke ka hapu nita do?”

²²Faik ndia, hataholi la bei tunga Feta Fai Matua Nakatema Manetualain Uma na, nai Yerusalem. Lelek ndia, la'e fai makasufuk.

²³Ndia te, Yesus bei la'o-la'o nai Salomo Kama na, nai Manetualain Uman dale,

²⁴nai lelek fo hataholi Yahudi la mai de lakabubua lai Yesus boboa kaisun. Boema lafa'dan lae, “O po'ilotak ami dale ma, naba'e losa faihi'da? Mafa'da no mangale'dok leona, metema tete'e ka Mane Mana Fe So'da ka nde O.”

²⁵Boema Yesus nataa nae, “Au afa'da basa emi so, tehu emi ta mamahele fa. Tatao-nono'ik fo Au tao-no'in ninik Au Ama nga na'de na, ana da'di buti esa neu Au.

²⁶Emi ta mamahele fa, nana Au bi'ilopong ta emi fa.

²⁷Au bi'ilopo ngala lamanene Au hala nga. Boema Au alelak asa, hu ndia de ala tunga Au.

²⁸Au fes maso'da matetu ka, ma manaketu basa ta ka, fo ala ta mopo-mate losa dodoo na. Ta hapu hataholi esa boen, hapu loso ninis leme Au limang dale mai fa.

²⁹Au Ama nga, Ana fe basa-basas mai Au, lenaheni basa hata lala'ena. Ta hapu hataholi esa boen, ana loso ninis leme Ama ka liman dale mai fa.

³⁰Au ma Ama ka nde bee na, esa.”

³¹Boema hataholi Yahudi la hele seluk batu fo ala tapa Yesus.

³²Tehu Yesus nafa'das nae, “Ama ka paleta Au fo tao tatao-nono'i malole ba'u ka, de emi mita basan so. De neme basa tatao-nono'ik sila la, bee ka nde tao na emi nau tapa Au?”

³³ Boema hataholi Yahudi la lataa lae, “Ta hu ka nde O tatao-nono'i malolem sila la fa, de ami nau tapa O ninik batu, te hu ka nde O makamumulu-makamamaek Manetualain. O hataholi daebafak esa boe na, O nau tao aoina ma da'di neu Manetualain.”

³⁴ Boema Yesus nae, “Ade nai emi Susula Hoholo lalanem dale, ta nanasulak nae, Manetualain nafa'da nae, ‘Emi ia lamatua daebafak hetu’?

³⁵Ita bubuluk basa, hata fo nanasulak nai Susula Malalao ka dalek, ana da'di losa dodoo na. Hu ndia de, metema Manetualain foi basa hataholi ta manasipok dede'a-kokola na, na'de ‘lamatua daebafak’,

³⁶naa, tao le'e de emi mafa'da mae, Au akamumulu-akamamaek Manetualain, hu ka nde Au afa'da ae, Manetualain Anan Au? Te see ko na, Manetualain nde hele Au de nadenu Au mai leo daebafa ka mai.

³⁷Metema Au ta tao tatao-nono'ik fo Ama ka paleta ka fa soona, boso mamahele Au.

³⁸Te hu ka nde Au tao-no'in de, mamahele hata fo Au tao-no'ik ndia leona, leomae emi ta nau mamahele Au fa. No enok ndia, emi bubuluk ma malelak mae, Ama ka da'di esa nahele no Au, ma Au da'di esa ahele o Ama ka.”

³⁹Boema ala sanga seluk enok fo ala ho'u Yesus, tehu Yesus la'o so.

⁴⁰ Yesus fali leo Lee Yarden-na selik neu, nai mamanak fo makahulu na Yohanis salani nana, de Ana leo neme ndia.

⁴¹Hataholi makadotok ala mai, boema ala kokolak lae, “Yohanis ta tao-no'i manda'di beuk fa, tehu basa hata fo nafa'dan la'eneu hataholi ia, memak tete'e ka la'en.”

⁴²Boema hataholi makadotok sila la, lamahele Yesus.