Read Termanu YOHANIS 11 Bible Online

YOHANIS 11 - Termanu bible

YOHANIS 11

¹ Hataholi esa na'de Lasarus, ana leo nai Betania, sama-sama no tolanoo inan Maria ma Marta.

² Maria nde inak fo manapo'a mina kaboominik neu Yesus ei na, de ana losen ninik langadoo na. Faik esa boema, Lasarus tu'u he'dis.

³Tolanoo inan duas fe halak leo Yesus neu lae, “Lamatuak, ami tolanoom fo Lamatua ka sue-laik ndia, namahe'di.”

⁴Yesus namanene halak ndia boema nae, “He'dis ndia, neukose ta nini mamates fa. He'dis ndia ana da'di, fo ela Manetualain nananamatutua-namadedemak, ma fo ela no enok ndia, Manetualain Ana na boeo, nananamatutua-namadedemak.”

⁵Yesus sue-lai Marta, Maria ma Lasarus.

⁶Tehu lelek fo Yesus hapu halak nae, Lasarus namahe'di boema, Ana sue tao leondiak fo nahele neme mamana na, faik dua seluk bai.

⁷Basa ndia, besa ka nafa'da ana manatunga nala nae, “Mai, fo teu leo Yudea teu.”

⁸Boema lae, “Ama Mesen, fai lai-laianak ia, hataholi Yahudi la sanga tapa Ama ninik batu, tehu besak ia, Ama nau fali seluk leo naa neu bai?”

⁹Tehu Yesus nafa'das nae, “Ade fai lele'do ka dodoo na, ta li'u sanahulu dua fa do? Hataholi manala'ok nai fai lele'do na ta nakatunu fa, ninik nita mangale'do daebafak ia.

¹⁰Tehu hataholi manala'ok nai fai le'odae na nakatunu, ninik ta hapu mangale'dok nai ndia fa.”

¹¹Basa boema nafa'da selu kasa nae, “Ita tia-lain Lasarus ana sungu so, tehu neukose Au u tao aso'da fali kana.”

¹²Boema Yesus ana manatunga nala lafa'dan lae, “Lamatuak, metema Lasarus ana sungu soona mahani te, tao leo bee o ana lea-hai.”

¹³Yesus dudu'a na soona nae, Lasarus maten so. Tehu laedaenga Yesus dudu'a na nde bee na soona nae, Lasarus sungu hii ndia.

¹⁴Hu ndia de, Yesus nafa'das no mangale'dok nae, “Lasarus maten so.

¹⁵Tehu Au amahoko, nanahu Au ta nai naa fa, ninik malole lenak soaneu emi, fo ela emi hapu mamahele. Besak ia, mai leona fo ata teu leo Lasarus teu.”

¹⁶Tomas fo loken lae, “Takalapak” nafa'da nonoo manatunga nala nae, “Mai fo ata tungan, fo ela ata mate ton!”

¹⁷Lelek Yesus losa mamanak ndia te, latoi-heni Lasarus faik ha ndia so.

¹⁸Betania deka no Yerusalem, fafa'kama kilo telu dodoo na.

¹⁹Hataholi Yahudi ba'u ka leu donge Marta no Maria, fo ala kokoe-nanasis, nana tolanoo na mamaten ndia.

²⁰Marta namanene Yesus mai boema neu leo deak neu de ana soluk Yesus, tehu Maria soona, nahele neme uma dale.

²¹Boema Marta nafa'da Yesus nae, “Lamatuak, leo uni ka lelek ndia, Lamatua ka nai ia soona, tao leo bee o au tolanoo nga ta mate fan.

²²Leomae leondiak boeo, au bubuluk basan besak ia boe, neukose Manetualain ka'da fe beek fo Lamatua ka noke neun.”

²³Yesus nafa'da Marta nae, “Neukose o tolanoo ma naso'da falik.”

²⁴Boema Marta nae, “Au bubuluk neukose Lasarus naso'da falik, metema hataholi manamate kala nanatao naso'da falik nai Fai Mate'e ka.”

²⁵Tehu Yesus nafa'da Marta nae, “Au nde manafe maso'da ka, ma manatao naso'da falik hataholi manamate kala. Hataholi fo namahele neu Au a, neukose naso'da, leomae ana mate so.

²⁶Ma hataholi kaso'dak fo namahele neu Au a, neukose ana ta mate losa dodoo na fa. Ade o ta mamahele neu dede'ak ndia fa do?”

²⁷Boema Marta nae, “Lamatuak, au amahele Lamatua ka Manetualain Anan, fo Manek Mana Fe So'da ka neukose Ana mai leo daebafak ia mai.”

²⁸Marta kokolak basa nae leondia boema, neu nalo Maria fo tolanoo na, de namakukutu kana nae, “Ama Mesen mai nai ia, de natane o.”

²⁹Maria namanene tutika ana fo'a lai-lai de neu soluk Yesus.

³⁰Ndia te, Yesus beita losa nggolok dale fa. Ana bei napadeik nai mamanak fo Marta natongo non nana.

³¹Hataholi Yahudi manakokoe-nanasi manai uma, lita Maria fo'a lai-lai leo deak neu boema leu tungan, nanahu laedaenga Maria neu ki nai lates nde ndia.

³²Maria losa mamanak ndia de nita Yesus boema, ana senek neu mata na de nafa'dan nae, “Lamatuak, leo uni ka lelek ndia, Lamatua ka nai ia soona, tao leo bee o, au tolanoo nga ta mate fan.”

³³Yesus nita Maria ki boema, hataholi Yahudi manamai sama-sama lo Maria, ala ki beno'u, boema Yesus dale na he'di sa, ninik dale na susa nanseli.

³⁴Boema Yesus natanes nae, “Emi matoin nai bee?” Lafa'da Yesus lae, “Mai teu fo meten Lamatuak.”

³⁵Tutika Yesus ki.

³⁶Boema hataholi Yahudi manai sila la bekola lae, “Mitakana dei, Ana sue na Lasarus ba'u na seli!”

³⁷Tehu nggelok soona lae, “Ana tao na hataholi poke kala lita, ma tao le'e de, Ana ta hapu kena-ka'i na mamate sa fo daenga boso mate Lasarus fa?”

³⁸Yesus susa nanseli, boema neu leo lates neu. Lates ndia nde bee soona leak esa, fo ala kenan ninik batu matuaina esa.

³⁹Ala losa lates boema, Yesus nafa'das nae, “Soliheok batu ndia.” Boema Marta, fo Lasarus tolanoo ina na nae, “Tehu ami matoi basa Lasarus, faik ha ia so Lamatuak. De tao leo bee o, naboo mangalalau so!”

⁴⁰Tehu Yesus nafa'da Marta nae, “Ade Au beita afa'da hai o ae: Metema o mamahele soona, neukose o mita Manetualain koasa matuaina fa do!”

⁴¹Boema ala soliheni batu ndia. Basa boema, Yesus nanganalo leo lalai neu de nae, “Makasi ba'u ka Ama, ninik O mamanene Au so.

⁴²Au bubuluk O mamanene Au tunga faik, tehu Au afa'dak ia, soaneu hataholi fo manai ia la, fo daenga ela lamahele lae, O nde madenu Au a.”

⁴³Yesus kokolak basa nae leondia boema, nalo napane'e nae, “Lasarus, leo deak mai leona!”

⁴⁴Tutika hataholi manamatek ndia, leo deak mai leona. Lima ein bei nanapotik ninik tema mamates, ma mata panan boeo, bei nanapotik nahelek ninik tema popoti na. Boema Yesus nafa'da hataholi manai sila la nae, “Se'iheni tema mamate na, fo ela ana la'ok nalelak.”

⁴⁵Hataholi Yahudi manadonge-dama Maria, ba'u ka lamahele Yesus nai lelek fo lita manda'dik ndia.

⁴⁶Tehu sila hataholin de'ubee leu leo hataholi Farisi la de, lafa'das Yesus tatao-nono'in ndia.

⁴⁷Hu ndia de, hataholi Farisi la lo malanga ima mala lakabua lo Mana Maketu-mala'di Agama Matua. Lakokolaok lae, “Ita muse tao bek dei? Te hataholi ia, ana tao manda'di beuk ba'u ka so!

⁴⁸Makanaema ita po'ilota kana leoiak nakandoo soona, neukose basa hataholi la lamahelen. Fo neu mate'e na te, neukose manakoasa Roma mai fo ana tao nakalulutuk Manetualain Uma na no basa ita leoina na lala'ena!”

⁴⁹Sila hataholin esa na'de Kayafas, fo imam matuaina nai teuk ndia dale na, nafa'das nae, “Emi ta bubuluk hata esa boen.

⁵⁰Ade emi ta mame'da mae, hu ka nde lauingu a de, malole lenak mate hataholi esa, neme basa leoina lala'e na, lakalulutuk?”

⁵¹Tunga ndo na, Kayafas hala kokolan ndia ta neme aafi mesa na mai ndia fa. Te hu ka nde ana da'di imam matuaina nai teuk ndia dale na, de nafa'da ela nae, neukose Yesus maten soaneu leoina Yahudi la.

⁵²Boema ta ka'da soaneu leoina Yahudi la mesa kasa fa, tehu soaneu Ana tao nakabubua Manetualain ana mana tapasasala nala.

⁵³Mulai faik ndia boema, basa manakoasa Yahudi la lalahalak esa, fo ala sanga taolisa Yesus.

⁵⁴Hu ndia de, Yesus ta nato'dak aoina na nai lea matan, ma nai buao Yahudi a dalek so'on. Boema Ana la'oela Yudea de neu leo kota esa na'de, Efraim fo ana deka no mo solokae ka. Yesus no ana manatunga nala leo leme ndia.

⁵⁵Nai lelek ndia, Fai Matua Paskah Yahudi a, ana deka so. Hataholi makadotok leme nggolo-ta'du kala mai, fo ala leo Yerusalem leu, fo sue ka nde Feta beita losa fa te, ala tunga lakahuluk ito-ato tao nalalao ao ka.

⁵⁶Ala sanga Yesus, tehu lelek fo lakabubua leme Manetualain Uman dale, boema esa natane esa nae, “O hahapu ma leo bek? Fafa'kama, Ana ta mai leo feta ia mai fa do.”

⁵⁷Ala kokolak lae leondia nana, malanga ima mala lo hataholi Farisi la po'i basa paleta lae, hataholi see bubuluk Yesus nai bee soona, muse ana fe sila halak, fo daenga ladenu hataholi neu ho'un.