Read Termanu YOHANIS 12 Bible Online

YOHANIS 12 - Termanu bible

YOHANIS 12

¹Bei faik ne bai soona, besa ka Fai Matua Paskah, boema Yesus neu leo Betania neu. Lasarus fo Yesus nafofo'a fali kana neme mamate sa mai ndia, ana leo nai nggolok ndia.

²Yesus losa naa boema, ala fe Yesus na'a ninu, de Marta nde nakalalau kana. Lasarus no fui nala langatuk la'a-linu sama-sama lo Yesus.

³ Basa boema, Maria nini mina narwastu kaboomeni mabeliina boto esa, fafaka ma liter seselik esa. De ana po'an neu Yesus ei na, boema ana losen ninik langadoo na. Uma ndia dalek lala'ena naboomeni nana mina ndia boo na.

⁴Tehu Yudas Iskariot, fo Yesus ana manatungan esa, fo makabui na boema, ana ke'dindiu Yesus, nahala ma nae,

⁵“Tao le'e de mina kaboomenik ndia ta nase'o neu doi lilofulak natun telu, fo fe doi na leo hataholi nu ta kala neu fa?”

⁶Yudas kokolak nae leondia nana, ta hu ka nde ana taoafik neu hataholi nu ta kala fa, tehu hu ka nde ndia hataholi nakodaa. La'iesa-la'iesa ana ho'i doik neme kas doi nakabubua ka mai. Ndia nde ho'u kas doik nakabubua ka.

⁷Tehu Yesus nae, “Lokopae inak ndia tao! Ana tao ndia soaneu Au fai natoi-natongo nga.

⁸ Hataholi nu ta kala tunga faik lai emi tala'da, tehu Au ta.”

⁹Hataholi Yahudi makadotok lamanene lae Yesus losa nai Betania so, boema leu tungan nai naa. Sila leu tungan ndia, ta hu ka nde Yesus fa, te hu ka nde sila boeo nau lita Lasarus fo Yesus tao naso'da fali kana neme mamate sa mai.

¹⁰Hu ndia de malanga ima mala sanga taolisa Lasarus boe,

¹¹nana ana tao na hataholi Yahudi makadotok la'oelas de lamahele Yesus.

¹²Balahaa boema hataholi manamai leo Feta Paskah mai a, sila makadotok lamanene lae, Yesus bei nai eno tala'dak sanga neu leo Yerusalem neu.

¹³ Boema ala ho'i ai palem do de leu solu kana. Ala eki bekao lae, “Koa-kio Manetualain leona! Baba'e-papalak ba'eneu Ndia fo Ana mai no Manetualain na'de na. Baba'e-papalak ba'eneu Mane Israe la!”

¹⁴Ala fe Yesus keledei ana esa de Ana sa'e. Hu ndia de, hata fo nanasulak nai Susula Malalaok dale, ana da'di nae,

¹⁵ “Boso bii-mamata'u, ana fe'oana Sio na lemin! Mete leona te, o Mane ma Ana mai, Ana sa'e keledei ana esa!”

¹⁶Lelek ndia Yesus ana manatunga nala beita lalelak basa dede'ak sila la fa. Tehu Yesus nananamatutua-namadedema basak ninik mamate na, besa ka lafandele hata fo hataholi la tao-no'in soaneu na, nanasula basak nai Susula Malalaok dale so.

¹⁷Hataholi manita Yesus nalo Lasarus neme lates dale leo deak mai, fo naso'da falik neme mamate sa mai a, ala tui-benga lakandoo dede'ak ndia.

¹⁸Hu ndia de hataholi makadotok sila la leu leo Yesus leu, ninik lamanene lae, Yesus nde tao manada'di beuk ndia.

¹⁹Boema hataholi Farisi la esa nafa'da esa nae, “Ita ta tao talelak hata esa boen! Mitakana dei, te basa daebafa ka lala'ena leu tungan!”

²⁰Nai hataholi manamaik leme Yerusalem fo nai lelek fai malole ndia, hataholi Yunani de'ubee lai dalek boe.

²¹Leu leo Felipus leu de lafa'dan lae, “Tolanoo ei, metema o nau soona, ami mahiik matongo mo Yesus.” (Bongi Felipus neme Betsaida fo nai Galilea.)

²²Boema Felipus neu nafa'da dede'ak ndia neu Anderias, de basa boema duas leu lafa'da Yesus.

²³Yesus nafa'das nae, “Fai na losa, soaneu Ana Hataholi ka nananamatutua-namadedemak.

²⁴Au dede'ang ia, tete'e ka la'en: Makanaema ha'de de'ek esa, ta selen leo dae dale neu, fo ha'de de'ek ndia po'o fan, soona neukose ana da'di de'ek esa nahele. Tehu makanaema ha'de de'ek ndia po'on nai dae dale, soona besa ka ana moli, fo nabuna-naboa ha'de de'e ba'u.

²⁵ Hataholi manasue-lai maso'da na, neukose namopo maso'da na. Tehu hataholi fo namopo maso'da na nai daebafak ia, neukose nakaboboi maso'da na, soaneu maso'da matetu ka ma manaketu basa ta ka.

²⁶Hataholi see nau nalalau-naoono Au soona, ana muse tunga Au, fo sue ka nde Au nai bee soona, Au malalau-maoono ngala boeo lai ndia. Hataholi see nalalau-naoono Au soona, neukose Au Amang fe ha'da-holomata neun.”

²⁷“Au dale nga to'a-sota. Besak ia Au muse ae le'e bai? Ade Au muse afa'da ae, ‘Ama, fali ma Au neme hatematak ia mai leona do’? Te hu ka nde doidosok ia de Au mai.

²⁸Ama, O na'de ma nananamatutua-namadedemak!” Boema namanene halak esa neme lalai mai de nafa'dan nae, “Au amatutua-amadedema basan so, ma neukose Au amatutua-amadedema selu kana.”

²⁹Hataholi makadotok manai sila la, lamanene halak ndia boe. Boema lae, “Mangguluk ndia!” Tehu nggelok soona lae, “Ta! Ata nusa so'da ka kokolak non!”

³⁰Boema Yesus nafa'das nae, “Ita tamanene halak ndia, tehu ta hu ka nde Au hihi-nanaung fa, te hu ka nde emi hihi-nanaum.

³¹Besak ia, fai na losa soaneu daebafak ia nananaketu-nala'dik. Besak ia, manakoasa daebafa ka nanalolihenik so.

³²Tehu Au ia, metema Au nananamatutua-namadedema basak nai daebafa ka soona, neukose Au hela uni basa hataholi la leo Au mai.”

³³Ana kokolak nae leondia nana sanga natu'du eno na tao leo beek, de Ana mate.

³⁴ Boema hataholi makadotok sila la lafa'dan lae, “Tunga ami Susula Hoholo-lalane ma nafa'da na soona, Mane Mana Fe So'da ka neukose naso'da losa dodoo na. Naa, tao leo beek de O mafa'da mae, Ana Hataholi ka muse nananamatutua-namadedemak nai daebafak ia poi na? See Ana Hataholik ndia?”

³⁵Boema Yesus nae, “Ka'da ba'ihanak mesa kana, mangale'dok ndia nai emi tala'da. Hu ndia de, leo la'ok beidai mangale'dok ndia bei hapun, fo ela makahatu ka boso tuni na emi. Hataholi manaleo la'ok nai makahatu ka dale ka, neukose ana ta bubuluk leo bee neu fa.

³⁶Mamahele mangale'dok ndia beidai bei hapun nai emi dalek, fo ela emi da'di ana mangale'dok.” Yesus kokolak basa nae leondia boema, Ana la'oela mamanak ndia, nana Ana ta nau natu'du aoina na neu hataholi sila la so'on.

³⁷Leomae Yesus tao basa manda'di beuk ba'u ka nai sila matan so, tehu ala ta nau lamahele fan.

³⁸ Hu ndia de, hata fo Nabi Yesaya nafa'da ka, ana da'di, “Lamatuak, see ka nde namahele ami tutui-bebengam? Manetualain natu'du koasa na neu see ka?”

³⁹Hu ndia de, ala ta nau lamahele fa, ninik Yesaya boeo nafa'da basa nae, “Manetualain nafa'da nae,

⁴⁰ ‘Ao tao apoke mata nala, Au tao atea dale nala, fo ela mata nala boso lita, dudu'a aafi nala boso lalelak, fo ela ala boso fali leo Au mai fo Au tao alea-ahais.’ ”

⁴¹Yesaya nafa'da nae leondia nana, nita basa Yesus matua-mademan so. Hu ndia de ana kokola kana.

⁴²Leomae leondiak boe, hataholi ba'u ka, lena-lenak nai manakoasa Yahudi la dalek, lamahele Yesus boe. Tehu ala ta lapalani manaku dede'ak ndia no mangale'dok fa nana, ala bii boso nalosak hataholi Farisi la ta po'is leu masok so'on.

⁴³Ala hii lanseli, hapu kokoa-kikiok neme hataholi daebafa ka, lena neme Manetualain so'ulai kasa.

⁴⁴Boema Yesus nalo nae, “Hataholi see namahele Au soona, ta namahele Au nde ndia fa te, namahele Ndia fo manamadenu Au a.

⁴⁵Ma hataholi see nita Au soona, nita Ndia fo manamadenu Au a.

⁴⁶Au mai leo daebafak ia mai fo da'di mangale'dok, fo ela basa hataholi fo lamahele Au a, ala boso leo nai makahatu ka dalek.

⁴⁷Hataholi fo lamanene Au nanoli nga, tehu ana ta tao tunga fan soona, Au ta nde huku nana fa. Nana Au ta mai aketu-ala'di daebafak ia fa, tehu Au mai fo Au fe so'dak neu daebafa ka.

⁴⁸Hataholi manatipa Au, ma ta nau lamanene Au dede'a-kokolang fa, hapu mana maketu-mala'di na so. Dede'a-kokolak fo Au afa'da kala, neukose neu fai mate'e ka te, dede'a-kokolak sila la nde laketu-lala'di sala.

⁴⁹Nanahu Au ta kokolak unik Au hihi-nanau mesa nga fa, te Amak fo manamadenu Au a, Ndia nde paleta Au, hata fo Au muse afa'dan, ma anduku-alosa kana.

⁵⁰Ma Au bubuluk basa paletan ndia nini so'da matetu ka ma manaketu basa ta ka. Hu ndia de, Au anduku-alosa kana, sama leo Ama ka nanoli basan neu au a so.”