Read Termanu YOHANIS 13 Bible Online

YOHANIS 13 - Termanu bible

YOHANIS 13

¹Bei ela ka'da faik esa bai soona, besa ka Fai Matua Paskah losa, tehu Yesus bubuluk basa, fai na losa soaneu Ana la'oela daebafak ia, fo Ana fali ne'un leo Aman neu. Ana sue-lai Ndia hataholin manai daebafa ka. Ana sue-lai naheles, losa mate'e na.

²Yesus no ana manatunga nala bei la'a-linu le'odaek, te nitu nadai basa dudu'a mangalau ka nai Yudas fo Simon Iskariot ana na dalen dale, fo sue ka nde ana ke'dindiu Yesus.

³Yesus bubuluk basa, Ama ka fe basan koasa lala'ena so. Boeo Ana bubuluk basa, Ana mai neme Manetualain mai, ma neukose Ana fali seluk leo Manetualain neu.

⁴Hu ndia de, Ana fo'a napadeik de Ana o'duheni ba'du manalu na, de Ana pa'a handu ka neu tala'da na.

⁵Basa ndia boema, Ana po'a oe leo bokol esa dalek neu, de Ana mulai safe ana manatunga nala ei na, boema Ana lose nama'das ninik handuk fo nanapa'ak nai tala'da na.

⁶Ana losa Simon Petrus boema, Simon Petrus nafa'dan nae, “Lamatuak, hapu nai bee Lamatua ka safe au ei nga?”

⁷Boema Yesus nafa'dan nae, “Besak ia o beita malelak hata fo Au taon ia fa, tehu mahani te, neukose o malela kana.”

⁸Petrus nafa'da Yesus nae, “Bosok, Lamatuak! Lamatua ka boso safe au ei nga makandondook!” Tehu Yesus naen nae, “Makanaema Au ta safe o ei ma fa soona, o ta hapu da'di esa mo Au fa.”

⁹Boema Simon Petrus nae, “Makanaema leondiak soona, Lamatua ka boso safe ka'da au ei nga mesa kana, tehu au lima nga no au langa nga boe!”

¹⁰Yesus nafa'da Petrus nae, “Hataholi fo nadiu basa oe soona, basa ao na lala'ena balisi so. Ta paluu tao balisi hataholi ndia seluk so'on, te ka'da ei na. Emi ia balisi so, tehu ta basa-basan balisi fa.” (

¹¹Yesus bubuluk basa, see ka nde neukose ana ke'dindiu nana. Hu ndia de, nafa'da nae, “Emi balisi so, tehu ta basa-basan balisi fa.”)

¹² Yesus safe basa ei nala boema, Ana pake falik ba'du manalu na, de nangatuuk falik. Boema nafa'das nae, “Ade emi ta malelak hata fo, besa ka Au taon neu emi ndia fa do?

¹³Emi malo Au mae, Mesen ma Lamatuak. Memak tete'e ka leondiak.

¹⁴Makanaema Au da'di emi Lamatua ma, ma emi Mese ma, fo Ana safe emi ei ma soona, emi boeo esa muse safe esa ei na.

¹⁵Au fe emi natutu'duk ia, fo daenga emi boeo tao tunga, hata fo Au tao basan neu emi so.

¹⁶ Au dede'ang ia tete'e ka la'en, Ata esa, ta ba'ulena tua na, ma hataholi nadedenuk esa, ta ba'ulena hataholi manamadenu nana fa.

¹⁷Makanaema emi bubuluk basa dede'ak ia la lala'ena, boema emi tao tungan soona, maua-manalek neu emi.

¹⁸ Au afa'da basa dede'ak ia la, ta soaneu emi basa-basa mala fa. Ninik Au bubuluk basa, see ka nde Au hele nana. Tehu hata fo nanasulak nai Susula Malalao ka dalek, muse ana da'di, fo nde ‘Hataholi fo na'a sama-sama no Au a, neukose ana la'ban Au.’

¹⁹Besak ia, Au afa'da dede'ak ndia neu emi, beidai ana beita da'di ia fa, fo ela metema dede'ak ndia ana da'di soona, neukose emi mamahele mae, Au nde Ndia fo loken lae, AU NAI IA.

²⁰ Au dede'ang ia tete'e ka la'en: See sipok hataholi fo Au adenu ka soona, ana sipok Au boe. Ma see sipok Au soona, ana sipok Ndia fo manamadenu Au a boe.”

²¹Yesus kokolak basa nae leondia boema, dale na he'di nanseli. Boema nae, “Au dede'ang ia tete'e ka la'en: Nai emi dalek, hapu hataholi esa neukose ana ke'dindiu Au.”

²²Boema ana manatunga nala dodoo doa kana, de esa mete esa, nana ala ta bubuluk Yesus kokolan ndia ana tu'da la'e see ka nde ndia fa.

²³Yesus ana manatungan fo Yesus sue-lai ka, nangatuuk nai Yesus boboa na.

²⁴Simon Petrus fen ta'du fo natane Yesus, see ka nde Yesus nafa'dak ndia.

²⁵Boema ana manatungan ndia, nakano'dok seluk leo Yesus neu de natanen nae, “See ndia Lamatuak?”

²⁶Yesus nafa'dan nae, “Hataholi fo Au fen loti fo Au dopen leo mango dale neu soona, hataholi a nde ndia so.” Boema Yesus ho'i na loti biak esa, de Ana dopen leo mango dale neu, basa boema Ana fen leo Yudas fo Simon Iskariot ana na.

²⁷Yudas sipo na loti ndia tutika nitu masok leo dalen dale neu. Boema Yesus nafa'dan nae, “O sanga tao beek soona, taon lai-lai leona.”

²⁸Sila manamangatuuk la'a lai ndia, hataholi esa boen, ana ta bubuluk tao le'e de, Yesus nafa'da Yudas nae leondia.

²⁹Sila nggelok laedaenga Yesus nadenu Yudas neu asa seluk hata esa, fo ala paluun nai feta ndia, do nini fe hataholi nuu ta kala doik, nana Yudas nde ho'u sila basa-basas doi na.

³⁰Yudas sipo na loti ndia tutika ana fo'a de ana leo deak neu. Ndia te, le'odae so.

³¹Yudas la'o boema Yesus nae, “Besak ia, Ana Hataholi ka nananamatutua-namadedemak, ma Manetualain nananamatutua-namadedemak tunga Ana Hataholik ndia.

³²Metema Manetualain nananamatutua-namadedemak tunga Ana Hataholik ndia soona, Manetualain namatutua-namadedema Ana Hataholi ka, tunga Ao inana. Lena-lenak, neukose Manetualain namatutua-namadedeman no laik-laik.

³³ Ana ngala lemin, neukose Au ta leo ala doo ka o emi so'on. Neukose emi sanga Au, tehu sama na leo hata fo Au afa'da basan neu manakoasa Yahudi la, leondiak boe Au afa'da neu emi. Au u leo mamana ka, emi ta hapu losa mamanak ndia fa.

³⁴ Au fe emi paleta beuk esa nae leo ia: Masue-malai ao leona. Sama na leo Au sue-lai emi basa-basa mala. Leondiak boe, emi muse masue-malai ao.

³⁵Makanaema emi masue-malai ao soona, neukose basa hataholi la bubuluk lae, Au ana manatungang emi.”

³⁶Boema Simon Petrus natane Yesus nae, “Lamatuak, Lamatua ka sanga leo bee neu?” Yesus nafa'dan nae, “Au leo bee u o, besak ia o beita hapu tunga fa. Tehu neukose makabui na te, o tunga Au.”

³⁷Petrus natane seluk nae, “Lamatuak, te tao le'e de, besak ia au beita tunga Lamatua ka fa? Au nau mate soaneu Lamatua ka!”

³⁸Boema Yesus nae, “Ade tete'e ka, o nau mate soaneu Au do? Fo ela o bubuluk leona te, manu ana beita kokoa fa, te o mafa'da basa la'i telu mae, o ta malelak Au fa!”