Read Termanu YOHANIS 20 Bible Online

YOHANIS 20 - Termanu bible

YOHANIS 20

¹Mamasok fafai na, fo bei makahahatuanak, te Maria Magdalena neu leo lates neu. Ana losa boema, ana mete te batuina fo ala tatanan neu late sa, nanakeko henik neme late sa bafa na mai so.

²Boema nalai fali de neu sanga Simon Petrus ma Yesus ana manatunga susue na de nafa'das nae, “Ala ko'o lini Lamatua ka neme lates dale mai so, tehu au ta bubuluk ala pe'dan nai bee a fa.”

³Boema Petrus no ana manatungan fe'ek ndia, lalai leo lates leu.

⁴Duas lalaik tehu ana manatunga fe'ek ndia nalai seli Petrus de, ana nduku nakahuluk lates.

⁵Tutika ana titino leo lates dale neu te, nita tema mamate sa bei lee-lee nai ndia, tehu ana ta kona leo lates dale neu fa.

⁶Simon Petrus losa nakabuik, tehu ana kona nakandoo leo lates dale neu de nita tema mamate sa bei lee-lee nai mamana na,

⁷tehu tema nanapa'ak nai Yesus langa na, ta deka nai ndia fa te, nanadiku matalololek de nanape'dak nai mamana fe'ek so.

⁸Basa boema, ana manatungan fo manalosa nakahuluk late sa ndia, ana kona leo dalek neu de nitan boema namahele. (

⁹Losa faik ndia te ala beita lalelak hata fo nanasulak nai Susula Malalaok dale nae, Ana muse naso'da falik neme mamate sa mai.)

¹⁰Basa ndia boema, Yesus ana manatungan sila la fali le'us.

¹¹Maria Magdalena napadeik neu late sa mata na boema ana kii. Ana bei kii-kii te, ana titino leo lates dale neu,

¹²boema nita ata nusa so'dak dua, ala pake bua-lo'a fulak. Duas langatuk lai Yesus popola na mamana, de esa nai langa na ma esa nai ei na.

¹³Boema ata nusa so'dak sila latanen lae, “Ina, te tao le'e de o kii?” Boema Maria nae, “Ala ko'o lini au Lamatua nga so, de au ta bubuluk ala pe'dan nai bee fa.”

¹⁴Ana kokolak basa nae leondia boema, ana lipa leo dea neu te, nita Yesus napadeik nai dea na so. Tehu ana ta bubuluk, Yesus nde ndia fa.

¹⁵Boema Yesus natanen nae, “Ina, te tao le'e de, ina kii? Ina sanga see?” Tehu Maria naedaenga manamanea osi a nde ndia de nafa'dan nae, “Ama, metema Ama nde pe'da heo kana neme ia mai soona, ama sue na mafa'da au, Ama pe'dan nai bee, fo daenga au u ho'i fali kana.”

¹⁶Boema Yesus nafa'dan nae, “Maria!” Tutika Maria lipa leo Yesus neu de, ana kokolak ninik dede'a Ibrani nae, “Rabuni!” (Fo sosoa na nae, “Mesen.”)

¹⁷Boema Yesus naen nae, “Boso taila'e Au dei, te Au beita kae leo Ama ka u fa. Tehu fali mu'u ma leon, fo mafa'da Au tolanoon gala mae, besak ia Au kae falik leo Au Ama nga ma o Amam, ma Au Manetualai nga ma o Manetualai ma.”

¹⁸Boema Maria neu nafa'da Yesus ana manatunga nala nae, au ita Lamatua ka so, de Lamatua ka nafa'da basa dede'ak sila la neu au.

¹⁹Bei nai mamasok ndia dalen-na boe, tehu la'e le'odaek, boema Yesus ana manatunga nala lakabubua leme uma esa dalek, de ala nggoelisa basa lelesu la, nana ala bii manakoasa Yahudi la. Tehu nggenge te Yesus mai de napadeik nai basa-basas tala'da, boema nafa'das nae, “So'da-molek ba'eneu emi.”

²⁰Nafa'da basa nae leondia boema, natu'dus lima na ma kaisu na. Lita Lamatua ka boema, lamahoko laanseli.

²¹Boema Yesus nafa'da la'iesa selukasa nae, “So'da-molek ba'eneu emibasamala. Sama na leo Ama ka nadenu Au, leondiak boe, Au adenu emi.”

²²Tutika Ana fuu ani hahae na neus, boema nafa'das nae, “Sipo ma Manetualain Dula Dalen-na leona.

²³ Metema emi fe do'o do ampon neu hataholi esa sala-singon soona, Manetualain boeo fe do'o do ampon neu hataholi ndia fa. Metema emi ta fe do'o do ampon neu hataholi esa sala singon fa soona, Manetualain boeo, ta fe do'o do ampon neu hataholi ndia fa.”

²⁴Tomas (fo loken soona lae, “Takalapak”), fo Yesus ana manatungan esa nde ndia boe. Ndia te ta nakabubua nos lai ndia fa.

²⁵Basa boema, Yesus ana manatungan sila la lafa'da Tomas lae, “Ami mita Lamatua ka so!” Tehu Tomas nae, “Metema au beita ita paku mamana ka nai lima na, fo au beita tao au lima ku'u nga neu bisu piik sila la, ma beita tao au lima nga neu kaisu na fa soona, au ta nau amahele makandondook fa.”

²⁶Basa mamasok esa seluk boema, Yesus ana manatunga nala lakabubua seluk nai mamanak ndia, tehu ia soona, Tomas nai ndia boe. Ala nggoe lisa basa lelesu la. Tehu Yesus mai de napadeik neu basas tala'da, boema nafa'das nae, “So'da-molek ba'eneu emi.”

²⁷Basa boema Yesus nafa'da Tomas nae, “Mete Au lima nga, fo tao o lima ku'uma neu bisu piik ia la leona. Boema lok o lima ma mai fo taon neu Au kaisu nga, fo o dalem-ma boso boe naba'e bai, tehu mamahele leona!”

²⁸Boema Tomas nafa'da Yesus nae, “Au Lamatua nga ma au Manetualai nga!”

²⁹Boema Yesus nafa'dan nae, “Hu ka nde o mita Au, de besaka o mamahele hetu do? Tehu maua-manalek ba'eneu hataholi fo namahele, leomae beita nita Au fa!”

³⁰Yesus beitao manada'di beuk makadotok seluk bai, nai ana manatunga nala matan, tehu ala ta sulak basas nai susulak ia dalek fa.

³¹Tehu ala sulak basa ia la, fo daenga ela emi mamahele mae, Yesus nde been-na Mane Mana Fe So'dak fo Manetualain Anan, boema hu ka nde emi mamahelen, de emi hapu maso'da ka.