Read Termanu YOHANIS 4 Bible Online

YOHANIS 4 - Termanu bible

YOHANIS 4

¹Hataholi Farisi la lamanene te Yesus salani hataholi ba'u ka, lenaheni Yohanis. (

²Tunga ndo na Yesus ta nde salani fa, te ana manatunga nala dei.)

³Hu ndia de, Yesus bubuluk hataholi Farisi la lamanene dede'ak ndia de, Ana la'oela Yudea boema neu leo Galilea neu.

⁵ Boema Yesus losa kota esa nai Samaria, na'de Sikhar, ta doo ka neme dae fo makahulu na Yakob fen neu anan Yusuf.

⁶Yakob oe dolu na nai ndia. Yesus sota nanseli no lala'o ka, boema nangatuuk neu oe dolu ndia su'u na. Ndia te, fafa'kama li'u sanahulu dua le'dohana na,

⁷Yesus ana manatunga nala leu asa nana'ak nai kota dale. Ala la'o boema, ina Samaria esa, ana mai dolu oe. Boema Yesus nafa'da inak ndia nae, “Ina, fe Au oe faa dei?”

⁸

⁹ Boema ina Samaria ndia nae, “Manetualain hataholi Yahudi, ma au hataholi Samaria; ma tao le'e de, Manetualain noke au oe?” (Nanahu, hataholi Yahudi la ta bole kokolak lo hataholi Samaria la fa.)

¹⁰Tehu Yesus naen nae, “Leo uni ka o bubuluk Manetualain baba'e-babatin, boema o bubuluk see nde mananoke o oe ia soona, tao leo bee o, o nde moke masafali hataholi ndia oe, soona neukose Ana fe o oe maso'da ka.”

¹¹Boema inak ndia nae, “Tuan hai dodolun ta, nate ka oe dolu ia dema na seli, na Tuan hapu oe maso'dak ndia neme bee mai?

¹²Ami ba'i-kaim Yakob, nde fe ami oe dolu ia. Fo no ana nala ma bana manun linu oe nai oe dolu ia. Ade Tuan maedaenga, Tuan ba'ulena Yakob do?”

¹³Boema Yesus nafa'dan nae, “See ninu oe ia soona, neukose ana maa ma'da seluk,

¹⁴tehu metema see ninu oe fo Au fe ka soona, neukose ana ta maa ma'da so'on, losa dodoo na. Nanahu Au fe oe ndia, neukose ana da'di oe mata nai aon dale, fo ana faa leo deak mai. Oe ndia nde nini so'da matetu ka, ma manaketu basa ta ka.”

¹⁵Tutika inak ndia nafa'da Yesus nae, “Tuan fe au oe ndia leona, fo ela au boso boe maa ma'da bai; boema au ta paluu mai hela oe nai ia so'on.”

¹⁶Tehu Yesus naen nae, “Muu malo o saotou ma fo mon leo ia mai leona.”

¹⁷Boema inak ndia nae, “Au saong ta ma.” Boema Yesus naen nae, “Memak o halam ndia la'en.”

¹⁸“Nanahu o sao la'i lima so, tehu besak ia o leo mo tou ka, o saom ta ndia fa.”

¹⁹Boema inak ndia nae, “Besa ka au bubuluk, Tuan nde bee na, nabi esa.

²⁰Ami bei-ba'ikai mala, sene-do'ok neu Manetualain nai letek ia lain, tehu Tuan hataholi nala lafa'da lae, hataholi a sene-do'ok neu Manetualain, ka'da nai Yerusalem mesa kana.”

²¹Boema Yesus naen nae, “Mamahele leona, te neu faik esa te, neukose hataholi a ta sene-do'ok neu Ama ka nai letek ndia lain so'on, ma ta nai Yerusalem boen.

²²Ba'eneu emi hataholi Samaria la soona, emi sene-do'ok meu hata fo emi ta malela kana fa, tehu ba'eneu ami hataholi Yahudi a soona, ami sene-do'ok neu Ndia fo ami malela kana, nanahu so'da-mole ka da'di neme hataholi Yahudi a mai.

²³Tehu losa fai na, fo fai na nde ia so, soona no Manetualain Dula Dale na koasa na, de hataholi la sene-do'ok neu Ama ka, da'dileo Manetualain fo ndo sa, fo nandaa no Ama ka dale hihii na.

²⁴Hu ka nde Manetualain ndia, nde Dula Dale ka, de no ka'da Manetualain Dula Dale na koasa na, de hataholi a hapu sene-do'ok neu Ama ka, sama leo Ama ka nai ia.”

²⁵Boema inak ndia nafa'da Yesus nae, “Au bubuluk Manek Mana Fe So'da ka fo loken lae Kristus ndia, neukose Ana mai. De metema Ana mai soona, neukose nafa'da basa hata lala'ena neu ita.”

²⁶Boema Yesus nafa'dan nae, “Te Au nde Mane Mana Fe So'dak ndia, fo besak ia, Au kola-kola o o nde ia so.”

²⁷Ndia te, Yesus ana manatunga nala besa ka ala fali ma'is. Lita Yesus kokolak no inak ndia boema, ala dodoo doa kana. Tehu ta lapalani latane inak ndia lae, “Te ina mai paluu beek?” do latane Yesus lae, “Tao le'e de, Ama kokolak no inak ia?”

²⁸Boema inak ndia la'oela nggusi na neme ndia, de nalai leo kota dale neu, de nafa'da basa hataholi la nae,

²⁹“Mai mitak hataholi esa nai eli, nafa'da basa au tatao-nono'ing lala'ena. De fafa'kama, Mane Mana Fe So'da ka nde ndia do?”

³⁰Boema basa hataholi la lalai leo Yesus leu.

³¹Ndia te, Yesus ana manatunga nala kokolak lon lae. “Ama Mesen, mu'a leona.”

³²Tehu Yesus naes nae, “Au nana'a-nininung lai ia so, tehu emi ta bubulu kana fa.”

³³Boema ana manatunga nala latatane aok lae, “Fafa'kama hataholi nini fen nana'a-nininuk do?”

³⁴Tehu Yesus nafa'das nae, “Au nana'a-nininung nde Au tunga Hataholi mana madenu Au a, hihii-nanaun, boema Au tao akababasak ue-le'dis fo Ana fen neu Au a.

³⁵Emi mafa'da mae, ‘Bei bulak ha seluk bai soona, fai keketu-kokoluk so.’ Tehu Au afa'da emi: Mete mitak tina-osi lamatasa beno'u so, de lahani ka'da fai keketu-kokolun!

³⁶Hataholi manaketu-kolu ka ana mulai sipo ngga'di na so. Boema ana tao nakabubua basa buna-boan lala'ena, soaneu so'da matetu ka, ma manaketu basa ta ka. Fo hataholi manasele-nggali ka no hataholi manaketu-kolu ka, lamahoko sama-sama.

³⁷Dede'a nakandandaak esa nde ia la'en boe. Nae leo ia, ‘Hataholi esa nde sele-nggali a, tehu hataholi fe'ek nde ketu-kolu nana.’

³⁸Au adenu emi meu ketu-kolu nai tina fo emi ta nde mamatina nana fa; te hataholi fe'ek nde namatina tina ndia, de emi mi'a mudak hataholi sila ue-le'din.”

³⁹Kota Samaria laun ba'u ka lamahele Yesus, nana inak ndia nafa'da nae, “Hataholi ia nafa'da basa au tatao-nono'ing lala'ena.”

⁴⁰Hu ndia de, hataholi Samaria la latongo lo Yesus boema, lafa'dan fo Ana leo no sila. De Yesus leo nos faik dua dale na.

⁴¹Basa boema, hu ka nde Yesus nanoli na de, hataholi ba'u ka boetai lamahelen.

⁴²Lafa'da inak ndia lae, “Besak ia, ami mamahele, nana ta hu o hala nafa'da ma fa te, hu ka nde ami mamanene matam, boema ami bubuluk memak tete'e ka, Hataholi ia nde Soi-tefa nala daebafa ka.”

⁴³Yesus leo faik dua neme Sikhar, boema Ana fali leo Galilea neu.

⁴⁴ Yesus nafa'da basa nae, “Nggolo isi kala, ala ta fe ha'da-holomata neu nabi esa, metema nabi ndia neme nggolok ndia mai.”

⁴⁵ Tehu Ana losa Galilea boema, hataholi sila la sipo kana no namahokok, nanahu lita basa hata fo Yesus taon, nai faik fo Fai Paskah neme Yerusalem.

⁴⁶ Basa boema, Yesus fali leo Kana neu, fo nai Galilea, nai bee Ana tao nasafali oe da'di angol. Nai kota Kapernaum ndia, hapu manapaleta, hataholi mana'a ngga'din esa, ana na namahe'di.

⁴⁷Lelek fo namanene hataholi la lafa'da lae, Yesus neme Yudea mai de, nai Galilea so, boema neu nala Yesus leo Kapernaum neu, fo nakahahaik ana na, te namahe'di de hihii maten so.

⁴⁸Tehu Yesus nafa'da manapaleta, hataholi mana'a ngga'din ndia nae, “Leo uni ka o ta mita Au tao manda'di beuk fa soona, o ta mamahele fa.”

⁴⁹Boema manapaleta, hataholi mana'a ngga'din ndia nae, “Tuan, teu lai-lai leona, beidai au ana nga beita mate fan ia.”

⁵⁰Tutika Yesus nafa'dan nae, “Mu'u ma leona, te o ana ma lea-hai so.” Hataholi ndia namahele Yesus halan ndia, boema ana la'o leona.

⁵¹Ana losa eno tala'dak boema, nasosolu ata nala de lafa'dan lae, “Tuan ana na lea-hai so.”

⁵²Boema natanes nae, li'u de'u bee boema ni'iana lea-hai. Boema ata nala lae, “Ndek hua sa, fafa'ka ma li'u esa le'dohana boema, sumai na mopon.”

⁵³Boema ni'iana ndia aman nafandele na, nandaa no li'u ndia boema, Yesus nafa'dan nae, “O ana ma hai so.” Tutika hataholi ndia no basa uma isi nala lala'ena lamahele Yesus.

⁵⁴Yesus tao manda'di beuk kadua nde ndia, fo nai faik fo neme Yudea leo Galilea neu.