Read Termanu YOHANIS 6 Bible Online

YOHANIS 6 - Termanu bible

YOHANIS 6

¹Basa faik ba'ubee boema, Yesus neu leo dano Galilea selik neu, fo loke dano ndia soona lae, Dano Tiberias boe.

²Ana losa naa boema, hataholi makadotok leu tungan, nana lita Ana tao manda'di beu kala ma nakahahaik hataholi kamahe'di sala.

³Boema Yesus kae leo pupukuk esa lain neu, de nangatuuk no ana manatunga nala leme ndia.

⁴Ndia te, hataholi Yahudi la Fai Paskah Matua na, ana deka so.

⁵Lelek fo Yesus mete leo boboa kaisun neu, de nita hataholi benongo mai boema, nafa'da Felipus nae, “Ita hapu asa nana'ak nai bee fo daenga ata fe hataholi ia la la'a?” (

⁶Yesus bubuluk basa hata fo Ana tao nana so, tehu Ana kokolak nae leondia nana, Ana sanga so'ba Felipus nde ndia.)

⁷Boema Felipus nae, “Ita asa loti, doi isi lilofulak natun dua boeo, tao leo bee o, ta dai hataholi ia la la'a fa, leomae esa na hapu ka'da faa anak boe.”

⁸Yesus ana manatunga fe'en esa na'de Anderias, fo Simon Petrus tolanoo na nae,

⁹“Ni'iana touanak esa nai ia, nini loti lima ma i'ak boak dua. Tehu ndia sosoa-ndandaan ta soaneu hataholi de'u-de'u basa ia la?”

¹⁰Tehu Yesus nafa'dan nae, “Madenu hataholi sila la langatuuk leona.” Nai mamanak ndia, na'u mesa-mesan de ladenu hataholi la langatuuk leu na'u lain, hataholi sila la basa-basas lala'ena — fafa'kama touk lifun lima.

¹¹Basa boema Yesus ho'i na loti sila la, boema noke makasi neu Manetualain. Basa ndia boema, Ana baba'e loti ndia neu hataholi makadotok sila la de la'a. La'a basa loti ndia boema, Ana baba'e fe selu kasa i'ak ndia, de la'a losa lakabete.

¹²Basa-basas la'a losa lakabete. Boema Yesus nafa'da ana manatunga nala nae, “Hehele makabubua nana'a ela kala leona. Boso masanggango faa anak boen.”

¹³Boema ala hehele lakabubua loti kalimak fo hataholi makadoto kala la'aela ka, henu lepeneu sanahulu dua.

¹⁴Hataholi makadotok sila la lita Yesus tao manda'di beuk ndia, boema bekola lae, “Tete'e ka, Nabi fo ita tamahena Ana mai leo daebafa ka mai a, nde Hataholi ia so!”

¹⁵Yesus bubuluk hataholi sila mamain ndia nde bee soona, ala sanga lakasetin fo Ana da'di sila mane na. Hu ndia de, Ana la'oheok leo nggolok manai lete kala neu.

¹⁶Le'odae boema, Yesus ana manatunga nala leu leo dano dale leu.

¹⁷Ala losa boema, ala sa'e ofak leo dano selik leu, fo ala sanga leo Kapernaum leu. Makahatu ka so, te Yesus beita mai fa.

¹⁸Ndia te, ani na fo'a de dano lii nala lapoponu.

¹⁹Ala la'o de ala losa, fafa'kama kilo lima do ne boema lita Yesus mai. Ana la'ok tunga oe lain. Litan tutika ala bii mangalalau.

²⁰Tehu Yesus nafa'das nae, “Boso bii te Au nde ia!”

²¹Boema no namahokok, ala sipok Yesus leo ofak lain neu. Boema no hatematak ndia boe, ofa ka losa Kapernaum.

²²Fo'a mai boema, hataholi makadotok bei manai dano seli ka, besa ka lame'da lan te, na'ka sa ka'da ofak esa neme ndia. Hu ndia de, ala bubuluk ka'da Yesus ana manatunga nala mesa kasa sa'e ofak ndia te Yesus ta tunga fa.

²³Basa boema, ofak de'ubee leme kota Tiberias sa mai de, ala see deka lo mamanak fo Yesus fe hataholi makadoto kala la'a loti a.

²⁴Lelek fo hataholi makadoto kala lita Yesus no ana manatunga nala ta lai ndia so'on boema, ala sa'e ofak sila la leona de leu sanga Yesus nai Kapernaum.

²⁵Hataholi sila la leu de latongo lo Yesus neme dano selik boema, latanen lae, “Ama Mesen, Ama losa ia ndek fai hi'da ka?”

²⁶Boema Yesus nae, “Tete'e ka, emi mai sanga Au nana ta hu ka nde emi malelak basa Au tao manda'di beu kala sosoa-ndandaan fa, te hu ka nde emi mi'a basa de emi makabete so.

²⁷Boso sanga ka'da nana'a kabook fo hapu basan. Te sanga nana'a kaboo ta ka, ma nana'a manini maso'da matetu ka, ma manaketu basa ta ka. Fo Ana Hataholi ka nde fe emi nana'ak ndia. Nanahu Amak Manetualain so'u basa Ana Hataholik ndia so.”

²⁸Boema latane Yesus lae, “Metema leondiak soona, ami muse tao leo beek fo besa ka nandaa no Manetualain hihii-nanaun?”

²⁹Boema Yesus nafa'das nae, “Manetualain nau emi tao ka nde ia: mamahele Manetualain nadenu Hataholi a, leona.”

³⁰Boema lae, “Metema leondiak soona, Ama ka fe ami ta'du-tana beek, fo ami mita ma mamahele Ama ka?

³¹ Ami bei ba'ikai mala la'a loti manna neme mo solokae ka, sama na leo nanasulak nai Susula Malalaok dale nae, ‘Ana fes la'a loti maneme nusa so'da ka mai.’ ”

³²Boema Yesus nafa'das nae, “Mamahele leona: te Au Amang nde fe emi loti matetu ka neme nusa so'da ka mai, te ta Musa fa.

³³Nanahu Manetualain fe loti nde bee na, nde Ndia manakona neme nusa so'da ka mai, boema ana fe so'dak neu basa hataholi daebafa ka lala'ena.”

³⁴Boema lafa'da Yesus lae, “Ama, fe ami loti ndia tunga faik leona.”

³⁵Tehu Yesus nafa'das nae, “Au nde loti manafe so'dak ndia. Hataholi see mai leo Au mai soona, neukose ana ta namala'a so'on losa dodoo na. Ma see namahele Au soona, neukose ana ta maa ma'da so'on losa dodoo na.

³⁶Tehu sama na leo Au afa'da basa emi ae, leomae emi mita Au so, tehu emi ta nau mamahele Au fa.

³⁷Ama ka fe basa Au hataholi la, neukose ala mai leo Au mai. Boema see mai leo Au mai soona, Au ta tipa esa boen.

³⁸Nanahu Au eme nusa so'da ka mai, fo Au ta tao-no'i tunga ka'da Au hihii-nanau mesa nga fa, te Au tao-no'i tunga Amak fo manamadenu Au a, hihii-nanaun.

³⁹Amak fo manamadenu Au a, hihii-nanaun nde: Ana nau basa hataholi fo Ana fe basan neu Au a, boso mopo esa boen, tehu ela Au tao aso'da fali kasa nai Fai Mate'e ka.

⁴⁰Fo memak dede'ak ndia nde nandaa no Au Amang hihii-nanau na. Au Amang hihii-nanaun nde, metema see nita Ana ka fo namahelen soona, ana hapu maso'da matetu ka, ma manaketu basa ta ka, boema Au tao aso'da fali kasa nai Fai Mate'e ka.”

⁴¹Boema hataholi Yahudi la mulai lakamu Yesus, hu ka nde nafa'da nae, “Au nde loti fo manakona neme nusa so'da ka mai a.”

⁴²Boema lakokola aok lae, “Ade hataholi ia, ta nde Yesus fo Yusuf ana na nde ndia hetu? Ami malelak ina ama nala! Naa, tao le'e de nafa'da nae, Ndia kona neme nusa so'da ka mai?”

⁴³Boema Yesus nafa'das nae, “Boso makamu.

⁴⁴Te hataholi a, ana ta hapu mai leo Au mai fa, metema Amak fo manamadenu Au a, ta nde no hataholi ndia leo Au a mai, boema see mai soona, neukose Au tao aso'da fali kana nai Fai Mate'e ka.

⁴⁵ Ala sula kana nai Nabi la Susulan dale nae leo ia: ‘Neukose Manetualain nanoli basa hataholi la.’ Hu ndia de, see namanene Ama ka, ma nanoli neme Ama ka mai soona, ana mai leo Au mai.

⁴⁶Au kokolang ia ta nanuu sosoak nae, hapu hataholi nita hai Ama ka so. Nana ka'da Ndia fo maneme Manetualain mai a, nde nita Ama ka.

⁴⁷Fo ela emi bubuluk te: Hataholi see namahele soona, ana hapu maso'da matetu ka, ma manaketu basa ta ka.

⁴⁸Au nde loti manafe maso'da ka.

⁴⁹Emi bei ba'ikai mala la'a loti manna neme mo solokae ka, tehu mates boe.

⁵⁰Tehu loti manakona neme nusa so'da ka mai a, ta leondiak fa. Metema see na'a loti ndia soona, ta mate fan.

⁵¹Au nde loti manakona neme nusa so'da ka mai, fo loti manafe maso'da ka. Hataholi see na'a loti ndia soona, naso'da losa dodoo na. Nana loti fo Au sanga fen neu hataholi daebafa ka ndia, nde bee na Au ao paa nga nde ndia.”

⁵²Hataholi Yahudi la lamanene dede'ak ndia boema, esa nale'a no esa. Lae, “Eno na tao leo beek, de hataholi ia nae, Ana fe ao paa na fo ita ta'an?”

⁵³Boema Yesus nafa'das nae, “Mamahele leona: Te metema emi ta mi'a Ana Hataholi ka ao paa na, ma minu ao daa na fa soona, neukose emi so'da ma sosoa-ndandaan ta.

⁵⁴Nana see na'a Au ao paa nga, ma ninu Au ao daa nga soona, ana hapu maso'da matetu ka, ma manaketu basa ta ka, boema neukose Au tao aso'da fali kana nai Fai Mate'e ka.

⁵⁵Nana Au ao paa nga, ma Au ao daa nga nde bee na, nana'a nininu matetuk.

⁵⁶Hu ndia de, metema see na'a Au ao paa nga, ma ninu Au ao daa nga soona, ana da'di esa nahele no Au, ma Au da'di esa ahele o hataholi ndia boe.

⁵⁷Amak fo maso'dak ndia nadenu Au, ma Au boeo aso'da eme Ama ka mai. Leondiak boe, hataholi fo na'a Au ao paa nga, neukose naso'da neme Au a mai.

⁵⁸Loti ia nde loti manakona neme nusa so'da ka mai. Loti ia ta sama no loti fo emi bei-ba'ikai mala la'a ka fa. Nana la'a loti ndia, tehu ala mate boe. Tehu see na'a loti ia soona, neukose naso'da losa dodoo na.”

⁵⁹Yesus nafa'da dede'ak sila la ndek lelek fo nanoli neme uma mamaso Kapernau ma dalek.

⁶⁰Lamanene Yesus dede'a-kokolan sila la boema, Yesus ana manatunga makadoto nala lae, “Nanolik ia bela na seli. See ka nde nalelak nanolik ndia!”

⁶¹Yesus bubuluk, ana manatunga nala lakamu nanolik ndia. Boema nafa'das nae, “Ade emi dale ma ba'ihana, nanahu Au dede'ang sila la do?

⁶²Dede'ak ndia dada'di na tao leo bee ko, ela metema emi mita Ana Hataholi ka kae falik ne'un leo mamana makasososa na neu dei?

⁶³Manetualain Dula Dale na, nde ana fe hataholi daebafa ka naso'da. Nanahu hataholi daebafa ka be'i-balakain sosoa-ndandaan ta. Au afa'da emi dede'a-kokolak sila la nde bee na, Manetualain Dula Dale na dede'a-kokolan, fo dede'a-kokola manafe maso'da ka.

⁶⁴Tehu emi hataholim nggelok ta nau mamahele fa.” Yesus bubuluk basa, neme makasososan mai a, see ka nde ta nau namahele fa, boema neukose see ka nde ke'dindiu nana.

⁶⁵Boema Yesus nafa'da selu kasa nae, “Hu ndia de, Au afa'da emi dei, te ta hapu hataholi mai leo Au mai fa, metema Ama ka ta natu'dun eno ka fa.”

⁶⁶Mulai neme hatematak ndia mai a, ana manatungan ba'u ka, lalai la'oelan, de ala ta nau tungan so'ok.

⁶⁷Boema Yesus natane ana manatunga kasanahulu dua nala nae, “Ade emi boeo nau malai la'oela Au boe do?”

⁶⁸ Boema Simon Petrus nae, “Lamatuak, ami meu leo see meu bai? Nanahu Manetualain dede'a-kokolan nini maso'da matetuk ma manaketu basa ta ka,

⁶⁹hu ndia de ami mamahele so, boema ami mamahele Lamatua ka nde hataholi malalaok fo Manetualain nadenun mai leo daebafa ka mai a.”

⁷⁰Tehu Yesus nae, “Ade Au ta nde hele emi hataholi kasanahulu duak ia la fa do? Tehu nai emi dalek, hapu hataholi esa, ana da'di nitu!”

⁷¹Yesus nafa'da hataholi a nde Yudas, fo Simon Iskariot ana na. Hu ndia de, leomae Yudas ndia hataholi esa neme Yesus ana manatunga kasanahulu dua nala mai, tehu ndia nde ke'dindiu Yesu sa.