Read Termanu YOHANIS 7 Bible Online

YOHANIS 7 - Termanu bible

YOHANIS 7

¹Basa ndia boema, Yesus neu leo basa mamanak lala'ena, nai Galilea. Ana ta nau neu leo Yudea neu fa, nana basa manakoasa Yahudi manai Yudea la lape'da dalek lon fo ala sanga taolisan.

² Lelek ndia, Fai Matua Lalaa Akidoo ka ana deka so.

³Boema Yesus tolanoo nala lafa'dan lae, “La'oela mamanak ia leona, fo mu leo Yudea mu, fo daenga O ana manatunga mala hapu lita O tatao-nono'im boe.

⁴Neukose hataholi ta hapu nafuni na tatao-nono'in, metema ana nau da'di hataholi nananita-nalelak. Metema O tao dede'a leo sila kala soona, muse daebafa ka lala'ena ala bubulu kana!” (

⁵Nana, tolanoo nala boeo, ta lamahele fan.)

⁶Boema Yesus nafa'das nae, “Au fai nga beita losa fa, tehu soaneu emi soona, emi hapu loak nai basa fai lala'ena.

⁷Tao leo bee o, daebafak ia ta nakamu-nakadau emi fa. Tehu Au soona, memak daebafa ka, nakamu-nakadau Au, nana Au afa'da daebafa ka tatao-nono'i mangalau na tataas esa.

⁸Emi mesa ma meu leo fai matua ndia meu. Te Au ta u fa, nanahu Au fai nga beita losa fa.”

⁹Yesus nafa'da tolanoo nala nae leo ndia boema, Ana leo neme Galilea.

¹⁰Yesus tolanoo nala la'o leo feta ndia leu boema, Yesus mesa kana neu leo feta ndia no denge-dengek, te hataholi esa boeo ta bubuluk boen.

¹¹Ana losa feta boema, basa manakoasa Yahudi la ala sangan de betane lae, “Te Ana mai de nai bee?”

¹²Hataholi makadotok mulai bengekutu la'eneu Yesus. Nggelok lae, “Hataholi ndia, hataholi malole.” Tehu nggelok bai soona lae, “Ta! Nana Ana tao na hataholi ba'u ka latofa-latalak so.”

¹³Tehu ta hapu hataholi napalani kokolak mangale'dok no fan, nanahu ala bii manakoasa Yahudi la.

¹⁴Feta ba'e duak boema, Yesus neu leo Manetualain Uman dale neu de nanoli hataholi la.

¹⁵Basa mana koasa Yahudi la dodoo doa kana, boema bekola lae, “Tao leo bee de, hataholi ia nalelak basa dede'ak sila la, te see ko na, Ana ta sakola nita fa?”

¹⁶Boema Yesus nae, “Fo Au fe nanolik ia la, Au nanoling ta sila fa, te Hataholi manamadenu Au a, nanolin sila la.

¹⁷Hataholi fo ana tunga Manetualain hihii-nanau na, neukose ana bubuluk, ade Au nanoling sila la neme Manetualain mai, do neme Au a mai.

¹⁸Ba'eneu see fo nanoli tunga ka'da malela mesa na, ana sanga hataholi koa-kion. Tehu hataholi fo ana sanga ha'da-holomata fe Hataholi manamadenu nana, soona hataholi ndia dale na ndoos, ma ta masapepekok fa.

¹⁹Ade Musa beita fe emi Manetualain paleta nala fa do? Tehu ta hapu emi esa boen, tunga paleta sila la fa. Na tao le'e de emi sanga taomisa Au?”

²⁰Boema hataholi makadotok sila la lae, “O mamulu ia so! See sanga taonisa O?”

²¹Yesus nae, “Au tao ka'da tatao-nono'ik esa, nai fai Saba ta, tehu emi dodoo doa kana.

²² Musa fe emi suna ta nakanenete na, leomae tunga ndo na, sunat ndia ana ta da'di neme Musa mai fa, tehu neme bei ba'ikai la mai, fo ndia te Musa beita. Hu ndia de, emi nau sunat hataholi nai fai Saba ta.

²³ Metema emi tao enok ndia, fo daenga emi boso la'olena Musa nakaneneten la'eneu suna ta soona, tao le'e de emi mamanasa Au, nana Au akahahaik hataholi nai fai Saba ta?

²⁴Boso maketu-mala'di hataholi tunga hata fo emi mitan, te maketu-mala'di tunga ka'da matetu na.”

²⁵Basa boema, hataholi Yerusalem de'ubee lae, “Ade ala sanga taolisa hataholi a, nde ia do?

²⁶Mitakana dei, te Ana kokolak pe'daon nai lea matan, tehu ta hapu hataholi kena-ka'i fan! Ade fafa'kama ita manakoasa nala lamahele, Mane Mana Fe So'da ka nde ia so do?

²⁷Tehu metema Mane Mana Fe So'dak ndia mai soona, hataholi esa boeo, ta bubuluk Ana mai neme bee mai fa! Te see ko na ita bubuluk hataholi ia, ana da'di neme bee mai so.”

²⁸Makabui na te, Yesus bei nanoli nai Manetualain Uman dale de nalo napane'e nae, “Da'di emi bubuluk see Au ia, boema Au da'di eme mai so hetu? Au mamaing ia, ta tunga Au hihii-nanau mesa nga fa. Tehu Ndia fo ita tamahele nana, nde nanuu hak nadenu Au a. Tehu emi ta malelak Hataholi ndia fa.

²⁹Au alelak Hataholi ndia, nana Au da'di eme Hataholi ndia mai, de Hataholi ndia nde nadenu Au a.”

³⁰No hatematak ndia boe, ala nau ho'u la Yesus leona, tehu esa boeo ta napalani tai la'e fan, nana fai na beita losa fa.

³¹Hataholi sila la ba'u ka lamahelen, de nalosa bekola lae, “Metema Mane Mana Fe So'dak ndia ana mai soona, ade Ana hapu tao manda'di beuk de'u lenaheni Hataholi ia do?”

³²Hataholi Farisi la boeo, lamanene hataholi makadotok sila la, ala bengekutu la'eneu Yesus. Hu ndia de, lakabubua lo malanga ima mala de ladenu manamanea Manetualain Uman de'ubee, leu ho'u Yesus.

³³Boema Yesus nafa'da hataholi makadotok manai Manetualain Uman dale la nae, “Au bei akabubua o emi, ka'da ba'ihanak mesa kana. Te basa ndia soona, neukose Au fali leo Ndia fo manamadenu Au a.

³⁴Neukose emi sanga Au, tehu emi ta hapu matongo mo Au so'on. Nanahu emi ta hapu meu leo mamanak ndia meu fa.”

³⁵Boema basa manakoasa Yahudi la esa kokolak no esa nae, “Te Hataholi ia, ana sanga neu leo bee neu, de nalosak nae, ita ta hapu tatotongo ton so'on? Ade, Ana sanga neu leo hataholi Yahudi manaleo nai nusadea, fo nai hataholi Yunani la dalek, fo sue ka nde nanoli hataholi Yunani sila la do?

³⁶Ana dudu'a tao leo beek de nalosa nae, neukose ita sangan, tehu ita ta hapu tatongo to fan, ma nae, neu leo mamana ka neu a, ita ta hapu teu leo mamanak ndia teu fa?”

³⁷ Losa feta ndia fai mate'e na fo faik ndia, fai masosoak, boema Yesus neu napadeik neu Manetualain Uman dale de nalo napane'e nae, “Hei hataholi mana maa ma'da kala lemin, ela leo bee na emi mai leo Au mai, fo minu leona.

³⁸ Ba'eneu see namahele Au soona, nanasulak nai Susula Malalaok dale nae: ‘Oe manafe maso'da ka, ana faa neme dalen dale mai.’ ” (

³⁹Yesus kokolak la'eneu see namahelen soona, neukose ana sipo Manetualain Dula Dale na. Nanahu lelek ndia, Manetualain beita fe Dula Dale na mai fa. Hu ka nde Yesus beita nananamatutua-namadedemak ninik mamate na fa.)

⁴⁰Hataholi makadoto kala lamanene Yesus kokolan ndia boema, hataholi nggelok lai hataholi sila dalek bekola lae, “Tao leo bee o, Hataholi ia nabi ndia!”

⁴¹Ma nggelok lae, “Mane Mana Fe So'da ka nde ia!” Tehu hapu nggelok bai soona lae, “Ah, hapu nai bee, Mane Mana Fe So'da ka, Ana mai neme Galilea mai?

⁴² Nana, nanasulak nai Susula Malalaok dale nae, Mane Mana Fe So'da ka nde bee na, Dauk tititi-nonosin, boema neukose Ana mai neme Dauk nggolo-ta'dun, fo Betlehem dei.”

⁴³Neu mate'e na boema, hataholi la mulai lale'a la'eneu Yesus.

⁴⁴Nalosa nggelok sanga ho'un, tehu hataholi esa boeo ta napalani taila'e fan.

⁴⁵Lelek fo ladenu hataholi manamanea Manetualain Uman fo leu ho'u Yesu sa, ala fali ma'is boema, malanga ima mala lo hataholi Farisi la latanes lae, “Te tao le'e de, emi ta mo fan?”

⁴⁶Boema hataholi sila la lae, “Waa, beita la'iesa boen, fo hapu hataholi ana kokolak sama na leo Hataholi ndia kokola na fa!”

⁴⁷Boema hataholi Farisi la lae, “Ade Ana tao na emi boeo mapangamak so hetu?”

⁴⁸“Ade ita manakoasa nala do hataholi Farisi la boeo, lamahele boen do?

⁴⁹Tehu hataholi makadotok sila la, ta lalelak Musa hoholo-lalanen fa, de tao leo bee o, ala soo-supa basas so.”

⁵⁰ Nai hataholi Farisi sila la dalek, hapu hataholi esa na'de Nikodemus, neu hai leo Yesus neu so. Boema Nikodemus ia nafa'da hataholi Farisi nggelok nae,

⁵¹“Tunga hoholo-lalane ka soona, ta bole huku hataholi esa boen, metema beita palisak dede'a na fo tamanene ana tui ndia tatao-nono'in leo beek fa.”

⁵²Boema latanen lae, “Ade o boeo, meme Galilea mai boe do? Palisak Susula Malalao ka dei! Te neukose o bubulu kana nafa'da nae, nabi ta da'di neme Galilea mai fa!” [

⁵³Basa ndia boema, basa hataholi la ala fali le'us leo uma nala leu.