Read Termanu YOHANIS 8 Bible Online

YOHANIS 8 - Termanu bible

YOHANIS 8

¹Tehu Yesus neu leo Pupuku Zetun na lain neu.

²Balahaa fafaik boema, neu seluk leo Manetualain Uman neu, boema hataholi ba'u ka mai. Tutika Yesus nangatuuk de nanolis.

³Ndia te, mese agama la lo hataholi Farisi la, ala ho'u la inak esa, ana hohonge, de lon leo Yesus neu. Boema ladenu inak ndia napadeik neu tala'daheon,

⁴boema lafa'da Yesus lae, “Ama Mesen, ami ho'u ma inak ia ana hohonge.

⁵ Nai Musa hoholo-lalanen dale, hapu nakanenete ka nae, ina matak leo ia ka, muse pia nini kana batu losa maten. Besak ia, Ama hahapu ma leo beek?”

⁶Latane lae leondia fo ala sanga lakahihi'ik Yesus, fo ala sanga Yesus sala na. Tehu Yesus ka'da nakatele de Ana duduik dae a.

⁷Tehu lakaseti lahelen boema, Ana so'uk langa na de nafa'das nae, “Emi see ka nde name'da nana, ndia salan ta soona, ndia nde pia nakahuluk inak ndia ninik batu.”

⁸Basa ndia boema, Yesus nakatele de Ana duduik seluk dae a ninik lima ku'u na.

⁹Tehu lamanene Yesus kokolak nae leondia tutika, ala la'o esa-esa de nalosa mamanak ndia louk. Lasi kala la'o lakahuluk, de besa ka hataholi makadoto kala tunga dea. Mate'e na, ela ka'da Yesus no inak ndia mesa kasa lai mamanak ndia. Tehu inak ndia bei napadeik nahele nai mamana na.

¹⁰Boema Yesus so'uk langa na de nafa'da ina ka nae, “Te hataholi makadoto kala leu lai bee so? Ade ala ta huku o fa do?”

¹¹Boema ina ka nae, “Ta, Ama,” Boema Yesus nafa'dan nae, “Naa, malole so, Au boeo ta huku o boen. Besak ia, fali mu'u ma leona, fo boso boe tao sala-singok seluk bai.”]

¹² Yesus kokolak seluk no hataholi makadotok sila la nae, “Au nde mangale'do daebafa ka. Metema see tunga Au soona, neukose ana ta la'ok nai makahatu ka dalek fa, tehu ana hapu mangale'do manafe maso'da ka.”

¹³ Tehu hataholi Farisi la lafa'da Yesus lae, “Besak ia, O sakasii seluk o ao ina ma, de o sakasiim ndia ta pake fan.”

¹⁴Boema Yesus nafa'das nae, “Leomae Au sakasii seluk Au aoina nga o, Au sakasiing ndia la'en, nana Au bubuluk, Au mai eme bee mai, ma Au u leo bee u. Tehu emi ta bubuluk au mai eme bee mai, ma au u leo bee u fa.

¹⁵Emi maketu-mala'di hataholi, ninik hataholi daebafa ka naketu-nala'din. Tehu Au ta aketu-ala'di hataholi esa boen.

¹⁶Tehu metema Au aketu-ala'di hataholi soona, Au nakeketung ndia matetuk, hu ka nde Au ta mesa nga fa. Amak fo manamadenu Au a, no nahele Au.

¹⁷Nai Musa hoholo-lalanen dale nanasulak nae leo ia: Metema hataholi dua sakasii soona, sakasii matetu ka nde ndia dei.

¹⁸Hapu hataholi dua sakasii Au, fo nde, Au ma Amak fo manamadenu Au a.”

¹⁹Boema hataholi Farisi la latane Yesus lae, “Te O Amam ndia nai bee?” Tuti ka Yesus nataa nae, “Emi ta malelak Au o Au Amang fa. Leo uni ka emi malelak Au soona, tao leo bee o emi malelak Au Amang boe.”

²⁰Yesus kokolak basa dede'ak sila la, ndek lelek fo nanoli neme Manetualain Uman dale. Ndia te, napadeik deka no peti doi ka. Tehu hataholi esa boen ta napalani ho'u fan, nana fai na beita losa fa.

²¹Boema Yesus nafa'da selu kasa nae, “Metema Au la'o soona, neukose emi sanga Au, tehu neukose emi mate nai emi sala-singo ma dalek. Nanahu Au u leo mamana ka, emi ta hapu losa fan.”

²²Boema manakoasa Yahudi la beekola lae, “Fafa'kama Ana sanga do'do aon ia, nanahu nafa'da nae, ‘Neu leo mamana ka, emi ta hapu losa fan.’ ”

²³Boema Yesus nafa'das nae, “Emi da'di meme dae mai, tehu Au da'di eme lain mai. Emi da'di meme daebafa ka mai, tehu Au ta da'di eme daebafa ka mai fa.

²⁴Hu ndia de, Au afa'da emi te, neukose emi mate nai emi sala-singo mala dalek. Boema memak neukose emi mate nai emi sala-singo mala dalek, metema emi ta mamahele, ‘Au Nde Ndia, fo lafa'da lae, AU NDE NDIA.’ ”

²⁵Boema latane Yesus lae, “Tunga ndo na, O ia se?” Tehu Yesus nafa'das nae, “Sosoak hata Au kokolak o emi!

²⁶Au bei sanga kokolak o emi dede'a ba'u, boema Au afa'da Au nakeketung soaneu emi a. Nana Ndia fo manamadenu Au a, hapu tamahelen. Hu ndia de, Au amanene beek neme Ndia mai soona, Au afa'dan neu daebafa ka.”

²⁷Tehu ala beita bubuluk Yesus kokolak nos la'eneu Ama ka nde ndia fa.

²⁸Hu ndia de, Yesus nafa'das nae, “Neme na fo metema emi so'u mamadema Ana Hataholi ka soona, besa ka emi bubuluk mae, ‘Au Nde Ndia, fo lafa'da lae, AU NDE NDIA’, boema besa ka emi bubuluk, te Au ta hapu tao hata esa boen, tunga Au hihii-anau mesa nga fa. Au afa'da ka'da hata fo Ama ka nanolin neu Au a.

²⁹Boema Ndia fo manamadenu Au a, no nahele Au. Ana ta po'ilotak Au mesa nga fa, nanahu Au tatao-nono'ing nandaa no dale na tataas esa.”

³⁰Yesus kokolak basa dede'ak sila la boema, hataholi ba'u ka lamahelen.

³¹Basa boema Yesus nafa'da hataholi Yahudi kamahehele kala nae, “Metema nai emi maso'da ma dalek, emi tunga Au nanoli nga soona, Au ana manatungang emi te'e-te'e,

³²boema neukose emi malelak Manetualain fo ndo sa, soona neukose Ana soi-tefa na emi.”

³³ Tehu lafa'da Yesus lae, “Ami ia, Abraham tititi-nonosin. Beita la'iesa fo ami da'di ata neu hataholi esa boen! Te O dudu'a tao leo beek, de O mafa'da mae, ‘Neukose emi nanase'i po'ik’?”

³⁴Boema Yesus nafa'das nae, “Au dede'ang ia, tete'e ka la'en, nana hataholi manatao sala-singo ka nde bee na, ana da'di sala-singo ka atan.

³⁵Boema ata esa, ta nanuu mamana matea-mahelek nai uma lo a dalek fa, tehu ana bongi ka nde nanuu mamana matea-mahelek nai uma lo a dalek, losa dodoo na.

³⁶Hu ndia de, metema ana ka soi po'i emi soona, ana soi po'i emi te'e-te'e.

³⁷Memak Au bubuluk emi ia nde bee na, Abraham tititi-nonosin. Tehu emi nau taomisa Au, nanahu emi ta nau sipok Au nanoli nga fa.

³⁸Au ita beek neme Au Ama nga mai soona, ndia nde Au afa'da nana. Tehu emi tao-no'i hata fo emi amam nanolin neu emi a.”

³⁹Boema lataa Yesus lae, “Ami amam nde Abraham.” Tehu Yesus nafa'das nae, “Leo uni ka, tete'e ka emi amam nde Abraham soona, tao leo bee o, emi tao-no'i hata fo Abraham tao-no'i ka.

⁴⁰Au tui-benga fe emi eno ndoos fo Au amanenen neme Manetualain mai, tehu emi nau taomisa Au. Soona Abraham tatao-nono'in ta leondiak fa!

⁴¹Emi tao-no'i hata fo emi amam tao-no'i ka.” Tehu lataa Yesus lae, “Ana kanaek ta ami fa. Ami Amam ka'da esa, fo nde Manetualain mesa kana.”

⁴²Boema Yesus nafa'das nae, “Leo uni ka emi amam nde Manetualain ndia soona, neukose emi sue-lai Au, nanahu Au mai eme Manetualain mai. Au mamaing ia, Au ta uni Au hihii-nanau mesa nga fa, te au uni Ndia fo manamadenu Au a, hihii-nanaun.

⁴³Hu bek de, emi ta malelak Au nanoli-nafa'dang fa? Hu ka nde emi ta makataka mamanene Au nanoli-nafa'dang fa.

⁴⁴Emi amam nde nitu a, de tao leo bee o, emi nau tunga emi amam hihii-nanaun. Neme makasososan mai a, nitu ndia kanisak. Ana ta hii eno ndo sa fa, nanahu eno ndo sa ta hapu nai dalen dale fa. Metema nasapepeko soona, nandaa no ndia, ninik ndia ha'da-tataon leondiak so. Ndia masapepekok, ma basa masa pepekok lala'ena da'di leme ndia mai.

⁴⁵Tehu Au afa'da ndoos de emi ta nau mamahele Au fa.

⁴⁶Nai emi dalek, see ka nde napalani nafa'da nae, Au masala-masingok? Metema Au afa'da ndoos, na tao le'e de emi ta mamahele Au fa?

⁴⁷Hataholi fo ana da'di neme Manetualain mai soona, neukose namanene Manetualain dede'a-kokolan. Tehu emi ta da'di meme Manetualain mai fa, hu ndia de, emi ta nau mamanene fan.”

⁴⁸Boema hataholi Yahudi la lataa Yesus lae, “Ade tete'e ka ami ta mafa'da mae, O hataholi Samaria nitu sa'ek fa do?”

⁴⁹Tehu Yesus nae, “Hataholi nitu sa'ek ta Au fa. Au fe ha'da-holomata neu Au Amang, tehu emi makamumuluk-makamamaek Au.

⁵⁰Au ta sanga ha'da-holomata neu Au fa. Hapu ka'da esa mesa kana nde sanga ha'da-holomata soaneu Au, nde Ndia fo manamaketu-mala'di ka.

⁵¹Au dede'ang ia, tete'e ka la'en. Hataholi manatunga Au dede'a-kokola nga, neukose ana ta mate losa dodoo na fa.”

⁵²Boema hataholi Yahudi la lafa'da Yesus lae, “Besak ia ami bubuluk tete'e ka, O ia hataholi nitu sa'ek! Abraham no nabi la mate basas so. Tehu O mafa'da mae, ‘Hataholi manatunga O dede'a-kokola ma, neukose ana ta mate losa dodoo na fa.’

⁵³Metema Abraham no basa nabi la mate la'i esa kasa soona, see O ia? Hapu nai bee O ba'u lenaheni ami amam Abraham!”

⁵⁴Boema Yesus nae, “Leo uni ka Au sanga ha'da-holomata soaneu Au mesa nga soona, ha'da-holomata ndia sosoa-ndandaan ta. Nana hataholi manafe Au ha'da-holomata ndia, nde Au Amang, fo emi mafa'da mae, emi Manetualaim,

⁵⁵te see ko na emi ta malela kana fa. Tehu Au alela kana. Leo uni ka Au afa'da ae, Au ta alela kana fa soona, Au hataholi masapepekok, sama na leo emi boe. Tehu Au alela kana, boema Au tunga dede'a-kokolan.

⁵⁶Emi amam Abraham, nita Au fai nga de namahoko nanseli!”

⁵⁷Boema hataholi Yahudi la lafa'da Yesus lae, “O teu ma beita dai limahulu boen te, O mafa'da mae, O mita Abraham so?”

⁵⁸Tehu Yesus nafa'das nae, “Te'e-te'e Au afa'da emi te: beita bongi Abraham boe te, hapu Au so.”

⁵⁹Boema hataholi Yahudi la hele batu fo ala sanga tapa Yesus. Tehu ta lita Yesus so'on, nana Yesus la'oela Manetualain Uma na so.