Read Termanu YOHANIS 9 Bible Online

YOHANIS 9 - Termanu bible

YOHANIS 9

¹Yesus la'o-la'o boema, nita hataholi esa poken neme inan bongi mai a.

²Boema Yesus ana manatunga nala latanen lae, “Ama Mesen, tao le'e de hataholi ia, bongin te pokek so? Ade hu ka nde ndia sala-singon, do ina-aman nde tao sala-singo ka?”

³Tehu Yesus nataa nae, “Hataholi ia poken nana ta hu ka nde ndia sala-singon do ina-aman sala-singon fa, tehu fo ela hataholi a hapu nita Manetualain koasa na tao-no'i nai hataholi ia dalek.

⁴Nai fai lele'do na soona, ita tao-no'i Ndia fo manamadenu Au a, tatao-nono'in. Nanahu nai fai le'odae na, hataholi a ta tao-no'i so'on.

⁵ Lelek fo Au bei nai daebafa ka, Au nde mangale'do daebafa ka.”

⁶Yesus nafa'da basa nae leondia boema, Ana mudi ape na neu dae a de Ana sese'do kana no dae. Basa boema Ana losen neu hataholi ndia mata na,

⁷ma nafa'dan nae, “Mu leona, fo safe o mata panam nai Lifu Siloa ma.” (Siloam ndia, sosoa na nae, ‘Nananadenuk’.) Boema hataholi ndia neu safe mata panan leona. Ana safe basan de ana fali ma'in te, nita so.

⁸Uma titia-tatai nala lo hataholi fo makahulu na litan ana da'di hataholi mananoke-nokek nai ka'da eno kala su'u na litan boema bekola lae, “Ade hataholi ia ta nde hataholi fo mandoo fai a, nangatuuk nai eno kala su'u na, fo ka'da noke su'di bee ka, nde ia hetu do?”

⁹Boema nggelok lae, “Nde ndia so.” Tehu nggelok bai soona lae, “Ta, mata na ka'da nahope no hataholi ndia.” Tehu hataholi fo besa ka ana hapu nita ndia, nafa'da aon nae, “Au nde ndia so.”

¹⁰Tutika latanen lae, “Te da'di tao leo beek de o hapu mita?”

¹¹Boema nae, “Hataholi fo mana'de Yesus ndia, Ana sese'dok na tane faa anak de Ana losen neu au mata nga. Basa ndia boema, nafa'da au nae, ‘Muu leona, fo safe o mata panam nai Lifu Siloa ma.’ Boema au la'o leona. Au u de au safe basa au mata panang tutika au ita.”

¹²Boema latane selu kana lae, “Te hataholi ndia nai bee?” Tehu nata nae, “Si'ika, au ta bubuluk fa.”

¹³Faik fo Yesus sese'dok dae no ape na, fo nakahahaik hataholi pokek ndia la'e fai Sabat. Hu ndia de lo hataholi fo besa ka nita ndia leo hataholi Farisi la neu.

¹⁵Ala losa boema, latanen tao leo beek de ana hapu nita. Boema nae, “Ana tao tane neu au mata nga, de basa boema, au u alou oe, tutika au ita leona.”

¹⁶Boema hataholi Farisi sila la nggelok lae, “Hataholi manataok ia, ana ta mai neme Manetualain mai fa, nana hataholi ndia, ana ta tao papakek neu fai Saba ta fa.” Tehu hataholi Farisi nggelok soona lae, “Hapu nai bee, hataholi masala-masingo ka hapu tao manda'di beuk leo ia ka?” Boema ala mulai lale'a leona.

¹⁷Boema hataholi Farisi la latane seluk hataholi ndia lae, “Te o hahapu ma leo beek, la'eneu Hataholi manatao na o mita seluk ndia?” Boema hataholi fo besa ka nita ndia nae, “Hataholi ndia Nabi ndia.”

¹⁸Tehu basa lasi-lasi Yahudi sila la ta nau lamahele, makahulu na tete'e ka hataholi ndia pokek, tehu besak ia nita so. Hu ndia de, lalo hataholi ndia ina aman,

¹⁹de latanes lae, “Ade tete'e ka emi anam ia, bongin te pokek so do? Na tao leo beek, de besak ia nita so?”

²⁰Boema hataholi ndia ina aman lae, “Memak ami anam ia, boema tete'e ka bongin te pokek so.

²¹Tehu da'di tao leo beek de besak ia ana hapu nita soona, ami ta bubuluk dede'ak ndia fa. Boema see ka nde tao nan ana hapu nita boeo, ami ta bubuluk fa. Ka'da matane matam te touinak so, de de'i fo nataa aon.”

²²Hataholi ndia ina aman lafa'da lae leondia, nanahu ala bii lasi-lasi Yahudi la. Hu ka nde basa malanga Yahudi la lalahalak basa lae, metema see manaku Yesus da'dileo Mane Mana Fe So'da ka soona, ta bole neu leo uma mamasok dale neu so'on.

²³Hu ndia de, hataholi ndia ina aman lafa'da lae, “Te touinak so de, de'i fo matane matam.”

²⁴Boema lalo seluk hataholi fo besa ka nita ndia de lafa'dan lae, “Supa-soo leona mae, o mafa'da tunga ndo na. Te ami bubuluk hataholi mana makahahaik o ndia, hataholi masala-masingok ndia.”

²⁵Tehu nataa nae, “Ade hataholi ndia masala-masingok do ta o, au ta bubuluk fa. Au bubuluk ka'da dede'ak esa mesa kana, fo nde makahulu na au pokek, tehu besak ia au ita so.”

²⁶Boema lafa'da selu kana lae, “Te Ana tao beek neu o? Ana tao o leo beek de o mita?”

²⁷Hataholi ndia nataa nae, “Au afa'da basa emi so, tehu emi ta nau mamanene fa. Tao le'e de emi nau mamanene seluk bai? Fafa'kama emi boeo nau da'di hataholi ndia, ana manatungan boe do?”

²⁸Boema laseon lae, “O nde da'di hataholi ndia ana manatunga na te ami ta! Ami ia Musa ana manatungan dei.

²⁹Nana ami bubuluk, Manetualain kokolak basa no Musa so. Tehu hataholi ndia soona, ami ta bubuluk Ana mai neme bee a mai fa.”

³⁰Boema hataholi ndia nataa nae, “Dodoo doak la'iesa kana, emi mafa'da mae, emi ta bubuluk hataholi ndia, Ana mai neme bee a mai fa, te nateka Ana tao na au hapu ita so.

³¹Ita bubuluk basa, Manetualain ta nau namanene hataholi masala-masingo ka huhule-haladoin fa, te namanene ka'da hataholi manafe ha'da-holomata ma manatao tunga hihii-nanau na, huhule-haladoin dei.

³²Neme daebafa ka ana mulai da'di a, ita beita tamanene la'iesa fo, hapu hataholi nakahahaik hataholi fo bongin te pokek so.

³³Metema hataholi ndia, Ana ta mai neme Manetualain mai fa soona, neukose Ana ta hapu tao hata-hata esa boen.”

³⁴Boema lae, “O mae le'e? Ala bongi o no sala-singok, tehu o sanga manoli ami bai?” Mulai neme faik ndia mai, ala ta nau hataholi ndia neu leo uma mamasok dale neu so'on.

³⁵Yesus namanene lae, ala ta nau sipo hataholi ndia, neu leo uma mamasok dale neu so'on boema, Ana sanga hataholi ndia de nafa'dan nae, “Ade o mamahele Ana Hataholi ka do ta?”

³⁶Boema hataholi ndia nae, “See Ndia, Lamatuak? O Sue na mafa'da au, fo ela au amahele hataholi ndia boe.”

³⁷Tutika Yesus naen nae, “O mitan so, hataholi ndia nde besak ia, Ana kokolak no o.”

³⁸Boema hataholi ndia senek neu Yesus mata na de nafa'dan nae, “Au amahele Lamatuak.”

³⁹Boema Yesus nafa'dan nae, “Au mai leo daebafa ka mai, fo Au aketu-ala'di, fo ela hataholi poke kala hapu lita, ma hataholi mananita kala pokes.”

⁴⁰Tehu hataholi Farisi de'ubee lai ndia de, lamanene Yesus natane hataholi ndia nae leondia boema, latane Yesus lae, “Ade O maedaenga ami ia boeo pokek do?”

⁴¹Boema Yesus nae, “Leo uni ka emi pokek soona, emi ta tao sala-singok fa. Tehu hu ka nde emi mafa'da mae, ‘Ami mita,’ soona dede'ak ndia sosoa na nae, emi hataholi bei masala-masingo kala.”