Read Termanu HATAHOLI 11 Bible Online

HATAHOLI 11 - Termanu bible

HATAHOLI 11

¹Hataholi nadedenu kala ma hataholi kamahehelek manai Yudea la lala'ena, lamanene hataholi ta Yahudi la boeo sipok Manetualain dede'a-kokolan so.

²Lelek fo Petrus neu leo Yerusalem neu boema, hataholi Yahudi kamahehele basak sila la lakamu-lakadau Petrus.

³Lafa'da Petrus lae, “Tao le'e de, o mu leo hataholi nanasunat beita kala uman mu? O mu bai te o mu'a-minu sama-sama mos bai!”

⁴Hu ndia de Petrus tui mangalele'dos basa hata fo ana da'di, mulai neme makasososa na mai. Petrus nafa'das nae,

⁵“Au hule-haladoi eme kota Yope, boema au ita ninitak esa. Au ita hata esa sama leo tema maloa biak esa kona neme lalai mai, belona nai bu'un has, basa boema nate'e neu au boboa nga.

⁶Nai lelek fo au mete matalolole leo temak ndia dalek neu te, au ita bana ei ha kala, bana fui kala, bana mana lo'do mana lae kala, ma manapui fui kala.

⁷Boema au amanene halak esa nafa'da au nae, ‘Petrus, fo'a leona! Do'do bana sila la fo mu'a leona!’

⁸Tehu au ataa ae, ‘Ta Lamatuak! Au beita u'a ita nana'ak fo nanakena-ka'ik ma manggenggeok fa.’

⁹Tehu halak ndia nafa'da seluk au neme lalai mai nae, ‘Hata fo Manetualain nafa'da basa nae, ta nanakena-ka'ik fa soona, boso mafa'da mae, nanakena-ka'ik.’

¹⁰Au ita manda'dik ndia la'i telu, de mate'e na boema basa-basas nanaso'u falik leo nusa so'da ka neu.

¹¹Nandaa no li'u ndia boe, hataholi kateluk maleme Kaisarea mai, fo ladenus mai lalo au a, ala losa uma fo au leo ka so.

¹²Boema Manetualain Dula Dale na nafa'da au nae, o dale ma boso naba'e, fo la'o sama-sama mos leona. Tolanoo kaneek ia la boeo, ala tunga au leo Kaisarea, de ami basa-basa mala masok leo Kornalius uman dale meu.

¹³Basa boema Kornalius tui ami, tao leo beek de ata nusa so'dak esa neu, de napadeik neme ndia uman, boema nafa'dan nae, ‘Madenu hataholi neu leo Yope neu, fo nalo touk esa na'de Simon Petrus.

¹⁴Neukose nanduku-nalosak fe o, halak fo neukose nini so'dak fe o mo o uma isi mala.’

¹⁵Petrus kokolak nakandoo nae, nai lelek fo au mulai kokolak ae leondia, boema Manetualain Dula Dale na kona neu hataholi sila la, sama leo makahulu na ana da'di neu ita.

¹⁶ Boema au afandele, Lamatua ka nafa'da hai nae, ‘Yohanis salani ninik oe, tehu neukose emi nanasalanik ninik Manetualain Dula Dale na.’

¹⁷Da'di, dede'a na ana mangale'do nae, Manetualain fe hataholi ta Yahudi la baba'e-babatik matak esa, sama leo Ana fen neu ita, nai lelek fo ita tamahele Lamatuak Yesus Kristus. Hu ndia de, hapu nai bee, au kenaka'i Manetualain!”

¹⁸Lamanene Petrus kokolan dede'ak ndia boema ta lase'i so'on. Boema ala koa-kio Manetualain leona. Lafa'da lae, “Metema leondiak soona, hataholi ta Yahudi la boeo, Manetualain fes fai loak soaneu ala tukatei-saledale leme sala-singo nala mai, ma ala hapu lame'da lita so'da matetu ka!”

¹⁹ Ala taolisa Stefanus boema, ala usi neu mai lo hataholi kamahehele kala, de nalosa ala tapasasala leo basa mamanak lala'ena leu. Nggelok lalai losa Fenisia, ma nggelok losa Siprus ma Antiokia. Ala tui-benga Manetualain dede'a-kokolan neu ka'da hataholi Yahudi la.

²⁰Tehu nai hataholi kamahehelek sila la dalek, fo hataholi maleme Siprus ma Kirene mai a, sila de'ubee leu leo Antiokia leu, fo ala tui-benga Hala Malole la'eneu Lamatuak Yesus neu hataholi ta Yahudi la boe.

²¹Lamatua ka koasa na nai hataholi sila la dalek, nalosa hataholi ba'u ka lamahele de ala fe so'da nala leo Lamatua ka neu.

²²Manda'dik sila la tutui na, ana losa hataholi salanik manai Yerusalem mala. Boema ladenu Barnabas neu leo Antiokia neu.

²³Ma lelek Barnabas losa naa de nita Manetualain ba'e-pala tao hataholi sila la tao leo beek, boema namahoko nanseli. Boema nokes fo ela te'e-te'e ala lilineka neu Lamatua ka no dale katematuak.

²⁴Barnabas ia, hataholi dale malole ma Manetualain Dula Dale na koasa nan, boema namahele nanseli neu Lamatua ka, de nalosa hataholi makadotok tunga Lamatua ka.

²⁵Basa boema, Barnabas neu sanga Saulus nai Tarsus.

²⁶Ana hapun boema non leo Antiokia neu, de duas leo lakabubua lo hataholi salanik manai naa la teuk esa dale na, boema duas lanoli hataholi makadotok. Nai Antiokia ndia nde ala foi hataholi kamahehele kala na'de, Hataholi Salanik.

²⁷Nai lelek ndia, hapu nabi de'ubee leme Yerusalem leo Antiokia leu.

²⁸ Nai nabi sila la dalek, hapu hataholi esa na'de Agabus. No Manetualain Dula Dale na hehela-nonolen de nafa'da ela nae, neukose la'a-ndoe matuaina da'di nai basa daebafa ka lala'ena. Memak tete'e ka, dede'ak ndia da'di nai lelek fo Kesel Klaudiu sa paleta.

²⁹Boema basa Yesus hataholi mana tungan sila la, lalahalak fo ala haitua fe basa tolanook manai Yudea la tutulu-fafalik. Sila esa-esak haitua tunga hahapu na.

³⁰Ala tao latetu sila nakeketun ndia boema, ladenu Barnabas no Saulus lini tutulu-fafalik sila la leo mauli-malanga salani kala neu.