Read Termanu HATAHOLI 14 Bible Online

HATAHOLI 14 - Termanu bible

HATAHOLI 14

¹Paulus no Barnabas la'ola'di dede'ak matak esa nai Ikonium. Duas leu leo hataholi Yahudi la uma mamason dale leu de duas kokolak de kokola nala malole hiik, de nalosa hataholi Yahudi ma hataholi ta Yahudi makadotok lamahele Yesus.

²Tehu hataholi Yahudi kamahehele ta kala dudungu-papau hataholi ta Yahudi la, de nalosa lakamuu-lakadau hataholi fo lamahele neu Yesu sa.

³Hu ndia de Paulus no Barnabas leo laladoo ka leme kota ndia. Ma no napalanik, duas kokolak la'eneu Lamatua ka. Boema Lamatua ka boeo Ana fe buti nae, duas tutuin la'eneu Lamatua ka susue-lalain ndia, tete'e ka; Ana fes koasa, fo ala tao manda'di beuk, ma dede'a matua ina la.

⁴Tehu kota ndia lau nala esa nale'a no esa; nggelok lok hataholi Yahudi la, ma nggelok lok hataholi nadedenu kala.

⁵Boema hataholi Yahudi la lo mauli-malanga nala sama-sama lo hataholi ta Yahudi la lalahalak fo ala tuni-ndeni, ma ala tapa hataholi nadedenu kala ninik batu.

⁶Tehu hataholi nadedenu kala bubuluk dede'ak ndia de ala la'oheok leo Listra ma Derbe leu fo nde kota-kota manai Likaonia, ma kota manai boboa-kaisun nala.

⁷Ala losa naa boema, ala tui-benga seluk Hala Malole ndia.

⁸Hapu touk esa nai Listra, bongin te ei na lu'uk so, de nalosa ana ta hapu la'ok fa, nana ei bu'u nala mate la'iesa kasa.

⁹Tou lu'uk ia boeo nangatuuk nai ndia fo namanene Paulus kokola na. Paulus nita tou lu'uk ndia namahele te'e-te'e de ana bisa lea-hai. Paulus meten,

¹⁰boema ana kokolak napane'e nae, “Mapadeik matetu leona!” Tutika tou lu'uk ndia nakaboku de napadeik, boema ana la'ok leona.

¹¹Lelek fo hataholi makadotok sila la lita hata fo Paulus taon ndia boema, ala eki linik dede'a Likaonia lae, “Nitu lalai sala kona leo daebafa ka mai nai hataholi daebafa ka ao paan dale mai nde ia so.”

¹²Boema ala foi Barnabas na'de Seus, ma Paulus na'de Hermes, nana Paulus nde kokola ka.

¹³Imam Nitu lalais Seu sa uma sosongo-tatangon nai kota Listra mata na. Boema ana hela nini sapi mane, ma bunga leo kota ndia lelesu ina na neu. Ana nau tunga no hataholi makadotok sila la, fo leu fe tutunu-hohotuk neu hataholi nadedenu kala.

¹⁴Lelek fo Barnabas no Paulus bubuluk hataholi sila la sanga tao beek ndia boema, duas sisii-lulu'i bua papake nala, de lalai leo hataholi makadotok sila la tala'da leu ma ala nggasi lae,

¹⁵ “Wei, te tao le'e de emi tao tataos ia? Ami ia hataholi daebafak sama leo emi boe! Ami nai ia nana, ami tui-benga Hala Malole ndia neu emi, fo ela emi tu'u-tapaheni emi tatao-nono'i sosoa-ndandaa tak ia, fo mai leo Manetualain fo maso'dak, ma mana makadada'dik lalai ma daebafa ka, boema tasi no oe isin lala'ena.

¹⁶Nai lelek makahulu na, Manetualain po'ilotak leoina la laso'da tunga sila hihii-nanau nala.

¹⁷Tehu Ana ta nafandeleheni fe buti la'eneu aoina na, fo nde Ana tao malole. Ana fe emi u'dan neme lalai mai, fo dae-oe laisi-lamina, la'e fai na. Ana fe emi nana'a-nininuk fo nandaa no emi dale ma.”

¹⁸Tehu hataholi makadotok sila la, ta lamanene hataholi nadedenuk sila la dede'a-kokolan fa, te ka'da ala tunu-hotu tutunu-hohotuk fe duas.

¹⁹Hataholi Yahudi de'ubee ala mai leme Antiokia fo nai Pisidia, ma leme Ikonium leo Listra leu, de ala dudungu-papau hataholi makadotok sila la, nalosa hataholi makadoto kala lo kasa. Ala tapa Paulus ninik batu, basa boema ala lele'a-loloson leo kota deak neu. Nana laedaenga mate son.

²⁰Tehu nai lelek fo hataholi kamahehelek manai sila la lapadeik okofeo lan boema, ana fo'a de ana masok fali leo kota dale neu. Balahaa boema, Paulus no Barnabas fali leo Derbe leu.

²¹Nai Derbe, Paulus no Barnabas tui-benga Hala Malole a, de hataholi ba'u ka lamahele Yesus. Basa ndia boema, duas fali leo Listra leu, de basa boema lakandoo leo Ikonium leu, de ala leo Antiokia, fo nai Pisidia.

²²Nai kota sila la, duas latetea-lahehele ma lanoli-lafa'da hataholi mana tunga Yesus manai kota sila la, fo daenga lamahele lahele Yesus. Lanoli-lafa'das lae, “Ita muse doidoso ba'u ka takahuluk, fo besa ka ita hapu namahokok nai Manetualain Daebafa Beu na dalek.”

²³Ma nai mamaso kala esa-esak, Paulus no Barnabas so'u fes Penatua-penatua. Ala hule-haladoi ma ala puasa basa boema, ala fe Penatua-penatua sila la leo Lamatuak fo sila dua lamahele ka.

²⁴Basa ndia boema, duas la'ok lakandoo duas leleo-lala'on, de ala la'ok seli nusa Pisidia de ala losa Pamfilia.

²⁵Ma ala tui-benga basa Manetualain dede'a-kokolan neme Perga, boema duas leu leo Atalia leu.

²⁶Ala sa'e ofak leme ndia mai, de ala fali leo Antiokia leu. Nai kota ndia nde, makahulu na ala fe duas leo Manetualain susue-lalain dalek neu, fo daenga ala tao-no'i tatao-nono'ik fo besak ia ala tao lakababasa kana.

²⁷Lelek ala losa Antiokia, boema lalo lakabubua basa mamasok ndia salani nala de ala tuis, basa hata fo Manetualain tao-no'in tunga sila dua. Boeo ala tuis la'eneu tao leo beek de, Manetualain soi enok fe hataholi ta Yahudi la fo lamahele Yesus.

²⁸Paulus no Barnabas leo doo ka lo hataholi kamahehelek manai kota ndia.